यूहन्ना 1 - बिलासपुरी नौआं नियम

बचन शरीरा रा रुप लेईने आया

¹ सृष्टिया ते बौहत पैहले बचन था, कने बचन परमेशरा सौगी था, कने बचन इ परमेशर था।

² सै सृष्टिया ते बौहत पैहले परमेशरा रे सौगी था।

³ दुनियां री हर इक चीज़ परमेशरे तिसरे जरिये बणाई, कने येढ़ि कोई चीज नीं सै जे परमेशरे तिसते बगैर बणाई।

⁴ ये सैई वचन आ तिने जे हरेक प्राणिये जो जीवन दित्या कने सै अहां पर परमेशरा रिया सच्चाईया जो तियां प्रगट कराँ जियां जे ज्योति अन्धकारा रियां चिज़ां जो प्रगट कराँ इ।

⁵ लोक नीं चाहन्दे भई तिन्हांरियां बुराईयां सामणे आओ, ठीक तियां इ तियां जे अन्धकार बुराई, पर तियां जे अन्धकार ज्योतिया जो नीं दबाई सकदा तियां इ दुष्ट तिसरिया ज्योतिया ने भरीरे माहणुये जो परमेशरा री सच्चाई सामणे ल्यौणे ते नीं रोकी सकदा।

⁶ परमेशरा रा भेज्जिरा इक माहणु आया तिसरा नौं जे यूहन्ना था।

⁷ सै गवाह बणीने आया भई सै लोकां जो ज्योतिया रे बारे च गवाही देई सक्को, ताकि सारे लोक तिसरे जरिये तिस पर विश्वास करी सक्को।

⁸ सै अप्पूँ त ज्योति नीं था, पर तिसरी गवाही देणे खातर आईरा था सै जे ज्योतिया साई आ।

⁹ सच्ची ज्योति इस संसारा च औणे औल़ी थी सै जे हर इक माहणुये जो अपणे ज्ञाना च चमकांई।

¹⁰ यनिके सै, सै जे ज्योतिया साई आ संसारा ची था, कने संसार कने तिसरी हरेक चीज़ तिसरी ही बणाईरी, पर लोकें फेरी भीं तिस्सो नीं पछयाणया।

¹¹ सै अपणयां लोकां च आया काँह्भई तिन्हांजो तिने रचीरा था, पर तिन्हें बी तिस्सो ग्रहण नीं कित्या।

¹² पर जितणयां जे तिस्सो ग्रहण कित्या, तिने तिन्हांजो परमेशरा री सन्तान हुणे रा अधिकार दित्या, यनिके तिन्हांजो सै जे तिस पर विश्वास रखां ये।

¹³ तिसरे अन्दर नांत खानदानी खून था, नां तिसरे जमणे च माता-पिता री कोई योजना थी, कने नांई मर्दा री कोई इच्छा थी, पर परमेशरा री इच्छा थी।

¹⁴ कने वचन शरीरा रा रुप लेईने आया; तिने अनुग्रह कने सच्चाईया ने भरी ने अहांरे बिच बास कित्या, कने अहें तिसरी येढ़ि महिमा देक्खी, तेढ़ी जे पिता रे इकलौते पुत्रा री महिमा हुआं इ।

¹⁵ यूहन्ने तिसरे बारे च गवाही दित्ति, कने जोरा ने बोल्या, “येई हाया सै, तिसरा जे मैं बखान कित्या भई सै जे मेरे बाद तुहांजो प्रचार करने आई कराँ, सै सामर्था च माहते बधी नेआ, काँह्भई सै माहते पैहले था।”

¹⁶ तिसरिया दया री परिपूर्णता ते अहें सब्बीं आशीषां पर आशीष पाई।

¹⁷ अहांजो व्यवस्था देणे औल़ा मूसा था, पर अनुग्रह कने सच्चाई परमेशरे अहांजो यीशु मसीह रे जरिये दस्से।

¹⁸ परमेशरा जो किने बी कदीं नीं देख्या, इकलौता पुत्र सै जे मसीह यीशु आ, तिसरा जे पिता ने बड़ा गैहरा रिश्ता, तिने इ अपणे पिता जो अहां सब्बीं पर परगट कित्या।

यूहन्ना बपतिस्मा देणे औल़े री गवाही

¹⁹ यूहन्ने री गवाही येई, भई ताहली जे यहूदी अगुवेयां यरूशलेम ते याजकां कने लेवियां जो तिसते ये पुछणे खातर भेज्या भई “तू कुण आ?”

