गलातियां 4 - बिलासपुरी नौआं नियम

¹ हऊँ ये बखान करगा: तदुआं तक जे इक बालक अपणे पिता रिया जायदाता रा वारस हूणा, पर तदुआं तक जे सै बालक आ सै इक्की दास्सा साई आ, हलाँकि सै सारियां चीजां रा स्वामी आ।

² सै पिता रे जरिये तैह वगता तक देखभाल करने औल़े कने जाँचणे औल़े रे अधीन रैआं।

³ तियां इ अहें बी, ताहली जे बच्चयां साई थे, तां दास्सां साई संसारा रे बेकार नियमां रा पालन कराँ थे।

⁴ पर ताहली जे सही बगत आया, तां परमेशरे अपणे पुत्रा जो भेज्या सै जे औरता ते जम्मीरा, कने व्यवस्था रे अधीन जीआ।

⁵ ताकि सै व्यवस्था रे अधीन जीणे औल़े माहणुआं जो छडवाई सक्को, तिसते जे अहें परमेशरा रे गोद लेईरे बच्चे बणी सक्को।

⁶ काँह्भई तुहें परमेशरा रे बच्चे हो, इस खातर परमेशरे अहांरे दिलां च अपणे पुत्रा री आत्मा भेज्जी, सैई आत्मा परमेशरा जो “हे अब्बा, हे पिता, बोलीने पुकाराँ।”

⁷ इस खातर हुण तुहें दास नींये, पर परमेशरा रे पुत्र ये; कने काँह्भई तुहें पुत्र ये, तां परमेशरे तुहांजो वारस बी बणया।

गलातियां रे बारे च पौलुसा री चिन्ता

⁸ पैहले तुहें लोक तां जे परमेशरा जो नीं जाणदे थे, तां तिस वगत तुहें येढ़े देबतयां रे दास थे सै जे हकीकत च परमेशर नीं थे।

⁹ पर हुण परमेशरा सौगी तुहांरा रिश्ता, कने मिन्जो बोलणा चाहिन्दा भई परमेशरे तुहां सौगी रिश्ता बनाणे च पैहल कित्ती, तां तुहें तिन्हां कमजोर कने नकम्मी परम्परा खा जो कजो वापस जाया राँये? क्या तुहें भीं ते तिन्हांरे दास बणने री इच्छा कराँ ये?

¹⁰ अन्यजाति लोको तुहें परमेशरा जो खुश करने खातर यहूदियां रे खास दिनां, महीनयां, ऋतुआं कने बर्षां जो मन्नां ये।

¹¹ तुहांरे बारे च हऊँ चिन्तित आ भई तुहांरे खातर सै जे काम्म मैं कित्तिरा, सै किति सारा वेकार त नीं हुईगरा।

¹² मेरे साथी विश्वासियो हऊँ तुहांजो विनती कराँ भई अप्पूँजो व्यवस्था ते लग करा तियां जे मैं कित्ती रा, काँह्भई हऊँ व्यवस्था ते तुहां साई अजाद हुईरा। तुहें मेरा किछ बगाड़ीरा नींआ।

¹³ तुहौं त याद हूणा भई हऊँ अपणे शरीरा री कमजोरिया रिया वजह ने पैहली बार तुहांले आया कने खुशखबरी सुणाई।

¹⁴ हलांकि मेरे शरीरा री कमजोरी तुहांरे खातर समस्या बणी, फेरी बी तुहें मिन्जो छोट्टा नीं समझया कने नांई माहने कोई नफरत कित्ती, बल्कि तुहें परमेशरा रे दूता रे रुपा च मेरा स्वागत कित्या, मन्नो हऊँ खुद मसीह यीशु इ था।

¹⁵ तिस वगत तुहें बौहत खुश थे! हुण तुहांरिया तिसा खुशिया जो क्या हुया? हऊँ तुहांरे खातर खुद इसा गल्ला रा गवाह भई जे मुमकिन हुन्दा, तां तुहें अपणियां आक्खीं बी नकाल़ीने मिन्जो देई देन्दे।

¹⁶ तां क्या तुहांजो सच्च बोलणे रिया वजह ने हऊँ तुहांरा दुश्मण हुईगरा?

