यूहन्ना 18 - बिलासपुरी नौआं नियम

बगीचे च यीशुये रा पकड़वाया जाणा

¹ ताहली जे यीशुये प्राथना खत्म कित्ती, तां सै अपणे चेलयां सौगी किद्रोन नाले रे पार तित्थी जे इक बागीचा था तिसच गए।

² धोखा देणे औल़ा यहूदा बी, तिसा जगह जो जाणाँ था, काँह्भई यीशु तिसा जगह जो अपणे चेलयां समेत जान्दा औन्दा रैयां था।

³ तांई यहूदा, अपणे सौगी रोमी सेना रे हथियारा औल़े माहणुआं, कने मुखियायाजकें कने फरीसियां रे भेजीरे सपाईयां जो मशालां कने हथियाराँ समेत लईने, तित्थी आईग्या।

⁴ फेरी यीशु तिन्हां सारियां गल्लां जो सै जे तिस सौगी हुणे औल़ियां थिआं जाणीने अग्गे बधया कने सिपाईयां ते पुच्छणे लगया, “तुहें किस्सो टोले रायें?”

⁵ तिन्हें यीशुये जो जवाब दित्या, नासरत नगरा रे यीशुये जो। यीशुये तिन्हांजो गलाया, “सै हऊँ आ।” तित्थी यहूदा खढ़िरा था, तिने जे तिस्सो धोखा दित्या।

⁶ ताहली जे यीशुये बोल्या, भई “सै हऊँ इ हाया” सै पिच्छे हटिने धरतिया पर पईगे।

⁷ यीशुये तिन्हांजो फेरी भीं पुच्छया, “तुहें किस्सो टोले रायें?” तिन्हें तिस्सो जवाब दित्या, नासरत रे यीशुये जो।

⁸ यीशुये जवाब दित्या मैं तुहांजो गलाई चुक्कीरा, “सै हऊँ इ हाया; जे तुहें मिन्जो टोल़या रायें, तां मेरे सारयां चेलयां जो जाणे देआ।”

⁹ ये इस इ खातर हुया, भई तिसरी पैहले री गलाई रियां गल्लां पूरी हुई सक्को, तियां जे तिने बोल्या था, “मैं तिन्हां चते, सै जे तैं मिन्जो दित्तिरे थे, किसी जो बी नीं गवाया।”

¹⁰ फेरी शमौन पतरसा ले इक तलवार थी, तिने तलवार कड्डी, कने महायाजका रे दास्सा पर चलाईने तिसरा खब्बा कान्न बडीने तिस्सो घायल करित्या। तिस दास्सा रा नौं मलखुस था।

¹¹ तां यीशुये पतरसा जो गलाया, “अपणिया तलवारा जो मयाना च रख: क्या हऊँ पीड़ा जो नीं सऊँ सै जे पिता परमेशरे मिन्जो दित्तिरी?”

हन्ना रे सामणे यीशु

¹² फेरी रोमी टुकड़िया रे सिपाईयें कने तिन्हांरे सुबेदारें कने यहूदियां रे मन्दरा रे पैहरा देणे औल़यां यीशुये जो कैद करील्या।

¹³ कने तिस्सो बन्हीने पैहले हन्ना लौ लईगे, सै जे तिस साल्ला रे महायाजक कैफा रा ससुर था

¹⁴ कैफा सै माहणु था तिने जे यहूदी अगुवेयां जो सलाह दित्ति थी भई सब्बीं लोकां रे बजाय इक्की रा मरना ठीक आ।

पतरसा रा इन्कार

¹⁵ शमौन पतरस कने इक होर चेला यीशुये रे पिच्छे आईगे। महायाजक इस चेले जो पछयाणां था इस खातर सै यीशुये सौगी महायाजका रे अंगणा तक आईग्या।

¹⁶ पर पतरस दरवाजे बाहर इ रुकिग्या। फेरी महायाजका जो जाणने औल़ा दुज्जा चेला बाहर गया, कने दवारा पर पैहरा देणे औल़िया दासिया ने गलाई ने, पतरसा जो अन्दरौ ली अन्दया।

¹⁷ तां दवारा पर पैहरा देणे औल़ी तिसे दासिये पतरसा जो गलाया, मिन्जो लगाँ भई तू बी यीशुये रा इक चेला? पतरसे जबाब दित्या, नां हऊँ निआं।

¹⁸ ठण्ड बौहत हुणे रिया वजह ते दास कने मन्दरा रे पैहरेदार आग्ग बाल़ी कने खड़ीने आग्ग सेकया राँ थे, पतरस बी तिन्हाने खड़ीने आग्ग सेकया राँ था।

महांयाजका रे जरिये यीशुये री पूछताछ

¹⁹ फेरी महायाजके यीशुये ते तिसरे चेलयां कने तिसरिया शिक्षा रे बारे च पुच्छया।

²⁰ यीशुये जबाब दित्या, “मैं सदा लोकां च रईने सारयां ने खुल्लेआम गल्ल-बात किति; मैं यहूदी सभा घराँ कने मन्दरा च तित्थी जे सारे लोक कट्ठे हुआं ये, सदा उपदेश दित्या। मैं कदीं बी लुखी-छिपिने किछ नीं गलाया।

