यूहन्ना 4 - बिलासपुरी नौआं नियम

यीशु कने सामरी जनाना

¹ फेरी ताहली जे यीशुये जो पता लगया भई फरीसियें सुणया भई यीशु यूहन्ने ते जादा लोकां जो चेले बणाईराँ कने तिन्हांजो बपतिस्मा देई कराँ।

² यीशु खुद बपतिस्मा नीं देई करां था बल्कि ये काम्म तिसरे चेले करी रां थे,

³ तां सै यहूदिया प्रदेशा जो छड्डिने बापस अपणयां चेलयां सौगी गलील प्रदेशा जो चलिग्या,

⁴ इस बार तिस्सो सामरिया प्रदेशा चींये जाणे पैया।

⁵ इस खातर सै सामरिया प्रदेशा रे इक नगर सूखार नगरा तक आया, ये नगर तिसा धरतिया ले था सै जे याकूबे अपणे मुण्डुये यूसुफा जो दित्तिरी थी;

⁶ कने याकूबे सै जे खूह बणाया था सै हुण तक तिसा इ जगह पर था। यीशु पैदल चली-चलीने थक्की गरा था इस खातर सै आईने खूआ ले इयां इ बैठिग्या। ये तिस बेले री गल्ल इ ताहली जे तकरीवन दपैहर हुई चुक्कीरे थे।

⁷ इतणे वगता च इक सामरी जनाना पाणी भरने आई। यीशुये तिसाजो गलाया, “मिन्जो पीणे जो किछ पाणी दे।”

⁸ काँह्भई तिसरे चेले तिस वगत नगरा च रोटी ल्यौणे गए थे।

⁹ तिसे सामरी जनाने तिस्सो हैरान हुईने गलाया, “तू त इक यहूदी आ, फेरी बी मांज सामरी जनाना ते पीणे खातर पाणी काँह मंगया दा?” काँह्भई यहूदी त सामरियां ने कोई बी सलबन्ध नीं रखदे।

¹⁰ यीशुये जबाब दित्या, “तू नीं जाणदी भई परमेशर तिज्जो क्या देणा चांह, कने तू नीं जाणदी भई कुण तेरते पाणी मंगया रां। जे तू जाणदी, तां तू माहते इस्सो मंगदी कने हऊँ तिज्जो जीवन देणे औल़ा पाणी देन्दा।”

¹¹ जनाने तिसजो गलाया, “प्रभु जी, तेरले त पाणी निकाल़णे जो कोई बी बर्तण निआं, कने खूह बड़ा डुग्गा, तां फेरी सै जीवन देणे औल़ा पाणी तेरेले किती ते आया?

¹² तू अहांरे पूर्वज याकूब ते महान नीं हुई सकदा, तिने जे अहांजो ये खूह दित्या; कने तिने अपणे बच्चयां कने डंगरां सौगी खुद अप्पूँ बी इसरा पाणी पित्या?”

¹³ यीशुये तिसाजो जबाब दित्या, “हर कोई तिस जे इस खूआ रा पाणी पीणा, तिसरी कदीं प्यास नीं बुझणी,

¹⁴ पर सै जे कोई तिस पाणिये जो पींगे, सै जे माह तिस्सो देणा, तिस फेरी कदीं प्यासे नीं रैहणां; बल्कि सै पाणी जे हऊँ तिस्सो देंगा, सै तिसच इक पाणिये रा सोता बणी जाणा सै जे तिस्सो अनन्त जीवन देंगा।”

¹⁵ फेरी तिसे जनाने तिसने गलाया, “प्रभु जी, सै जल मिन्जो दे ताकि हऊँ फेरी कदीं प्यासी नीं रऊँ कने नांई मिन्जो इतणे दूर पाणी भरने जो औणे पौ।”

¹⁶ इस पर यीशुये तिसाजो गलाया, “जा अपणे घरा-औल़े जो सद्दीने इत्थी लीऔ।”

¹⁷ जनाने जबाब दित्या, “मेरा कोई घरा-औल़ा निआं।” यीशुये तिसाजो गलाया, “तां जे तू गलाया राईं भई तेरा कोई घरा-औल़ा निआं, तां तू ठीक इ बोल्या दी।

¹⁸ तेरे पांज्ज घरा-औल़े थे, कने हुण तू जिस माहणुये सौगी रैईं सै बी तेरा घरा-औल़ा निआं; इस खातर तैं सै जे गलाया, ठीक इ गलाया।”