¹⁷ व्यवस्था पर चलाणे औल़े तुहां च बौहत गैहरी रुची लें, पर तिन्हांरा मकसद ठीक निआं। सै तुहांजो माह्ते लग करना चाँये, ताकि तुहें तिन्हांरे चेले बणी जाओ।

¹⁸ कोई किसी च हमेशा गैहरी रुची लेन्दा रौओ, येत इक खरी गल्ल इ, पर ये किसी खरे खातर हूणा चाहिन्दा, कने सिर्फ तिस इ बगत नीं, ताहलियां तक जे हऊँ तुहां सौगी आ।

¹⁹ मेरे प्यारे बच्चो, तियां जे इक औरत बच्चा जणने रे वगत पीड़ा जो अनुभव कराँ इ, तियां इ हऊँ भीं तुहांरे खातर इक बार पीड़ सैईराँ। मांह तिसा पीड़ा च तदुआं तक रैहणा तदुआं तक जे तुहें पूरे तरिके ने मसीह साई नीं बणी जान्दे।

²⁰ हऊँ चाँह भई हुण तुहांले आई पुज्जुँ कने तुहांजो लग तरिके ने गल्ल-बात करूँ, काँह्भई हऊँ नीं समझी पाईराँ भई तुहांजो क्या बोलूं।

सारा कने हाजिरा रा उदाहरण

²¹ व्यवस्था रे अधीन रैहणे औल़यां ते हऊँ पुछणा चाँह; क्या तुहें नीं सुणदे भई व्यवस्था क्या बोलां इ?

²² पवित्रशास्त्रा च लिखिरा भई अब्राहम रे दो पुत्र थे, इक्की रा जन्म दासिया ते हुया था कने दुज्जे रा जन्म अजाद जनाना ते हुया था।

²³ पर सै जे दासिया ते जम्मया, सै माहणुये रिया सोच्चा रे मुतावक जम्मया; कने सै जे अजाद जनाना ते जम्मया, सै परमेशरा रे वायदे रे मुतावक जम्मया।

²⁴ हुण इन्हां दुईं जनानां री, परमेशरा रियां दुईं वाचां ने तुलना कित्ती जाई सक्कां इ। तिसरे बच्चे जे दासता च जम्मे सै हाजिरा इ कने हाजिरा सिनै पहाड़ा पर बन्हीरी वाचा रा प्रतीक इ।

²⁵ कने हाजिरा मानो अरब रा सिनै पहाड़ा आ, सै अज्जके यरूशलेम री तरफ ईशारा कराँ इ काँह्भई सै अपणे बच्चयां सौगी दासता रा जीवन भुगती राईं।

²⁶ पर स्वर्गा रा यरूशलेम अजाद जनाना सारा साई आ कने तिसरे बच्चे दास नींये। ये यरूशलेम अहां रिया माता साई आ।

²⁷ काँह्भई पवित्रशास्त्रा च लिखिरा : “अरे बांझ औरत, खुशी मना, तैं किसी बच्चे जो नीं जणया, खुशिया ने चीख, तैं बच्चा जणने री पीड़ नीं अनुभव कित्ती, काँह्भई सुहागणां रिया अपेक्षा छड्डी रिया जनाना रे बच्चे जादा हुणे।”

²⁸ मेरे साथी विश्वासियो, अहें इसहाका साई परमेशरा रे वायदे री सन्तान ये।

²⁹ कने तियां जे तिस बगत माहणुये रिया इच्छा रे मुतावक जम्मीरा, आत्मा रे मुतावक जम्मीरे जो सतां था, तियां इ हुण बी हुआं।

³⁰ पर पवित्रशास्त्र क्या बोलां? “इसा दासिया जो कने इसारे पुत्रा जो बाहर कड्डा, काँह्भई ये दासी पुत्र त अजाद जनाना रे सौगी वारस नीं हूणा।”

³¹ इस खातर मेरे साथी विश्वासियो, अहें तिसा दासिया रे पुत्र नींये, बल्कि अहें त अजाद जनाना री सन्तान ये।