यूहन्ना 3 - बिलासपुरी नौआं नियम

यीशु कने नीकुदेमुस

¹ निकुदेमुस नौआं रा इक माहणु था, सै जे यहूदियां रा धार्मिक अगुवा था, सै इक फरीसी था।

² सै रात के बगत यीशुये ले आया कने बोल्या, गुरू जी, हऊँ जाणाँ भई तुहें परमेशरा रिया तरफा ते अहांजो सखाणे आईरे, काँह्भई सै चमत्कार जे तुहें दस्सां ए तिस्सो परमेशरा रिया सहायता ते बगैर कोई बी नीं दस्सी सकदा।

³ यीशुये तिसजो जबाब दित्या, हऊँ तुहांजो सच्च बोलां, भई कोई बी परमेशरा रे राज्जा जो देक्खी नीं सकदा, तदुआं तक जे सै दोबारा जन्म नीं लौ।

⁴ निकुदेमुसे तिसजो गलाया, “तां जे इक माहणु बुढा हुई जां, तां फेरी तिसरा जमणा कियां हुई सक्कां? क्या सै फेरी भीं अपणिया मौआ रे पेट्टा च जाईने दुज्जी बार जन्म लेई सक्कां?”

⁵ यीशुये तिस्सो जबाब दित्या, “हऊँ तेरने सच्च बोलां, कोई बी परमेशरा रे राज्जा च दाखल नीं हुई सकदा तदुआं तक जे सै पाणिये ते कने आत्मा ते जन्म नीं लौ।

⁶ माता-पिता अपणे बच्चयां जो जन्म दें, फेरी बी सिर्फ परमेशरा रा आत्मा तुहांजो परमेशरा रिया सन्तान्ना रे रूपा च बदली सक्कां।

⁷ मेरिया बोल्ली रिया गल्ला पर चम्भा नीं कर भई ‘तिज्जो दोबारा जन्म लेणे पौणा।’

⁸ सै जे कोई पवित्र आत्मा ते जम्मीरा सै येढ़ा इ हाया, तियां जे हवा तितखा जे बैहणा चाईं तितखौ बैहणे लगां इ। तू तिसारी अवाज़ सुणां, पर ये नीं दस्सी सकदा भई सै कित्खा ते औआंईं कने कित्खौ जाईं?”

⁹ निकुदेमुसे यीशुये जो जबाब दित्या, भई “येढ़ा कियां हुई सक्कां?”

¹⁰ ये सुणीने यीशुये तिसजो जबाब दित्या, “तू इस्राएलियां रा गुरू हुईने बी इन्हां गल्लां जो नीं समझदा?

¹¹ हऊँ तुहांजो सच्च बोलां, भई अहें सै जे जाणाँ ए सैई बोलां ए, कने अहें सै जे देक्खीरा तिसरी ही गवाही दें, कने सै जे अहें बोलां ए तिस पर तुहें विश्वास नीं करदे।

¹² ताहली जे हऊँ तुहांने संसारा रे बारे च गल्लां करां, तां तुहें मेरा विश्वास नीं करदे, पर जे हऊँ तुहांने स्वर्गा रे बारे च गल्लां करूँ तां कियां विश्वास करगे?

¹³ कोई स्वर्गा जो नीं गया, पर सिर्फ माहणुये रा पुत्र यनिके हऊँ, सै जे स्वार्गा ते उतरी ने आईरा।

¹⁴ कने तियां जे मूसे सुनसान जगह च पितल़ी रे बणीरे सर्पा जो ऊच्चिया ठारी टंगाया, तियां इ मेरा यनि माहणुये रे पुत्रा रा ऊच्चिया ठारी टंगया जाणा बी जरूरी आ;

¹⁵ ताकि सै जे कोई माह पर विश्वास करो, सै अनन्त जीवन पाओ।”

¹⁶ “काँह्भई परमेशरे संसारा रे लोकां ने इतणा प्यार कित्या भई तिने अपणे इकलौते पुत्रा जो तिन्हांरे खातर बलिदान करित्या, ताकि हर इक माहणु सै जे तिस पर विश्वास करो, सै नाश नीं हो, पर अनन्त जीवन पाओ।

¹⁷ काँह्भई परमेशरे अपणे पुत्रा जो संसारा च इस खातर नीं भेज्या भई सै संसारा रे लोकां जो सजा रा हुक्म देओ, पर इस खातर भेज्या भई संसारा रे लोक तिसरे जरिये छुटकारा पाओ।

¹⁸ सै जे परमेशरा रे पुत्रा पर विश्वास कराँ, तिस पर सजा देणे रा हुक्म नीं हुन्दा, पर सै जे तिस पर विश्वास नीं करदा, सै दोषी हुई चुक्कीरा; काँह्भई तिने परमेशरा रे इकलौते पुत्रा पर विश्वास नीं कित्या।

