इब्रानियों 5 - बिलासपुरी नौआं नियम

¹ परमेशरे हरेक महायाजका जो इस्राएल रे लोकां रे बिच्चा ते चुणया, कने तिने हरेक महायाजका जो लोकां रिया तरफा ते अपणी सेवा रे खातर नियुक्त कित्या ताकि सै लोकां रे पापां रिया माफिया खातर भेंट कने बलिदान चढ़ाये।

² काँह्भई इक महांयाजक खुद बौहत सारियां गल्लां च कमजोर आ इस खातर सै नासमझां कने भटकीरयां ने कोमल व्यवहार करी सक्कां।

³ काँह्भई सै खुद कमजोर आ इस खातर तिस्सो नां सिर्फ लोकां रे पापां खातर वल्कि अपणे पापां रे खातर बी बलिदान चढ़ाणे री जरूरत इ।

⁴ कोई अपणे खातर महांयाजका रे आदरा रा पद खुद नीं चुणदा, पर इक माहणु महांयाजक तां बणां, जे परमेशरे तिस्सो चुणीरा ओ, तियां जे परमेशरे हारून जो चुणया था।

हमेशा खातर महायाजक

⁵ तियां इ मसीह अप्पूँजो महायाजक बणाईने अपणी बडयाई नीं कित्ती, पर परमेशरे तिस्सो सै आदर दित्या ताहली जे तिने ये बोल्या, “तू मेरा पुत्र आ; आज्ज हऊँ ये घोषित करा भई तू मेरा पुत्र आ”

⁶ इयां इ परमेशर तिस्सो दुज्जिया जगह च भीं बोलां, “तू मेलिकिसिदक याजका साई सदा खातर याजक आ।”

⁷ ताहली जे यीशु इस संसारा च था तां तिसरे जीवन काला च ऊच्चिया अवाज़ा च पुकारदे हुये कने रोन्दे हुये आँसुआं ने परमेशरा रे सामणे प्राथना कने विनती कित्ती सै जे तिस्सो मौती ते बचाई सक्कां था; काँह्भई सै नम्र कने परमेशरा रे प्रति समर्पित था इस खातर परमेशरे तिसरी प्राथना सुणीने तिसजो जबाब दित्या।

⁸ परमेशरा रा पुत्र हुणे पर बी तिने दुखां रे जरिये हुक्म मनणा सिखया,

⁹ ताहली जे तिने बो सब कित्या सै जे तिस्सो करना चाहिन्दा था, तां सै तिन्हां सारयां रे खातर सदा काल रे छुटकारे री वजह बणया सै जे तिसरे हुक्मां जो मन्नां ये।

¹⁰ कने परमेशरे तिस्सो मेलिकिसिदक याजका साई महायाजक हुणे रे खातर घोषित कित्या।

बिश्वासा ते भटकणे रा नतीजा

¹¹ अहांले इसरे बारे च बोलणे जो बौहत किछ आ, पर तिन्हांरा बखान करना मुश्किल आ, काँह्भई तुहें समझणे च बड़े सुस्त ये।

¹² भले इ तुहें बौहत पुराणे विश्वासी ये कने हुण तुहांजो लोकां रे खातर गुरू बणी जाणा चाहिन्दा था, फेरी भीं हुण तुहांजो ये जरूरी हुईगरा भई कोई तुहांजो दोबारा परमेशरा रे विषय री सान गल्ल सिखाओ। तुहें त बच्चे साई ये तिस्सो जे दुध चाहिन्दा कने सै जे रोटी नीं खाई सकदा।

¹³ जो बी दुध पीआं सै हल्तियें बी बच्चा, काँह्भई सै सही कने गल़ता च फर्क करना नीं जाणदा।

¹⁴ पर रोटी तिन्हां लोकां रे खातर इ सै जे विश्वासा च परिपक्व ये, कने सै जे अनुभवा रे जरिये सही कने गल़ता च फर्क करना जाणाँ ये।