यूहन्ना 2 - बिलासपुरी नौआं नियम

गलील रे काना च पैहला चमत्कार

¹ फेरी तिज्जे दिन गलील जिले रे काना नगरा च इक ब्याह लगीरा था, तिसच जे यीशुये री माता बी आईरी थी।

² यीशु कने तिसरे चेले बी तिस ब्याह च न्यून्दा देईने सद्दीरे थे।

³ ताहली जे दाखरस घटणे लगया, तां यीशुये रिये माते तिसजो गलाया, “इन्हांले हुण होर दाखरस निआं।”

⁴ यीशुये तिसाजो गलाया, “माता ये तू मिन्जो कां दस्या राईं? मेरा बगत हल्तिये नीं आईरा।”

⁵ पर तिसरी माते सेवकां ने गलाया, “सै काम्म जे यीशु तुहांजो करने जो गलाओ तियां इ करयों।”

⁶ यहूदी रितिया रे मुताबक ऊथी पाणी भरने रे पत्थरा रे छे मटके रखीरे थे, सै मटके तियां इ थे जियां जे यहूदी शुद्धी करने खातर कम्मां च इस्तेमाल कराँ थे। हर मटके च कोई अस्सी ते इक सौ बीह लीटर तक पाणी औआं था।

⁷ यीशुये सेबकां जो गलाया, “मटकयां जो पाणिये ने भरी दो।” तिन्हें सारे मटके बिल्लां-बिल्लां तक भरीते।

⁸ फेरी तिने सेवकां ने बोल्या, “हुण थोड़ा जेआ पाणी इन्हां चते कड्डीने दाबता रा इन्तजाम कराणे औल़े मुखिये ले लेई जवा।” कने सै दाखरस तिसले लेईये।

⁹ ताहली जे तिने मुखिये सै पाणी चख्या सै जे दाखरस बणी गरा था, सै नीं जाणदा था भई ये कित्ते आया, पर तिन्हां सेबकां जो पता था तिन्हे जे पाणी कड्डया था, तां तिने लाड़े जो सद्दीने तिसजो गलाया,

¹⁰ “हर कोई पैहले बधिया दाखरस परोसां कने ताहली जे मेहमान पी ने तृप्त हुई जांये तिसते बाद सै दाखरस जे परोसया जां सै इतणा बधिया नीं हुन्दा; पर तैं बधिया दाखरस हुण तक संभाली ने रखीरा।”

¹¹ यीशुये गलील जिले रे काना नगरा च ये पैहला नशाण दस्सीने अपणी महिमा परगट कित्ती कने तिसरे चेलयां तिस पर विश्वास कित्या।

¹² इसते बाद यीशु कने तिसरी माता, तिसरे भाई कने तिसरे चेले कफरनहूम नगरा जो गये कने तित्थी किछ दिन रुके।

ब्यापारियां जो मन्दरा ते बाहर कड्डया जाणा

¹³ यहूदियां रा फसह रा त्योहार नजदीक आईरा था, कने यीशु यरूशलेम नगरा जो गया।

¹⁴ तित्थी परमेशरा रे मन्दरा च यीशुये देख्या भई लोक बैलां, भेड्डां कने कबूतरां जो बेचणे लगीरे कने सिक्कयां जो बदलने औल़े सौदागर अपणियां सीटां पर बैठिरे।

¹⁵ फेरी तिने रस्सियां रा कोड़ा बणाया कने सब्बीं जो बैलां कने भेड्डां समेत परमेशरा रे मन्दरा ते बाहरौ खदेड़ीत्या, सिक्कयां जो बदलने औल़े सौदागराँ रे सिक्के खन्डेरीने तिन्हांरियां चौकियां मुन्धियां करीने सट्टीतियां,

¹⁶ कबूतर बेचणे औल़यां जो तिने गलाया, “इन्हांजो इत्थीते बाहर लेई जवा कने मेरे पिता रे घरा जो बजार मता बणान्दे।”

¹⁷ फेरी तिसरे चेलयां जो याद आया भई पवित्रशास्त्रा च लिखिरा, “तेरे घरा खातर मेरा ये जनून मेरे अन्दर अग्गी साई भड़कां।”

¹⁸ इस पर यहूदी अगुवेयां यीशुये ने बोल्या, “तू जे ये काम्म करी रां तां अहांजो कुण जेआ नशाण दस्सीरां?”

¹⁹ फेरी यीशुये तिन्हांजो जबाब दित्या, भई “इस मन्दरा जो तोड़ी दो, मांज इस्सो तिन्नां दिनां च दोबारा बणाई देणा।”

²⁰ इस पर यहूदी अगुवेयां बोल्या, “इस मन्दरा बनाणे जो छताल़ि साल लगीरे कने तू इसजो तिन्नां दिनां च बनाणे री गल्ल करी रां!”

²¹ पर अपणिया गल्ला च यीशुये तिस मन्दरा रा जे जिकर कित्या था सै तिसरा अपणा इ शरीर था।

²² पर ताहली जे सै मूईरयां चते भीं ते जिऊंदा हुया तां तिसरे चेलयां जो याद आया भई यीशुये येढ़ा बोलीरा था; कने तिन्हे पवित्रशास्त्र सै जे मसीह रे मरने ते बाद जिऊंदा हुणे रे बारे च दस्सां यीशुये रियां गल्लां पर विश्वास कित्या।

यीशु माहणुआं रे मना जो जाणाँ

²³ ताहली जे यीशु यरूशलेम नगरा च फसह रे बगत त्योहारा च था, तां मतयां लोकें तिन्हां नशाणां जो जे सै दस्सां था देखीने तिस पर विश्वास कित्या।

²⁴ पर यीशुये अप्पूँजो तिन्हांरे भरोसे नीं छड्डया, काँह्भई सै सारयां लोकां जो जाणाँ था।

²⁵ तिस्सो इसा गल्ला री कोई जरूरत नीं थी भई कोई आईने तिसजो लोकां रे बारे च दस्सो, काँह्भई लोकां रे मना च क्या, इसजो सै जाणाँ था।