²⁰ इस खातर तिने तिन्हांने सच्च बोल्या कने साफ गलाईत्या, भई “हऊँ मसीह निआं।”

²¹ फेरी तिन्हें यूहन्ने ते पुच्छया, “जे तू मसीह नींआ तां सच्च क्या? क्या तू एलिय्याह भविष्यवक्ता?” तिने जबाब दित्या, “नां, हऊँ सै निआं।” यहूदियें इक होर स्वाल कित्या, “तां क्या तू सै भविष्यवक्ता सै जे औणे औल़ा?” तिने जबाब दित्या “नां।”

²² तां तिन्हे तिसते पुच्छया, “फेरी तू हाया कुण? अहांजो दस्स ताकि तिन्हें जे अहांजो तुहांरे बारे च पता करने भेजीरा, अहें तिन्हाजो जबाब देई सक्को।”

²³ तिने गलाया, तियां जे यशायाह भविष्यवक्ते गलाईरा, “हऊँ तिस साई आ सै जे येढ़िया जगह च प्रचार करी रां तित्थी जे तिसरी अवाज़ कोई नीं सुणो: भई परमेशरा रे औणे खातर खुद अप्पूँजो तियां त्यार करा तियां जे किसी खास माहणुये रे औणे खातर लोक रस्ता त्यार कराँ ये।”

²⁴ ये लोक फरीसियें भेज्जीरे थे।

²⁵ तिन्हे तिसते ये स्वाल पुच्छया, भई “जे नां तू मसीह आ, न एलिय्याह, कने नांई सै भविष्यवक्ता, तां फेरी लोकां जो बपतिस्मा कजो देआं?”

²⁶ तिन्हांजो जबाब देन्दे हुये यूहन्ने गलाया, “हऊँ त पाणिये ने बपतिस्मा देआं, पर तुहांरे बिच इक माहणु खढ़िरा तिस्सो जे तुहें नीं जाणदे।

²⁷ यनिके ये सैई हाया तिस जे मेरते बाद तुहांजो प्रचार करना, हऊँ तिसरे मुकावले किछ बी नींआ, सै इतणा खास आ भई हऊँ इक्की सेवका रा सब्बीं ते छोट्टा काम्म तिस खातर करना चाओ, तां बी लायक नींआ।”

²⁸ ये गल्लां यरदन नदिया रे पार बैतनिय्याह नगरा च हुईयां, तित्थी जे यूहन्ना बपतिस्मा देआं था।

परमेशरा रा मेमना

²⁹ दुज्जे दिन यूहन्ने यीशुये जो अपणी तरफ औन्दे देखीने गलाया, “देक्खा, ये परमेशरा रा मेमना सै जे संसारा रा पाप अपणे ऊपर लेई जां।

³⁰ ये सैई आ तिसरे बारे च मैं गलाया था, ‘इक माहणु तिस जे मेरे बाद तुहांजो प्रचार करना सै सामर्था च माह्ते बी बड्डा, काँह्भई सै माह्ते पैहले था।’

³¹ हऊँ खुद तिस्सो पछयाणदा बी नीं था भई सै मसीह था, पर इस खातर हऊँ पाणिये ते बपतिस्मा देन्दा हुआ आया भई इस्राएल रे लोक तिस्सो जाणी लो।”

³² फेरी यूहन्ने ये गवाही दित्ति : “मैं आत्मा जो कबूतरा साई स्वर्गा ते उतरदे देख्या, कने सै तिस पर टिकिग्या।

³³ हऊँ त तिस्सो पछयाणदा बी नीं था, भई सै मसीह था, पर तिने जे मिन्जो पाणिये ते बपतिस्मा देणे जो भेज्जिरा, तिने इ माहने गलाया, ‘तिसरे ऊपर जे तू पवित्र आत्मा जो औंदे कने टिकदे देक्खो, सैई पवित्र आत्मा ते बपतिस्मा देणे औल़ा।’

³⁴ कने मैं देख्या, कने हऊँ तुहांजो सच्च बोलां भई येई परमेशरा रा पुत्र आ।”