¹⁹ इस पर जनाने तिसने गलाया, “प्रभु जी, हऊँ समझी सक्कां इ भई तू इक भविष्यवक्ता।

²⁰ अहांरे पूर्वज इस पहाड़ा पर अराधना करां थे, पर तुहें यहूदी लोक बोलां ये भई यरूशलेम नगरा च अराधना करनी चाहिन्दी।”

²¹ यीशुये तिसाजो गलाया, “ओ नारी, मेरिया गल्ला पर विश्वास कर भई सै बगत आईरां ताहली जे तुहां पिता री अराधना नांत इस पहाड़ा पर करनी, कने नांई यरूशलेम च करनी।

²² तुहें सामरी लोक तिस्सो जे नीं जाणदे, तिसरी अराधना करां ए; कने अहें यहूदी लोक तिस्सो जे जाणां ए तिसरी अराधना करां ए; काँह्भई छुटकारा यहूदियां चते आ।

²³ पर सै वगत आई चुक्कीरा, ताहली जे सच्चे भगत अहांरे पिता परमेशरा री अराधना आत्मा रिया अगुवाईया च सच्चाईया ने करगे, काँह्भई अहांरे पिता अपणे खातर येढ़े इ भगतां जो टोल़ां ये।

²⁴ परमेशर आत्मा इ, इस खातर जरूरी आ भई तिसरी अराधना करने औल़े आत्मा कने सच्चाईया ने अराधना करो।”

²⁵ जनाने तिसने गलाया, “हऊँ जाणाँ इ भई मसीह सै जे परमेशरा रा अभिषिक्त माहणु कहलाया जां, औणे औल़ा; ताहली जे सै औंगा, तां तिस अहां जो सारियां गल्लां दसणियां।”

²⁶ यीशुये तिसाने गलाया, “हऊँ जे तेरने गल्ल करी रां, हऊँ सैई हाया।”

चेलयां री वापसी

²⁷ इतणे च तिसरे चेले आई पुज्जे, कने तिन्हांजो ये देखीने सच्ची जो बौहत हैरानी हुई भई सै इक जनाना ने गल्ल-बात करी रां; पर किन्हिये बी तिसते किछ नीं पुच्छया, भई “तू क्या चाँह यनि किस खातर इसाने गलाईरां?”

²⁸ फेरी सै जनाना अपणा घड़ा तिसा जगह छड्डिने गाँवां जो बापस चलीगी, कने लोकां ने बोलणे लगी,

²⁹ “आईने, इक्की येढ़े माहणुये जो देक्खा, तिने मेरे बारे च बौहत सारियां गल्लां दस्सीत्या सै जे मैं किति रियां थी। किति येई मसीह त निआं?”

³⁰ इस पर लोक नगरा ते निकल़ीने यीशुये जो देखणे औणे लगे।

³¹ इस बिच तिसरे चेले तिसते बिनती करने लगे, “गुरू जी, किछ खाई लैं।”

³² पर यीशुये तिन्हांते गलाया, “खाणे रे खातर मेरेले सै रोटी, तिसरे बारे च जे तुहें नीं जाणदे।”

³³ इस पर तिसरे चेले अप्पूँ बाटियें इक दुज्जे ते पुछणे लगे, “क्या किन्हिये तिसजो खाणे खातर किछ लन्दीरा?”

³⁴ यीशुये तिन्हांजो गलाया, “मेरा खाणा तिस परमेशरा रिया इच्छा रा पालन करना हया तिने जे मिन्जो भेज्जिरा, कने तिसरे कम्मा जो पूरा करना सै जे तिने मिन्जो सौंपीरा।

³⁵ तुहें अक्सर बोलां ये, ‘बढाईया जो हल्तियें बी चार महीने पैईरे?’ देक्खा हऊँ तुहांजो बोलां, ध्यान देईने खेतां जो देक्खा, भई तियां जे खेतां च पक्कीरी फसल बढाईया रे खातर त्यार हुआं इ, तियां इ माहणु मेरा सन्देश ग्रहण करने खातर त्यार आ।

³⁶ बढाई करने औल़ा अपणी मजदूरी पां, कने अनन्त जीवना खातर फसल कठेराँ, ताकि फसल बाहणे औल़ा कने बढणे औल़ा ये दोन्नों मिलीने मौज करो।

³⁷ काँह्भई इत्थी ये कहावत ठीक बैठीराँ ई: बाहणे औल़ा कोई होर आ कने बढणे औल़ा कोई होर।

