इब्रानियों 6 - बिलासपुरी नौआं नियम

¹ इस खातर औआ मसीह रियां शिक्षां री शुरु रियां गल्लां जो दोहराईये नीं पर विश्वासा च परिपक्व हुन्दे जाईये। अहांजो भीं ते पैहलकिया शिक्षा रे बारे च यनिके मौती रिया तरफा जो लेई जाणे औल़े कम्मां ते मन फिरावा, कने परमेशरा पर विश्वास करना,

² कने बपतिस्मा कने हाथ रखणे रिया शिक्षा रे बारे च, कने मूईरयां चते जिऊंदा हुणे रे बारे च, कने अनन्त न्याय री शिक्षा रे बारे च गल्ल नीं करनी चाहिन्दी।

³ औआ, अहें परिपक्व विश्वासी बणिये! जे परमेशर अनुमति देओ तां अहें येई करगे।

⁴ सै लोक जे अपणे विश्वासा जो छड्डी दें तिन्हांजो भीं ते मन फिराव रिया तरफा कियां ल्याया जाई सक्कां? तिन्हें इक बार परमेशरा री सच्चाई पैहचाणी थी, स्वर्गा ते बरदान पाये थे कने तिन्हें दुज्यां सौगी इकट्ठा पवित्र आत्मा पाया था,

⁵ तिन्हें महसूस कित्या था भई परमेशरा रा वचन उत्तम आ कने तिन्हें औणे औल़े युगा री सामर्था जो बी महसूस कित्या था।

⁶ कने जे हुण तिन्हें अपणा विश्वास छड्डीतरा! इस खातर तिन्हौं मन फिराव री तरफ ल्यौणा मुश्किल आ, काँह्भई सै खुद परमेशरा रे पुत्रा जो भीं ते क्रूसा पर चढ़ाई राँये कने लोकां रे सामणे तिसरी बेज्जति करी राँये।

⁷ सै लोक जे अच्छी शिक्षा पायें सै इक धरतिया साई ये जिस पर बौहत बार बारिस पौआं इ। जे जमीन खरी, तां किसाना रे खातर अच्छी फसल उगां इ कने परमेशरा रिया तरफा ते आशीष पाईं।

⁸ पर लोक सै जे अपणे विश्वासा जो छडी दें सै तिसा धरतिया साई ये जिस पर झाड़ियां कने कण्डे उगां ये कने सै जे निकम्मी जमीन इ। परमेशर तिसा धरतिया जो शरापित करने औल़ा कने अन्त बिच अग्गी तिसारा नाश करना।

⁹ पर प्यारे मित्रो, हलाँकि अहें इस तरिके ने गल्ल करया राँये, तां बी अहें हकीकत च विश्वास कराँ ये भई तुहांरे खातर ये नींआ। अहांरा भरोसा येआ भई तुहें अच्छियां गल्लां रे खातर ये सै जे छुटकारे सौगी औआं इयां।

¹⁰ काँह्भई परमेशर अन्याई निआं भई तुहांरे काम्म, कने तिस प्यारा जो भुल्ली जाओ, सै जे तुहें तिसरे लोकां री मदद करने रे जरिये तिसरे खातर दस्या। कने परमेशर याद करगा भई तुहें हुण बी लोकां री मदद करया राँये।

¹¹ अहांरी ये बौहत इच्छा इ भई तुहें तदुआं तक जे जिऊंदा ये अच्छा व्यवहार करदे रौआ, ये पक्का करने रे खातर भई तुहांरी आशा सच्च हूणी।

¹² तां तुहें सुस्त नीं बणने। पर तुहें तिन्हांरा अनुशरण करगे सै जे अपणे विश्वास कने धैर्य रिया वजह ने परमेशरा रे वायदयां रे बारस हुणे।

परमेशरा रा अटल वायदा

¹³ ताहली जे परमेशरे अब्राहमा ने वायदा कित्या था, तां कसम खाणे खातर तित्थी तिसते बड्डा कोई होर नीं था, इस खातर तिने अपणे ही नौआं री कसम खाईने ये बोल्या,

¹⁴ “हऊँ सचमुच तिज्जो बौहत आशीष देंगा, कने तेरे बंशां जो अनगिणत बधांगा।”

¹⁵ इस खातर अब्राहम तिन्हां वायदयां जो पाणे रे खातर धैर्य ने इन्तजार करदा रैया।

¹⁶ माहणु त अपणे ते किसी बड्डे रा नौं लेईने कसम खांये, कने तिन्हांरे हर इक बैहसा रा फैसला कसमा नेई खत्म हुआं।

¹⁷ इस खातर परमेशरे बी कसम खाद्दि, ये करने रे जरिये तिने तिन्हां लोकां जो ये दिखाणा चाहया तिसते जे वायदा कित्तिरा था भई सै वायदा जे तिने कित्तिरा सै तिस्सो पूरा करगा।

¹⁸ तां फेरी येत्थी दो गल्लां ईं-परमेशरा रा वायदा कने तिसरी कसम-सै जे कदीं नीं बदली सकदियां कने तिन्हांरे बारे च जे परमेशर कदीं झूट्ठ नीं बोल्ली सकदा। इस खातर अहें सै जे परमेशरा ले सुरक्षा पाणे जो आईरे कने सै आशा जे तिने अहांजो दित्तिरी, तिसाजो थम्मीरे हुये, बौहत जोशा चे।

¹⁹ अहांरी आशा मजबूत इ कने ये हिल्ली नीं सकदी कने ये अहांजो परमेशरा ते भटकणे नीं देन्दी, वल्कि ये अहांजो परमेशरा रे मन्दरा रिया पवित्र जगह तक लेई जांई,

²⁰ तित्थी जे यीशुये मेलिकिसिदक याजका साई सदा काल रा महायाजक बणीने अहां खातर अगुवे साई प्रवेश कित्तिरा।