लूका 20 - बिलासपुरी नौआं नियम

यीशुये रे अधिकारा रा स्वाल

¹ इक दिन येढ़ा हुया भई ताहली जे यीशु मन्दरा च लोकां जो उपदेश देईरा था कने खुशखबरी सुणाई कराँ था, तां तिस बगत मुखियायाजक कने शास्त्री, बजुर्गां सौगी तिन्हाले आईने खड़ीगे;

² कने यीशुये ते पुच्छया, भई अहांजो दस्स तू इन्हां कम्मां जो किस अधिकारा ने कराँ, कने सै कुण आ, तिने जे तिज्जो ये अधिकार दितिरा?

³ तिने तिन्हांजो जबाब दित्या, “हऊँ बी तुहांते इक स्वाल पुछां, पैहले तिसरा जबाब देआ!

⁴ माहणुआं जो बपतिस्मा देणे रा अधिकार यूहन्ने जो परमेशरा ते मिलया था या माहणुआं ते।”

⁵ फेरी तिन्हें अप्पूँ बाटियें बिचार कित्या, “जे अहें इसने येढ़ा गलांगे भई परमेशरे दित्या था, तां तिस बोलणा भई फेरी तुहें तिस पर काँह नीं विश्वास कित्या।

⁶ कने जे अहें इसने गलांगे भई सै सिर्फ माहणुयें दितिरा, तां तिन्हां लोकां अहां पर पत्थर मारने, काँह्भई ये सचमुच जाणाँ ये भई यूहन्ना इक भविष्यवक्ता था।”

⁷ इस खातर तिन्हे जबाब दित्या, “अहें नीं जाणदे।”

⁸ तिन्हां रिया इसा गल्ला पर यीशुये गलाया, “तां तुहांजो हऊँ बी नीं दस्सी सकदा, भई इस कम्मां जो हऊँ किस अधिकारा ने कराँ।”

दुष्ट करसाणां रा उदाहरण

⁹ फेरी यीशुये लोकां जो ये उदाहरण दित्या : “भई किसी माहणुये अंगूरां रा बगीचा लगाया, कने करसाणां जो तिसरा ठेका देईने कईयां दिनां खातर अप्पूँ दुज्जे मुलखा चलिग्या।

¹⁰ ताहली जे अंगूर चुगणे रा बगत आया, तां तिने अपणे इक्की नोकरा जो अंगूरां चाते अपणा हिस्सा लेणे खातर भेज्या। पर तिन्हे करसाणें तिस्सो मारी कुट्टी ने खाली हत्थ भेजित्या।

¹¹ फेरी तिने मालके इक होर दास भेज्या, कने तिस सौगी बी तिन्हे येढ़ा इ बरताव कित्या, तिसजो बी मारया कुट्टया कने बेज्जत करीने खाली हत्थ वापस भेजित्या।

¹² बाद बिच तिने मालके अपणा तिज्जा नोकर भेज्या, पर तिन्हे करसाणें तिसजो बी घायल करीने खाली हत्थ बाहर कड्डित्या।

¹³ बगीचे रे मालके गलाया, हुण हऊँ क्या करूँ? हऊँ अपणे पुत्रा जो तिन्हाले भेजगा, हुई सक्कां भई सै तिसरा आदर करगे।

¹⁴ पर जिस मौके करसाणें तिसरे मुण्डुये जो देख्या, तां सै अप्पूँ चियें गलाणे लगे, देक्खा, इस बगीचे रा वारस आई कराँ। जे अहें इस्सो मारी देईये तां इसरी सारी जायदात अहांरी हुई जाणी!

¹⁵ कने तिन्हे सै बगीचे ते रगड़ीने बाहर कड्डया कने मारीत्या।” फेरी यीशुये तिन्हाते पुच्छया, “तुहांजो क्या लगां? तिस बगीचे रा मालक तिन्हां करसाणां ने केढ़ा बरताव करगा?

