यूहन्ना 19 - बिलासपुरी नौआं नियम

¹ फेरी पिलातुसे सिपाईयां जो हुक्म दित्या भई यीशुये जो लेई जो कने तिस्सो कोड़े मरा।

² फेरी सिपाईयें कण्डेयां रा मुकट बणाईने तिसरे सिरा पर रख्या कने तिस्सो जामनी रंगा रा चोल़ा पैहनाया।

³ फेरी सै तिसले आईने बोलणे लगे, “यहूदियां रे राजा प्रणाम!” तिन्हें यीशुये जो थप्पड़ मारे।

⁴ पिलातुस इक बार भीं मैहला ते बाहर आया कने लोकां ने बोल्या, देक्खा, हऊँ तिस्सो तुहां लोकां रे सामणे बाहर ल्याया रां, तिसते जे तुहें ये जाणी लो भई मिन्जो तिसच कोई खोट नीं मिल्या।

⁵ फेरी यीशु बाहर आया, तिने सिरा पर कण्डयां रा मुकट कने जामनी रंगा रा चोल़ा पैहनीरा था, पिलातुसे लोकां ने बोल्या, “देक्खा, येआ सै माहणु।”

⁶ मुखियायाजकें कने मंदरा रे पैहरेदारें तिस्सो देखदे इ रौल़ा पाया, कने बोल्या, “इस्सो क्रूसा पर चढ़ाओ! इस्सो क्रूसा पर चढ़ाओ!” पिलातुसे तिन्हांने बोल्या, इस्सो तुहें इ लईजो कने क्रूसा पर चढ़ाओ, हऊँ इसच कोई खोट नीं पान्दा।

⁷ यहूदी अगुवेयां तिस्सो जबाब दित्या, “अहांरी इक व्यवस्था इ कने तिसा व्यवस्था रे मुतावक मौती रिया सजा रे लायक आ, काँह्भई ये अप्पूँजो परमेशरा रा पुत्र हुणे रा दावा करां।”

⁸ तां जे पिलातुसे तिन्हांजो ये बोलदे सुणेया, तां सै बौहत इ जादा डरीग्या।

⁹ तिने फेरी मैहला रे अन्दर जाईने, यीशुये ते पुच्छया, “तू किति तेआ?” पर यीशुये तिस्सो कोई जबाब नीं दित्या।

¹⁰ इस पर पिलातुसे तिस्सो बोल्या, क्या तू मेरने गलाणा नीं चाहन्दा? क्या तू नीं जाणदा भई मिन्जो तिज्जो छडणे रा बी अधिकार आ कने तिज्जो क्रूसा पर चढ़ाणे रा बी अधिकार आ।

¹¹ यीशुये तिस्सो जबाब दित्या, “जे परमेशरा रिया तरफा ते तिज्जो अधिकार नीं दित्या हुन्दा; तां तेरा मांह पर कोई अधिकार नीं हुंदा; इस खातर तिने माहणुये जे मिन्जो तेरे हवाले कित्तिरा, तिसरा पाप जादा।”

¹² ये सुणीने पिलातुस यीशुये जो छडणे री होर बी कोशिश करने लगया। यहूदी लोक चिखणे इ लगीगे, जे तैं इस्सो छडया तां तू बादशाह कैसरा रा मित्र निआं, सै जे अप्पूँजो राजा हुणे रा दावा करो, तां सै कैसरा रा बरोधी आ।

¹³ तंजे पिलातुसे ये गल्लां सुणियां तां, यीशुये जो पत्थरा रे चबुतरे पर लईग्या तिस पर जे बैट्ठीने न्याय कित्या जां, तिस्सो जे इब्रानी भाषा च गब्बता या पत्थरा रा फर्श बोलां ये, कने सै न्याय करने आसणा पर बैठिग्या।

¹⁴ ये फसह रे त्योहारा रे हफ्ते रिया त्यारिया रा दिन था। ये तकरीवन दोपैहरयां री गल्ल इ। पिलातुसे यहूदी लोकां ने बोल्या, देक्खा, ये रैया तुहांरा राजा।

