लूका 15 - बिलासपुरी नौआं नियम

गवाच्छी रिया भेडा रा उदाहरण

¹ यीशु ताहली जे उपदेश देआं था तां बौहत सारे चुंगी लेणे औल़े कने पापी लोक तिसरियां गल्लां जो सुणने खातर तिसले औआं थे।

² इसजो देखीने फरीसी कने यहूदी शास्त्री बड़बड़ाणे लगे, “ये माहणु त पापी कने घटिया लोकां सौगी उट्ठां बैट्ठां कने तिन्हां सौगी रोटी बी खां!”

³ फेरी यीशुये तिन्हाजो ये उदाहरण सणवाया :

⁴ “जे तुहां चते किसी ले सौ भेड्डां ओ, कने तिन्हां चते इक गवाच्छी जाओ, तां तिस रखवाल़े क्या करना? क्या तिस बाकी नड़िनुये भेड्डां जो पहाड़िया पर सुरक्षित जगह पर छड्डिने, तिसा गवाच्छी रिया भेड्डा जो तदुआं तक टोल़दे नीं रैहणा? तदुआं तक जे सै तिसजो मिली नीं जाओ।”

⁵ “कने ताहली जे सै भेड तिस्सो मिली जाईं, तां तिस बड़िया खुशिया ने तिसाजो अपणे मुन्ढे पर चक्की लेआं।

⁶ कने ताहली जे सै अपणे घरें पुज्जी जां तां तिस अपणे मित्राँ कने पड़ेसियां जो बोलणा मेरे सौगी नन्द मनावा, काँह्भई मिन्जो मेरी गवाच्छी री भेड मिली गरी!

⁷ हऊँ तुहांजो बोलां; भई इयां इ, इक मन फिराणे औल़े पापिये रे बारे च बी स्वर्गा च आनन्द हूणा, जितना जे भई तुहां साई नड़िनुये लोकां खातर नीं हुन्दी सै जे सोच्चां ये भई अहें धर्मी ये, तिन्हाजो जे बुराईया ते मन फिराणे री जरूरत नीं।”

गवाच्छी रे सिक्के रा उदाहरण

⁸ फेरी यीशुये इक होर उदाहरण देईने बोल्या, “मन्नया भई किसी जनाना ले दस चान्दिया रे सिक्के ओ, कने तिन्हां चते जे इक गवाच्छी जाओ, तां क्या तिसा दिऊआ बाल़ीने कने सूण देई-देईने, तदुआं तक तिस सिक्के जो अपणे घरा रिया हर इक कुणियां च नीं टोल़दिया रैहणा तदुआं तक जे सै तिसाजो मिली नीं जाओ?

⁹ ताहली जे सै सिक्का तिसाजो मिली जां, तां तिसा अपणी सहेलियां कने पड़ेसणीं जो सद्दीने बोलणा, ‘मेरे सौगी आईने खुशी मनावा काँह्भई मिन्जो मेरा गवाच्छी रा सिक्का मिलीग्या!’

¹⁰ इस इ तरिके ने, जे इक पापी बी अपणे पापां ते मन फिराओ, तां स्वर्गा च परमेशरा रे स्वर्गदूतां तिसरे खातर खुशी मनाणी।”

उड़ाऊ पुत्रा री कहाणी

¹¹ यीशुये तिन्हांजो ये कहाणी बी सुणाई, “किसी माहणुये रे दो मुण्डु थे।

¹² तिन्हां चते छोट्टे मुण्डुये पिता ने गलाया, ‘पिता! हऊँ तुहांरे मरने तक इन्तजार नीं करी सकदा इस खातर तुहांरी जायदाता च सै जे मेरा हिस्सा बणां सै मिन्जो हुण दे।’ फेरी तिसरा पिता अपणे दुईं मुण्डुआं च अपणी जायदात बन्डी देआं।

¹³ किछ दिनां ते बाद, तिने छोट्टे मुण्डुये अपणा सारा समान बन्हील्या कने किति दूर देशा जो चलिग्या, कने तिसा जगह बुरे कम्मां च फसीने तिने अपणा सारा पैसा गवाईत्या।

¹⁴ ताहली जे सै अपणा सारा पैसा खर्च करीने खाली हुईग्या, तां फेरी तिस देशा च नकाल़ पैया, कने सै गरीब हुईने भुक्खा मरने लगया।

¹⁵ फेरी सै काम्म टोल़णे खातर तिस देशा रे इक्की करसाणे ले गया कने तिसने बिनती किति भई सै अपणे सूराँ जो चराणे खातर मिन्जो रखी लो, तिने करसाणे सै रखील्या कने सूराँ जो चराणे खातर भेजित्या।

¹⁶ तिस्सो इतणी जादा भूक्ख लगीरी थी भई तिन्हां फल़ियां जे सूर खां थे सै तिन्हाजो खाईने अपणा पेट भरना चाँह था, पर तिन्हां चते बी तिस्सो किछ नीं मिलदा था।

¹⁷ ताहली जे सै अपणे होशा च आया, तां सै अपणे मना च सोचणे लगया, मेरे पिता रे घरें इतणे जादा मजदूर ये तिन्हांजो जे खाणे जो इतणी जादा रोटी मिलांई भई सै खाईने बी नीं मुकदी! पर इथी मेरे इतणे बुरे हाल ये भई हऊँ भुक्खा मरने लगीरा!

