याकूब 5 - बिलासपुरी नौआं नियम

अमीराँ जो चेतावनी

¹ अमीर लोको सुणा, औणे औल़े वगता च तुहां पर सै जे भयंकर परेशानियां औणे औल़ियां, तिन्हां रिया वजह ने रोआ कने विलाप करा।

² तुहांरी दौलत बर्बाद हुईगी कने तुहांरे कपड़े कीड़े खाईगे।

³ तुहांरा सोना चान्दी जंगा ने खराब हुई चुक्कीरा; तिसरा खराब हूणा इ तुहांरे खलाफ गवाही देंगा, तिस पर लगीरे जंगा तुहांरे शरीरा जो अग्गी साई खाई लेणा। संसारा रे आखरी वगता च तुहें दौलत कट्ठा किति।

⁴ देक्खा, तिन्हे मजदूरें जे तुहांरी फसल लुणि, तिन्हांरी मजदूरी तुहें धोखा देईने रोकीरी, तिन्हांरी मजदूरी तुहांरे खलाफ चीन्डां मारी राईं; फसल लुणने औल़यां री पुकार सर्वशक्तिमान प्रभुये रे कन्नां तक पुज्जी चुक्कीरी।

⁵ तुहें इसा धरतिया पर अपणी हर इक इच्छा पूरा करने कने विलासिता च अपणी जिन्दगी गवाईती; तुहें खुद अप्पूँजो बध कित्ते जाणे रे दिना रे खातर पाल़ी-पोसीने जानबरा साई मोटा तगड़ा करी लरा।

⁶ सै लोक जे अपणा बचाव खुद नीं करी सक्कां थे, तिन्हां लोकां जो तुहें दोषी ठैहराया कने मारी बी दित्या।

दुखा च धैर्य रखणा

⁷ मेरे प्यारे साथी विश्वासियो, प्रभु यीशुये रे औणे तक धीरज रखा। देक्खा करसाण धरतिया री कीमती फसला खातर तदुआं तक तसल्ली रक्खीने इन्तजार कराँ तदुआं तक जे सै शुरु री कने आखरी बरखा नीं देक्खी लेन्दा।

⁸ इस खातर भई प्रभु यीशुये रा औणा नजदीक आ, तुहें बी तसल्ली रक्खीने अपणे मना च मजबूत रौआ।

⁹ साथी विश्वासियो, अप्पूँ चियें इक्की दूये री शकैतां मता करदे, नैत परमेशरा बी तुहांजो सजा देणी; देक्खा, न्याय करने औल़ा त अन्दर औणे रे खातर दरवाजे पर खढ़िरा।

¹⁰ मेरे साथी विश्वासियो, तसल्लिया ने दुख सैहणे रे सम्बन्धा च तिन्हां भविष्यवक्तयां जो याद करा, तिन्हें जे प्रभुये रिया तरफा ते तिसरे सन्देशा जो बोल्या था।

¹¹ तिन्हां लोकां जो अहें काफी आदर दें, सै जे धीरजा ने दुख सैहन्दे रैं। तसल्लिया ने सैहणे औल़यां च अय्यूब इक आदर्श आ; तिसरे अनुभवा ने अहें सिक्खां ये भई परमेशरा रिया योजना रा अन्त कियां भलाईया च हुआं, इस खातर भई प्रभु कितना दयालु कने करुणा ने भरीरा।

¹² पर मेरे साथी विश्वासियो, सब्बीं ते बड्डी गल्ल येई भई सगन्द नीं खायों, न स्वर्गा री, न धरतिया री, न किसी होरी चीज़ा री; पर साफ-साफ हाँ, बोल्ला या नां, ताकि तुहांते गुनाह नीं हो कने परमेशरा रिया सजा ते बची सक्को।

प्राथना री ताकत

¹³ जे तुहां चते कोई दुखी हो, तां तिस्सो प्राथना करनी चाहिन्दी कने जे कोई खुश आ, तां तिस्सो स्तुति रे भजन गाणे चाहिन्दे।

¹⁴ जे तुहांरे बिच कोई बमार आ, तां सै कलीसिया रे प्राचीनां जो सद्दो भई सै तेल मल़ीने प्रभुये रे नौआं ते तिसरे खातर प्राथना करो,

¹⁵ विश्वासा ने कित्तिरी तिन्हां रिया प्राथना ते बीमार ठीक हुई जाणे, कने प्रभुये तिसजो खड़ा करना कने जे तिने गुनाह बी कित्तिरे ओ, परमेशरा तिसरे पाप माफ करने।

¹⁶ इस खातर तुहें अप्पूँ चियें इक्की दुज्जे रे सामणे अपणे-अपणे पापां जो मन्नी लौआ, कने इक्की दूये रे खातर प्राथना करा, ताकि तुहें भले चंगे हुई जाओ : धर्मी माहणुये रिया प्राथना रे असरा ने बड़ा किछ हुई सक्कां।

¹⁷ एलिय्याह भविष्यवक्ता बी त अहां साई दुख-सुख भोगणे औल़ा इक माहणु था, कने तिने पूरे मना ने प्राथना कित्ती भई बर्खा नीं हो कने साडे तिन्हां साल्लां तक धरतिया पर बर्खा नीं हुई।

¹⁸ फेरी तिने दोबारा प्राथना कित्ती, तां अम्बरा ते बर्खा बरसणे लगी, कने धरतिया ते फसल़ां उगणे लगियां।

¹⁹ हे मेरे साथी विश्वासियो, तुहां चते जे कोई सच्चाईया ते भटकी जाओ कने तिस्सो कोई भीं मोड़ी ने रस्ते पर ली औआं,

²⁰ तां सै जाणी लो भई सै जे किसी पापिये जो पापा रे रस्ते ते वापस ली औआं सै तिस पापिये रिया आत्मा जो अनन्त काल रिया मौती ते बचां कने परमेशर तिसरे कई पापां जो माफ कराँ।