लूका 11 - बिलासपुरी नौआं नियम

चेलयां जो प्राथना करना सखाणा

¹ इक दिन यीशु इक्की जगह प्राथना करी रां था। जिस बगत सै प्राथना खत्म करी बैट्ठे, तां चेलयां चते इक्की तिन्हाले आई ने गलाया, “प्रभु जी, तियां जे यूहन्ने अपणे चेलयां जो प्राथना करना सखाया, तियां इ अहांजो बी तू प्राथना करना सखा।”

² तिने तिन्हाजो गलाया, “तुहें इस तरिके ने प्राथना करा; ‘हे अहांरे पिता, तू स्वर्गा च बिराजमान आ; लोक तेरा आदर करो काँह्भई तू पवित्र परमेशर आ, तू संसारा रे सारे माहणुआं कने सारियां चीजां पर राज करो।

³ अहांरी रोज की रोटी तू हर रोज अहांजो देआ कर।

⁴ कने अहांरे पापां जो माफ कर, काँह्भई अहें बी अपणे हर इक अपराधिये जो माफ कराँ ये, कने अहांजो परीक्षा ते बचा’।”

प्राथना रे बारे च यीशुये री शिक्षा

⁵ फेरी यीशुये तिन्हाने बोल्या, “मन्नया तुहांरा इक मित्र आ कने तुहें अधिया राति जो तिस मित्रा रे घरें जांये, कने तिसजो बोलां ये, ‘मित्र! मिन्जो तिन्न रोटियां दे;

⁶ काँह्भई मेरा इक मित्र यात्रा करदा हुआ मेरे घरें आया, पर इस वगत तिस्सो खाणे जो देणे खातर मेरले किछ बी त्यार निआं।’

⁷ कने जे सै अन्दरा ते येढ़ा बोल्लो, मिन्जो तंग नीं कर, हुण दरवाजा बंद हुई चुक्कीरा, कने विस्तरे च माह सौगी मेरे न्याणे सुत्तीरे इसा वजह ते, हऊँ उट्ठीने इस बगत तेरी कोई सहायता नीं करी सकदा।

⁸ पर हऊँ तुहांजो ये दस्सां, भई तिस नीं उठणा कने नांई तुहांजो किछ देणा, पर जे तुहें मंगणे खातर बेशर्म बणीने बार-बार दरवाजा खड़कांदे रेहंगे, तां तिस जरूर उठणा कने जितना तुहांजो चाहिन्दा सै तिस तुहांजो देणा।

⁹ कने हऊँ तुहांजो बोलां, भई सै जे तुहांरियां जरूरतां इयां, परमेशरा ते मंगा कने तिसजो पाणे री आशा रक्खा; खटखटाणा जारी रखा कने दरवाजा खोल्या जाणा।

¹⁰ काँह्भई सै जे कोई मंगां, तिस्सो मिलां; कने सै जे टोल़ां, सै पां; कने सै जे खड़कां, तिसरे खातर खोल्या जाणा।

¹¹ तुहां चते येढ़ा कुण पिता हुंगा, भई ताहली जे तिसरा पुत्र रोटी मंग्गो, तां तिस्सो पत्थर देओ; या मच्छी मंग्गो, तां तिसरे बदले तिस्सो सर्प देओ?

¹² या जे सै अण्डा मंग्गो, तां क्या तुहें तिस्सो बिच्छु दित्या ओ? बिल्कुल नीं!

¹³ जे तुहें बुरे हुईने अपणयां बच्चयां जो खरियां चिज़ां देणा जाणाँ ये, तां स्वर्गीय पिता अपणे मंगणे औल़यां जो पवित्र आत्मा काँह नीं देंगा।”

यीशु कने बालजबूल

¹⁴ इक दिन यीशुये बुरीआत्मा रा सताईरा इक माहणु, सै जे गुंगा था, तिस चते बुरीआत्मा जो बाहर कड्डया, कने फेरी सै गूँगा बोलणे लगीग्या। येढ़ा देखीने लोकां जो हैरानी हुई।

¹⁵ किछ लोकें गलाया, “इस्सो ये ताकत, बुरीआत्मा रे मुखिये (बालज़बूला) ते मिलां इ, सै जे शैतान आ!”

