लूका 1 - बिलासपुरी नौआं नियम

लूका रा मकसद

¹ आदरणीय थियूफिलुस जी! मतयां लोकें तिन्हां गल्लां रा ब्योरा लिखणे री कोशिश किति सै जे अहांरे बिच हुईयां।

² ठीक सैई गल्लां सै जे अहांजो तिन्हां लोकां ते मिलियां, तिन्हें जे इन्हां गल्लां जो यीशु मसीह रिया सेवकाईया रे शुरु तेई देख्या था कने बाद बिच सै परमेशरा रे वचना रे सेवक बणे।

³ इस खातर शुरु तेई इन्हां सारियां गल्लां जो पूरी सावधानिया ने कने ठीक-ठाक जाँच पड़ताल़ करने ते बाद, मिन्जो ये ठीक लगया भई हऊँ बी इन्हांजो तेरे खातर बारी-बारी लिखुं।

⁴ तिसते जे भई तू तिन्हां गल्लां री हकीकत जाणी लो तिन्हांरी जे तिज्जो शिक्षा देई तरी।

यूहन्ने रे जन्मा री घोषणा

⁵ तिन्हें दिनें ताहली जे यहूदिया प्रदेशा च हेरोदेस राजे रा राज था। तित्थी जकर्याह नौआं रा इक याजक था, सै जे अबिय्याह री याजकां री मण्डलिया च था। कने तिसरिया जनाना रा नौं इलिशिबा था सै जे हारून रे कुल़ा री थी।

⁶ जकर्याह कने इलिशिबा ये दोन्नों जणे परमेशरा री नज़राँ च धर्मी थे, सै बड़े ध्याना ने प्रभुये रे हुक्मा जो कने विधियां जो मन्नां थे।

⁷ पर इलिशिबा रे औत्र हुणे रिया वजह ने तिन्हारे कोई न्याणा नीं था, कने हुण सै दोन्नों जणे बड़े स्याणे हुईगरे थे।

⁸ ताहली जे जकर्याह अपणी मण्डलिया री बारी औणे पर यरूशलेम रे मन्दरा च याजकां रा काम्म करी रां था।

⁹ तां याजकां रे रीति-रिवाजां रे मुतावक तिसरे नौआं पर चिट्ठी निकल़ी कने तिसरा नौं आया भई प्रभुरे मन्दरा च जाईने तिसरिया हजूरिया च धूप बाल़ो।

¹⁰ कने ताहली जे धूप बालणे रा बगत आया ताहली मते लोक मन्दरा रे अंगणा च कट्ठे हुईने प्राथना करी कराँ थे।

¹¹ ताहली जे जकर्याह प्रभुरे मन्दरा च था, तिस बगत तिने प्रभुरा इक स्वर्गदूत ‌धूप बालणे री चौकिया रे सज्जे पासे खढ़िरा देख्या।

¹² जकर्याह तिस स्वर्गदूता जो देखीने घबराईग्या कने डरा रे मारे तिसरा बड़ा बुरा हाल था।

¹³ पर तिने स्वर्गदूते जकर्याह ने गलाया, “जकर्याह डरदा मत, इक पुत्र पाणे रे खातर तैं सै जे प्राथना परमेशरा ने कित्ती री, सै तेरी प्राथना परमेशरे सुणीलरी; कने तेरी जनाना इलिशिबा ते तिज्जो इक पुत्र जमणा! कने तू तिस पुत्रा रा नौं यूहन्ना रखयां।

¹⁴ तिज्जो त बड़ा नन्द कने खुशी हूणी, कने सौगी तिसरे जमणे ते मते सारयां लोकां मौज करनी,

¹⁵ तिस परमेशरा रे खातर खास काम्म करना। तिस कदीं बी अंगूरां रा रस कने कोई नशीली चीज़ नीं पीणी; कने तिस अपणी मौआ रे गर्भा ची पवित्र आत्मा ते भरी जाणा।

