इब्रानियों 11 - बिलासपुरी नौआं नियम

बिश्वासा रे उदाहरण

¹ जितने लोक परमेशरा पर विश्वास कराँ ये तिन्हांजो ये निश्चा भई तिसा चीज़ा री जे सै आशा करी राँये सै परमेशरा तिन्हांजो देणी, तिन्हांजो निश्चा भई सै चीज जे तिन्हें हल्तियें तक नीं देखी सै हकीकत च मौजूद इ।

² अहांरे पूर्वजां रा विश्वास इस तरिके रा था सिर्फ इस वजह ने परमेशर तिन्हांते खुश था।

³ विश्वासा तेई अहें जाणाँ यें भई संसारा री सृष्टि परमेशरा रे वचनां रे जरिये हुई थी। इस खातर अहें जो बी देक्खां ये सै तिन्हां चीजां ते बणीरा तिस्सो जे अहें देक्खी नीं सकदे।

⁴ विश्वासा तेई आदम रे बेटे हाबिले कैना ते उत्तम बलिदान परमेशरा खातर चढ़ाया, कने विश्वासा रेई जरिये हाबिल जो परमेशरे धर्मी माहणुये रे रुपा च ग्रहण कित्या, काँह्भई परमेशर तिसरियां भेन्टां ते खुश हुया था; कने हलाँकि हाबिल मरी चुक्कीरा फेरी भीं विश्वास केढ़ा हूणा चाहिन्दा सै इस बारे च अहांजो सखां।

⁵ विश्वासा रे जरिये हनोक जिऊंदा स्वर्गा जो चक्कील्या गया इस खातर सै मरया नींआ, कने किसी जो बी सै मिलया नींआ, काँह्भई परमेशरे तिस्सो चक्की लरा था, कने तिसरे चक्के जाणे ते पैहले तिसरी ये गवाही दित्ति गई थी भई तिने परमेशरा जो खुश कित्तिरा।

⁶ कने सिर्फ विश्वासा रे जरिये परमेशरा जो खुश कित्या जाई सक्कां; काँह्भई परमेशरा रे नेड़े औणे औल़े जो विश्वास करना चाहिन्दा भई सै हया, कने सै जे तिस्सो जाणने री कोशिश कराँ ये तिन्हांजो सै ईनाम देआं।

⁷ विश्वासा रे जरिये नूँह जो ताहली जे तिन्हां गल्लां री चेतावनी दित्ति गई सै जे तिने देक्खी तक नीं थिआं, तां तिने परमेशरा रा आदर करदे हुये तिसरे हुक्मा जो मन्नीने अपणे परिवारा जो बचाणे रे खातर इक जहाज बणाया था। अपणे विश्वासा रे जरिये तिने इस संसारा जो दोषी मन्नया कने इस खातर परमेशरे नूँह जो धर्मी घोषित कित्या, काँह्भई तिने परमेशरा पर विश्वासा कित्या।

⁸ विश्वासा रे जरिये इ ताहली जे परमेशरे अब्राहम जो येढ़िया जगह पर जाणे रे खातर सद्दया था, सै जगह जे बाद बिच वारिस रे रुपा च तिसजो मिलणी थी, हलाँकि सै ये जाणदा तक नीं था भई सै कित्ती जाया राँ, फेरी भीं तिने परमेशरा रा हुक्म मन्नया कने सै चली गया।

⁹ विश्वासा रे जरिये इ तिसा जगह जो देणे रा वायदा जे परमेशरे तिस्सो कित्या था, तिस पर सै इक परदेसिये साई तम्बू बणाईने रैया। अब्राहमा सौगी तिसरा पुत्र इसहाक कने पोता याकूब बी तम्बुये च रै तिन्हे जे तिस वायदे जो परमेशरा ते पाया था।

¹⁰ काँह्भई अब्राहम मजबूत निऊंआं औल़े नगरा च (स्वर्गा च) रैहणे रे खातर इन्तजार करया राँ था, तिस राजे रचणे औल़ा कने बनाणे औल़ा परमेशर आ।

¹¹ विश्वासा ने सारा खुद बुढी हुणे पर बी गर्भ धारण करने री सामर्थ पाई; पर अब्राहमे वायदा करने औल़े परमेशरा जो बफादार जाणया था।

