यूहन्ना 9 - बिलासपुरी नौआं नियम

जन्मा रे अन्हे जो देखणे री सामर्थ मिलणा

¹ ताहली जे यीशु अपणे चेलयां ने जाया रां था, तां तिने इक माहणुये जो देख्या, सै जे जन्मा ते अन्हा था।

² कने तिसरयां चेलयां यीशुये पुच्छया, “गुरू जी, किने पाप कित्या था भई ये अन्हा जम्मया, इने माहणुये या इसरे मौ-बुढ़यां?”

³ यीशुये जबाब दित्या, “न त इने पाप कित्तिरा था, न इसरे मौ-बुढ़यां; पर ये इस खातर अन्हा जम्मया भई परमेशरा रे काम्म इसच परगट हो।

⁴ तिने जे हऊँ भेज्जिरा, अहांजो तिसरे काम्म दिनें-दिनें इ करी लेणा जरूरी आ; काँह्भई सै रात औणे औल़ी तिसच जे कोई काम्म नीं करी सकदा।

⁵ तदुआं तक जे हऊँ संसारा चा, तदुआं तक संसारा री जोत आ।”

⁶ येढ़ा बोलीने यीशुये धरतिया पर थुक्या, कने तिस थुक्का ने मिट्टी मलाई, कने तिस अन्हे रिया आक्खीं पर मल़ीने

⁷ तिसजो गलाया, “जा शीलोह रे कुण्डा च धोई ले” (शीलोह रा मतलब भेज्जिरा) इस खातर तिने जाईने धोया, कने देखदा हुआ बापस आईग्या।

⁸ फेरी तिसरे पड़ेसी कने सै लोक तिन्हें जे तिसजो पैहले भिख मंगदा देख्या था, सै बोलणे लगे, “क्या ये सैई माहणु निआं, सै जे बैठीने भिख मंगदा रेआं था?”

⁹ किछ लोकें गलाया, “ये सैई हाया,” होरसीं गलाया, “नां, ये सै निआं, पर तिस साई लगया राँ।” पर सै जे पैहले अन्हा था तिने जबाब दित्या, “हऊँ सैई हाया।”

¹⁰ फेरी सै तिसते पुछणे लगे, “तिज्जो आक्खीं री जोत कियां मिली?”

¹¹ तिने जबाब दित्या, “यीशु नौआं रे इक माहणुये गिल्ली मिट्टी मेरियां आक्खीं पर मल़ीने मिन्जो गलाया, जा कने शीलोह च जाईने अपणा मुँह धोईने औ इस खातर तां जे हऊँ जाईने धोई आया, तां मिन्जो दिखणे लगीप्या।”

¹² फेरी लोकें तिसते पुच्छया, “सै किति आ?” तिने गलाया, “हऊँ नीं जाणदा।”

फरीसियां रे जरिये चंगाईया री जाँच पड़ताल़

¹³ सै जे पैहले अन्हा था लोक तिस्सो फरीसियां वल लेईगे।

¹⁴ जिस दिन जे यीशुये मिट्टी मलाईने तिसरी आक्खीं च जोत पाई थी, सै विस्राम रा दिन था।

¹⁵ फेरी फरीसियें बी तिसते पुच्छया भई तैं आक्खीं री जोत कियां पाई? तिने तिन्हांने गलाया, “तिने मेरियां आक्खीं पर गीली मट्टी लाई, फेरी मैं धोई ली कने हुण हऊँ देक्खी सक्कां।”

¹⁶ इस पर किछ फरीसी बोलणे लगे, “ये माहणु परमेशरा रिया तरफा ते निआं काँह्भई सै विस्राम रे दिना रा पालन नीं करदा।” होरीं गलाया, “कोई पापी माहणु भला येढ़े चमत्कारा रे काम्म कियां करी सक्कां?” इसा गल्ला पर सै अप्पूँ बाटियें लड़ने लगे।

¹⁷ तिन्हे तिस अन्हे ने फेरी भीं गलाया, “तिसरे बारे च तू क्या बोलां काँह्भई तिने तेरिया आक्खीं च जोत पाई?” तिने गलाया, “सै त भविष्यवक्ता।”

¹⁸ पर यहूदी अगुवेयां जो विश्वास नीं हुया भई सै अन्हा था कने हुण देक्खी सक्कां, ताहलुआं तक जे तिन्हे, तिसरे मौ-बुढ़यां जो सद्दीने तिन्हांते नीं पुच्छया,

¹⁹ “क्या ये तुहांरा मुण्डु आ, तिस्सो जे तुहें बोलां ये भई ये अन्हा जम्मीरा था? फेरी हुण सै कियां देक्खी सक्कां?”