¹⁹ सजा रे हुक्मा री वजह येई भई जोति इसा दुनिया च आई कने लोकें अन्धेरे जो जोतिया ते जादा प्यारा समझया, काँह्भई तिन्हांरे काम्म बुरे थे।

²⁰ काँह्भई सै माहणु जे पाप कराँ सै जोतिया ते नफरत कराँ, कने सै जोतिया रे नेड़े तां नीं औन्दा भई किति तिन्हारे पाप सामणे नीं आई जो।

²¹ पर सै माहणु जे सच्चाईया पर चलां सै जोतिया रे नेड़े औआं ताकि तिसरे काम्म दिखी जाओ भई ये परमेशरा रिया तरफा ते हुईरे।”

यीशु रे बारे च यूहन्ने री गवाही

²² इसते बाद यीशु अपणे चेलयां सौगी यहूदिया प्रदेशा च आए; कने तित्थी सै तिन्हां सौगी रैईने लोकां जो बपतिस्मा देणे लगया।

²³ कने यूहन्ना बी एनोन नौआं रे गाँवां च सै जे सामरिया इलाके च सालोम नगरा ले था बपतिस्मा देआं था, काँह्भई तित्थी बौहत सारा पाणी था कने लोक तित्थी आईने बपतिस्मा लेआं थे।

²⁴ ये तिस वगता री गल्ल इ ताहली जे यूहन्ने जो बन्दी बणाईने जेल्ला च कैद नीं कित्तिरा था।

²⁵ ऊत्थी यूहन्ने रे चेलयां री किसी यहूदी धर्म गुरुये सौगी शुद्धीकरण रे बारे च बैहस बसाई हुईगी।

²⁶ इस खातर यूहन्ने रे चेले तिसले आये कने गलाया, “गुरू जी, सै माहणु जे यरदन नदिया रे पार तुहां सौगी था, कने तिसरे बारे च जे तुहें गल्ल कित्ती थी, सै माहणु बपतिस्मा देआं, कने हर इक माहणु तिसलौ बपतिस्मा लेणे जाया रां।”

²⁷ यूहन्ने जबाब दित्या, ताहलुआं तक जे किसी माहणुये जो स्वर्गा ते नीं दित्या जाओ, ताहलुआं तक सै किछ नीं पाई सकदा।

²⁸ तुहें सब मेरे गवाह ये भई मैं गलाया था, हऊँ मसीह निआं, पर मिन्जो तिसते पैहले भेजीरा।

²⁹ लाड़ा-लाड़ी ब्याह करी लें; पर लाड़े रा मित्र खड़ा हुआं कने तिसजो सुणां, कने सै लाड़े रिया अवाज़ा ते बड़ा खुश हुआं: मेरी खुशी येढ़ि ही हाई कने हुण सै पूरी हुई।

³⁰ ये जरूरी आ भई सै बौहत खास हुई जाणे चाहिन्दे, जबकि हऊँ खास नीं होऊं।

³¹ “सै जे स्वर्गा ते औआं सै सब्बीं ते महान आ; कने सै जे धरतिया ते औआं, सै धरतिया रा, इस खातर सै धरतिया ने जुड़ी रियां ही गल्लां करां : कने सै जे स्वर्गा ते उतरी रा, सै सब्बीं ते महान आ।

³² तिने सै जे किछ देख्या, कने सुणया, सै तिसरी गवाही देआं, पर बड़े घट लोक तिसरे सन्देशा जो ग्रहण करां ये।

³³ पर तिने माहणुये जे तिसरे सन्देशा पर विश्वास कित्या, सै इस पर सैहमत हुईग्या भई परमेशर सच्चा।

³⁴ काँह्भई तिस्सो जे परमेशरे भेज्जीरा, सै परमेशरा रियां इ गल्लां बोलां; काँह्भई ये सैई आ तिसजो जे परमेशरे पवित्र आत्मा पूरे तरिके ने देई दित्तिरा।

³⁵ या पिता परमेशर अपणे पुत्रा जो प्यार करां, कने तिने सारा किछ तिसरे अधिकारा च दित्तिरा।

³⁶ इस खातर सै जे कोई परमेशरा रे पुत्रा पर विश्वास करां, तिसजो इ अनन्त जीवन मिलणा; पर सै माहणु जे परमेशरा रे पुत्रा री गल्ल नीं मनदा, तिस्सो अनन्त जीवन नीं मिलणा, पर परमेशरा तिसजो अनन्त काल री सजा देणी।”