¹⁶ ताहली जे तिस बड्डे हुई जाणा, ताहली तिस अपणे प्रचारा ते मते सारयां इस्राएली लोकां जो तिन्हारे प्रभु परमेशरा पासे लैई औणा।

¹⁷ यूहन्ना परमेशरा रे सेवक एलिय्याह री आत्मा च कने सामर्थया च भरी ने तिसरे अग्गे-अग्गे चलना। ताकि परमेशरा रे औणे ते पैहले लोकां रे मनां जो परमेशरा जो ग्रहण करने खातर त्यार करी सक्को। तेरे पुत्रा, मौ-बुढ़यां रा मन अपणे बच्चयां री तरफ फेरना, कने तिस हुक्मा जो नीं मनणे औल़े लोकां जो हुक्म मनणे रा ज्ञान सखाणा।”

¹⁸ जकर्याह स्वर्गदूता ते पुच्छया, “येढ़ा किछ हूणा, इसा गल्ला जो हऊँ कियां जाणी सक्कां? काँह्भई ये गल्ल बौहत हैरान करने औल़ी कने भरोसा करने लायक नीं, काँह्भई हऊँ त बुड्डा हुईगरा, कने मेरी जनाना बी बुड्डी हुईगरी।”

¹⁹ फेरी स्वर्गदूते तिसजो जबाब दित्या, “मेरा नौं जिब्राईल आ, हऊँ साक्षात परमेशरा रिया हजूरिया च खढ़िरा रेआं, तिने इ मिन्जो तुन्हांने गल्ल बात करने कने तिज्जो ये खुशखबरी सुनाणे खातर भेजीरा।

²⁰ कने इस बगत मैं जो किछ तेरने गलाया, तिस पर तैं भरोसा नीं कित्या, इस खातर त्याड़ुआं तक जे सै बालक नीं जम्मया, तिन्हां दिनां तक तू अपणे मुँआं ते नीं बोल्ली सकगा। काँह्भई सै गल्लां जे मैं गलाईयां सै गल्लां अपणे बगता च पूरी हूणी।”

²¹ इस सारे बगता च, लोक जकर्याह रा मन्दरा ते बाहर औणे रा इन्तजार करया राँ थे, तिन्हांजो हैरानी हुईराँ थी भई तिसजो मन्दरा रे अन्दर इतणी देर काँह लगी राईं।

²² ताहली जे सै बाहर निकल़ीने आया तां सै तिन्हां लोकां ने नीं गलाई सकया। कने सै जाणी गै भई तिने पक्का मन्दरा च कोई दर्शण देख्या, सै तिन्हाजो ईशारा करदा रेआ, कने मुँआं ते बोल्ली नीं सकया।

²³ ताहली जे जकर्याह री सेवा रे दिन पूरे हुईगे, तां सै यरूशलेम छड्डिने अपणे घरा जो चलिग्या।

²⁴ किछ दिनां ते बाद छोड़े इ तिसरी जनाना इलिशिबा भारहत्थी हुई; कने पंज्जां महीनेयां तक किसी ने नीं मिली कने घरें इ रैई,

²⁵ कने गलाणे लगी, “प्रभु कितना दयालु आ!” भई “मेरे कोई न्याणा नीं था, पर तिने मांह पर किरपा करीने मिन्जो लोकां च औत्तर हुणे री बेईज्जतिया ते बचाया।”

यीशुये रे जन्मा री भविष्यवाणी

²⁶ इलिशिबा रे भारहत्थी हुणे रे छेऊंये महीने, परमेशरे जिब्राईल नौआं रे स्वर्गदूता जो गलील प्रदेशा रे नासरत नगरा च,

²⁷ मरियम नौआं री इक क्वारी कुड़िया रे घरें भेज्या। तिसारी मंगणी यूसुफ नौआं रे माहणुये ने हुई थी, सै जे राजा दाऊद रे खानदाना रा था।

