इफिसियां 2 - बिलासपुरी नौआं नियम

मौती ते जिन्दगिया रिया तरफा

¹ तुहें पैहले अपणयां अपराधां कने पापां रिया वजह ने आत्मिक रुपा च मरीगरे थे।

² तिन्हां च जे पैहले तुहें संसारा रिया रितिया रे मुतावक कने तिसा बुरी आत्मा रा अनुशरण करदे हुये जीआं थे सै जे इसा धरतिया रे उपरा री आत्मिक शक्तियां रा मालक आ। सैई बुरी आत्मा हुण तिन्हां माहणुआं च काम्म करी राईं सै जे परमेशरा रा हुक्म नीं मनदे।

³ इक बगत था ताहली जे अहें सब बी तिन्हां साई जीआं थे कने बासनां कने अपणे पापी स्वाभावा रियां इच्छां जो पूरा कराँ थे। अहें अपणे स्वभावा च दुज्जेयां लोकां साई थे इस खातर परमेशर अहांने गुस्सा था।

⁴ पर परमेशर दया रा धनी आ; अपणे तिस महान प्यारा रिया बजह ने तिने अहांने प्यार कित्या,

⁵ ताहली जे अहें पापां रिया वजह ने आत्मिक रुपा च मूईरे थे, तां मसीह सौगी तिने अहांजो बी जिऊंदा कित्या (परमेशरा रे अनुग्रह तेई तुहांरा छुटकारा हुईरा।)

⁶ काँह्भई परमेशरे अहौं मसीह साई मूईरयां चते जिऊंदा कित्या कने मसीह सौगी अहांरे रिश्ते रिया वजह ने स्वर्गा च तिस सौगी बठाल़या।

⁷ तिने मसीह यीशुये रे जरिये इस तरिके ने अपणी दया अहां पर दिखाई ताकि औणे औल़े वगता च संसारा रे लोकां देखणा भई तिसरा अनुग्रह कितना महान आ। ये अनुग्रह सब्बीं ते महान आ।

⁸ काँह्भई परमेशरा रे अनुग्रह रे जरिये तुहांरे विश्वासा रिया वजह ने तुहांरा छुटकारा हुईरा, तिने तुहौं किछ करने रिया वजह ने नीं छुडवाया, पर ये परमेशरा रा दान आ;

⁹ कने ये अहांरे कित्तिरे कर्मां रा फल़ निआं तिसरा जे कोई घमण्ड करी सक्को।

¹⁰ काँह्भई परमेशर अहांरा बनाणे औल़ा, तिने मसीह यीशु च अहांरी सृष्टि इस खातर कित्ती भई अहें भले काम्म करो, तिन्हांजो जे परमेशरे पैहले ते अहांरे खातर त्यार कित्तिरा।

मसीह च इक

¹¹ इस खातर याद करा, भई तुहें लोक सै जे जन्मा ते अन्यजाति ये तिन्हौं यहूदी लोक नफरत करीने बगैर खतने औल़े बोलां ये, पर खतना माहणुआं रे जरिये शरीरा च कित्या जां।

¹² याद करा तिस बगत तुहें लोक मसीह ते लग थे, तुहें इस्राएल रिया बरादरिया ते बाहर थे, कने तिसरे वायदे रिया वाचां रे हिस्सेदार नीं थे कने इस संसार च बगैर आशा ते कने बगैर परमेशरा ते थे।

¹³ इक वगत था ताहली जे तुहें परमेशरा ते दूर थे, पर हुण मसीह यीशु च तिसरे खून्ना रे जरिये नेड़े लन्दे।

¹⁴ यहूदी कने गैर-यहूदी अप्पूँ चियें इक्की दुज्जे ते नफरत कराँ थे कने लग हुईगरे थे; ठीक इयां तियां जे तिन्हांरे बिच कोई दवाल खढ़िरी हो। पर मसीहे नफरता रिया तिसा दवाल्ला जो गिराईत्या कने दुईं जो इक करील्या।

¹⁵ व्यवस्था रे बौहत नियम थे, पर मसीहे अपणिया मौती रे जरिये सारे यहूदी नियमां जो मटाया, तिसते जे यहूदी कने अन्यजातियां जो मसीह अप्पूँ सौगी मेल कराईने इक नया समूह बणाए। इस तरिके ने तिने तिन्हांरे बिच मेल-मलाप कित्या।

¹⁶ कने क्रूसा पर अपणी मौता रे जरिये बैर रा नाश करीने दुईं जो इक शरीर बणाईने परमेशरा ने मेल़ करवाया।

¹⁷ मसीहे आईने तुहां लोकां जो सै जे दूर थे तिन्हाजो बी कने सै जे नेड़े थे तिन्हांजो बी दुईं जोई मेल-मिलापा री खुशखबरी सुणाई।

¹⁸ काँह्भई अहें दुईं किस्मा रे लोक इक्की आत्मा रे जरिए पिता गे पुजणे जोगे हुए।

मसीह अहांरा कुणे रा पत्थर

¹⁹ इस खातर हुण तुहें अन्यजाति लोक अंजाण कने पराये नींए, पर पवित्र लोकां सौगी स्वदेशी कने परमेशरा रे परिवारा रे हुईगरे।

²⁰ तुहें इक येढ़ा घर ये सै जे प्रेरितां कने भविष्यवक्तयां री निऊंवा पर बणाईरा, कने तिसरे कुणे रा पत्थर खुद मसीह यीशु आ।

²¹ तिसच जे सारी रचना कट्ठा मिलीने प्रभुये रे खातर इक पवित्र मन्दर हुईने बधदी जाईं,

²² तिसच जे तुहें बी पवित्र आत्मा रे जरिये परमेशरा रे रैहणे री जगह हुणे खातर सौगी बणाए जायें।