इफिसियां 4 - बिलासपुरी नौआं नियम

मसीह रिया देहा च एकता

¹ इस खातर हऊँ सै जे प्रभुये री सेवा रे खातर कैदी आ, तुहां लोकां ने विनती कराँ भई तुहौं परमेशरे तियां जे जीणे खातर सद्दीरा तिस तरिके ने जीआ।

² हमेशा नम्रता कने कोमलता सौगी, धैर्यपूर्वक व्यवहार करा, इक्की दूये जो प्यारा ने सैहन्दे रौआ।

³ पवित्र आत्मे अहांजो इकट्ठा करीने इक कित्तिरा, तां तसल्लिया ने मिली जुलीने इक जुट रैहणे खातर तुहें हर कोशिश करा सै जे अहांजो अप्पूँ चींये बन्हीने रखां इ।

⁴ जिस्म इक आ कने पवित्र आत्मा बी इक आ, इयां इ ताहली जे तुहांजो बी सद्दया गया तां इक इ आस्सा च हिस्सेदार हुणे रे खातर सद्दया गया।

⁵ इक इ प्रभु आ, इक इ विश्वास आ, कने इक इ बपतिस्मा,

⁶ परमेशर इक्को इ हा कने सै सबनीं रा पिता, सैई सब्बीं रे ऊपर आ, सब्बीं च सैई काम्म कराँ, कने सब्बीं च सैई समाईरा।

आत्मिक बरदान

⁷ पर अहां चते हर इक्की जो मसीह रे दान्ना रे हिसाबा ने अनुग्रह मिलीरा।

⁸ इस खातर पवित्रशास्त्र बोलां, “सै ऊँचे पर चढ़ेया कने कैदियाँ जो बन्हीने लेईग्या, कने लोकां जो दान दित्ते।”

⁹ ताहली जे पवित्रशास्त्र बोलां भई “सै ऊँचे पर चढ़या” तां इसरा मतलब येआ भई सै पैहले धरतिया रे थलड़े हिस्से च बी उतरया था।

¹⁰ सै जे हेठ उतरी रा था, ये सैई हाया, सै जे ऊपर बी चढ़ीरा था इतणे ऊपर भई स्वर्गा च सब्बींते ऊच्चिया पदबिया पर, ताकि सै सारिया सृष्टिया जो अपणिया मौजूदगिया ने भरी दो।

¹¹ तिने खुद इ किसी जो प्रेरित हुणे रा बरदान दित्या, तां किसी जो भविष्यवक्ता हुणे रा, किसी जो खुशखबरिया रे प्रचारक हुणे रा, किसी जो परमेशरा रे लोकां री हिफाज़त करने कने सखाणे रा।

¹² ताकि सै परमेशरा रे लोकां जो तिसरी सेवा करने रे खातर त्यार करी सक्को तिसते जे मसीह रा शरीर यनि कलीसिया होर बी मजबूत हुईजो।

¹³ ये तदुआं तक हुन्दा रैहणा तदुआं तक जे अहें अहांरे विश्वास कने परमेशरा रे पुत्रा रे ज्ञाना रे जरिये इक नीं हुईजो। फेरी अहां तियां परिपक्व हूणा तियां जे मसीह आ, कने अहां पूरे तरिके ने तिस साई हूणा।

¹⁴ तां हुण ते अहौं बच्चे साई नीं रैहणा चाहिन्दा। अहें तिसा किश्तिया साई नींये सै जे समुद्रा रियां लहराँ सौगी इतखा-उतखा भटकीने रस्ता बदलदी रैईं। इसरा मतलब येआ भई चलाक कने छली लोक अहांजो अपणिया झुट्ठिया शिक्षां ते बैहकाई नीं सक्को।

¹⁵ बल्कि अहौं प्यारा ने सच्चाई बोलदे हुये हर गल्ला च मसीह साई बणने रे खातर परिपक्व हूणा चाहिन्दा, सै जे अहांरा सिर आ,

¹⁶ अहें सारे जितने मसीह पर विश्वास कराँ ये, तिसरे जिस्मा रे अंगाँ साई ये। तियां जे इक्की माहणुये रा जिस्म सारे जोड़ा रे जरिये जुड़ीरा कने ताहली जे जिस्मा रे सारे अंग ठीक-ढ़ंगा ने काम्म कराँ ये, तां शरीर बधां कने मजबूत हुआं; इस तरिके ने ताहली जे अहें सारे मसीह रे दित्तिरे कम्मा जो कराँ ए अहां मजबूत कने परिपक्व हुणे कने इक्की दूये जो जादा प्यार करना।