¹² इस वजह ते तिस इक माहणुये ते सै जे मरने औल़ा था इतणे बंशज पैदा हुये भई सै अम्बरा रे तारयां कने समुद्रा रे कनारे रे रेता रियां कणियां साई अनगिणत ये।

¹³ ये सारे लोक तिन्हेंजे परमेशरा पर विश्वासा कित्या कने परमेशरा रे जरिये वायदा कित्ती रियां चीजां जो बगैर पाये मरीगे। पर सै दूरा तेई देखीने खुश हुये कने ये बी समझीगे भई अहें धरतिया पर परदेशी कने अंजाण ये।

¹⁴ सै जे येढ़ियां गल्लां बोलां ये, सै ये दस्सां ये भई अपणे देशा रिया टोल़ा चे।

¹⁵ कने तिस देशा ते जे सै निकल़ी आईरे थे, तिस देशा रे बारे च सै लगातार सोच्चे नींये, जे सै सोच्चे हुन्दे तां वापस चलीगरे हुन्दे।

¹⁶ पर तिन्हें इक उत्तम यनि स्वर्गीय देशा च रैहणे री इच्छा कित्ती; इस खातर परमेशर तिन्हांरा परमेशर कहलाणे ते खुश था, काँह्भई परमेशरे तिन्हां खातर इक नगर त्यार कित्तिरा।

¹⁷ विश्वासा रे जरिये अब्राहमे परखे जाणे रे बगता च अपणे पुत्र इसहाका जो बल़िया खातर भेन्ट चढ़ाया। अब्राहमा जोई परमेशरे वायदा कित्या था फेरी बी सै अपणे इकलौते पुत्रा री बल़ि देणे जो त्यार था।

¹⁸ हलाँकि परमेशरे तिसने बोल्या था, “इसहाका रे जरिये इ तेरा वंश जाणया जाणाँ।”

¹⁹ काँह्भई अब्राहम ये समझी चुक्कया था भई परमेशरा च मूईरयां जो जिऊंदा करने री सामर्थ इ; इक तरिके ने तिने इसहाक जो मूईरयां चते जिऊंदा पाया।

²⁰ काँह्भई इसहाके परमेशरा पर विश्वास कित्या, इस खातर तिने अपणे पुत्र याकूब कने एसाव जो आशीष दित्ति सै जे भविष्य च तिन्हांरे जीवना च पूरी हूणी थी।

²¹ विश्वासा रे जरिये इ याकूबे मरदे बगत यूसुफा रे दुईं पुत्राँ चते इक्की-इक्की जो आशीष दित्ति, कने अपणे सोठुये रे सहारे मत्था टेक्कीने परमेशरा री अराधना कित्ती।

²² विश्वासा रे जरिये इ यूसुफे, ताहली जे सै मरने औल़ा था, तां इस्राएली लोकां जो मिस्र देशा ते निकल़णे रे बारे च बोल्या, कने तिने अपणी हड्डियां जो अपणे सौगी ले जाणे रा हुक्म दित्या।

²³ विश्वासा रे जरिये इ मूसा रे मौ-बुढ़यां तिस्सो जमणे ते बाद तिन्नां महीनयां तकौ लुकोई रखया, काँह्भई तिने देख्या भई बालक खास आ, कने सै राजे रे हुक्मा ते नीं डरे।

²⁴ विश्वासा रे जरिये इ मूसे बड्डे हुईने फिरौना रिया बेटिया रा पुत्र कहलाणे ते नां करी ती।

²⁵ इस खातर भई तिस्सो पापां च थोड़े इ दिनां रे सुख भोगणे ते परमेशरा रे लोकां सौगी दुख भोगणा जादा खरा लगया।

²⁶ मूसे सोच्चया भई मिस्र रे भण्डारा ते बड्डा धन पाणे ते मसीह रे खातर दुख सैहणा जादा कीमती आ, काँह्भई सै भविष्या च ईनाम पाणे री उम्मीद करी रां था।

²⁷ तिने विश्वासा रे जरिये राजे रे गुस्से ते बिणा डरे मिस्र देशा जो छड्डीत्या। काँह्भई सै तियां जाया राँ था तियां जे भई सै परमेशरा जो देख्यारा था, तिस्सो जे कोई देक्खी नीं सकदा।