¹⁶ हऊँ दस्सां, तिस आईने तिन्हां करसाणां जो मारीने खत्म करी देणा, कने अंगूरां रा बगीचा किसी होरी करसाणां ले सम्भाल़ी देणा।” येढ़ा सुणीने तिन्हे गलाया, “परमेशर येढ़ा कदीं नीं करो।”

¹⁷ यीशुये तिन्हां खा देख्या कने गलाया, “तां फेरी पवित्रशास्त्रा च ये क्या लिखिरा? तिस पत्थरा जो जे राजमिस्त्रियें बेकार समझीने कण्डे करी तरा था, सैई पत्थर हुण कुणे रा खास पत्थर हुईगरा।

¹⁸ सै जे कोई तिस पत्थरा पर रुढ़गा तिस चकनाचूर हुई जाणा, कने तिसरे गास जे सै पत्थर पौंहगा, सै तिस जिगल़ी देणा।”

कैसरा जो कर देणा

¹⁹ शास्त्रियें कने मुखियायाजकां तिस बेले जे ये उदाहरण दित्या, तां सै इकदम तिस्सो पकड़ना चाँह थे, काँह्भई सै जाणीगे भई यीशु अहांरी तरफ ईशारा करी रां भई इस कहाणिया रे करसाण अहें लोक ये, पर सै लोकां ते डराँ थे।

²⁰ सै सही मौके रिया तलाशा च थे, इस खातर तिन्हे अगुवेयां किछ जासूसां जो धर्मी माहणुआं रे भेषा च भेज्या भई यीशुये री कोई येढ़ि गल्ल पकड़ा तिसरी शिकायत जे अहें अधिकारियां ने करी सक्को ताकि सै तिसजो गिरफ्तार करी लो।

²¹ तिन्हे जासूसें गलाया, “गुरू जी, अहें जाणाँ ये भई तू ठीक बोलां कने सखां बी आ, कने न त किसी ने कोई भेदभाव रक्खां, पर तुहें सच्चाईया ने परमेशरा रा रस्ता दस्सां ये।

²² अहांजो येढ़ा दस्सा: भई क्या कैसरा जो कर देणा ठीक आ कि नीं?”

²³ यीशु तिन्हां रिया चलाकिया जो जाणिग्या कने तिन्हाजो गलाया,

²⁴ “तुहें मिन्जो इक दिनार दस्सा।” फेरी तिन्हाते पुच्छया, “इस पर किसरा नौं कने फोटू आ?” तिन्हे गलाया, “कैसरा रा।”

²⁵ यीशुये गलाया, तां ठीक आ, “सै जे कैसरा रा, सै कैसरा जो दवा। पर सै जे परमेशरा रा तिस्सो परमेशरा जोई दवा।”

²⁶ सै लोकां रे सामणे इसा गल्ला च तिस्सो पकड़ी नीं सक्के, पर सै जासूस यीशुये रे जबाबां ते हैरान रेईने, चुप हुईगे।

जिऊंदा हूणा कने ब्याह

²⁷ फेरी सदूकी सै जे बोल्लां ये भई मरीरयां रा जिऊंदा हूणा त हाया इ निआं। तिन्हां चा ते कितणेयां तिसले आईने पुच्छया।

²⁸ भई “गुरू जी, मूसे अहां जो ये व्यवस्था दित्तिरी भई जे किसी रा भाई अपणिया जनाना रे जिऊंदा हुन्दे हुये बिणा सन्ताने मरी जाओ, तां तिसरा भाई तिसरिया विधवा जो ब्याई ने अपणे भाईये खातर, तिसाते बच्चा पैदा करी सक्कां।

²⁹ तां येढ़े इ सात्त भाई थे, सब्बीं ते बड्डे भाईये रा ब्याह हुया कने सै बगैर बच्चयां तेई मरीग्या।

