इब्रानियों 4 - बिलासपुरी नौआं नियम

परमेशरा रे लोकां रा विस्राम

¹ ताहली जे परमेशरे अहांने वायदा कित्तिरा भई अहें विस्राम रिया जगह प्रवेश करगे, तां अहांजो इस खातर चौकस रैहणा चाहिन्दा ताकि तुहां चते कोई तित्थी जाणे ते बंचित नीं रौ।

² काँह्भई अहें बी यीशु मसीह री खुशखबरी सुणी चुक्कीरे तियां जे इस्राएली लोकें बी विस्राम रिया जगह च प्रवेश करने री खुशखबरी सुणी थी। पर तिन्हें तिस पर विश्वास नीं कित्या इस खातर सै सन्देश तिन्हांरे खातर बेकार था।

³ पर अहें तिन्हेंजे विश्वास कित्या, परमेशरा रे वायदा कित्तिरे तिस विस्रामा च प्रवेश कराँ ये; तियां जे परमेशरे बोल्या था, “मैं गुस्सा हुईने ये कस्म खाद्दि, भई सै तिसा जगह च कदीं प्रवेश नीं करगे तित्थी जे हऊँ तिन्हांजो आराम देआं,” परमेशरे ये इस खातर नीं बोल्या, काँह्भई हुण तक विस्राम री जगह त्यार नीं थी, पर सै जगह संसारा रिया सृष्टिया रे बगता ते त्यार इ।

⁴ काँह्भई सतवें दिनां रे बारे च परमेशरे पवित्रशास्त्रा च येढ़ा बोलीरा, भई “परमेशरे सतवें दिन अपणे सब कम्मां जो नपटाई ने रमान कित्या।”

⁵ कने अहें बी ये पढ़ा ये भई तिने बाद बिच बोल्या, “सै मेरे विस्रामा रिया जगह च कदीं प्रवेश नीं करी पांगे।”

⁶ सै इस्राएल रे लोक तिन्हेंजे पैहले खुशखबरिया जो सुणीरा था, पर विस्राम रिया जगह च प्रवेश करने च असफल रै, काँह्भई तिन्हें परमेशरा रा हुक्म नीं मन्नया। पर हुण बी किछ लोकां जो विस्राम रिया जगह च प्रवेश करने रे खातर मौका।

⁷ इस खातर परमेशरे किसी दुज्जे वगता जो अपणे विस्रामा रिया जगह च प्रवेश करने खातर तैह कित्या कने सै वगत आज्ज आ। अहांरे पूर्वजें विद्रोह करने रे कई साल्लां बाद परमेशरे दाऊदा रे जरिये बोल्या, तियां जे तिने बोल्या, “जे तुहें आज्ज परमेशरा री अवाज़ सुणो, तां तिसरा पालन करने ते इन्कार नीं करयां”

⁸ काँह्भई जे यहोशू इस्राएली लोकां जो विस्रामा रिया जगह च प्रवेश कराई लेआं, तां बाद बिच परमेशरे दुज्जे दिनां रे बारे च गल्ल नीं कित्ती हुन्दी।

⁹ इस खातर हल्तियें बी इक जगह परमेशरा रे लोकां खातर त्यार इ तित्थी जे सै पूरी तरह आराम करी सक्कां ये। तिन्हां तियां आराम करना तियां जे सत्तवें दिन परमेशरे आराम कित्या था।

¹⁰ काँह्भई सै जे कोई परमेशरा रे विस्रामा च प्रवेश कराँ, तिने बी परमेशरा साई अपणयां कम्मां जो पूरा करीने विस्राम कित्तिरा।

¹¹ इस खातर आओ अहें तिस विस्राम रिया जगह च जाणे री कोशिश करिये, ताकि येढ़ा नीं हो भई कोई माहणु इस्राएली लोकां साई हुक्म नीं मन्नीने विस्राम च जाई नीं पाओ।

¹² काँह्भई परमेशरा रा वचन जिऊंदा, सामर्थी, कने हरेक दोधारी तलवारी ते बी बौहत पैना; सै अहांरे प्राण कने आत्मा जो गहराईया तक बिन्हां, तियां जे इक तेज तलवार अहांरे हरेक जोड़ां जो, कने गुदे-गुदे जो लग करीने आर-पार बिन्ही देईं, कने मनां रियां भावनां कने विचाराँ जो परखी लेआं।

¹³ सृष्टिया री कोई बी चीज़ परमेशरा रिया नज़राँ ते छिपीरी नीं, पर तिसरे सामणे सारी चीजां खुल्ही कने प्रगट इ। कने अहें अपणी जिन्दगिया च जो किछ कित्तिरा तिसरा हिसाब अहांजो परमेशरा ले देणे पौणा।

अहांरा महान महायाजक

¹⁴ इस खातर औआ अहें अपणे विश्वासा जो मजबूतिया ने थम्मी रखिये। काँह्भई सै अहांरे खातर इक महायाजक आ, सै जे स्वर्गा च गईरा कने सै परमेशरा रा पुत्र यीशु मसीह आ।

¹⁵ काँह्भई यीशु मसीह सै जे अहांरा महायाजक आ सै अहां री हरेक कमजोरिया जो समझां; काँह्भई सै सब्बीं गल्लां च अहां साई शैतान्ना रे जरिये परखया गया, पर तिने कोई पाप नीं कित्या।

¹⁶ इस खातर औआ, अहें हौंसले सौगी परमेशरा रे सामणे चलिये सै जे लोकां पर अनुग्रह कराँ। फेरी अहां पर परमेशरा दया कने अनुग्रह करना कने अहांरी जरूरतां रे वगत तिस अहांरी मदद करनी।