²⁸ विश्वासा रे जरिये इ मूसे इस्राएली लोकां जो फसह रे त्योहारा जो मनणे रा हुक्म दित्या कने दरवाजे रिया चौखटा पर भेड्डा रे बच्चे रा लहू छिड़कणे रा हुक्म दित्या, ताकि नाश करने औल़ा स्वर्गदूत इस्राएल रे पैहलौठयां पुत्राँ जो हाथ नीं लाओ।

²⁹ विश्वासा रे जरिये इ इस्राएली लोक लाल समुद्रा चियें हुईने पारा जो चली गये, तियां जे सुकिया धरतिया परा ते; कने ताहली जे मिस्र देशा रे लोकें तेढ़ा इ करना चाहया, तां सब डुबी मरे।

³⁰ विश्वासा रे जरिये इ यरीहो नगरा री चार दीवारी, ताहली जे इस्राएली लोक सत्तां दिनां तक तिसरा चक्कर लाई चुक्के, तां सै थल्ले पई गई।

³¹ विश्वासा रे जरिये इ राहाब वेश्या हुक्म नीं मनणे औल़यां सौगी नाश नीं हुई, काँह्भई तिसे भेदियां जो शान्तिया ने रखीरा था।

³² हुण होर हऊँ क्या बोलूं? काँह्भई मेरले वगत नींआ भई गिदोन, बाराक, शिमशोन, यिफतह, दाऊद, शमुएल, कने भविष्यवक्तयां रे बारे च गल्ल करूँ।

³³ इन्हें विश्वासा रे जरिये लड़ाई कित्ती कने राज जित्ते; न्याय ने राज कित्या; सै जे परमेशरे वायदा कित्तिरा था तिसजो पाया; तिन्हें शेराँ रे मुँह बी बन्द कित्ते,

³⁴ इन्हें अग्गी रियां लपटां जो ठण्डा कित्या; तलवारा ते बचीगे, हलाँकि सै कमजोर थे फेरी बी तिन्हें ताकत पाई; लड़ाईयां च सै वीर निकले; कने तिन्हें दुश्मणां रियां फौजां जो मारीने नठाया। ये सारा किछ तिन्हांरे विश्वासा रेई जरिये हुया।

³⁵ विश्वासा रे जरिये किछ जनानें अपणे मूईरयां रिस्तेदाराँ जो फेरी भीं जिऊंदा पाया। पर कितणे त विश्वासा जो नीं छडणे रिया वजह ते जेल्ला च मार खान्दे-खान्दे मरीगे कने जेल्ला ते अजाद नीं हूणा चाये, ताकि सै बौहत अच्छा जीवन पाई सक्को, ताहली जे सै मूईरयां चते जिऊंदा हुणे।

³⁶ किछ लोकां रा त मजाक बणाया गया था; कने कोड़े खाये जबकि किछ होर लोक बन्हे गये, कने किछ लोकां जो जंजीरा ने जकड़ीने जेल्ला च पाई दित्या गया।

³⁷ किछ लोकां जो पत्थर मारे गये; तिन्हौं आरयां ने चीरेने दो फाड़ करित्या गया; किछ लोक तलवारां ने मारे गये; सै जे गरीब थे तिन्हांजो कष्ट दित्ते गये कने तिन्हांने बुरा व्यवहार कित्या गया। सै भेड बकरियां रियां खाल्लां ओडीने इखा-उखा भटकदे रै;

³⁸ सै जंगलां, कने पहाड़ां, कने गुफां च, कने धरतिया रियां दराराँ च भटकीने छुपीरे रै। ये लोक इतणे अच्छे थे भई संसार इन्हां लोकां रे लायक नीं था।

³⁹ विश्वासा रे जरिये इ इन्हां सब्बीं रे बारे च खरी गवाही दित्ति गईरी, तां बी तिन्हांजो वायदा कित्ती रियां चीज़ नीं मिली।

⁴⁰ काँह्भई परमेशरे अहां खातर पैहले तेई इक अच्छी योजना बणाई थी। तिसरा मकसद ये था भई सै सिर्फ अहां सौगी सिद्ध बणो।