यूहन्ना 21 - बिलासपुरी नौआं नियम

तिबिरियास नदिया रे कण्डे चेलयां जो दिसणा

¹ इन्हां गल्लां ते बाद तिबिरियास नदिया रे कण्डे (गलील समुद्रा रा दुज्जा नौं आ) यीशु चेलयां ले भीं ते आया। कने ये सब किछ इयां हुया भई;

² शमौन पतरस, थोमा यनि दिदुमुस (तिस्सो जे जुड़वा बोलां ये), गलील जिले रे काना गाँवां रा नतनएल, कने जब्दिये रे दोन्नों पुत्र कने यीशुये रे चेलयां चते दो होर चेले तित्थी नदिया रे कनारे पर कट्ठे थे।

³ शमौन पतरसे तिन्हांजो गलाया, हऊँ मच्छियां पकड़ने जायेराँ। तिन्हें तिस्सो गलाया अहें बी तेरने सौगी चलां ये। तां सै तिसने चलीगे कने किश्तिया च बैठीने मच्छियां जो पकड़ने रे खातर चलीपे, पर तिसा राति सै किछ मनी पकड़ी सक्के।

⁴ अगले दिन भ्याग हुणे लगी गरी थी, यीशु नदिया रे कनारे आईने खड़ीग्या। तां बी तिसरे चेलयां सै नीं पछयाणया भई सै यीशु इ हाया।

⁵ फेरी यीशुये तिन्हांजो पुच्छया, “बच्चो! क्या तुहांले मच्छियां हईयां?” तिने जबाब दित्या, अहांले निआं।

⁶ फेरी यीशुये तिन्हांजो गलाया किश्तिया रे सज्जे हत्था खा जाल़ लावा, तां तुहांजो किछ मच्छियां मिली जाणियां। तां तिन्हें जाल़ लाया कने बौहत जादा मच्छियां हुणे रिया वजह ते सै तिस जाल़ा जो खिंजी नीं सक्के।

⁷ फेरी तिने चेले तिसने जे यीशु प्यार करां था पतरसा ने बोल्या, “येत प्रभु आ!” ताहली जे शमौन्ने ये सुणया भई सै प्रभु आ, तां तिने अपणे सै कपड़े पैहनी ले सै जे तिने काम्म करदे वगत खोल्ही तरे थे कने झीला च छैल़ मारीती, काँह्भई तिस वगत तिने अधे कपड़े पैहनीरे थे।

⁸ पर दुज्जे चेले मच्छियां ने भरीरा जाल़ खींजदे-खींजदे किशतिया पर आये। सै कनारे ते कोई जादा दूर नीं थे, सै सिर्फ तकरीवन सौ मीटर दूर थे।

⁹ ताहली जे सै कनारे पर उतरे, तां तिने तित्थी कोयलयां री आग्ग बल़दी देखी। तिस पर मच्छी पकणे जो रखीरी थी कने रोटी बी रखीरी थी।

¹⁰ यीशुये तिन्हांने गलाया, “तुहें हुण सै जे मच्छियां पकड़ी रियां, तिन्हां चते खरियां-खरियां ली औआ।”

¹¹ शमौन पतरस किश्तिया परा गया कने 153 बड-बडियां मच्छियां ने भरीरा जाल़ कनारे खौ खिंजया। जाल़ा च बौहत जादा मच्छियां थिआं फेरी भीं सै जाल़ फटया निआं।

¹² यीशुये तिन्हांजो गलाया, “येत्थी औआ कने रोटी खावा।” तिसरे चेलयां चते किसी जो बी ये पुछणे री हिम्मत नीं हुई भई “तू कुण आ?” काँह्भई तिन्हांजो पता लगी गरा था भई सै प्रभु आ।

¹³ यीशुये आईने रोटी कने मच्छियां लई कने तिन्हांजो दित्ति।

¹⁴ मूईरयां चते जिऊंदा हुणे ते बाद ये तिज्जी बार यीशुये अपणया चेलयां जो दर्शण दित्या।

