यूहन्ना 12 - बिलासपुरी नौआं नियम

यीशुये रे पैरा पर इत्र मल़णा

¹ यीशु फसह रे त्योहारा ते छे दिन पैहले बैतनिय्याह च आया तित्थी जे लाजर था, तिस्सो जे यीशुये मूईरयां चते जिऊंदा कित्या था।

² तित्थी यीशुये रा आदर करने खातर तिन्हें धाम बणाई; कने मार्था परोसया राँ थी। यीशुये सौगी रोटी खाणे औल़यां च लाजर बी था।

³ तां मरियमे तिन्न सौ मिली लीटर असली जटामांसी रा बड़ा मैंहगा इत्र लेईने यीशुये रे पैरा पर मल़या, कने अपणयां बाल़ां ने तिसरे पैर साफ कित्ते, कने इत्रा रिया खुशवुआ ते सारा घर मैहकीग्या।

⁴ पर तिसरयां चेलयां चते यहूदा इस्करियोति नौआं रा इक चेला सै जे तिस्सो पकड़वाणा चां था, सै बोलणे लगया,

⁵ “ये इत्र तिन्न सौ दिनार रा बेच्चीने गरीबां जो काँह नीं दित्या?”

⁶ तिने सै गल्ल इस खातर नीं बोल्ली थी भई तिस्सो गरीबां री चिंता थी पर इस खातर बोल्ली थी भई सै चोर था, कने तिसले तिन्हांरी पैसयां री थैली रेआं थी कने तिसच सै जो किछ पां थे, सै कड्डी लेआं था।

⁷ यीशुये बोल्या, “इसाजो रैहणे देआ तंग नीं करा, ये वगता ते पैहले मेरे दफनाये जाणे री त्यारी करया राँई।

⁸ काँह्भई गरीब लोकां त सदा तुहां सौगी रैहणा, पर मांह सदा तुहांरे सौगी नीं रैहणा।”

लाजरा रे खलाफ शाजिश

⁹ यहूदी लोकां री इक बड्डी भीड़ा जो ताहली जे ये पता लगया भई यीशु ऊत्थी बैतनिय्याह च था, तां लोक तिसने मिलणे जो आए। सै न सिर्फ यीशुये जो बल्कि तिस लाजरा जो बी देखणे खातर आए थे, तिस्सो जे यीशुये मूईरयां चते जिऊंदा कित्या था।

¹⁰ इस खातर मुखियायाजकें लाजरा जो बी मारने री योजना बणाई,

¹¹ काँह्भई तिसरिया वजह ते बौहत सारे यहूदी लोकें अपणे अगुवेयां जो छड्डिने यीशुये पर विश्वास कित्या।

यरूशलेम च यीशुये रा स्वागत

¹² दुज्जे दिन बौहती लोकें त्योहारा रे आईरे थे सुणया भई यीशु यरूशलेम जो आय राँ।

¹³ इस खातर तिने खजूरा रियां डालियां लईयां कने तिसने मिलणे जो चलीपे, कने बोलणे लगे, “परमेशरा री जय हो!” “आशीषित आ सै माहणु सै जे प्रभुये रे नौआं ते औआं।” “आशीषित आ इस्राएल रा राजा!”

¹⁴ फेरी यीशुये जो गधे रा इक बच्चा मिलया कने तियां जे सै यरूशलेम नगरा च आया सै तिस पर बैठिग्या, तियां जे पवित्रशास्त्रा च लिखिरा तियां इ हुया:

¹⁵ “यरूशलेम रे लोको, घबरान्दे मता; देक्खा, तुहांरा राजा गधे रे बच्चे पर बैठीने आया रां।”

¹⁶ तिसरे चेले ये गल्लां पैहले नीं समझे थे, पर तंजे यीशुये री महिमा प्रगट हुई तां तिन्हांजो याद आया भई ये गल्लां तिसरे बारे च लिखी रियां थिआं, कने होरीं लोकें तिसने इस तरिके राई बर्ताब कित्या था।

¹⁷ भीड़ा चते तिन्हें लोकें गवाही दित्ति सै जे तिस वक्त तिस सौगी थे ताहलूं जे लाजरा जो कब्रा चते सद्दीने जिऊंदा कित्या था।