¹⁶ किछ होरीं लोकें यीशुये जो परखणे खातर तिसते इक स्वर्गीय नशाण मंगया, भई इसा गल्ला जो साबित कर भई तिज्जो परमेशरे भेज्जिरा

¹⁷ यीशु तिन्हां सारयां रे मना री गल्लां जो जाणिग्या, इस खातर तिने गलाया, “तिस प्रदेशा रे लोक जे अप्पूँ बाटियें लड़दे-घुल़दे रौ, सै कदीं नीं बसदा बल्कि उजड़ी जां। कने तिस घरा रे लोक जे इक्की दूये ने लड़दे रौ, तां सै घर बी उजड़ी जां।

¹⁸ कने जे शैतान कने तिसरे राज रियां आत्मां अप्पूँ बाटियें लड़दे रौ, तां तिसरा राज कियां बणीरा रैहणा? काँह्भई तुहें मेरे बारे च बोलां ये, भई ये शैतान्ना रिया सहायता ते बुरीआत्मा जो निकाल़ां।

¹⁹ भला जे हऊँ शैतान्ना रिया सहायता ते बुरीआत्मां जो नकाल़ां, तां तुहांजो मनणे पौणा भई तुहांरे चेले बी बालजबूल रिया सहायता ते बुरीआत्मां जो निकाल़ां ये? इस खातर सैई तुहांरा न्याय करगे।

²⁰ कने जे हऊँ परमेशरा रिया शक्तिया ने बुरीआत्मा नकाल़ां, तां समझील्वा भई परमेशरा रा राज तुहांरे बिच आई पुज्जीरा।

²¹ “ताहली जे ताकतवर माहणु हथियार पैहनीने अपणे घरा री रखवाल़ी कराँ, तां तिसरी दौलत बची रैईं।

²² पर ताहली जे तिसते बी जादा ताकतवर कोई तिस पर हमला करीने तिस्सो जित्ति लेआं, तां तिसरे सै हथियार तिन्हां पर जे तिसरा भरोसा था, खोई लेआं, कने तिसरी दौलत लुट्टी ने बन्डी देआं।

²³ “सै जे कोई मेरा सहयोगी निआं, सै मेरा बरोधी आ कने सै जे मेरे सौगी कठेरदा निआं सै बखोरने रा काम्म कराँ।

अधूरे सुधारा ते बिपत्ति

²⁴ “ताहली जे कोई बुरीआत्मा किसी माहणुये जो छड्डां इ, तां सै आराम पाणे रिया खोज्जा च सुनसान जगह टोल़दी फिराँ इ, पर सै तिसाजो नीं मिली पान्दी। फेरी सै अपणे मना च बोलां इ, भई हऊँ तिस इ माहणुये ले जाईं तिसच जे पैहले वास कराँ थी,

²⁵ कने ताहली जे गई तां पाया भई तिस माहणुये री जिन्दगी तिस घरा साई सै जे साफ सुथरा कने सजा-सजाईरा कने खाली ओ।

²⁶ फेरी सै जाईने, अपणे ते बी खतरनाक सात्त बुरीआत्मां सौगी लेईने औआं इ कने तिस माहणुये च बड़ीने ऊथी वास कराँ इ। तिसते बाद तिस माहणुये री हालत पैहले ते बी बुरी हुई जाईं।”

आशीषित कुण आ?

²⁷ जिस बगत यीशु इन्हां गल्लां जो बोल्ली इ कराँ थे, तां भीड़ा चते इक जनाना उठीकने जोरा री अवाज़ा च गलाई, “कितणी आशीषित इ तेरी सै माता तिसे जे तिज्जो जन्म दित्या, कने दुध प्याया!”

