इब्रानियों 12 - बिलासपुरी नौआं नियम

धैर्य री बुलाहट

¹ इस वजह ते ताहली जे बौहत लोकां रे विश्वासा रियां गवाहीयें अहांजो इतणे बड्डे बद्दल़ा साई घेरीरा ओ, तां औआ, हरेक रोकणे औल़ियां चिज़ां कने उलझाणे औल़यां पापां जो दूर करीने, तिसा दौड़ा च जे अहां दौड़णा तिसाजो धैर्य ने दौड़िये।

² सै जे अहांजो विश्वासा रिया तरफा लेई जां कने अहांरे विश्वासा जो सिद्ध करने औल़े यीशुये रिया तरफा देखदे रैं। तिने जे तिसा खुशिया खातर सै जे औणे औल़े दिनां च मिलणे औल़ी थी, बेज्जतिया री परवाह नीं करीने क्रूसा री मौत सही ली, कने परमेशरा रे संघासणा रे सज्जे पासे आदरा रिया जगह जाई बैट्ठया।

परमेशर पिता रे जरिये ताड़ना

³ इस खातर यीशुये रे उदाहरणा पर ध्यान देआ भई तिने जे पापियां रे जरिये दित्तिरे बौहत दुखां जो कने नफरता जो सहन करील्या, ताकि तुहें उदास हुईने हिम्मत नीं हारी दो।

⁴ तुहें अप्पूँजो बचाणे रे खातर पापा रे खिलाफ लड़दे हुये हुण तक तिसा सीमा तक नीं सहन करना पैया भई तुहांजो खून बहाणा पया।

⁵ कने तुहें तिस उत्साह रियां गल्लां जो भुल्ली गरे, सै जे परमेशरे तुहांजो अपणे बच्चे साई बोल्ली रियां, “मेरे बच्चे, ताहली जे प्रभु तुहांजो दस्सो भई तैं गल़ती कित्ती, तां तिस सुधारा जो हल्की गल्ल नीं समझ। कने ताहली जे प्रभु तिज्जो थिड़को तां हिम्मत नीं हार।

⁶ काँह्भई प्रभु तिसने जे प्यार कराँ, तिसजो सुधाराँ बी आ, कने तिस्सो जे सै अपणा बच्चा मन्नी लेआं, तिस्सो सुधारने रे खातर सजा बी देआं।”

⁷ तुहें पिता री दित्तिरी सजा समझीने इन्हां दुखां जो सहन करी लौआ; तियां जे इक पिता बच्चे ने बर्ताव कराँ तियां इ परमेशर तुहांजो अपणे बच्चे जाणीने तुहांजो बर्ताव कराँ। येढ़ा कोई बच्चा नींआ तिसजो जे सुधारने रे खातर पिता सजा नीं देन्दा ओ।

⁸ जे परमेशर तुहांजो नीं सुधारो तियां जे सै अपणे बच्चे जो सुधाराँ, तां तुहें परमेशरा रे असली बच्चे नींये पर अबैध बच्चे साई ये।

⁹ फेरी ताहली जे अहांरा संसारिक पिता बी अहांजो सुधारने रे खातर सजा देआं, फेरी बी अहें तिसरा आदर कराँ ये। तां ये अहांरे खातर होर बी जादा जरूरी आ, भई परमेशर सै जे अहांरा आत्मिक पिता तिसरे सुधारा जो अहें ग्रहण करी लो ताकि अहें जिऊंदा रौ।

¹⁰ अहांरे संसारिक पिता त अपणिया सोच्चा रे मुतावक तियां जे तिन्हांजो ठीक लगां था, थोड़े दिनां रे खातर अहांजो सुधाराँ थे, पर परमेशर त अहां रिया भलाईया रे खातर अहांजो सुधाराँ ताकि अहें बी तिस साई पवित्र हुईजो।

¹¹ जिस वगत सै अहांजो सुधाराँ ये तिस वगत सै सुधार अहांजो ठीक नीं लगदा, वल्कि बुरा लगां, तां बी सै जे सुधारा जो सैहन्दे-सैहन्दे पक्के हुईगरे, बाद बिच तिन्हांजो शान्ति कने धार्मिकता रा ईनाम मिलां।

उपदेश कने चेतावनी

¹² इस खातर अपणे थक्कीरे हत्थां जो ऊपर चक्का कने अपणे कम्बदे हुये गोडयां जो मजबूत करा।

¹³ कने सिधे रस्ते पर चलदे रौआ ताकि लंगड़ा कने कमजोर तुहांरे पिछे-पिछे चलदे हुये भटकी नीं जाओ, पर मजबूत हुईजो।

¹⁴ सब्बीं ने शान्तिया ने रैहणे, कने पवित्र हुणे रे खातर हर तरह री कोशिश करदे रौआ, काँह्भई पवित्रता ते बिणा कोई प्रभुये जो कदीं बी नीं देखी सकदा।

¹⁵ कने ध्यान रखा, येढ़ा नीं ओ भई कोई परमेशरा रे अनुग्रह ते छुटी जाओ, या अविश्वासा री कड़वी जड़ तुहांरे बिच फुटी जो कने अपणे जहरा रे जरिये बौहत सारे लोकां जो दुख देओ कने अशुद्ध बणाये।

