इब्रानियों 7 - बिलासपुरी नौआं नियममेलिकिसिदक याजक 1 ये मेलिकिसिदक शालेम नगरा रा राजा, कने परमेशर सै जे बौहत महान आ तिसरा याजक था। ताहली जे अब्राहम राजयां जो हराईने वापस आया रां था, तां मेलिकिसिदक, अब्राहमा ने मिलीने तिस्सो आशीष दित्ति थी। 2 इस्सो इ अब्राहमे कव्जा कित्ती रियां सारियां चिज़ां रा दशमांश बी दित्या, मेलिकिसिदक रा मतलबा न्याय रा राजा, कने फेरी शालेम रा राजा यनि शान्तिया रा राजा। 3 मेलिकिसिदक रा नां पिता, नां तिसरी माता, नां तिसरे पूर्वजां री कोई वंशावली, नां तिसरे जन्मा री कने नां मौती रे बारे च कोई जानकारी। सै परमेशरा रे पुत्रा साई सदा खातर याजक बणीरा रैया। 4 हुण ये सोच्चा भई मेलिकिसिदक कितना महान था तिस्सो जे जाणे-माणे पूर्वज अब्राहमे कब्जा कित्ती रियां चीजां रा दसवां हिस्सा दित्या। 5 मूसा रिया व्यवस्था रे मुतावक लेवी रे वंशज यनि सै जे याजका रा पद पायें, तिन्हांजो हुक्म मिलीरा भई इस्राएली लोकां ते दशमांश ले यनि अपणे लोकां ते, हलाँकि चाये सै अब्राहमा रे वंशा ते ओ। 6 पर मेलिकिसिदक, सै जे लेवी रे वंशा रा नीं था, फेरी बी अब्राहम ते दशमांश लेआ कने तिस्सो आशीष दित्ति तिसने जे परमेशरे वायदा कित्तिरा था। 7 अहें पक्का जाणाँ ये भई सै जे आशीष देआं सै आशीष पाणे औल़े ते महान आ। 8 याजक सै जे दशमांश लें सै माहणु ये सै जे मरी जाये, पर मेलिकिसिदक इसते बी महान आ, काँह्भई पवित्रशास्त्र बोलां भई सै जिऊंदा। 9 तां अहें ये बी बोल्ली सक्कां ये भई लेवी बी, सै जे दशमांश लें, तिन्हें बी मेलिकिसिदक जो अब्राहम रे जरिये दशमांश दित्या। 10 काँह्भई ताहली जे मेलिकिसिदके लेवी रे पूर्वज अब्राहम ने भेंट कित्ती, तिस वगत लेवी पैदा नीं हुईरा था। मेलिकिसिदका साई दुज्जा याजक 11 ये लेवीय याजका रे अधारा पर व्यवस्था इस्राएली लोकां जो दित्ति गई थी। हुण, जे लेवीय याजकां रा काम्म ठीक था, तां अलग तरह रे याजका रे प्रगट हुणे री जरूरत नीं थी, सै जे मेलिकिसिदक साई आ, पर हारून साई नींआ। 12 काँह्भई ताहली जे याजका रा पद बदलया जां, तां व्यवस्था रा बी बदलना जरूरी आ। 13 अहें ये सारियां गल्लां समीह रे बारे च बोल्या राँये सै जे दुज्जे गोता रा, कने तिस गोता चते किन्हिये कदीं याजका साई बेदिया री सेवा नीं कित्तिरी। 14 काँह्भई ये अहें जाणाँ ये भई अहांरा प्रभु यहूदा रे गोता रा था, कने इस गोता रे बारे च मूसे याजक पदा री कोई चर्चा नीं कित्ती। 15 मेलिकिसिदक साई इक दुज्जे याजका रे औणे ते ये होर बी साफ हुई जां, 16 काँह्भई व्यवस्था रे हुक्मा रे मुतावक तिसजो याजक बणना था तिस तरिके ने यीशु याजक नीं बणया, पर अविनाशी जीवना रिया सामर्था रे जरिये याजक बणया। 17 काँह्भई तिसरे बारे च परमेशर पवित्रशास्त्रा च ये गवाही देआं, “तू मेलिकिसिदक याजका साई सदा काल रा याजक आ।” 18 इस तरिके ने मूसा री व्यवस्था निर्बल कने निष्फल हुणे रिया वजह ते परमेशर इस्सो हुण इस्तेमाल नीं करया राँ। 19 (काँह्भई मूसा री व्यवस्था किसी गल्ला री सिद्धि नीं करी सक्की) पर हुण अहांले इक उत्तम आशा इ तिसरे जरिये अहें परमेशरा रे सामणे औआं ये। नये महायाजका री महानता 20 होर परमेशरे बी तिस वगत कसम खाद्दि ताहली जे तिने यीशुये जो याजका साई बणाया, 21 काँह्भई होर याजक त बिणा कसमा ते याजक बणाये गये, पर यीशु कसमा सौगी परमेशरा रिया तरफा ते नियुक्त कित्या गया, तिने जे तिसरे बारे च गलाया, “हऊँ, प्रभु कसम खां, भई तू युगानुयुगा रा याजक आ कने मांह अपणा मन कदीं नीं बदलना।” 22 इस खातर यीशु गारन्टी देआं भई नई वाचा पुराणिया वाचा ते उत्तम हूणी। 23 होर इक फर्क आ, काँह्भई पैहले बौहत सारे याजक बणदे आये, पर सै सारे मरीगे कने याजका रा काम्म लगातार करी नीं पाये। 24 पर यीशु युगां-युगां तक रैयां, इस वजह ने तिसरा याजक पद अटल आ। 25 इस खातर सै जे यीशुये रे जरिये परमेशरा ले औयें, सै तिन्हांरा पूरी तरह छुटकारा करी सक्कां, काँह्भई यीशु तिन्हां खातर विनती करने जो हमेशा जीवित आ। 26 इस खातर येढ़ा महायाजक अहां रियां जरूरतां जो पूरा कराँ, सै जे पवित्र, निष्कपट, कने निर्मल आ, कने पापियां ते लग आ, कने तिस्सो जे परमेशर स्वर्गा च लेईग्या। 27 कने दुज्जे महायाजकां साई यीशुये जो जरूरी निआं भई हर रोज पैहले अपणे पापां रे खातर कने फेरी लोकां रे पापां रे खातर बलिदान चढ़ाये; काँह्भई यीशुये अप्पूँजो बलिदान्ना रे रुपा च सारयां लोकां रे पापां खातर इक इ बार बलिदान चढ़ाया। 28 काँह्भई मूसा री व्यवस्था तिस माहणुये जो महायाजक हुणे खातर नियुक्त कराँ इ सै जे सिद्ध नींआ, पर व्यवस्था ते बाद परमेशरे कसम खाईने अपणे पुत्रा जो नियुक्त कित्या कने तिसरा पुत्र युगां-युगां तक सिद्ध महांयाजक बणीरा। |
This work is licensed under Creative Commons Attribution-ShareAlike 4.0 License.