²⁸ फेरी यीशुये गलाया, “पर इन्हांते बी जादा परमेशर तिन्हौ आशीष देआं, सै जे परमेशरा रा बचन सुणां ये, कने तिसरा पालन कराँ ये।”

स्वर्गा रे नशाणा री मंग

²⁹ ताहली जे जादा भीड़ कट्ठी हुन्दी जां थी तां यीशु बोलणे लगया, “इस जुगा रे दुष्ट लोक बुरे; सै नशाण मंगा यें, पर योना रे नशाणा जो छड्डिने कोई होर नशाण तिन्हांजो नीं दित्या जाणा।

³⁰ तियां जे योना नीनवे रे लोकां खातर इक नशाण हुया, तियां इ माहणुये रा पुत्र यनि हऊँ बी इस जुगा रे लोकां खातर नशाण हूणा।

³¹ न्याय रे दिन शेबा री राणिया इसा पीढ़ियां रे लोकां रे खलाफ उट्ठीने तिन्हाजो दोषी बनाणा, काँह्भई सै सुलैमाना रा ज्ञान सुणने खातर बड़े दूरा ते आई थी, कने हुण येत्थी येढ़ा कोई हाया सै जे सुलैमाना ते बी बड्डा; फेरी बी ये पीढ़ी तिसरी गल्ल सुणने जो नां कराँ इ।

³² फेरी न्याय रे दिन, नीनवे रे लोकां बी इसा पीढ़ियां रे लोकां रे खलाफ उट्ठणा कने तिन्हाजो दोषी बनाणा, काँह्भई योना रे प्रचारा जो सुणीने तिन्हे पाप करना छड्डीते थे। हुण येत्थी येढ़ा कोई हाया, सै जे योना ते बी जादा सामर्थी आ, फेरी भीं ये पीढ़ी तिसरी गल्लां सुणने जो नां कराँ इ।

शरीरा रा दिऊआ

³³ “कोई बी माहणु दिऊआ बाल़ीने तिस्सो लुकोन्दा निआं, या तिस्सो टोकरे हेठ नीं रखदा, पर ऊच्चिया ठारी रखां, भई अन्दर औणे औल़े लोक इसा लोई च चिज़ां जो देक्खी सक्को।

³⁴ तेरियां आक्खीं तेरे जीवना रे दिऊये साई आ, इस खातर तांजे तेरी आँख साफ देक्खी सक्कां, तां तेरा सारा जीवन बी उजियाला; पर जे तेरी नजर ठीक नीं, तां तेरा सारा जीवन बी अन्धेरे ने भरोईरा।

³⁵ इस खातर सावधान रैयां, भई सै उजाला जे तू चा सै अन्धेरा नीं हुईजो।

³⁶ जे तू अपणी पूरी जिन्दगी परमेशरा रिया सच्चाई रे मुतावक जीआं, तां तू हरेक चीज़ा जो सही ढंगा ने जाणने रे लायक हुई जाणा भई परमेशर तूते क्या चाँह; ये तिस इक्की कमरे साई हूणा तिसच जे दिऊए री तेज रोशनी चमकयां राईं, सै जे तुहांजो हर चीज़ साफ देखणे लायक बणांई।”

शास्त्रियां कने फरीसियां जो फटकार

³⁷ जिस बगत यीशु गलाई कराँ था, फेरी किसी फरीसिये तिन्हांजो अपणे घरें रोटी खाणे खातर नियून्दा दित्या। सै तिन्हांरे घरें गया कने तिन्हां सौगी रोटी खाणे बैट्ठया।

³⁸ तिस फरीसिये जो ये देखीने हैरानी हुई भई तिने रोटी खाणे ते पैहले अपणे हात्थ पैर नीं धोये।

³⁹ प्रभुये तिसजो गलाया, “फरीसियो, तुहें कौलियां कने थाल़ियां जो उपरा-उपरा ते मांजणे च सावधानी वरतां ये, पर तुहांरिया अन्तरात्मा च हुण बी गन्दगी, तुहां च हुण बी लालच कने बुराई भरीरी!

⁴⁰ अरे मूर्ख लोको! क्या परमेशरे अन्दर बाहर, दोन्नों नीं बणाये?