प्रभु यीशु रे पैहले चेले

³⁵ दुज्जे दिन ताहली जे यूहन्ना अपणे दो चेलयां ने खढ़िरे थे,

³⁶ कने तिने यीशुये जो सामणे जान्दे हुये देख्या कने गलाया, “देक्खा ये परमेशरा रा मेमना।”

³⁷ ताहली जे तिन्हे दुईं चेलयां तिस्सो येढ़ा गलान्दे हुये सुणया तां सै यीशुये रे पिच्छे चली पे।

³⁸ कने ताहली जे यीशुये मुड़ीने देख्या भई सै पिच्छे आई कराँ ये तां तिने तिन्हाते पुच्छया, “तुहांजो क्या चाहिन्दा?” तिन्हे तिसजो जबाब दित्या, “गुरू जी, तुहांरा रैहणे रा ठकाणा किति आ?”

³⁹ यीशुये तिन्हाने गलाया, “औआ कने देक्खा।” फेरी तिन्हें जाईने यीशुये रे रैहणे री जगह देक्खी, तिस दिन सै तिसले ठैहरे, काँह्भई संजके जुन्ना रे तकरीवन चार बजी चुक्कीरे थे।

⁴⁰ तिन्हां दुईं चते, सै जे यूहन्ने री गल्ल सुणीने यीशुये रे पिच्छे चलीगरे थे, तिन्हां चते इक शमौन पतरस रा भाई अन्द्रियास था।

⁴¹ तिने पैहले अपणे सके भाईये शमौना ने मिल़िने तिसजो गलाया, “भाई अहांजो मसीह, मिलीग्या।”

⁴² फेरी अन्द्रियास शमौना जो यीशुये ले ली आया, तिने शमौन्ना जो ध्यान्ना ने देख्या कने गलाया, “तू यूहन्ना रा मुण्डु शमौन आ: तू कैफा यनि पतरस रे नौआं ते पछयाणया जाणा।”

फिलिप्पुस कने नतनएल जो सद्दया जाणा

⁴³ अगले दिन यीशुये गलील प्रदेशा च जाणे रा निश्चा कित्या। सै फिलिप्पुस ने मिलया कने गलाया, “मेरे पिच्छे चली औ।”

⁴⁴ फिलिप्पुस बैतसैदा नगरा रा निवासी था। तित्थी अन्द्रियास कने पतरस बी रैयां थे।

⁴⁵ फिलिप्पुस जो नतनएल मिलया कने तिने तिसने गलाया, “तिसरे बारे च जे मूसे व्यवस्था च कने भविष्यवक्तयां बी लिखिरा, सै अहांजो मिलीग्या; सै यूसुफ रा पुत्र, नासरत रा रैहणे औल़ा यीशु आ।”

⁴⁶ फेरी नतनएले तिसते पुच्छया, “क्या कोई खरी चीज़ नासरत ते बी निकल़ी सक्कां इ?” फिलिप्पुसे तिसने गलाया, “जाईने देक्खी लें।”

⁴⁷ यीशुये नतनएला जो अपणी तरफ औन्दे देखीने तिसरे बारे च गलाया, “येआ इक सच्चा इस्राएली वंशज तिस्च जे कोई खोट निआं।”

⁴⁸ नतनएले यीशुये ते पुच्छया, “तुहें मिन्जो कियां जाणाँ?” यीशुये तिसजो जबाब दित्या, “इसते पैहले भई फिलिप्पुसे तिज्जो सद्दया, ताहली तू अंजीरा रे डाल़ा हेठ था, तां मैं तिज्जो देख्या था।”

⁴⁹ नतनएले तिसजो जबाब दित्या, “गुरू, तू परमेशरा रा पुत्र आ, तू इस्राएल रा राजा।”

⁵⁰ तिसरे जबाबा च यीशुये गलाया, “मैं जे तेरने गलाया भई मैं तिज्जो अंजीरा रे डाल़ा हेठ देख्या, क्या ताईं तू इस खातर विश्वास कराँ? तू अग्गे इसते बी बड्डे-बड्डे काम्म देखणे।”

⁵¹ यीशुये तिसने भीं गलाया, “हऊँ तेरने सच्च बोलां भई तूं स्वर्गा जो खुलदे कने परमेशरा रे दूतां जो माहणुये रे पुत्रा यनि मेरे ऊपर उतरदे कने ऊपर जान्दे देखणा।”