¹⁸ बौहत सारे लोक यीशुये ने मिलणे खातर आये थे, काँह्भई तिन्हें इस चमत्कारा रे बारे च सुणया था।

¹⁹ तां फरीसी अप्पूँ चियें बोलणे लगे, “सोच्चा अहें किछ मनी करी सकदे। देक्खा, संसारा रे सारे लोक इसरे इ पिच्छे चली परे।”

यूनानियां रा यीशुये जो टोल़णा

²⁰ तित्थी किछ यूनानी थे सै जे इस त्योहारा च अराधना करने खातर यरूशलेम आईरे थे।

²¹ तिन्हें गलील प्रदेशा रे बैतसैदा नगरा रे रैहणे औल़े फिलिप्पुसा ले जाईने विनती कित्ती, “श्रीमान! अहें यीशुये ने मिलणा चांये।”

²² फिलिप्पुसे आईने अन्द्रियासा ने बोल्या, तां अन्द्रियासे कने फिलिप्पुसे जाईने यीशुये जो बोल्या।

²³ पर यीशुये तिन्हांजो बोल्या, “सै वगत आई गरा भई माहणुये रे पुत्रा री महिमा हो।

²⁴ हऊँ तुहांजो सच-सच बोलां भई तदुआं तकौ जे कणका रा दाणा मिट्टिया च मिलीने मरी नीं जान्दा, तदुआं तकौ सै कल्हा इ रई जां; पर तंजे मरी जां, तां मता फल़ ल्यावां।

²⁵ सै जे अपणे प्राणा ने प्यार कराँ, सै तिस्सो नाश करां; कने सै जे इस संसारा च अपणे प्राणा ने बैर करां, सै अनन्त जीवन पाणे खातर तिस्सो संभाली रक्खां।

²⁶ जे कोई मेरी सेवा करना चाओ, तां सै मेरे चेले बणो; कने तित्थी जे हऊँ आ, तित्थी मेरा सेवक बी हूणा। जे कोई मेरी सेवा करो, तां पिता परमेशरा तिसरा आदर करना।

क्रूसा रिया मौती रा संकेत

²⁷ “हुण मेरा जी घबराया राँ। इस खातर हुण हऊँ क्या बोलूं? ‘हे पिता, मिन्जो इस दुखा रिया घड़िया ते बचा?’ काँह्भई हऊँ इस इ वजह ते इस संसारा च आया ताकि दुख सहूँ।

²⁸ हे पिता परमेशर, अपणी महिमा परगट कर।” तिस इ वगत स्वर्गा ते ये अवाज़ आई, “मैं इसरी महिमा कित्ती, कने फेरी दोबारा करनी।”

²⁹ फेरी सै लोक जे तिथी खढ़िरे थे कने सुणया राँ थे तिन्हें बोल्या भई “बद्दल़ गरजया।” होरसी बोल्या, “कोई स्वर्गदूत इसने गलाया।”

³⁰ इस पर यीशुये तिन्हांजो बोल्या, “ये अवाज मेरे खातर नीं, पर तुहां लोकां रे फायदे खातर थी।

³¹ हुण इस संसारा रे लोकां रा न्याय करने रा वगत आईगरा, कने हुण परमेशरा इस संसारा पर राज करने औल़े शैतान्ना रिया शक्तिया जो खत्म करी देणा;

³² कने ताहली जे हऊँ धरतिया परा ते थोड़ा ऊपर चढ़ाया जाणा, तां मांह सब्बीं लोकां री अगुवाई करनी।”

³³ येढ़ा बोलीने तिने ये संकेत दित्या भई तिसरी मौत किस तरिके री हूणी।

³⁴ इस पर लोकें तिस्सो बोल्या, “अहें पवित्रशास्त्रा री गल्ल सुणिरी भई मसीह सदा जिऊंदा रैहणा, फेरी तू काँह बोलां, भई माहणुये रे पुत्रा जो ऊच्चे पर चढ़ाया जाणा जरूरी आ? ये माहणुये रा पुत्र कुण आ?”