⁴¹ अपणिया अन्तरात्मा जो परमेशरा ने जोड़ा, बजाये इसरे भई तुहें बाहरा री सफाई करो।

⁴² “पर फरीसियो, तुहांजो बौहत भयानक सजा मिलणी! तुहें अपणी छोट्टी ते छोट्टी कमाईया रा यनि सौंफ, जीरा, कने पुदीने रा बी दसवां हिस्सा देणा नीं भुलदे, पर तुहें न्याय कने परमेशरा रे प्यारा जो भुल्ली जायें। ये ठीक आ भई तुहें दशमांश दें, पर सै जे इसते बी जरूरी गल्ल इ, तुहें तिसजो बी करना नीं भूल्लो।

⁴³ “ओ फरीसियो, तुहांजो बौहत भयानक सजा मिलणी! तुहें येढ़ा चाँये भई यहूदी सभा घराँ च खास आसण मिलो कने बज़ाराँ च आदरा सौगी नमस्कार।

⁴⁴ “तुहांजो बौहत भयानक सजा मिलणी! काँह्भई तुहें खेतां च दबोईरी तिन्हां कब्राँ साई ये, तिन्हां पर जे लोक अनजाणे च चलां ये कने नीं जाणदे भई तिन्हां कब्राँ च कितणी सड़ी रियां चिज़ां इयां।”

⁴⁵ फेरी व्यवस्थापकें गलाया, “गुरू जी, सै किछ गल्लां जे तुहें हुण बोल्ली तिन्हारे जरिये तुहें अहांरी बी निंध्या किति।”

⁴⁶ यीशुये गलाया, “व्यवस्थापको, तुहांरे खातर बी भयानक सजा हूणी! काँह्भई तुहें कई नियम लागू कराँ ये तिन्हांरा पालन करना जे कठण आ, तुहें लोकां जो तिन्हां पर चलने खातर मजबूर कराँ ये; पर तुहें खुद अपणे नियमां पर नीं चलदे।

⁴⁷ “तुहांजो त बौहत भयानक सजा मिलणी! काँह्भई तुहें तिन्हां भविष्यवाणी करने औल़यां पवित्र माहणुआं खातर कब्र बणायें, तिन्हाजो जे तुहांरे बजुर्गें मारी दितिरा।

⁴⁸ खूनियो! तुहें अपणे बजुर्गां रे कम्मां च सहमत हुआं ये भई सै किछ जे तिन्हें कीतिरा सै ठीक कीतिरा। काँह्भई तिन्हे त भविष्यवाणी करने औल़यां जो मारया कने तुहें तिन्हारी कब्राँ बणाईयां।

⁴⁹ परमेशरे अपणिया बुद्धिया ने तुहांरे खातर येढ़ा गलाया, ‘हऊँ तिन्हाले भविष्यवक्तयां कने प्रेरितां जो भेजगा, तिन्हांजे इन्हां चते किछ मारी देणे कने किछ पर जुल्म करने।’

⁵⁰ संसारा रे शुरु तेई जितने बी भविष्यवक्तयां रा खून हुया, तिस खातर इस बगता रे लोकां जो जिम्मेवार बणाया जाणा,

⁵¹ हाबिल रिया मौती ते लेईने जकर्याह री मौती तक, तिन्हारा खून जे परमेशरा जो अर्पण करने री बेदी कने परमेशरा रे मन्दरा रे बिच हुया, इन्हां सब्बीं रे खातर इसा पीढ़ियां रे लोकां जोई इसरा लेखा-जोखा देणे पौणा।

⁵² “बौहत भयानक सजा मिलणी तुहां व्यवस्थापकां जो! काँह्भई तुहें ज्ञानां री चाबिया जो लोकां ते लकोई ने रखां ये। तुहें अपणे आप त परमेशरा रे राज्जा च नीं जान्दे पर तुहें दुज्जेयां जो बी जाणे ते रोकां ये।”

⁵³ यीशु जिस बगत अपणी गल्ल बोल्ली बैट्ठे, तां फरीसी कने शास्त्री, तिन्हां रिया इसा गल्ला पर बड़ा नराज हुये। तिस इ घड़ी तिन्हे यीशुये ते मते सारे स्वाल पुछे,

⁵⁴ कने इसा कोशिशा च लगीरे रै, भई तिन्हारे मुँआं ते येढ़ि गल्लां निकल़वायें तिन्हाजो जे तिन्हां रेई बरुध इस्तेमाल करीने फसाई सक्को।