याकूब 3 - बिलासपुरी नौआं नियम

जीभा जो बशा च करना

¹ “मेरे साथी विश्वासियो तुहां चते कई सारयां जो उपदेशक बणने री इच्छा नीं करनी चाहिन्दी, काँह्भई अहां सखाणे औल़यां रा न्याय परमेशरा जादा सख्तिया ने करना।

² अहें सारे बौहत गल़तियां कराँ ये, पर सै माहणु जे अपणिया जुबाना जो बशा च करी सक्कां, सै खरा माहणु आ; कने हरेक हालाता च अप्पूँजो बशा च करी सक्कां।

³ इक छोट्टी जेई लगाम घोड़े रे मुँआं च लगाईने अहें तित्थी जे चाओ तिस्सो लेई जाई सक्कां ये।

⁴ यनि पाणिये रे जहाजां रा उदाहरण बी लेई सक्कां ये, देक्खा, चाये सै कितणे इ बड्डे हो ताकतवर हवां तिन्हांजो चलाईंयां, पर इक छोट्टी जेई पतवारा ने तिन्हारा मांझी तिन्हांजो अपणिया इच्छा रे मुतावक घुमान्दा रैयां।

⁵ तियां इ जीभ, सै जे शरीरा रा इक छोट्टा जेआ अंग आ, पर सै बौहत बड्डी बर्बादी ल्याई सक्कां इ। देक्खा, तियां जे अग्गी री इक छोट्टी जेईया चिन्गारिया ने सारा जंगल फुखी जां।

⁶ हाँ, ये जीभ; अग्गी री इक लपट साई। ये बुराईया रा इक पूरा संसार आ। ये जीभ अहांरे शरीरा रे अंगाँ च इक येढ़ा अंग आ, सै जे सारे शरीरा जो कलंकित करी देईं कने अहांरे सारे जीवना च आग्ग लाई देईं। ये जीभ नरका री अग्गी ते भड़कदी रैईं।”

⁷ हरेक किस्मा रे जंगली पशु-पंछी कने कीड़े-मकोड़े, पाणिये च रैहणे औल़े प्राणी माहणुआं रे बशा च कित्ते जाई सक्कां यें कने हुई बी गैईरे।

⁸ पर जीभा जो कोई माहणु बशा च नीं करी सकदा, ये खतरनाक विषा ने भरीरी इक येढ़ि बुराई सै जे कदीं चैना ने नीं रैहन्दी।

⁹ कदी-कदी ये अहांरे प्रभु पिता री बडयाई कराँ इ कने परमेशरा रे रुपा च बणाईरे लोकां रे खलाफ जैहर उगल़ां इ।

¹⁰ इस खातर स्तुति कने शाप इक्की मुँआ ते उमड़ीने बाहर औआं ये; मेरे साथी विश्वासियो, ये बिल्कुल ठीक नींआ।

¹¹ क्या पाणिये रे इक्की झरने चते मीठा कने खारा दुईं किस्मां रा पाणी निकल़ां?

¹² मेरे साथी विश्वासियो, क्या अंजीरा रे डाल़ा पर जैतून या अंगूरां रिया बेला पर अंजीर लगी सक्कां ये? कदीं मनी, तियां इ मीठा पाणी नमकीन झरने ते नीं निकल़ी सक्कां।

स्वर्गीय ज्ञान

¹³ भला तुहां च ज्ञानी कने समझदार कुण आ? सै जे हाया, तिस्सो अपणे व्यवहारा ने ये दसणा चाहिन्दा भई तिसरे काम्म तिसा नम्रता ने कित्ते गईरे सै जे ज्ञाना ने जुड़ीरे।

¹⁴ पर जे तुहां लोकां रे दिलां च कड़वाहट कने स्वार्थ भरोईरा हो, तां अपणे ज्ञाना रा ढोल मता पिटदे, येढ़ा करीने त तुहें सच्चाईया पर पर्दा पान्दे हुये झूट्ठ बोल्ली कराँ ये।

¹⁵ येढ़े ज्ञाना रा स्रोत परमेशर नींआ, ये दुनियावी आ, शारीरिक कने शैतान्नी आ।

¹⁶ काँह्भई तित्थी जे हिरख कने स्वार्थी इच्छां इयां, तित्थी सब तरह री बुराईयां कने गड़बड़ी हुआं इ।

¹⁷ पर सै ज्ञान जे परमेशरा रिया तरफा ते औंआं सै पवित्र, मिलणसार, कोमल, दुज्जेयां रे अधीन रैहणे औल़ा। ये दया कने खरयां कम्मां ने भरीरा, इसच कदीं पक्षपात नींआ, कने हमेशा ईमानदार होता है।

¹⁸ सै लोक जे मेल करवां ये, सै शान्तिया रा ब्यू बांयें कने भलाईया री फसल लुणा यें।