²⁸ जिब्राईल स्वर्गदूत मरियम रे सामणे खड़ीग्या कने तिसारी बडयाई करदे हुए बोलणे लगया, “नमस्कार! तेरे ऊपर प्रभुरी किरपा हुई, कने प्रभु तू सौगी आ।”

²⁹ इसा गल्ला जो सुणीने मरियम बौहत हैरान हुईने सोच बिचार करने लगी भई स्वर्गदूता री गलाई रिया गल्ला रा क्या मतलब हुया।

³⁰ स्वर्गदूते तिसाजो गलाया, “मरियम तू डरदी मत, काँह्भई परमेशर तेरते बौहत खुश आ।

³¹ तू गर्भवति हूणा, कने तेरते इक बालक जमणा; कने तू तिसरा नौं यीशु रखयां।

³² तिस सबनीं च महान हूणा, कने परमप्रधान परमेशरा रा पुत्र कहलाणा। प्रभु परमेशरा तिसजो तिसरे पूर्वज राजा दाऊद री राजगद्दी देणी।

³³ कने तिस इस्राएली लोकां रे राजा हूणा कने याकूब रे घराने पर सदा खातर राज करना; कने तिसरा राज कदीं खत्म नीं हूणा!”

³⁴ मरियमे स्वर्गदूता ने गलाया, “हऊँ त इक कवारी कुड़ी, मेरे न्याणा कियां हूणा?”

³⁵ इसा गल्ला पर स्वर्गदूते तिसाजो जबाब दित्या, “पवित्र आत्मा तेरे ऊपर उतरना, कने परमप्रधान परमेशरा री महान सामर्थ तू पर छाणी। इस खातर तेरते सै जे न्याणा जमणा सै पवित्र हूणा, कने सै परमेशरा रा पुत्र कहलाया जाणा।

³⁶ कने सुण, इक गल्ल होर दस्सूं, तेरी रिश्तेदार इलिशिबा, स्याणदे बगता च बी भारहत्थी हुईगी। लोक तिसाजो औत्र बोलां थे, पर ये तिसारे भारहत्थी हुणे रा छेंऊआं महीना हुईगरा।

³⁷ काँह्भई तू हैरान मत हुन्दी, परमेशर सब किछ करी सक्कां!”

³⁸ इसा गल्ला पर मरियमे गलाया, “हऊँ त प्रभुरी दासी, सब किछ तेरा इ बोल्लीरा ओ।” तिसते बाद स्वर्गदूत तिसा लाते चलिग्या।

मरियम रा इलिशिबा ने मिलणे जाणा

³⁹ फेरी किछ दिनां ते बाद मरियम त्यार हुईने यहूदा प्रदेशा रे पहाड़ी इलाके च इक नगरा जो गई।

⁴⁰ कने तिसा जगह जे जकर्याह रैयी कराँ था। तिसरे घरें जाईने तिसे तिसरिया जनाना इलिशिबा जो नमस्ते किति।

⁴¹ येढ़ा हुया भई जियां जे इलिशिबे, मरियमा री नमस्ते सुणी, तियां इ न्याणा तिसारे गर्भा च फुरने लगया, कने इलिशिबा पवित्र आत्मा ने भरीगी।

⁴² कने सै खुश हुईने जोरा री अवाज़ा च मरियमा ने बोलां इ, “परमेशरे तिज्जो सारियां जनानां च बौहत आशीषित कित्या, कने तेरा न्याणा बी आशीषित हुया!

⁴³ ये कितणी बड्डी ईज्जता री गल्ल इ भई मेरे प्रभुरी अम्मा मेरे साई इक हल्की जनाना ने मिलणे जो आई!

⁴⁴ तियां जे तैं मिन्जो नमस्ते किति, तियां इ तेरी अवाज़ सुणी ने मेरे पेट्टा च न्याणा मौज्जा ने उछल़णे लग्या!