¹⁵ फेरी सै रड़ाये, इस्सो लेई जावा, इस्सो मारी देवा, कने इस्सो क्रूसा पर चढ़ाओ! पिलातुसे तिन्हांजो बोल्या, क्या तुहें चाँह ये भई हऊँ तुहांरे राजे जो क्रूसा पर चढ़ाऊं? इस पर मुखियायाजकें जबाब दित्या, कैसरा जो छड्डिने अहांरा कोई दुज्जा राजा निआं।

¹⁶ फेरी पिलातुसे यीशुये जो क्रूसा पर चढ़ाणे खातर सपाईयां रे हवाले करित्या, कने सै तिस्सो बाहरौ लईगे;

क्रूसा पर चढ़ाया जाणा

¹⁷ फेरी सिपाईयें यीशुये जो अपणे कब्जे च लेआ। तिन्हें तिसरा क्रूस तिसले खुद चकाया कने तिस्सो यरूशलेम नगरा ते बाहर खोपड़ी नौआं रिया जगह पर लेईगे, तिस्सो जे इब्रानी भाषा च गुलगुता बोल्या जां।

¹⁸ तित्थी तिन्हें यीशुये जो दो होरी कैदियां ने सौगी क्रूस पर चढ़ाया। इक तिसरे सज्जे कने इक तिसरे खब्बे हत्था, यीशु तिन्हांरे बिच्चा औल़े क्रूसा पर चढ़ाया।

¹⁹ कने पिलातुस राजपाले दोषपत्र लिखीने क्रूसा पर लगवाया। तिसच लिखिरा था, यीशु नासरी, यहूदियां रा राजा।

²⁰ बौहत सारे यहूदी लोकें तिस दोष पत्रा जो पढ़या, काँह्भई तित्थी जे यीशुये जो क्रूसा पर लटकाया था, सै जगह यरूशलेम नगरा ते नेड़े थी, कने ये पत्र यूनानी, लतीनी कने इब्रानी भाषा च लिखिरा था।

²¹ तां यहूदियां रे मुखियेयाजकें पिलातुस ने बोल्या, यहूदियां रा राजा नीं लिख, पर ये लिख, भई तिने बोल्या, भई “हऊँ यहूदियां रा राजा।”

²² पिलातुसे तिन्हांजो जबाब दित्या, मैं सै जे लिखित्या, सै लिखित्या।

²³ तंजे सिपाईयें यीशुये जो क्रूसा पर लटकाईत्या, तां चऊँ सिपाईयें तिसरे कपड़े अप्पूँ चियें चऊँ हिस्यां च बंडी ले। इक्की सपाईये खातर इक हिस्सा था, तिने तिसरा चोल़ा बी त्वारील्या काँह्भई सै उपरा ते थल्ले तकौ बिणा किसी सलाई देईने बुणीरा था।

²⁴ इस खातर सिपाईयें इक्की दूये ने बोल्या, भई अहां इस्सो फाड़ना निआं, पर इस पर पर्चियां पाईने तिसरा जे नौं निकलगा तिस जोई मिलणा। काँह्भई पवित्रशास्त्रा च सै जे लिख्या गईरा सै पूरा हुईजो, तिन्हें मेरे कपड़े बी अप्पूँ चियें बंडी ले, कने मेरे कुरते खातर पर्चियां पाईयां। सिपाईयें ठीक येढ़ा इ कित्या।

²⁵ पर यीशुये रे क्रूसा ले तिसरी माता, कने तिसरिया माता री बैहण, क्लोपास री जनाना मरियम, कने मगदल गाँवां री मरियम बी खढ़ी रियां थिआं।

²⁶ तंजे यीशुये अपणी माता कने अपणे प्यारे चेले जो तित्थी खढ़िरे देख्या, तां अपणिया माता ने बोल्या, “माता, ये तेरा पुत्र आ।”

²⁷ फेरी तिने अपणे चेले जो बोल्या, “ये तेरी माता इ।” तिस इ बगता ते सै चेला यीशुये रिया माता जो अपणे घरें लेईग्या कने अपणे पास रक्खया।

यीशुये री मौत

²⁸ इसते बाद तंजे यीशुये जो पता लगीग्या भई तिसरा सारा काम्म पूरा हुईग्या, इसी खातर बी भई पवित्रशास्त्रा री गल्ल पूरी हो तिने बोल्या, मिन्जो ध्याय लगीरी,