¹⁶ येढ़ा नीं हो भई कोई माहणु व्यभिचारी, या अब्राहम रे पोते एसाव साई अधर्मी हो। काँह्भई एसाव पैहलौठा था कने तिसले पैहलौठा होणे रे सारे अधिकार थे, पर तिने अपणे जन्म सिद्ध अधिकारा जो हल्का समझीने इक्की वगता रे खाणे रे खातर अपणे छोट्टे भाईये याकूब जो बेच्चीत्या।

¹⁷ तुहें त जाणाँ ये भई बाद बिच ताहली जे तिने पिता री आशीष पाणी चाई, तां तिस्सो नीं मिली, हलाँकि सै रोया तियां जे अपणियां गल़तियां जो सुधारने रे खातर इक मौका पाणे री कोशिश करया राँ था फेरी बी तिस्सो सै आशीष नीं मिली।

¹⁸ तुहें लोक सिनै पहाड़ा साई असली पहाड़ा ले नीं आये तित्थी जे आग्ग जल़ीरी थी कने काल़ी घटा रैहन्दी थी, तित्थी जे अन्धकार कने आन्धी थी। कने इस्राएल रे लोक परमेशरा ते व्यवस्था पाणे रे खातर येढ़ि जगह च गये।

¹⁹ कने नां तुहें येढ़िया जगह च आये तित्थी तुहें तुरहिया री अवाज़ सुणी कने बोलणे औल़े री येढ़ि भारी अवाज़ सुणी तिसरिया वजह ने सुणने औल़यां येढ़ि विनती कित्ती ओ, भई तिन्हांने होर गल्लां नीं करो।

²⁰ येढ़ा तिन्हें इस खातर बोल्या, काँह्भई सै परमेशरा रे हुक्मा जो सहन नीं करी पाये ताहली जे परमेशरे तिन्हांने ये बोल्या, “जे कोई पशु बी पहाड़ा जो छुओ तां तिस्सो पत्थर मारीने मारी दित्या जाओ।”

²¹ कने सै दर्शण येढ़ा डरावना था भई मूसे बी येई गलाया, “हऊँ डरा रे मारे थर-थर कम्बया राँ।”

²² पर तुहें सिय्योन रे पहाड़ा पर आईगे सै जे जिऊंदा परमेशरा रा स्वर्गीय यरूशलेम नगर आ कने तित्थी अनगिणत स्वर्गदूत खुशिया रा त्योहार मनायें।

²³ कने तुहें परमेशरा रे पैहलौठे बच्चे रिया कलीसिया च आईगरे, तिन्हारे नौं जे स्वर्गा च लिखे गईरे। ये धर्मी लोकां री आत्मा इ सै जे हल्तिये स्वर्गा चे, कने तिन्हांजो सिद्ध कित्या गया कने तुहें खुद परमेशरा ले आईगरे सै जे सारियां गल्लां रा न्याय करने औल़ा।

²⁴ तुहें यीशुये ले आई चुक्कीरे सै जे परमेशर कने लोकां रे बिच्चा रा नईया वाचा रा बिचौल़िया, कने छिड़कावा रे तिस लहूये रे नेड़े आईगरे सै जे हाबिल रे लहूये ते बड्डे वायदे कराँ।

²⁵ सावधान रौआ, भई तुहें परमेशरा ते मुँह नीं फेरा सै जे तुहांजो गल्लां कराँ, काँह्भई जे इस्राएल रे लोक सजा ते नीं बचे ताहली जे तिन्हें इसा धरतिया च रैहन्दे हुये मूसा रियां गल्लां ते मुँह फेरील्या था, तां सच्चीजो अहें बी नीं बची सकदे, जे अहें तिस परमेशरा ते मुँह फेरगे सै जे स्वर्गा ते अहांने गल्लां कराँ।

²⁶ ताहली जे परमेशरे सिनै पहाड़ा पर खड़ा हुईने गल्लां कित्तियां, तां तिसरिया अवाज़ा ते धरती हिलाई गई पर हुण तिने ये वायदा कित्तिरा भई, “इक बार फेरी मांह नां सिर्फ धरतिया जो, पर अम्बरा जो बी हिलाई देणा।”

²⁷ कने ये गल्ल भई, “इक बार फेरी” इसा गल्ला जो दस्सां भई बणाई हुई चीजां हिल्ली जाणियां, कने सै हटाई दित्ति जाणियां ताकि सै चीजां जे हिलाई नीं जाई सकदियां सै अटल रैहणियां।

²⁸ इस खातर अहांजो सै राज जे मिलीरा सै हिलाया नीं जाई सकदा, इसा गल्ला रे खातर अहें परमेशरा रा धन्यवाद कराँ ये। कने ईज्जत कने डरा ने परमेशरा री येढ़ि अराधना कराँ ये, तिसते जे परमेशर खुश हुआं।

²⁹ काँह्भई अहांरा परमेशर भस्म करने औल़िया अग्गी साई आ।