²⁰ तिसरे मौ-बुढ़यां जबाब दित्या, “अहें त जाणाँ ये भई सै अहां रा मुण्डु आ, कने ये अन्हा जम्मीरा था;

²¹ पर अहें ये नीं जाणदे भई हुण ये कियां देक्खां? कने न त ये जाणाँ ये भई किने इस रियां आक्खीं च जोत पाई। इसते इ पुछी लवा; ये बड़ा सयाणा हुईगरा; अपणे बारे च ये खुद बोल्ली सक्कां।”

²² तिसरयां मौ-बुढ़यां ये गल्लां इस खातर बोल्ली काँह्भई सै यहूदी अगुवेयां ते डराँ थे, काँह्भई तिन्हां च इसा गल्ला रा येक्का हुई चुक्कीरा था, भई जे कोई यीशुये जो मसीह मन्नो, तां सै यहूदी सभा घर ते बाहर कड्डी दित्या जाओ।

²³ इस खातर तिसरे मौ-बुढ़यां गलाया, भई “सै सयाणा हुई चुक्कीरा, इसते इ पुछी लवा।”

²⁴ फेरी यहूदी अगबेयां तिस माहणुये जो दुज्जी बार भीं ते सद्दया सै जे अन्हा था, कने गलाया, “सच्च बोल, तू जे ठीक हुया तां तू परमेशरा री स्तुति कर। अहें त जाणाँ ये भई सै माहणु पापी आ।”

²⁵ तिने जबाब दित्या, “हऊँ नीं जाणदा भई सै पापी आ की नीं; हऊँ इक गल्ल जाणाँ भई हऊँ अन्हा था कने हुण देक्खी सक्कां।”

²⁶ तिन्हें तिसने भीं गलाया, भई “तिने माहणुये येढ़ा क्या कित्या? भई तिज्जो आक्खीं री जोत मिलीगी?”

²⁷ तिने जबाब दित्या, “मैं तुहांजो दस्सी त दित्या, पर तुहें मेरी गल्ल सुणदे नींये; हुण दुज्जी बार काँह सुणना चांये? क्या तुहें बी तिसरे चेले बणना चांये?”

²⁸ फेरी तिन्हे तिसरा अपमान कित्या कने गलाया, “तू तिसरा चेला हूणा, अहें त मूसा रे चेले।

²⁹ अहें जाणाँ ये भई परमेशरे मूसे ने गल्ल बात किति; पर इस माहणुये जो नीं जाणदे भई ये कितिते औआं।”

³⁰ तिने तिन्हाजो जबाब दित्या, “येत हैरानिया री गल्ल इ भई तुहें नीं जाणदे भई ये किति रा, पर तिने मेरी आक्खीं ठीक कित्तियां।

³¹ अहें सारे जाणाँ ये भई परमेशर पापियां री नीं सुणदा, पर जे कोई परमेशरा रा भगत ओ कने तिसरी इच्छा पूरी करां, तां परमेशर तिसरी सुणां।

³² संसारा रिया शुरुआता ते ये कदीं सुणने च नीं आया भई किन्हिये किसी जन्मा रे अन्हे माहणुये रिया आक्खीं च जोत पाई ओ।

³³ ये माहणु परमेशरा रिया तरफा ते आ, तांई सै ये सब करी पाया।”

³⁴ तिन्हें तिसजो जबाब दित्या, “तू त तदका जे जम्मीरा तदका इ पापी आ, कने हुण तू अहांजो क्या सखाणे लगीरा?” कने तिन्हे तिसजो धक्के देईने यहूदी सभा घरा ते बाहर कड्डित्या।

आत्मिक अन्धापन

³⁵ यीशुये सुणया भई तिन्हे तिस्सो धक्का देईने बाहर कड्डित्या, कने ताहली जे तिसने मुलाकात हुई तां गलाया, “क्या तू परमेशरा रे पुत्रा पर विश्वास कराँ?”

³⁶ तिने जबाब दित्या, “श्रीमान जी, मिन्जो दस्सा भई ये परमेशरा रा पुत्र कुण आ, ताकि हऊँ तिस पर विश्वास करी सक्कूँ?”

³⁷ यीशुये तिसने गलाया, “हऊँ माहणु यनि परमेशरा रा पुत्र आ, तू पैहले ते मिन्जो देक्खी चुक्कीरा, कने हऊँ सैई हाया तिसने जे तू इस बगत गल्ल बात करीराँ।”

³⁸ तिने गलाया, “प्रभु जी, हऊँ तूह पर विश्वास कराँ।” कने तिसरे पैराँ पर मत्था टेक्कीने अराधना कित्ती।

³⁹ फेरी यीशुये गलाया, “हऊँ इस संसारा च इस न्याय जो करने आईरा, ताकि सै जे नीं देखदे सै देखणे लगो कने सै जे देक्खां ये सै अन्हे हुई जाओ।”

⁴⁰ किछ फरीसी सै जे यीशुये सौगी थे तिन्हे ये गल्लां सुणी ने तिसने गलाया, “क्या तू बोल्ली रां भई अहें बी अन्हे?”

⁴¹ यीशुये तिन्हांने गलाया, “जे तुहें अन्हे हुन्दे तां पापी नीं ठहरदे; पर तियां जे तुहें बोल्लां ये भई तुहें देक्खी सक्कां ये, इस खातर तुहांजो माफ नीं कित्या जाणा।”