³⁵ फेरी यीशुये तिन्हांने बोल्या, “जोति तुहांरे बिच हल्तियें किछ वगत होर रैहणी, तदुआं तका जे जोति तुहांले इ अग्गे बधदे रौआ, किति येढ़ा नीं हो भई अन्धेरा तुहांजो घेरी लो; सै जे अन्धेरे च चलां सै नीं जाणदा भई सै कितो जाया राँ।

³⁶ तदुआं तका जे जोति तुहांले इ, जोतिया पर विश्वास करा, तिसते जे तुहें जोतिया रे बच्चे बणी सक्‍को।” ये गल्लां बोलीने यीशु चलिग्या कने तिन्हांते दूर रैहणे लगया।

यहूदियां रा अविश्वासी बणीरा रैहणा

³⁷ यीशुये तिन्हांरे सामणे इतणे जादा चमत्कार दस्से, तां बी तिन्हे तिस पर विश्वास नीं कित्या;

³⁸ येढ़ा इस खातर हुया भई यशायाह भविष्यवक्ते सै जे बोल्या था सै पूरा हो; “प्रभु, किन्हिये बी अहांरे सन्देशा पर विश्वास नीं कित्या, कने कोई नीं समझदा भई ये तेरी पराक्रमी सामर्थ इ?”

³⁹ सै इस वजह ते विश्वास नीं करी सक्के, काँह्भई यशायाह दोबारा बोलां:

⁴⁰ “तिने तिन्हांरियां आक्खीं अन्ही करी तियां, ताकि सै देक्खी नीं सक्को, कने तिन्हांरे डमाक बंद करीते ताकि सै समझी नीं सक्को। नैत सै मेरी तरफ मुड़ी जान्दे कने हऊँ तिन्हांजो ठीक करी देंदा।”

⁴¹ यशायाह ये गल्लां इस खातर बोलियां भई तिने खुद यीशुये री महिमा देक्खी, कने तिने तिसरे बारे च गल्लां बी कित्ती यां।

⁴² तां बी अधिकारियां चते बौहतीं तिस पर विश्वास कित्या, पर सै फरीसियां रिया वजह ते यीशुये जो सब्बीं रे सामणे इस खातर नीं ग्रहण करां थे, भई सै किति यहूदी सभा घर चते तिन्हाजो कड्डी नीं देओ;

⁴³ काँह्भई तिन्हांजो परमेशरा रे आदरा रे बजाय माहणुआं रा आदर करना जादा प्यारा लगां था।

यीशुये रे बचन न्याय रा आधार

⁴⁴ यीशुये ऊच्चिया अवाज़ा च बोल्या, “सै जे मेरे पर विश्वास कराँ, सै मेरे पर नीं पर मेरे भेजणे औल़े पर विश्वास कराँ।

⁴⁵ कने सै जे मिन्जो देक्खां सै मेरे भेजणे औल़े जो देक्खां।

⁴⁶ हऊँ संसारा च जोत बणीने आईरा, इस खातर भई सै जे मेरे पर विश्वास करगा सै अन्धेरे च नीं रौ।

⁴⁷ जो कोई मेरियां गल्लां सुणीने नीं मन्नो, तां मांह तिस्सो दोषी नीं बनाणा; काँह्भई हऊँ संसारा च दोषी बनाणे नीं आईरा, पर संसारा जो बचाणे खातर आईरा।

⁴⁸ सै जे मिन्जो छोट्टा जाणाँ सै मेरियां गल्लां मनदा निआं तिस्सो दोषी बनाणे औल़ा त इक आ; मतलब सै जे वचन मैं बोल्या, तिस इ न्याय रे दिन तिस्सो दोषी ठराना।

⁴⁹ काँह्भई मैं अपणिया खा ते गल्लां नीं कित्ती यां; पर पिता तिने जे मिन्जो भेज्या तिने इ मिन्जो हुक्म दितिरा भई क्या-क्या बोलूं कने क्या-क्या नीं बोलूं?

⁵⁰ कने हऊँ जाणा भई तिसरा हुक्म अनन्त जीवन आ इस खातर हऊँ जो किछ बोलां, सै तेढ़ा जे पिता मिन्जो बोल्या तेढ़ा इ हऊँ बोलां।”