यूहन्ना 11 - बिलासपुरी नौआं नियम

लाजरा री मौत

¹ लाजर नौआं रा इक माहणु बमार पैईग्या। सै मरियम कने तिसारी बैहण मार्था रे गाँव बैतनिय्याह रा बसिन्दा था।

² ये सैई मरियम थी तिसे जे प्रभुये पर इत्र मल़या था कने अपणे सिरा रे बाल़ां ने प्रभुये रे पैर साफ कित्ते थे। ये बमार लाजर इसारा भाई था।

³ इस खातर इस रिये भैणे तिस्सो दस्सीत्या, “हे प्रभु, देख, तिसने जे तुहें प्यार कराँ थे, सै बमार आ।”

⁴ यीशुये ताहली जे ये सुणया तां सै बोलां, “इसा बमारिया री वजह मौत नीं; पर ये बमारी परमेशरा री महिमा परगट करने खातर इ भई इसते परमेशरा रे पुत्रा जो महिमा मिलो।”

⁵ यीशु, मार्था, तिसारी भैण मरियम, लाजरा ने प्यार कराँ थे।

⁶ पर ताहली जे यीशुये सुणया भई लाजर बमार हुई गरा, तां तित्थी जे सै ठैहरी रा था, तित्थी सै दो दिन होर रुकिग्या।

⁷ दुईं दिनां ते बाद यीशुये अपणे चेलयां जो बोल्या, “औआ, अहें यहूदिया प्रदेशा रे बैतनिय्याह गाँवां जो चलिये।”

⁸ चेलयां तिसने बोल्या, “गुरू जी, किछ दिन पैहले यहूदी अगुवे तूह पर पत्थराव करने री कोशिश करी रां थे, कने तू फेरी बी तित्थी जोई जाया राँ।”

⁹ यीशुये जबाब दित्या, “क्या इक्की दिना च बारा घण्टे नीं हुंदे? जे कोई दिना रे उजाले च चलो तां सै ठोकर नीं खांदा, काँह्भई सै सूरजा रिया लोई जो देखां।

¹⁰ पर जे कोई राति जो चलो तां सै ठोकर खां, काँह्भई राति जो लोय नीं हुन्दी।”

¹¹ तिने ये गल्लां गलाईयां कने फेरी तिन्हांने बोल्या, “अहांरा दोस्त लाजर सैईगरा, पर हऊँ तिस्सो जगाणे जाई कराँ।”

¹² फेरी तिसरे चेलयां तिसजो बोल्या, “हे प्रभु, जे तिसजो निन्द आईगरी, तां तिस ठीक हुई जाणा।”

¹³ यीशु लाजरा रिया मौती रे बारे च बोल्या राँ था, पर सै समझे भई यीशु निन्दा च आराम करने रे बारे च बोल्या राँ।

¹⁴ इस खातर फेरी यीशुये तिन्हांने साफ-साफ बोल्या, “लाजर मरी चुक्कया;

¹⁵ कने हऊँ तुहांरिया वजह ने फैदे च रैया भई हऊँ तित्थी नीं था; काँह्भई हुण तुहें मांह पर विश्वास करी सक्को। औआ हुण अहें तिसलौ चलिये।”

¹⁶ फेरी थोमा तिस्सो जे दिदुमुस बोलां ये, तिने अपणयां साथी चेलयां ने बोल्या, “औआ, अहें बी प्रभुये ने तित्थी चलिये ताकि अहें बी तिस सौगी मरी सक्को।”

यीशु इ पुनुरूत्थान कने जीवन आ

¹⁷ ताहली जे यीशु बैतनिय्याह च पुज्जया तां तिस्सो पता लगया भई लाजरा जो कब्रा च रखीरे चार दिन हुईगरे।

¹⁸ बैतनिय्याह गाँव यरूशलेम नगरा ते तकरीवन तिन्न किलोमीटरा रिया दूरिया पर था।

¹⁹ इस खातर भाईये रिया मौती पर मार्था कने मरियमा जो शान्ति देणे खातर यहूदा प्रदेशा ते बौहत सारे लोक आईरे थे।

²⁰ ताहली जे मार्थे ये सुणया भई यीशु आई कराँ, तां सै तिसने मिलणे जो गई, पर मरियम घरें इ बैठीरी रैई।