⁴⁵ तिज्जो परमेशरे आशीषित कित्या, काँह्भई तैं विश्वास कित्या भई जो किछ प्रभुये तिज्जो गलाया, सै पूरा हूणा।”

मरियम रा प्रभुरे खातर गीत गाणा

⁴⁶ फेरी मरियमे गलाया : “हऊँ परमेशरा री स्तुती कराँ इ।

⁴⁷ हऊँ मेरा छुटकारा करने औल़े परमेशरा च आनन्दित हुई,

⁴⁸ भई तिन्हे अपणी दासिया रे हल्के मना पर नज़र कित्ती, कने अज्जा ते हर इक जुगा रे लोकां मिन्जो धन्या बोलणा।

⁴⁹ कने तिस सर्वशक्तिमान परमेशरा रा नौं पवित्र आ, तिने मेरे खातर बड्डे-बड्डे काम्म कित्तिरे।

⁵⁰ कने तिसरी दया तिन्हां लोकां पर बणी रैयां इ, सै जे पीढ़िया ते पीढ़िया तक तिसते डरां ए।

⁵¹ परमेशर अपणे शक्तिशाली सामर्था ने बड्डे-बड्डे काम्म कराँ! देक्खा, सै लोक जे अपणिया समझा पर घमण्ड कराँ थे, परमेशरे तिन्हाजो हराईत्या।

⁵² परमेशरे राजयां जो तिन्हां रिया राजगद्दियां ते थल्ले त्वारी दित्या; कने पिड़ितां जो परमेशरे ऊच्चे संघासणां पर बठाल़ीने आदर दित्या।

⁵³ तिन्हे भूख्यां जो बधिया रोटी ख्वाईने रजाया कने सेठां जो खाली हत्थ बाहर कड्डया।

⁵⁴ परमेशरे इस्राएल रे लोकां री मदद किति, काँह्भई तिने अपणे वायदे जो याद कित्या,

⁵⁵ तेढ़ा जे परमेशरे अहांरे पूर्वजां यनि अब्राहम कने तिसरे कुलबे रे परति सै जे वायदा कित्या था तिस्सो पूरा कित्या।”

⁵⁶ मरियम तकरीवन तिन्न महीने इलिशिबा सौगी रैयी, इसते बाद सै अपणे घरा जो बापिस आई गी।

बपतिस्मा देणे औल़े यूहन्ने रा जन्म

⁵⁷ फेरी इलिशिबा रे न्याणा जमणे रा बगत पूरा हुया, कने तिसे इक मुण्डुये जो जन्म दित्या।

⁵⁸ कने ये खबर इकदम तिसारे पड़ेसियां कने रिस्तेदाराँ च फैलीगी भई प्रभुये स्याणदिया बेला बी तिसाजो न्याणा देईने बौहत दया किति, इस खातर लोकें तिसा सौगी मिलीने खुशी मनाई।

⁵⁹ ताहली जे सै मुण्डुये अट्ठां दिनां रा हुया, तां यहूदी जातिया री रशमा रे मुतावक सारे रिश्तेदार कने मित्र तिसरा खतना (नामकरण) करने खातर कट्ठे हुए। सै तिस मुण्डुये रा नौं तिसरे पिता रे नौआं रे मुतावक जकर्याह रखणे लगे।

⁶⁰ पर इलिशिबे येढ़ा नौं रखणे रे खातर मना कित्या कने गलाया, “इस मुण्डुये रा नौं यूहन्ना रखा।”

⁶¹ इसा गल्ला पर सारेयां लोकें रेहान हुईने पुच्छया, “कां? तेरे परिवारा च इस नौआं ते त कोई बी निआं।”

⁶² फेरी तिन्हे तिस मुण्डुये रे पिता जो ईशारा करीने पुच्छया भई तू इसरा क्या नौं रखणा चाँह।