मसीह च नया जीवन

¹⁷ इस खातर मिन्जो प्रभुये रे दित्ते गये अधिकारा ने हऊँ ये बोलां भई तुहें अविश्वासियां साई जिन्दगी नीं जीआ तिन्हांरी सोच जे बेकार इ।

¹⁸ सै परमेशरा रे बारे रियां गल्लां जो साफ तौर पर समझी नीं सकदे कने सै परमेशरा ते मिलणे औल़िया जिन्दगिया ते दूर ये, काँह्भई सै परमेशरा जो जाणदे नींये कने तिन्हांरे मन कठोर ये।

¹⁹ काँह्भई सै हुण शर्म महसूस नीं करदे कने तिन्हें अप्पूँजो बेशर्म काम्म करने च समर्पित करी तरा। सै हर तरिके रे गन्दे काम्म लगातार कराँ ये कने होर जादा करने री इच्छा कराँ ये।

²⁰ पर ये सै नींआ सै जे तुहें मसीह रिया शिक्षा ते सिक्खया।

²¹ सै जे तुहें मसीह रे बारे च सुणीरा कने सिक्खीरा हकीकत च सै खुशखबरिया रा सच्चा सन्देश आ सै जे मसीह यीशुये रे बारे चा।

²² तुहांरे गुरुये तुहौं तुहांरे पुराणे स्वभावा जो छडणे खातर सखाया, तुहांरी बुरी भलाखें तुहांजो भटकाया कने तुहांरी जिन्दगी बरबाद करीती।

²³ हुण तुहांरा सोचणे रा तरीका कने परमेशरा री अराधना करने रा तरीका पूरी तरह नया हूणा जरूरी आ।

²⁴ कने तुहौं नया स्वाभाव धारण करना चाहिन्दा, तिसजो जे परमेशरे अपणे बराबर हुणे खातर बणाईरा। तुहांरा स्वभाव सही मायने च धर्मी कने पवित्र हूणा चाहिन्दा।

नई जिन्दगिया रे खातर नियम

²⁵ इस खातर तुहें झूट्ठ बोलणा छड्डिने, हरेक अपणे पड़ोसिये ने सच्च बोल्लो, काँह्भई अहें सारे इक्की शरीरा रे अंग ये।

²⁶ तुहें गुस्सा त कराँ, पर गुस्से च आईने पाप नीं करना, दिन घरने ते पैहले तुहांरा गुस्सा खत्म हुईजो।

²⁷ तुहौं इम्तेहाना च पाणे खातर शैतान्ना जो मौका नीं देआ।

²⁸ सै जे चोरी करदा आया, सै इसते बाद चोरी नीं करो, बल्कि तिस्सो काम्म करना चाहिन्दा, खुद अपणे हत्थां ने मेहणत करा, ताकि तिसले तिस्सो जे जरूरत इ, तिस सौगी बंडणे जो किछ हुई सक्को।

²⁹ तुहांरे मुँआं ते कोई बुरी गल्ल नीं निकल़णी चाहिन्दी, पर जरूरता रे मुतावक सैई निकल़ो सै जे दुज्यां रिया तरक्किया खातर मददगार हो, ताकि तिसते जे सुणने औल़े रा भला हो।

³⁰ परमेशरा रे पवित्र आत्मा जो दुखी मत करा काँह्भई परमेशरे अपणे पवित्र आत्मा ने तुहां पर मोहर लगाईरी भई इक दिन परमेशर तुहांजो पूरे तरिके ने छुड़वांगा।

³¹ हर तरिके री कड़वाहट, झुँझलाहट, गुस्सा, चिखणा-चिल्लाणा, निंध्या कने हरेक बुराईया जो तुहें अपणे अन्दरा ते दूर करा।

³² अप्पूँ चियें इक्की दुज्जे रे प्रति दयालु कने करुणावान बणा कने अप्पूँ चियें इक्की दूये रे अपराधां जो तियां इ माफ करा तियां जे मसीह रे जरिये तुहांजो परमेशरे बी माफ कित्या।