²¹ मार्थे यीशुये जो बोल्या, “हे प्रभु, जे तू येत्थी हुंदा तां मेरा भाई नीं मरदा।

²² पर हऊँ जाणा ईं भई हुण बी तू परमेशरा ते जो किछ मंगगा, परमेशरा तिज्जो दई देणा।”

²³ यीशुये तिसाजो बोल्या, “तेरे भाईये दोबारा जिऊंदे हुई जाणा।”

²⁴ मार्थे तिसने बोल्या, “हऊँ जाणाँ इ भई न्याय रे दिन तिस भीं ते जिऊंदे हूणा, ताहली जे हर कोई जिऊंदा हुई जाणा।”

²⁵ यीशुये तिसाने बोल्या, “हऊँ सै आ सै जे मूईरयां लोकां जो न्याय रे दिन जीवना च वापस लैई औवां; सै जे माह पर विश्वास कराँ, भले इ सै मरी जो, तिस जिऊंदा रैहणा,

²⁶ कने सै जे कोई मांह च जीआं कने मांह पर विश्वास कराँ, तिस कदीं नीं मरना। मार्था क्या तू इसा गल्ला पर विश्वास कराँ इ?”

²⁷ तिसे यीशुये ने बोल्या, “हाँ प्रभु, हऊँ विश्वास कराँ इ, भई परमेशरा रा पुत्र मसीह सै जे संसारा च औणे औल़ा था, सै तूई हाया।”

यीशु रोया

²⁸ फेरी इतणा बोलीने मार्था ऊत्थीते चलीगी, कने अपणी भैण मरियमा जो कल्ही सद्दीने बोल्या, “गुरू येत्थी हाया, कने तिज्जो सदया राँ।”

²⁹ ताहली जे मरियमे येढ़ा सुणया सै ताहलूं इ उट्ठीने तिसने मिलणे जो चलीपी।

³⁰ यीशु अजें तका बी गाँवां ते बाहर इ था, सै हल्तियें बी तिसा इ जगह था तित्थी जे मार्था तिसने मिली थी।

³¹ फेरी यहूदी लोक सै जे मरियमा सौगी घरें थे कने तिसाजो शान्ति देया राँ थे, तिन्हें देख्या भई मरियम छोड़चा ने उट्ठीकने बाहर चलीगी, इस खातर सै तिसारे पिच्छे-पिच्छे ये सोच्चीने गये भई सै रोणे जो कब्रा पर जाया राँई।

³² ताहली जे मरियम तित्थी पुज्जी तित्थी जे यीशु था, तां यीशुये जो देखीने तिसरे पैरा पर पईगी कने बोल्या, “हे प्रभु जे तू येत्थी हुंदा तां मेरा भाई मरदा नीं।”

³³ यीशुये ताहली जे मरियमा जो कने तिसा सौगी आईरे यहूदी लोकां जो रोंदे कने बिलखदे देख्या, तां तिसरी आत्मा तड़फी गी। सै बौहत परेशान था,

³⁴ कने बोल्या, “तुहें तिस्सो किति दफनाईरा?” तिन्हें तिस्सो बोल्या, “हे प्रभु, औआ कने देक्खा।”

³⁵ यीशुये रिया आक्खीं ते परौल़े निकल़णे लगे।

³⁶ इस पर यहूदी लोकें बोल्या, “देक्खा, ये लाजरा ने कितना प्यार कराँ थे।”

³⁷ पर तिन्हां चते कईयें बोल्या, “क्या ये सै माहणु आ तिने जे अन्हेयां रियां आक्खीं ठीक कित्तियां थी, क्या ये लाजरा जो बी मरने ते नीं बचाई सकदा?”

लाजरा रा जिऊंदा कित्या जाणा

³⁸ फेरी यीशु अपणे मना च इक बार भीं बौहत जादा परेशान हुया कने कब्रा पर आया। ये कब्र इक गुफा साई थी कने गुफा रा दरवाजा इक्की पत्थरा ने ढक्कीरा था।

³⁹ यीशुये बोल्या, “पत्थरा जो कब्रा रे दरवाजे ते कण्डे करा।” तिस मूईरे री भैण मार्था तिसने बोलणे लगी, “हे प्रभु, तिस चते त हुण बुरी बास आयरदी हूणी, काँह्भई तिस्सो मूईरे जो चार दिन हुईगरे।”

⁴⁰ यीशुये तिसाजो बोल्या, “क्या मैं तेरने नीं बोल्या था भई जे तू विश्वास करगी, तां परमेशरा री महिमा जो देखगी।”

