यूहन्ना 20 - बिलासपुरी नौआं नियम

खाली कब्र

¹ मगदल गाँवां री मरियम त्वारा रे दिन सबेरके जुन्ना रे अन्‍धेरे ची किछ होर जनानां ने कब्रा पर आई, कने तिन्हें पत्थरा जो कब्रा रे दरवाजे परा ते हटिरा देख्या।

² फेरी सै जनानां दौड़ीने शमौन पतरस कने दुज्जे चेले लौ गई, सै जे यीशुये रा प्यारा था, तिन्हांले आईने गलाया, सै प्रभुये रिया लाशा जो कब्रा ते निकाल़ीने लईगे; कने अहें नीं जाणदियां, भई तिस्सो किति रखी दित्या।

³ फेरी पतरस कने दुज्जा चेला कब्रा खौ दौड़े।

⁴ कने सै दोन्नों सौगी-सौगी दौड़या राँ थे, पर दुज्जा चेला पतरसा ते अग्गे दौड़ीने पैहले कब्रा पर पुज्या।

⁵ कने झुकीने कफणा रे कपड़े पैईरे देक्खे : तां बी सै अन्दरौ नीं गया।

⁶ तां शमौन पतरस बी सै जे तिसरे पिच्छे आयाराँ था, पुज्जीग्या, कने कब्रा रे अन्दर चलिग्या। तिने देख्या भई तित्थी कफ़णा रे कपड़े पईरे।

⁷ कने सै कपड़ा तिसने जे तिसरा मुँह ढक्कीरा था, कफ़णा रे कपड़े ते लग, दुज्जिया जगह तैह लगीरा रखोईरा था।

⁸ फेरी दुज्जा चेला सै जे कब्रा पर पैहले पुज्जीरा था, सै बी कब्रा च गया, कने तिने देखीने विश्वास कित्या भई यीशु मूईरयां चते जिऊंदा हुईगरा।

⁹ सै अजें तक बी पवित्रशास्त्रा रे तिस बचना जो नीं समझी पाए थे, भई, “तिसरा मूईरयां चते जिऊंदा हूणा जरूरी था।”

¹⁰ फेरी सै चेले अपणे-अपणे घरा जो चलीगे।

मरियम मगदलिनी जो दर्शण

¹¹ मरियम रोंदी-रड़ांदी कब्रा ते बाहर खढ़ीरी थी, रोंदी-रोंदी सै कब्रा च अन्दरा खौ जुल्की।

¹² तित्थी जे यीशुये री लाश रखीरी थी, तिसा जगह तिसे चिट्टे कपड़े पैहनीरे, दो स्वर्गदूत देखे, इक तिसरे सरहाणे खौ कने दुज्जा तिसरे पैंदा खौ, बैठिरा था।

¹³ तिन्हें तिसाजो पुच्छया, भैहण तू काँह रोया राईं? तिसे जबाब दित्या, सै मेरे प्रभुये रिया लाशा जो चक्की ने लई गये, कने पता मनी या भई तिन्हें तिस्सो किति रखीत्या?

¹⁴ येढ़ा बोलीने सै घुम्मी कने तिसे यीशुये जो खढ़िरा देख्या, पर सै पछयाणी नीं सक्की भई सै यीशु इ हाया।

¹⁵ यीशुये तिसाजो गलाया, “तू काँह रोया राईं? तू किस्सो टोल्या राईं?” ये सोची ने भई सै माली आ, तिसे यीशुये ने गलाया, जे तू यीशुये रिया लाशा जो चक्कीने लेई गरा तां मिन्जो दस्सी दे, तैं तिसजो किति रखीरा, मांह तिसा लाशी जो लई जाणा।

¹⁶ यीशुये तिसाजो गलाया, मरियम, सै पिच्छे खौ घुम्मी कने तिसे इब्रानी भाषा च गलाया, “गुरू।”

¹⁷ यीशुये तिसाजो गलाया, मेरयां पैराँ ने लिपटी ने मिन्जो मत रोक, काँह्भई हऊँ अजें तक पिता ले नीं गईरा, तू मेरे भाईयां लौ जा, कने तिन्हांजो दस हऊँ अपणे परम पिता कने तुहांरे परम पिता, अपणे परमेशर कने तुहांरे परमेशरा ले जाया रां।