⁶³ तिने लिखणे रे खातर तख्ती मंगी, कने सारेयां लोकां जो हैरानिया च पाईने तिने लिख्या, “इस मुण्डुये रा नौं यूहन्ना इ हाया।”

⁶⁴ इकदम इ जकर्याह बोलणे लगया, कने सै परमेशरा रा गुणगान करने लगया।

⁶⁵ कने तिसरे अखा-बखा रे रैहणे औल़े जितने लोक थे सै सारे रेहान हुईगे; कने ऊथी केढ़ी-केढ़ी गल्लां हुईयां इसरा गलाण बोलण यहूदिया प्रदेशा रे सारे पहाड़ी लाके च फैल्लीग्या।

⁶⁶ सारे सुणने औल़े लोक अपणे-अपणे मना च सोच-बिचार करने लगे, “ये मुण्डु केढ़ा हूणा?” काँह्भई ये पक्की गल्ल इ भई प्रभुये री सामर्थ तिस मुण्डुये पर थी।

जकर्याह रा भविष्यवाणी करना

⁶⁷ यूहन्ना रा पिता जकर्याह पवित्र आत्मा ने भरीग्या कने तिने येढ़ि भविष्यवाणी किति :

⁶⁸ “प्रभु इस्राएल रे परमेशरा री स्तुति करा, काँह्भई सै अपणे लोकां री मदद करने आईरा कने तिन्हाजो बचाईरा।

⁶⁹ कने अपणे सेबक राजा दाऊद रे कुल़ा च अहांरे खातर इक महान छुटकारा करने औल़े जो भेज्या,

⁷⁰ तियां जे तिने बौहत पैहले ते अपणे पवित्र भविष्यवक्तयां रे जरिये बोल्या था,

⁷¹ भई सै अहांरे दुश्मणां ते, कने अहांते नफरत करने औल़यां ते अहांजो बचांगा।

⁷² भई अहांरे पूर्वजां पर दया करीने अपणे पवित्र वायदे जो पूरा करो,

⁷³ सै वायदा जे तिन्हे अहांरे पूर्वज अब्राहम सौगी कित्या था।

⁷⁴ कने तिसरे बरदाना ते अहें अपणे दुश्मणां रे चुंगल़ा ते छडुआईने बिणा डरे

⁷⁵ तिसरे सामणे पवित्रता कने प्रभुरी इच्छा रे मुतावक जिन्दगी भर तिसरी सेवा करदे रैईये।

⁷⁶ कने बालक, तू परमप्रधान परमेशरा री भविष्यवाणी करने औल़ा माहणु पुकारया जाणा, काँह्भई तू प्रभुरे अग्गे-अग्गे चलना कने तिसरे औणे खातर लोकां जो त्यार करना।

⁷⁷ तू अपणयां लोकां जो ये सखाणा भई सै कियां तिन्हांजो छुटकारा देणे रे खातर तिन्हांरे पापां जो माफ कराँ।

⁷⁸ ये अहांरे परमेशरा री दया री वजह ते हुणा, तियां जे सूरज अहांजो रौशनी देणे रे खातर चमकां, तियां इ मसीह बी अहांले स्वर्गा ते औणा,

⁷⁹ भई सै जे परमेशरा जो नीं जाणदे सै तिन्हां लोकां साई ये सै जे अन्धेरे च बैठिरे, कने मौती ते डरीरे, तिन्हां पर परमेशरा रे सन्देशा री लोय चमको। कने तिस अहांरी अगुवाई करनी, ताकि अहें परमेशरा सौगी शान्तिया ने रैई सक्को।”

⁸⁰ कने सै बालक यूहन्ना कद काठिया च कने आत्मा रिया शक्तिया च मजबूत हुन्दा गया, कने बड्डा हुणे ते बाद तदुआं तक जे तिने इस्राएल रे लोकां च अपणी सेवा नीं शुरु किति, तदुआं तक सै जंगला च रैया।