⁴¹ तां लोकें तिस पत्थरा जो कण्डे करित्या। यीशुये स्वर्गा खा देखीने बोल्या, “हे पिता, हऊँ तेरा धन्यवाद कराँ काँह्भई तैं मेरी सुणी ली।

⁴² हऊँ जाणा भई तू सदा मेरी सुणा, पर सै जे भीड़ चऊँ पासयां खढ़िरी थी, ये तिन्हां रिया वजह ते मैं तिन्हांरे खातर ऊच्चिया अवाजा च बोल्या, तिसते जे सै ये विश्वास करी सक्को भई तैं मिन्जो भेज्जिरा।”

⁴³ ये बोलणे ते बाद तिने ऊच्ची अवाज़ च हाक पाई, “लाजर, बाहर निकल़ी औ!”

⁴⁴ सै जे मरीगरा था सै कफणा ते हाथ पैर बन्धोई रेई बाहर निकल़ी आया, कने तिसरा मुँह पर्ने कने लिपटीरा था। यीशुये लोकां ने बोल्या, “इस्सो खोली देआ कने जाणे देआ।”

यीशुये रे खलाफ शाजिश

⁴⁵ इसते बाद मरियमा सौगी आईरे यहूदियां चते बौहत लोकें यीशुये रे इस कम्मा जो देखीने तिस पर विश्वास कित्या,

⁴⁶ पर तिन्हां चते किछ लोक फरीसियां ले गै कने यीशुये रे कम्मा री खबर दित्ति।

⁴⁷ फेरी मुखियायाजकें कने फरीसियें महासभा सद्दी, कने बोल्या, “अहांजो क्या करना चाहिन्दा? ये माहणु बौहत सारे चमत्कारी नशाण दस्यारां।

⁴⁸ जे अहें हुण इस्सो येढ़ा करदे हुये नीं रोकया, तां सारयां तिस पर मसीहा समझीने विश्वास करने लगी जाणा, कने रोमी लोकां आईने अहांरे मन्दरा कने अहांरे लोकां रा नाश करी देणा।”

⁴⁹ फेरी तिन्हां चते इक्की सभा रे सदस्य, तिसरा नौं जे कैफा था कने सै जे तिस साल्ला रा महायाजक था, तिसने बोल्या, “तुहें लोक किछ मनी जांणदे;

⁵⁰ कने नां तुहें समझा ये भई तुहांरा भला इस चा भई अहांरे लोकां खातर सिर्फ इक माहणु मरो, कने सारी जाति नाश नीं हो।”

⁵¹ ये गल्ल तिने अपणिया तरफा ते नीं बोल्ली, पर तिस साल्ला रा महायाजक हुईने भविष्यवाणी किति, भई यीशुये इस्राएली लोका खातर मरना;

⁵² कने नां सिर्फ तिन्हांरे खातर, पर इस खातर बी भई तिस परमेशरा रे होरीं बच्चयां खातर बी मरना, सै जे धरतिया पर बिखरीरे ताकि सै इक हुईजो।

⁵³ इस खातर तिस इ दिना ते सै तिस्सो मारने री साजस रचणे लगे।

⁵⁴ फेरी यीशुये तिस बगता ते यहूदियां रे सामणे खुल्लेआम औणा जाणा बन्द करित्या, फेरी सै सुनसान इलाके च एप्रैम गाँवां जो चलिग्या; कने अपणयां चेलयां सौगी तित्थी रैहणे लगया।

⁵⁵ यहूदियां रा फसह रा त्योहार नेड़े था, कने बौहत लोक फसह ते पैहले इ गाँवां ते यरूशलेम नगरा जो गये भई यहूदी नियमा रे मुतावक सै अप्पूँजो पवित्र करो।

⁵⁶ इस खातर सै यीशुये जो टोलणे लगे कने मन्दरा च खड़ीने अप्पूँ चियें बोलणे लगे, “तुहें क्या सोच्चां यें? क्या तिस इस त्योहारा च नीं औणा?”

⁵⁷ मुखियायाजकें कने फरीसियें यीशुये जो गिरफ्तार करने रे मकसदा ने ये हुक्म दित्या था भई जे किसी माहणुये जो पता चली जो भई यीशु किति आ? तां सै इसरी सूचना अहांजो देओ, ताकि अहें तिस्सो पकड़ी सक्को।