²⁹ तित्थी सिरके ने भरीरा इक बरतण रखीरा था। इस खातर तिन्हें सपंजा जो सिरके च डबोया, कने जूफा रे डाल़ा रा डन्डा लेईने तिस पर रक्खीने यीशुये रे मुँआं ने लाया।

³⁰ फेरी तंजे यीशुये तिसजो चखीने बोल्या भई “सब किछ पूरा हुआ।” तां तिने अपणा सिर थल्ले खौ कित्या कने प्राण छड्डीते।

भाले ने बिन्या जाणा

³¹ हुण ये त्यारिया रा दिन था कने अगले दिन फसह रा कने विस्राम रा दिन दोन्नों इ थे। ये यहूदी लोकां रे खातर इक खास दिन था कने सै नीं चाहन्दे थे भई इस दिन किसी रा बी शरीर क्रूसा पर लटकीरा रौ। इस खातर यहूदियें पिलातुस ने विनती कित्ती भई तिन्हांरियां लत्तां तोड़ी दित्तियां जाओ ताकि तिन्हांरी मौत छोड़ हुईजो कने तिन्हांरे शब क्रूसा परा ते थल्ले उतारे जाई सक्को।

³² इस खातर सिपाई आये कने तिन्हां चते तिन्हां दुईं कैदियां रियां, लत्तां तोड़ी तियां, सै जे यीशुये सौगी क्रूसा पर चढ़ाईरे थे।

³³ तंजे सै यीशुये लौ आये, तां तिन्हें देख्या, भई सै पैहले इ मरीगरा था। इस खातर तिन्हें तिसरियां लतां नीं तोड़ियां।

³⁴ पर तिन्हां चते इक्की सिपाईये यीशुये रिया बखिया च अपणा भाला मारया, तिसते जे ताहलूं इ खून कने पाणी निकल़या।

³⁵ तिने माहणुये जे ये गल्लां हुन्दे हुये देखियां, तिने इ इस बारे च गवाही दित्ति, ताकि तुहें बी यीशुये पर विश्वास करी सक्को। तिसरी ये गवाही सच्ची, कने सै जाणाँ भई तिने सच्च बोल्या।

³⁶ ये इस खातर हुआ भई, पवित्रशास्त्रा च लिखिरा वचन पूरा हुई जाओ, “तिसरी कोई बी हड्डी नीं टुटणी।”

³⁷ कने इक होर गल्ल पूई हुई सै जे पवित्रशास्त्रा च लिखिरी भई, “तिस्सो तिन्हें भाले ने बिन्हया, तिन्हां इ तिसखा देखणा।”

यीशुये रा कब्रा च रखया जाणा

³⁸ इसते बाद अरिमतियाह गाँवां रे यूसुफे सै जे यीशुये रा चेला था, (पर यहूदी अगुवेयां रे डरा ते इसा गल्ला जो लुकोई रक्खां था) तिने पिलातुसा ते विनती किति, भई यीशुये रिया लाशा जो तित्थी ते नेणे रा हुक्म देओ। पिलातुसे तिस्सो इजाजत दईती, कने सै तित्थी आईने तिसरिया लाशा जो लईग्या।

³⁹ निकुदेमुसे बी, तित्थी तकरीवन तेती किलो गन्धरस कने एलोवेरा मलाईने ल्या। ये सैई नीकुदेमुस था सै जे यीशुये लौ राति रे बगत आया था,

⁴⁰ फेरी तिन्हें यीशुये रिया लाशा जो लेआ कने यहूदियां रे दबणे रिया प्रथा रे मुतावक, तिस्सो खुशबुदार समान्ना सौगी कफ़णा च लपेटित्या।

⁴¹ तिस जगह पर जे यीशुये जो क्रूसा पर चढ़ाईरा था, तिसरे नेड़े इक बाग बी था। कने तिस बागा च इक नौंईं कब्र थी, तिसच जे कदीं किसी रिया लाशा जो नीं रखीरा था।

⁴² कने सै कब्र बौहत नेड़े थी, इस खातर तिन्हे यीशुये रिया लाशा जो तिसच रखीत्या। कने ये यहूदियां रा विस्रामा रिया त्यारिया रा दिन था,