¹⁸ मगदल गाँवां री मरियमे जाईने चेलयां जो दस्या, “मैं प्रभुये जो देख्या” कने ये गल्लां यीशुये इ तिसाजो बोलियां थी।

चेलयां जो दिखणा

¹⁹ तिस त्वारा रे संजके बगता, सै जे हफ्ते रा पैहला दिन था, चेले यहूदी अगुवेयां रे डरा रे मारे दरवाजा बन्द करीने बैठिरे थे। तां यीशु तित्थी आईने तिन्हांरे बिच खड़ा हुईग्या, कने तिन्हांजो गलाया, “तुहांजो शान्ति मिलो।”

²⁰ ये बोल्लीने यीशुये अपणे हाथ कने बखिया रा जख्म तिन्हांजो दस्या। चेलयां तंजे प्रभुये जो देख्या, तां सै बौहत खुश हुईगे।

²¹ यीशुये तिन्हांजो फेरी भीं गलाया तुहांजो शान्ति मिलो, तियां जे पिता परमेशरे मिन्जो संसारा च भेज्या तियां इ हऊँ बी तुहांजो संसारा च भेज्या रां।

²² येढ़ा बोलीने तिने तिन्हां पर फूक मारी, कने गलाया, “पवित्र आत्मा जो ग्रहण करा।

²³ तिस माहणुये रे जे पाप तुहां माफ करी दणे, तिन्हांजो माफी मिली जाणी कने तिन्हांरे जे पाप तुहां माफ नीं करने, तिन्हां बगैर माफिया तेई रैणा।”

थोमा जो दर्शण

²⁴ थोमा सै जे बारां चेलयां चते था, कने तिस्सो जे दिदुमुस (जुड़वा) बोलां थे। तंजे यीशु आया था तां तिन्हांने सौगी नीं था।

²⁵ दुज्यां चेलयां तिस्सो बोल्या भई, “अहें प्रभुये जो देख्या।” पर तिने जबाब दित्या, “तदुआं तका जे हऊँ तिसरयां हत्थां च मेखां रे सुराख नीं देक्खी लुँ, कने तिन्हां च अपणी गुट्ठी पाईने नीं देक्खी लुँ, कने बखिया पर भाले रे सुराखा जो हात्थ नीं पाई लुँ तदुआं तक मिन्जो विश्वास नीं हूणा भई यीशु मूईरयां चते जिऊंदा हुईगरा।”

²⁶ अट्ठां दिनां बाद यीशुये रे चेले फेरी भीं घरा च कट्ठे हुये, कने थोमा तिन्हांने सौगी था। (दरवाजे पर ताला लगीरा था।) यीशु आया कने तिन्हां च खढ़ी गया, कने तिन्हांजो गलाया, “तुहांजो शान्ति मिलो।”

²⁷ फेरी तिने थोमा जो गलाया, आओ कने अपणी गुट्ठी मेरे हात्था च पाईने देख, कने अपणा हात्थ मेरे बखिया च पाईने देख। शक करना छड्डिने मांह पर विश्वास कर भई हऊँ जिऊंदा हुईगरा।

²⁸ थोमे जबाब दित्या, “मेरे प्रभु, हे मेरे परमेशरा!”

²⁹ यीशुये तिस्सो गलाया, “तैं मिन्जो देखीने मेरे पर विश्वास कित्या, पर सै लोक आशीषित ये तिन्हे जे मांह पर बिणा देखे विश्वास कित्या।”

इसा कताबा रा मकसद

³⁰ यीशुये अपणयां चेलयां जो होर बी बौहत सारे अदभुत चमत्कार दस्से, सै जे इसा कताबा च नीं लिखिरे।

³¹ पर ये सै जे लिखे गईरे, इस खातर भई तुहें विश्वास करो भई यीशु इ मसीह आ, सैई परमेशरा रा पुत्र आ। कने तिस पर विश्वास करीने अनन्त जीवन पाओ।