याकूब 2 - बिलासपुरी नौआं नियम

सब्बीं ने प्यार करा

¹ मेरे साथी विश्वासियो, तुहें अहांरे महिमावान प्रभु यीशु मसीह रे चेले हुणे रिया वजह ने तुहां च कोई भेद-भाव नीं ओ।

² कल्पना करा भई तुहांरिया कलीसिया च जे इक माहणु सोने री गुट्ठी कने मैहंगे कपड़े पैहनीने आओ, कने इक गरीब माहणु बी मैले-कुचैले कपड़े पैहनीने आओ।

³ जे तुहें अमीर माहणुये जो, “अच्छा आदर कने बैठणे जो खरी जगह दें,” कने तिस गरीब माहणुये जो बोल्लो, “तूं येत्थी खढ़िरा रै,” या “मेरे चरणां च बैठ।”

⁴ तां क्या इसते साफ-साफ भेद-भाव नीं दिखदा भई तुहांरे विचार कितणे खराब ये?

⁵ मेरे प्यारे साथी विश्वासियो, ध्याना ने सुणा, क्या परमेशरे तिन्हां लोकां जो नीं चुणीरा, सै जे संसारा रिया नजरां च गरीब ये, ताकि सै विश्वासा च अमीर हुई जो कने तिस राज्जा रे बारस बणो, तिसजो जे परमेशरे अपणयां भगतां जो देणे रा वायदा कित्तीरा?

⁶ तां बी तुहें गरीबां री बेज्जति कराँ ये। तुहें जाणां ए भई ये अमीर लोक इ हाए सै जे तुहां पर अत्याचार करां ए। सैई सै जे तुहांजो कचैहरियां च जबरदस्ती घसीटी ने नीं लेई जाएं?

⁷ क्या ये सैई लोक नींये, सै जे मसीह रे तिस उत्तम नौआं री निंध्या कराँ ये, सै जे तुहांजो दित्तिरा?

⁸ तां बी जे तुहें पवित्रशास्त्रा ते मिलणे औल़े वचना रा सच्चमुच पालन कराँ ये, भई “अपणे पड़ेसिये ने अप्पूँ साई प्यार करा” तां तुहें ठीक कराँ ये।

⁹ पर जे तुहें भेद-भाव कराँ ये, तां तुहें पाप कराँ ये; कने परमेशरा री व्यवस्था तुहांजो गुनाहगार साबित कराँ इ।

¹⁰ काँह्भई सै जे कोई इक्की हुक्मा जो छड्डिने सारिया व्यवस्था रा पालन कराँ, तिस माहणुये साई आ तिने जे सारिया व्यवस्था जो नीं मन्नया।

¹¹ सैई परमेशर तिने जे बोल्या था, “तू व्यभिचार नीं करयां” ये बी गलाया था, “तू हत्या नीं करयां।” इस खातर जे तुहें व्यभिचार नीं करदे पर हत्या कराँ ये तां बी तुहें परमेशरा रिया व्यवस्था जो तोड़ने औल़े हुये।

¹² इस खातर ताहली जे तुहें किछ बोलां ये या कराँ ये, ये आद रखयां भई तुहांरा इन्साफ तिस नियमा ने हूणा सै जे अहांजो अजाद कराँ।

¹³ इस खातर जे तुहें दुज्यां पर दया नीं करदे, तुहां पर बी दया नीं किति जाणी; जे तुहें दुज्यां रे प्रति दयालु रै, तां परमेशरा तुहांरे खातर बी दयालु रैहणा ताहली जे तिस न्याय करना।

विश्वास कने अच्छे काम्म

¹⁴ मेरे प्यारे साथी विश्वासियो, जे तुहां चते कोई प्रभु यीशु मसीह पर विश्वास करने रा दावा कराँ ये पर तिसले कोई काम्म नींआ, तां तिसरा विश्वास बेकार आ, तां तिसरा सै विश्वास क्या तिसरा छुटकारा करी सक्कां?

¹⁵ मन्नी लो भई किसी साथी विश्वासिये जो कपड़यां री कने रोज किया रोटिया री किल्लत हो,

¹⁶ कने तुहें तिन्हांने बोल्ला ये, भई “गर्म रौआ कने तृप्त रौआ, जावा परमेशर तुहांजो आशीष देओ, पर तिन्हांजो रोटी कने कपड़े नीं देओ, तां इसरा क्या फायदा?”

¹⁷ देख्या तुहें, सिर्फ विश्वास रखणा काफी नींआ, तिस विश्वासा सौगी जे काम्म जुड़ीरे नींये, सै विश्वास नीं कहलाया जाणा सै बेकार कने मरीरा।

¹⁸ पर कोई बोल्ली सक्कां, “तेरले विश्वास आ पर हऊँ खरयां कम्मां जो मन्नां।” तुहें बिणा कम्मां ते अपणा विश्वास दस्सा कने हऊँ अपणे कम्मां ते अपणा विश्वास दसगा।

¹⁹ तिज्जो विश्वास आ भई इक इ परमेशर आ; तू ठीक कराँ! बुरीआत्मा विश्वास कराँ इ भई परमेशर हाया; कने सै डरा ने कम्बदी रैंई।

²⁰ पर ओ! निकम्मे माहणुआ, तू ये कदीं सोचणा भई सै विश्वास बेकार आ, तिस सौगी जे अच्छे काम्म नींये?

²¹ क्या तू भुल्लीगरा भई अहांरे पूर्वज अब्राहमे ताहली जे अपणे पुत्र इसहाका जो बेदिया पर चढ़ाया, तांई परमेशरा रिया नज़राँ च धर्मी गिणया गया?

²² देक्खा, तिसरा परमेशरा पर इतणा भरोसा था भई सै जे किछ परमेशरे बोल्या, सै सब किछ करने जो त्यार हुईग्या; तिसरे विश्वासा जो तांई पूरा मन्नया गया ताहली जे तिने सै कित्या सै जे तिस्सो करने खातर बोल्या गया था,

²³ इस खातर तियां जे पवित्रशास्त्रा च लिखिरा, तियां इ हुया, “अब्राहमे परमेशरा पर विश्वास कित्या, कने तिसरे विश्वासा रिया वजह ने परमेशरे अब्राहम जो धर्मिये रे रुपा च ग्रहण कित्या, कने सै परमेशरा रा मित्र कहलाया।

²⁴ तुहें देखील्या भई सिर्फ विश्वासा तेई नीं, पर अपणे कम्मां ते माहणु धर्मी बणां।

²⁵ तियां इ राहाब वेश्य बी, क्या तिस बगत अपणे कम्मां ते धर्मी नीं बणी, ताहली जे तिसे जासूसां जो अपणे घरा च शरण दित्ति कने फेरी तिन्हांजो दुज्जे रस्ते किति भेज्जीत्या।

²⁶ तियां जे बिणा साह ते शरीर मूईरा हुआं, तियां इ बिणा खरयां कम्मां ते विश्वास बी मूईरा हुआं।