याकूब 4 - बिलासपुरी नौआं नियम

संसारा ने दोस्ती

¹ तुहांरे बिच लड़ाईयां कने झगड़यां री वजह क्या इ? क्या ये तुहांरे अन्दर बुरी इच्छां रे संघर्षा रिया वजह ते नीं?

² तुहें लालसा कराँ ये पर तुहांजो मिलदा नींआ, इस खातर तुहें हत्या कने लालच कराँ ये, फेरी बी सै जे तुहें चाँये सै हासिल नीं करी पान्दे; इस खातर तुहें लड़ाई झगड़ा कराँ ये। फेरी बी तुहांजो नीं मिलदा, काँह्भई तुहें परमेशरा ते नीं मंगदे।

³ तुहें मंगणे पर पान्दे इस खातर नींये, काँह्भई गल़त इरादे ने मंगां ये, ताकि सिर्फ अपणियां इच्छां जो पूरा करी सक्को।

⁴ विश्वासघाती लोको, क्या तुहांजो ये पता नींआ भई संसारा री दोस्ती तुहांजो परमेशरा रा दुश्मण बणां ईं? हऊँ भीं बोलां भई जे तुहांरा मकसद इस संसारा रा मजा लुटणा इ हाया, तां तुहें परमेशरा रे दोस्त नीं हुई सकदे।

⁵ क्या तुहें पवित्रशास्त्रा च लिखी रिया इसा गल्ला जो बेकार समझां ये, “परमेशरे अहांजो जीवन दित्या इसा वजह ते सै मजबूतिया ने चाँह भई अहें सिर्फ तिसरे इ ओ।”

⁶ बुरियां इच्छां रा डटी ने मुकाबला करने रे खातर सै जादा ते जादा अनुग्रह देआं; तियां जे भई पवित्र शस्त्र बोलां, “परमेशर घमण्डियां रा बरोध कराँ, पर नम्र लोकां पर किरपा कराँ।”

⁷ इस खातर खुद परमेशरा रे अधीन हुई जवा, कने शैतान्ना रा बरोध करा, तिस तुहांरे सामणे ते नट्ठी जाणा।

⁸ परमेशरा रे नेड़े औआ, तां तिस बी तुहांरे नेड़े औणा। अरे पापियो! अपणयां पापां जो अपणे जीवना ते दूर करा, कने दोगले माहणुओ, अपणे मना जो पवित्र करा।

⁹ अपणे पापां रिया वजह ते दुखी हुआ, कने शोक करा, कने रोआ। हुई सक्कां तुहांरा ये हसणा शोका च कने तुहांरी ये मौज उदासिया च बदली जो।

¹⁰ प्रभुये रे सामणे अप्पूँजो नम्र करा, तां तिस तुहांजो आदर देणा।

विश्वासियां पर दोष मढ़ना

¹¹ मेरे साथी विश्वासियो, इक्की दुज्जे री बुराई मत करा। सै जे अपणे साथी विश्वासियां री बदनामी कराँ या तिन्हां पर इल्जाम लगां, सै व्यवस्था री बदनामी कराँ; कने जे तू येढ़ा कराँ, तां तू व्यवस्था रा पालन करने औल़ा निआं, पर तिसरा न्याय करने औल़ा बणी जां।

¹² व्यवस्था रा देणे औल़ा कने तिसरा न्याय करने औल़ा त इक इ हाया सै जे परमेशर आ, तिस्सो इ बचाणे कने बर्बाद करने रा अधिकार आ। इस खातर तू कुण आ, सै जे अपणे पड़ेसिये पर दोष लगां?

भविष्य रा फिक्र

¹³ तुहें सै जे येढ़ा बोलां ये भई आज या कल अहां किसी दुज्जे नगरा च जाईने इक साल व्यापार करीने किछ कमांगे।

¹⁴ पर सच्चाई त येई भई तुहें नीं जाणदे भई कल क्या हूणा, तुहांरी जिन्दगी हाई कितणी? ये भापा साई सै जे थोड़ी देर दिस्सां इ फेरी गायब हुई जाईं।

¹⁵ इसरे बजाय तुहांजो ये बोलणा चाहिन्दा, भई “जे प्रभु चाओ तां अहें जिऊंदा रैहन्गे, कने ये या सै काम्म बी करगे।”

¹⁶ पर हुण तुहें अपणिया योजना रे बारे च घमण्ड कराँ ये; सै सारा घमण्ड बुरा हुआं।

¹⁷ इस खातर सै जे भलाई करना जाणाँ, पर करदा नींआ, तिसरे खातर ये पाप आ।