³⁰ तिसरे दुज्जे भाईये तिसा विधवा ने ब्याह कित्या, पर सै बी बिणा वच्चयां तेई मरीग्या।

³¹ फेरी तिज्जे भाईये बी तिसा विधवा ने ब्याह कित्या कने सै बी बिणा संतान इ मरया इसा रितिया ने सत्तां रे सत्त भाईयें तिसा जनाना ने ब्याह कित्या पर सै सब बिणा किसी बच्चे तेई मरी मुकीये।

³² बाद च सै विधवा जनाना बी मरीगी।

³³ हुण अहांरे पुछणे रा मतलब येआ भई जिऊंदा हुणे पर तिन्हां सत्तां चते सै किसरी जनाना हूणी? काँह्भई सै सत्तां भाईयां री जनाना रैई चुक्कीरी थी।”

³⁴ यीशुये तिन्हांते गलाया, “ब्याह त इस संसारा च लोकां रे खातर आ।

³⁵ पर औणे औल़े जुगा च येढ़ा किछ नीं हूणा, काँह्भई सै जे मरी मुकीगरे तिन्हां चा ते जिऊंदा हुणे रे लायक लोक, ताहली जे ज्यून्दे हुणे, तिस जुगा च लोकां नांत ब्याह करने, कने नां जनानां ब्याह च दित्तियां जाणियां।

³⁶ कने तिन्हां फेरी कदीं नीं मरना, काँह्भई येढ़िया हालता च सै स्वर्गदूतां रे बराबर हुणे, कने नौंये जीवना च भीं ते जिऊंदा किति रे परमेशरा रे पुत्र हुणे।

³⁷ पर इसा गल्ला जो भई मूईरे ज्यून्दे हुई जायें : मूसे बी बल़दे हुये बुटड़यां री कहाणिया च प्रगट कित्या भई सै प्रभुये जो अब्राहम, इसहाक कने याकूब रा परमेशर बोल्लां।

³⁸ परमेशर त मुड़दयां राँ नीं पर ज्यून्दया रा परमेशर आ: काँह्भई तिसरिया नज़राँ च सारे ज्यून्दे इ हाये।”

³⁹ फेरी ये सुणीने यहूदी शास्त्रियां चा ते कितणेयां गलाया, भई “गुरू जी, तुहें ठीक गलाया।”

⁴⁰ इसते बाद दुज्जी दफा किसी जो प्रभुये ते किछ बी पुछणे री हिम्मत नीं पैई।

मसीह किसरा पुत्र आ

⁴¹ फेरी यीशुये तिन्हांते पुच्छया, “मसीह जो दाऊद रा पुत्र कांह् करीने बोल्लां यें?

⁴² काँह्भई राजा दाऊद खुद भजन संहिता रिया कताबा च बोल्लां : भई परमेशरे मेरे प्रभुये जो गलाया,

⁴³ तू मेरे सज्जे पासे बैठ, तदुआं तक जे हऊँ तेरे दुश्मणां जो पूरी तरह हराई नीं दूँ।

⁴⁴ जबकि दाऊद मसीह जो अपणा प्रभु बोलां; इस खातर सै इक्की वगता च तिसरा पुत्र कियां हुई सक्कां।”

शास्त्रियां ते खबरदार

⁴⁵ ताहली जे सारे लोक ये गल्लां सुणीराँ थे, तां यीशुये अपणे चेलयां ने गलाया।

⁴⁶ “शास्त्रियां ते बचीने रौआ, इन्हौं लम्मे-लम्मे चोल़े पैहनीने घुमणा खरा लगां, कने इन्हौं बज़ाराँ च नमस्कार, कने यहूदी सभा घराँ च खास आसण, कने धाम्मां च खास जगह प्यारे लगां ये।

⁴⁷ सै विधवां रा घर बार खाई जांये, कने दसणे खातर बड़िया देरा तक प्राथना करदे रैं, इस खातर इन्हौं बौहत भयानक सजा भुगतणे पौणी।”