यीशु कने तिसरा चेला

¹⁵ जलपान करने ते बाद यीशुये शमौन पतरसा जो गलाया, “हे यूहन्ना रे पुत्र शमौन, क्या सच्चमुच तू मेरने इन्हांते जादा प्यार कराँ?” पतरसे यीशुये जो जवाव दित्या, “हाँ, प्रभु! तू जाणाँ भई हऊँ तिज्जो प्यार करां।” यीशुये पतरसा जो गलाया, “मेरे चेलयां जो सम्भाल़ सै जे मेमनयां साई ये।”

¹⁶ सै तिसने दुज्जी बार बोलां, “यूहन्ना रे पुत्र शमौन, क्या तू मेरने प्यार कराँ?” पतरसे यीशुये जो बोल्या, “हाँ, प्रभु! तू जाणाँ भई हऊँ तिज्जो प्यार करां।” यीशुये पतरसा जो गलाया, “मेरियां भेड्डां री रखवाली कर।”

¹⁷ यीशुये फेरी तिज्जी बार पतरसा जो गलाया, “यूहन्ना रे पुत्र शमौन, क्या तू मिन्जो प्रेम कराँ?” पतरस बौहत परेशान हुईग्या भई यीशुये तिस्सो तिज्जी बार ये पुच्छया, क्या तू मिन्जो प्रेम कराँ? तां पतरसे यीशुये जो गलाया, “हे प्रभु! तू सब किछ जाणाँ, तू जाणाँ भई हऊँ तेरने प्रेम कराँ।” यीशुये तिस्सो गलाया, मेरियां भेड्डां जो चरा।

¹⁸ हऊँ तेरने सच्च बोलां, भई ताहली जे तू जवान था, तां तू खुद अपणे लक्का जो बन्हीने तित्थी जे तेरा दिल कराँ तित्थी जो चली जां था। पर ताहली जे तू बुड्डे हुई जाणा, तां तू अपणे हात्थ फैलाणे कने किसी होरी तिज्जो बन्ही लेणा कने तिज्जो उत्थी लेई जाणा तित्थी जे तू जाणा नीं चाहन्गा।

¹⁹ यीशुये ये दसणे खातर गलाया, भई पतरसा कियां मरना कने तिसरे मरने ते परमेशरा री महिमा कियां हूणी। येढ़ा गलाई ने यीशुये तिस्सो बोल्या, औ मेरा चेला बण।

यीशु कने तिसरा प्यारा चेला

²⁰ पतरस पिच्छे मुड़या कने देख्या भई, सै प्यारा चेला, तिस्सो जे यीशु प्यार कराँ था, तिन्हांरे पिछे आये राँये सैई था तिने जे रोटी तोड़दे बगत, यीशुये खौ झुकीने पुच्छया था भई, “प्रभु! सै कुण आ तिस जे तिज्जो धोखे ने पकड़वाणा।”

²¹ ताहली जे पतरसे तिस्सो देख्या तां तिने यीशुये ते पुच्छया “प्रभु, इसरा क्या हुंगा?”

²² यीशुये तिस्सो गलाया, जे हऊँ चाऊँ भई मेरे औणे तक सै जिऊंदा रौ, तां इसते तिज्जो क्या? पर तू मेरा चेला बण।

²³ इयां ये गल्लां विश्वासी भाईयां च येत्थी तको फैली गियां भई, तिस चेले नीं मरना। पर यीशुये येढ़ा नीं बोलीरा था भई, तिस चेले नीं मरना। पर ये बोलीरा था, जे, हऊँ चाऊँ भई मेरे औणे तक सै जिऊंदा रौ। तां इसते तिज्जो क्या?

उपसंहार

²⁴ ये सैई चेला सै जे इन्हां सारियां गल्लां रा गवाह कने तिने जे ये गल्लां लिखियां; अहें जाणाँ ये भई तिसरी गवाही सच्ची।

²⁵ यीशुये होर बी बौहत सारे काम्म कित्ते। जे तिन्हां सारियां गल्लां जो इक-इक करीने लिखदे, तां हऊँ समझां भई, सै जे कताबां लिखियां जांदियां तां सै इतणियां जादा हुन्दियां भई पूरे संसारा च तिन्हां कताबां रखणे जो जगह नीं हुन्दी।