²¹ फेरी तू मेरते काँह ये स्वाल पुच्छया राँ? तिन्हांते पुछ, मैं क्या-क्या गलाया, तिन्हें जे मिन्जो सुणया। मैं जो किछ गलाया, मेरे सुणने औल़े ही दस्सी सक्कां ये।”

²² तंजे तिने येढ़ा गलाया तां मन्दरा रे पैहरेदारे सै जे तित्थी खढ़िरा था, यीशुये जो इक थप्पड़ मारया, कने गलाया तैं महायाजका जो ईंयाँ जबाब देणे री हिम्मत कियां किति।

²³ यीशुये तिस्सो जबाब दित्या, “जे हऊँ बुरा गलाया राँ तां तू साबित कर कने दस भई इसच बुरा क्या था, कने जे मैं ठीक गलाया तां तू मिन्जो काँह मारया राँ।”

²⁴ फेरी हन्ने यीशुये जो बझीरे जोई महायाजक कैफा लौ भेजित्या।

पतरसा रा भीं ते इन्कार करना

²⁵ ताहली जे शमौन पतरस खढ़ी ने आग्ग सेक्या राँ था, तां तिन्हें तिस्सो पुच्छया, क्या तू तिसरा चेला? तिने नां दित्ति, कने गलाया “हऊँ निआं।”

²⁶ महायाजका रा इक सेवक सै जे तिस दास्सा रा रिशतेदार था, तिसरा जे पतरसे कान्न बढया था, पुच्छया दस्स, “क्या मैं तिज्जो यीशुये सौगी बगीचे च नीं देख्या था?”

²⁷ तां फेरी भीं पतरसे नां दईती। कने ताहलूं इ कुकड़े झांग दईती।

पिलातुस रे सामणे यीशु

²⁸ फेरी सै सवेरे रे बगत यीशुये जो कैफा रे घरा ते रोम रे राजपाल पिलातुस ले मैहला जो लईगे, पर यहूदी लोकां चते कोई बी राजपाला रे मैहला च जान्दा, तां सै अपवित्र हुई जान्दा कने तिस्सो फसह री रोटी खाणे री अनुमति नीं मिलदी।

²⁹ इस खातर राजपाल पिलातुस बाहर आईने तिन्हांने मिलया कने बोल्या, “इस माहणुये रा क्या दोष आ?”

³⁰ तिन्हें जबाब दित्या, “जे ये अपराधी नीं हुंदा, तां अहें इस्सो तेरे हवाले नीं करदे।”

³¹ पिलातुसे तिन्हांजो गलाया, “तुहें लोक इसजो लईजो कने अपणिया व्यवस्था रे मुतावक इसरा न्याय करा।” यहूदी अगुवेयां तिस्सो जबाब दित्या, “अहांले किसी जो मारने रा कोई अधिकार नींआ।”

³² ये इस खातर हुआ भई यीशुये री ये बोल्ली रियां गल्लां सच्च साबित हुईजो तिन्हांरे जरिये जे तिने संकेत दित्या था भई तिसरी मौत किस तरीके री हुणी।

³³ फेरी पिलातुस राजपाल्ला रे मैहला च वापस चलिग्या कने यीशुये जो मैहला रे अन्दर सद्दीने तिसते पुच्छया, क्या तू यहूदियां रा राजा?

³⁴ यीशुये जबाब दित्या, “क्या तुहें ये गल्ल अपणिया तरफा ते पुच्छया रांये, या किसी होरी तुहांते मेरे बारे च ये बोल्या?”

³⁵ पिलातुसे गलाया, तू जाणां भई हऊँ यहूदी नींआ, तैं येढ़ा क्या कित्तिरा भई तेरे लोकें कने मुखियायाजकें तिज्जो मेरे हवाले करित्या?

³⁶ यीशुये जबाब दित्या, “मेरा राज इसा धरतिया रा निआं। जे मेरा राज इसा धरतिया रा हुंदा, तां मेरे चेले मिन्जो यहूदियां ते बचाणे खातर लड़ाई करदे, पर हुण मेरा राज इत्थी रा निआं।”

³⁷ पिलातुसे तिस्सो गलाया, तां क्या तू राजा? यीशुये जबाब दित्या, “तू बोलां भई हऊँ राजा। हऊँ इस खातर पैदा हुईने संसारा च आया भई सच्चाईया रे बारे च सखाई सक्कूँ। सै माहणु जे सच्चाईया ने प्यार रक्खां ये सै मेरा बचन सुणां ये।”

³⁸ पिलातुसे तिस्सो पुच्छया, सच्च क्या? कने ये बोलीने, पिलातुस बाहर आईने यहूदी अगुवेयां ले गया, कने तिन्हांने बोल्या हऊँ तिसच कोई खोट नीं कड्डी सक्कया।

मौती रिया सजा रा हुक्म

³⁹ पर तुहांरी ये रीति भई फसह रे त्योहारा पर हऊँ तुहां खातर किसी कैदिये जो छड्डी सक्कां। तां तुहें क्या चाँये भई हऊँ तुहां खातर इस यहूदियां रे राजे जो छड्डी दूँ।

⁴⁰ तां सै फेरी भीं जोरा-जोरा ने रौल़ा पाणे लगे, इस्सो नीं पर बरअब्बा जो छड्डी दे। बरअब्बा खुंखार मुजरिम था।