¹⁸ माह अपणे पिता रे घरें जाणा कने तिन्हाजो गलाणा, पिता जी, मैं परमेशरा रे कने तेरे बरोधा च पाप कित्तिरा,

¹⁹ हुण हऊँ तुहांरा मुण्डु कहलाणे रे लायक त निआं, पर मेहरवानी करीने मिन्जो अपणा इक मजदूर समझीने रखी लै।

²⁰ “फेरी सै तिस देशा जो छड्डिने वापस अपणे पिता रे घरें आया, कने ताहली जे सै हल्तियें अपणे घरा ते दूर इ था, तिसरे पिता सै औन्दा देखील्या, कने तिस पर तरस खाईने तिसखा जो दौड़ीने गया कने तिस्सो जप्फी पाईने बड़ा प्यार कित्या।

²¹ तिने मुण्डुये पिता ने गलाया, ‘पिता जी, मैं परमेशरा रे कने तेरे बरोधा च पाप कित्या, कने हुण हऊँ तेरा मुण्डु कहलाणे रे लायक निआं।’

²² पर तिसरे पिता अपणे नोकराँ जो हुक्म दित्या, छोड़चा ने घरें जाईने सारयां ते बधिया कपड़े लेईने औआ कने इसजो पैहनाओ। इसरे हत्था च गुट्ठी कने पैराँ च जुत्ते पैहनावा।

²³ कने अपणा पाल़ीरा मोटा जेआ बकरा लाईने बढ्ढा कने औआ तिस्सो खाईने खुशियां मनाईये,

²⁴ काँह्भई मिन्जो येढ़ा लगया भई मेरा ये मुण्डु मरीगरा था, पर ये जिऊंदा। ये गवाच्छी गरा था, पर हुण मिलीग्या। कने सै नन्द करने लगे।

²⁵ “इस दौरान ताहली जे ये सब हुई करां था, तिसरा बड्डा मुण्डु खेतां च काम्म करीराँ था। ताहली जे सै घरें वापस आया, तां तिने गाणे बजाणे कने नचणे री अवाज़ सुणी।

²⁶ तिने अपणे इक नोकरा ते पुच्छया ये क्या हुई कराँ?

²⁷ फेरी तिस्सो दस्या भई, तेरा भाई वापस आई गरा ‘कने तेरे पिता बड्डी धाम बनाणे खातर अपणा पाल़ीरा मोटा जेआ बकरा बड्डीरा। अहें नन्द मनाई रायें, काँह्भई सै ठीक ठाक घरें वापस आईग्या।’

²⁸ “येढ़ा सुणीने बड्डा भाई बड़ा भारी गुस्से हुया, कने तिसरिया वजह ने सै घरा रे अन्दर नीं गया। फेरी तिसरा पिता बाहर आईने तिस्सो अन्दर औणे खातर मनाणे लगया,

²⁹ पर तिने अपणे पिता जो जबाब दित्या, ‘इतणे साल्लां तक हऊँ तुहांरी सेवा करदा रेआ, कने तुहें सै किछ जे मिन्जो करने जो गलाया मैं सै हर इक काम्म कित्या। पर तुहें अज्जा तक मिन्जो मेरे मित्राँ सौगी मौज करने खातर इक बकरिया रा बच्चा तक नीं दित्या।

³⁰ पर तां जे तुहांरा ये मुण्डु अपणा सारा पैसा कंजरियां पर लुटाईने वापस आईरा, तां तुहें सब्बीं ते खरे कने मोटे जे बकरे जो बड्डीने खुशियां मनाई रायें।’

³¹ “ ‘तिसरे पिता तिसजो गलाया, मेरे पुत, हऊँ कने तू सौगी रैं, कने सै जे किछ मेरले आ, सै सारा तेरा इ त हाया।

³² अहां ये खुशिया रा दिन मनाणा। काँह्भई तेरे भाईये रा घरें वापस औणा जिऊंदा हुणे रे बराबर आ। सै गवाच्छी गरा था, कने हुण सै घरौ वापस आईग्या।’ ”