³⁸ तिज्जो मैं तिस खेता रिया फसला बढणे जो भेज्या, तिसच जे तैं मेहणत नीं कित्तिरी : होरीं तिसच मेहणत कित्ती कने तुहें तिसरिया मेहणता रे फल़ा च हिस्सेदार हुये।”

सामरियां रा विश्वास करना

³⁹ तिस नगरा रे कई सामरियें तिसा जनाना रे गलाणे पर यीशुये पर विश्वास कित्या, तिसे ये गवाही दित्ति थी, भई तिने मेरिया जिन्दगिया रे बारे च बौहत सारियां गल्लां दस्सी तियां जो किछ मैं कित्तिरा था।

⁴⁰ फेरी ताहली जे ये सामरी तिसले आये, तां तिन्हे तिसते रुकणे खातर बिनती किति, कने सै तिन्हाले दो दिन तक रुकया।

⁴¹ कने तिसरयां बचनां ते प्रभावित हुईने होर मतयां सारयां लोकें तिस पर विश्वास कित्या,

⁴² तिन्हे तिसा जनाना ने गलाया, “हुण अहें सिर्फ तेरे बोलणे तेई विश्वास नीं करदे; काँह्भई अहें अप्पूँ इ तिस्सो सुणील्या कने हुण अहें ये जाणीगे भई सच्ची जो येई हाया सै जे संसारा रा छुटकारा करने औल़ा।”

⁴³ फेरी दो दिन बाद सै ऊत्थीते निकल़ीने गलील जो चलीप्या;

⁴⁴ काँह्भई यीशुये खुद गवाही दित्ति भई भविष्यवक्ते जो अपणे लाके च आदर नीं मिलदा।

⁴⁵ ताहली जे सै गलील च आया, तां गलील रे लोकें बड़िया मौज्जा ने तिसरा स्वागत कित्या; काँह्भई जितने काम्म तिने त्योहारा रे बगत यरूशलेम च कित्ते थे, सै सब तिन्हे देक्खे थे, काँह्भई सै बी तिस त्योहारा च शामल थे।

राज कर्मचारिये रे पुत्रा जो चंगा करना

⁴⁶ फेरी सै भीं ते गलील रे काना नगरा च गया, तित्थी जे तिने पाणिये जो दाखरस बणाया था। इस बार तित्थी राजे रा इक कर्मचारी था तिसरा मुण्डु जे कफरनहूम नगरा च बमार था।

⁴⁷ सै ये सुणीने भई यीशु यहूदिया जिले ते गलील जिले च बापस आईगरा, सै तिसले काना नगरा च गया कने बिनती करने लगया भई चल्लीने मेरे मुण्डुये जो ठीक करी दे : काँह्भई सै मरने जो हुईगरा था।

⁴⁸ यीशुये तिसने गलाया, “तदुआं तक जे तुहें चमत्कारा रे काम्म नीं देक्खी लेंगे ताहलुआं तक तुहां विश्वास नीं करना।”

⁴⁹ राजे रे नोकरे तिसने गलाया, “प्रभु जी, इसते पैहले भई मेरा मुण्डु मरी जाओ, तुहें मेरे सौगी चला।”

⁵⁰ यीशुये तिसजो गलाया, “तू जा तेरा मुण्डु जिऊंदा रैहणा।” तिने माहणुये यीशुये री गलाई रियां गल्लां पर विश्वास कित्या कने घरा जो चलीप्या।

⁵¹ सै घरा जान्दे हुये हल्तियें रस्ते ची था ताहली तिसरे दास तिस्सो मिले कने तिसजो ये खुशखबरी दित्ति भई हुण “तेरा मुण्डु ठीक आ।”

⁵² तिने तिन्हांते पुच्छया, “किस वगत सै ठीक हुणे लगया?” तिन्हे जबाब दित्या, “पिछले कल दपैहरयां तकरीवन इक बजे तिसरा बुखार उतरीगरा।”

⁵³ फेरी मुण्डुये रा पिता जाणिग्या भई ये ठीक तिस बगता री गल्ल इ ताहली जे यीशुये तिसने गलाया था भई, “तेरा मुण्डु जिऊंदा रैहणा,” तिसते बाद तिने अपणे पूरे परिवारा सौगी विश्वास कित्या।

⁵⁴ ये दुज्जा चमत्कारी नशाण था सै जे यीशुये यहूदिया प्रदेशा ते आईने गलील नगरा च कित्या।