इब्रानियों 2 - बिलासपुरी नौआं नियम

महान छुटकारा

¹ इस वजह ते अहांजो तिन्हां गल्लां पर सै जे अहें सुणी रियां, होर बी मन लगाणे री जरूरत इ, ताकि अहें बैहकी ने तिन्हांते दूर चली नीं जाओ।

² काँह्भई सै जे सन्देश परमेशरे स्वर्गदूतां रे जरिये बोल्या था, सै सच्चा साबित हुया कने हरेक अपराध कने हुक्मां जो नीं मनणे औल़े जो सजा मिली,

³ तां अहां लोकां जो बी पक्का सजा मिलणी जे अहें बड्डे छुटकारे ते बेफिक्र रैं। प्रभु यीशु मसीह खुद इस छुटकारे रे बारे च पैहले बोल्या था कने तिस्सो सुणने औल़यां चेलयां रे जरिये अहांजो सच्चा साबित हुया।

⁴ परमेशरे बी चिन्ह कने अदभुत काम्म कने कई किस्मा रे सामर्था रे कम्मां रे जरिये कने अपणिया इच्छा रे मुतावक लोकां जो पवित्र आत्मा रे जरिये बरदान देईने ये साबित कित्या।

अहांरा मुक्ती दाता

⁵ परमेशरे अहांजो औणे औल़े तिस संसारा जो तिसरी चर्चा जे अहें करया रायें, स्वर्गदूतां रे अधीन नीं कित्या पर प्रभु यीशुये रे अधीन कित्या।

⁶ तियां जे पवित्रशास्त्रा रिया किसी जगह पर ये लिखिरा, “परमेशर, लोक क्या ये, भई तिज्जो तिन्हांरे बारे च सोचणा चाहिन्दा, या लोक क्या ये भई तू तिन्हांरी फिक्र कराँ?

⁷ तैं तिन्हांजो स्वर्गदूतां ते सामर्था च किछ वगता तक घट करीने बणाईरा, तैं तिन्हांजो राजे साई महिमा कने आदर दित्तिरा।

⁸ तैं सब किछ तिन्हांरे अधिकारा च करित्या।” इस खातर ताहली जे परमेशरे सब किछ तिन्हांरे अधिकारा च करित्या, तां तिने किछ बी नीं रखया सै जे तिन्हांरे अधीन नीं हो। पर अहें हुण तकौ सब किछ तिन्हांरे अधीन नीं देखदे।

⁹ पर अहें यीशुये जो देक्खां ये, सै जे स्वर्गदूतां ते किछ इ वगता रे खातर घट कित्या गया था, ताकि परमेशरा रे अनुग्रह रे जरिये सै सब्बीं रे खातर मरी सक्को। कने काँह्भई तिने दुख सैया कने मरया, तां हुण अहें जाणाँ ये भई सै महिमामय आ कने आदर कित्या गईरा।

¹⁰ परमेशरे सब किछ बणाईरा कने तिसजो सै लगातार अपणे खातर बणाईने रखां। परमेशरे सही कित्या ताहली जे तिने दुखा रे जरिये यीशुये जो सिद्ध कित्या ताकि सै बौहत सारयां बच्चयां जो महिमा च पहुँचाये। काँह्भई यीशु इ हाया सै जे तिन्हौं छुटकारे च लेई जां।

¹¹ काँह्भई पवित्र करने औल़ा कने सै जे पवित्र कित्ते जायें, तिन्हां सारयां रा पिता इक इ हाया; इस वजह ते यीशु तिन्हांजो भाई-भैण बोलणे ते नीं शर्मान्दा।

¹² पर मसीह परमेशरा ने बोलां, “मेरे लोकां जो मांह ये दसणा भई तैं क्या कित्तिरा; तिन्हां रिया सभा रे बिच मांह तेरा भजन गाणा।”

¹³ कने फेरी सै ये बोलां, “मांह तिस पर भरोसा रखणा।” कने फेरी सै बोलां, “मांह तिन्हां बच्चयां सौगी आ सै जे मिन्जो परमेशरे दित्तिरे।”

¹⁴ काँह्भई तियां जे परमेशरा रे बच्चे माहणु ये, तियां इ यीशु बी तिन्हां साई माहणु बणया। परमेशरे ये इस खातर कित्या ताकि तिसरिया मौती रे जरिये शैतान्ना जो नाश करी सक्को, तिसले जे मौती रा अधिकार था।

¹⁵ कने इस तरिके ने तिने तिन्हां सारयां जो छडवाईल्या सै जे मौती रे डरा रिया वजह ने जिन्दगी भर इक्की दास्सा साई जीआं थे।

¹⁶ काँह्भई प्रभु यीशु त स्वर्गदूतां जो नीं, पर अब्राहमा रे वंशां जो सम्भाल़ां।

¹⁷ इस वजह ते मसीह यीशुये जो सब्बीं गल्लां च माणुआं साई बणना जरूरी था; ताकि सारयां रे पापां खातर सै प्रायश्चित बल़ि हुणे रे खातर परमेशरा रे सामणे दयालु कने विश्वास लायक महायाजक बणो।

¹⁸ काँह्भई यीशुये री परीक्षा लिति गईरी कने तिने खुद दुख भोग्या, इस खातर सै परीक्षा च पैईरे लोकां री मदद करी सक्कां।