यूहन्ना 15 - बिलासपुरी नौआं नियमयीशु अंगूरां री सच्ची बेल 1 यीशुये गलाया, “हऊँ अँगूरा रिया बेली साई आ; कने मेरा पिता तिसरा माली आ। 2 सै जे डाल़ी मेरे च हई कने फल़ नीं ल्यान्दी, तिस्सो सै बढी देआं। कने सै डालियां जे फल़ देईयां, तिन्हांजो सै छांगी देआं भई सै होर बौहत फल़ ल्याओ। 3 तुहां लोकां जो सै जे उपदेश मैं दित्तिरा, तिसरिया वजह ते तुहें पैहले तेई सुच्चे हुईगरे। 4 मेरे सौगी जुड़ीरे रौआ कने मांह तुहां सौगी रैहणा। जिस तरीके ने इक डाल़ी फल़ नीं देई सकदी, तदुआं तक जे सै बेली ने जुड़ी नीं जान्दी, इयां इ जे तुहें मांह च नींये, तां किछ अच्छा नीं करी सकदे। 5 सै बेल हऊँ इ कने तुहें तिसरियां डाल़ियां इ। सै जे मांह च बणीरा रैआं, कने हऊँ तिसच, तां सै बौहत फल़वन्त हुआं, काँह्भई मेरते बिणा तुहें किछ नीं करी सकदे। 6 जे कोई मांहने जुड़ीरा नीं रैंहदा तां सै टुटी रिया डालिया साई सटी दित्या जां कने सै सुकी जां। फेरी तिन्हां डालियां जो कट्ठयां करीने अग्गी च पाईने फुकी दें। 7 जे तुहें मेरेने जुड़ीरे रौ कने मेरे उपदेशा रे मुतावक चलदे रौ, तां जो किछ तुहें चाँह यें मंगा, सै तुहांजो मिली जाणा। 8 इसते मेरे पिता री बौहत बडयाई हुआं इ भई तुहें मेरे चेले बणीने बौहत फल़ पैदा करने औले हुईजो। 9 तियां जे मेरे पिता परमेशरे मेरने प्यार कित्या, तियां इ मैं बी तुहांजो प्यार कित्या। मेरे प्यारा च बणीरे रौआ। 10 जे तुहें मेरयां हुक्मां जो मनगे तां तुहां मेरे प्यारा च बणीरे रैहणा। तियां जे हऊँ पिता परमेशरा रे हुक्मां रा पालन करीने तिसरे प्यारा च बणीरा रैआं। 11 मैं तुहांजो ये गल्लां इस खातर बोलियां भई मेरा आनन्द तुहां च बणीरा रौ कने तुहांरा आनन्द उमड़दा रौ। 12 “मेरा हुक्म येआ भई तुहें अप्पूँ चियें प्यार रखा, इयां इ तियां जे मैं तुहांजो प्यार कित्या। 13 बडे ते बडा प्यार येआ भई कोई माहणु अपणे दोस्तां खातर अपणी जान बी दई दो, येढ़ा प्यार करना किसी बी माहणुये रे बशा रा काम्म निआं। 14 जे तुहें मेरिया दस्सी रिया गल्ला पर चलां ये सै जे हऊँ बोलां, तां तुहें मेरे सच्चे दोस्त बणी जांये। 15 हूणा ते बाद हऊँ तुहांजो दास नीं बोलदा; काँह्भई दास नीं जाणदा भई तिन्हांरा मालक क्या-क्या करया राँ, पर हऊँ तुहांजो दोस्त बोलां, काँह्भई मैं तुहांजो सारियां गल्लां बातां दस्सी रियां, सै जे मैं अपणे पिता ते सुणी रियां। 16 तुहें मिन्जो नीं चुणया, पर मैं तुहांजो अपणे खातर चुणीरा; कने नियुक्त कित्तिरा भई तुहें जाओ कने कामयाब हुईने औआ, हऊँ चांह भई तुहांरी कमयाबी बणीरी रौ, काँह्भई ताहलूं जे तुहें पिता ते मेरे चेले हुणे रे नाते जो किछ मंग्गो, तां सै तुहांजो मिली जाओ। 17 इन्हां गल्लां रा हुक्म हऊँ तुहांजो इस खातर दस्यारां भई तुहें इक्की दुजे ने प्यार रखा। संसारा रा बैर 18 “जे ये संसार रे लोक तुहांजो बैर रखां ये तां याद रखा भई तिन्हें तुहांते पैहले मेरने बैर रखया। 19 जे तुहें इस संसारा रे लोकां साई हुंदे, तां संसारा रे लोक तुहांजो अप्पूँ साई प्यार करदे, पर तुहें संसारा रे नींये पर मैं तुहांजो संसारा चते चुणील्या; इस खातर संसार तुहांजो बैर कराँ। 20 मेरी गलाई रियां गल्लां जो याद रखा भई ‘इक दास अपणे मालका ते बडा निआं।’ इस खातर जे तिन्हें मिन्जो सताया तां तिन्हां तुहांजो बी सताणा; जे तिन्हें मेरा उपदेश मन्नया, तां तिन्हां तुहांरियां गल्लां बी मनणियां। 21 मेरा चेला हुणे रिया वजह ते लोकां तुहांजो ये सब किछ करना, काँह्भई सै नीं जाणदे भई मिन्जो किने भेज्जिरा। 22 जे हऊँ नीं औन्दा कने तिन्हांने गल्लां नीं करदा, तां तिन्हां चते किसी बी पापी नीं हूणा था। पर हुण अपणे पापां खातर तिन्हाले कोई बी बहान्ना निआं। 23 सै जे मेरने बैर रखां, सै पिता ने बी बैर रखां। 24 जे हऊँ तिन्हां बिच सै चमत्कार नीं करदा सै जे किन्हिये बी नीं कित्ते, तां सै पापां रे दोषी नीं हुंदे; पर हुण तंजे तिन्हें सब किछ देखीने बी मेरने कने मेरे पिता ने बैर रखया। 25 पर ये इस खातर हुआ भई सै वचन पूरा ओ सै जे तिन्हां रिया व्यवस्था च लिखिरा, ‘तिन्हें बगैर किसी कारणा ते मेरने बैर रखया।’ 26 पर तिस बगत जे सहायक औणा, ये सै पवित्र आत्मा सै जे पिता परमेशरा रिया तरफा ते औआं कने सै जे सच्च आ तिस्सो प्रगट करां। ताहली जे तिस औणा, तां तिस तुहांजो मेरे बारे च दसणा। 27 कने तुहांजो बी मेरे बारे च दुज्यां जो दसणा चाहिन्दा काँह्भई तुहें शुरु ते ही मेरने सौगी रै। |
This work is licensed under Creative Commons Attribution-ShareAlike 4.0 License.