कुलुस्सियां 2 - बिलासपुरी नौआं नियम

¹ हऊँ चाँह भई तुहें ये जाणी लो भई हऊँ तुहांरे खातर कने तिन्हां सारयां विश्वासियां रे खातर सै जे लौदीकिया नगरा चे कने तिन्हां सब्बीं विश्वासियां खातर सै जे आमतौर पर मांहने कदीं नीं मिले, हऊँ तुहांरी मदद करने रे खातर जो किछ करी सक्कां सै सब किछ करी रां,

² ताकि तिन्हांरे मनां जो तसल्ली मिलो कने सै अप्पूँ चियें प्यारा ने इक हुईने रौ, कने हऊँ चाँह भई तिन्हां लोकां रा पूरा भरोसा ओ, काँह्भई सै परमेशरा रिया योजनां रा भेत पूरे तरिके ने समझी सक्को, सै जे खुद मसीह आ।

³ तिसच जे बुद्धि कने ज्ञाना रे सारे भण्डार छुपीरे।

⁴ येढ़ा हऊँ इस खातर बोलीराँ भई कोई तुहांजो अपणी मिठी-मिठी गल्लां ने धोखा नीं देई दो।

⁵ हलाँकि हऊँ तुहांते दूर आ, पर तियां जे भई हऊँ तुहांरे सौगी इ हया, काँह्भई हऊँ तुहांरे बारे च सोचदा रैयां, कने हऊँ खुश आ भई तुहांजो तियां जे जीणा चाहिन्दा था तुहें तियां इ जीया कराँ ये कने मसीह च तुहांरा विश्वास मजबूत आ।

मसीह च बणीरे रौआ

⁶ इस खातर तियां जे तुहें यीशुये जो मसीह कने प्रभुये रे रुपा च ग्रहण कित्तिरा, तियां इ हुण लगातार तिसरा अनुशरण करदे रौआ,

⁷ कने तिस ची मजबूत हुन्दे जावा तियां जे इक पेड़ धरतिया च जड़ पकड़ां; कने लगातार तिस ची अपणे विश्वासा जो बधान्दे जावा, कने परमेशरा रा जादा ते जादा धन्यवाद करदे रौआ।

⁸ ध्यान रखा, भई कोई तुहांजो अपणे तिस संसारिक ज्ञाना च कने बेमतलब गल्लां च नीं फसाओ सै जे माहणुआं रियां बणाईरी रीतियाँ ते कने संसारा रिया आदी शिक्षा रे मुतावक त हाया, पर मसीह रे मुतावक निआं।

⁹ काँह्भई ताहली जे मसीह माहणुये रे रुपा च आया, तां बी सै पूरे तरिके ने परमेशर था।

¹⁰ कने तुहें तिस ची भरपूर हुईगे, सै हरेक प्रधान्नां कने अधिकारियां ते बी ऊपर आ।

¹¹ ताहली जे तुहें मसीह पर विश्वास कित्या, तां तुहांरा खतना माहणुआं रे हत्थां ते नीं हुया था (तियां जे यहूदी कराँ ये) पर खतना सै जे मसीह रे जरिये कित्या गईरा इसते तुहांरा पापी स्वाभाव दूर कित्या गया,

¹² ताहली जे तुहें बपतिस्मा लेआ था, तां मसीह साई गड्डे गये थे कने मसीह साई तुहें जी उठे थे। ये इस खातर हुया काँह्भई परमेशरे अपणिया सामर्था रे जरिये मसीह जो मरने ते बाद जिऊंदा कित्या।

¹³ ताहली जे तुहें अपणे पापां च मुड़दा थे कने तुहें अपणे पापी स्वाभावा रिया शक्तिया ते अजाद नीं थे, फेरी परमेशरे तुहांजो मसीह सौगी जिऊंदा कित्या, कने अहांरे सारे अपराधां जो माफ कित्या,

¹⁴ कने परमेशरे विधियां रा ये लेख सै जे अहांरे नौआं पर कने अहांरे बरोधा च था पूरे तरिके ने क्रूसा पर मेक्खां ने हटाईत्या; ताहली जे लोकें यीशुये जो क्रूसा पर मेक्खां ने गड्डीने मारया था।

¹⁵ परमेशरे क्रूसा रे जरिये शासकां कने अधिकारियां जो हराया कने क्रूसा रे जरिये तिन्हां पर जय पाईने तिन्हांरा लोकां रे सामणे तमाशा बणाया।

¹⁶ इस खातर खाणे-पीणे री चिज़ां या त्योहारां या नये चांद रे त्योहारां या विस्राम रे दिनां जो लेईने कोई तुहांरा न्याय नीं करो।

¹⁷ काँह्भई ये सारे नियम औणे औल़ी गल्लां री छाया साई ये, पर मसीह इ सच्च आ।

^18-19 सै जिस्मा रा सिर आ। तिसते जिस्मा रा सारा हिस्सा पालन-पोषण पाईने इक साथ रैयां ये। तां ये तियां इ बधां तियां जे परमेशर इसजो बधाणा चाँह। कोई माहणु तुहौं खुद अप्पूँजो बेईज्जत करने कने स्वर्गदूतां री पूजा करने जो जोर देईने तुहांजो तुहांरा ईनाम पाणे ते दूर नीं करो। येढ़ा माहणु अपणे देखीरे दर्शणां रा बर्णन करने च लगीरा रैयां कने अपणिया संसारिक सोच्चा रिया वजह ने झूट्ठे घमण्डा च भरीरा रैयां, कने सै मसीह ने जुड़ीरे नींये।

मसीह सौगी मरना कने जीणा

²⁰ काँह्भई तुहें मसीह सौगी मरी चुक्कीरे कने तुहांजो संसारिक आदी शिक्षां ते छुटकारा मिली चुक्कीरा, तां फेरी काँह तुहें संसारा रे नियमां रा लगातार पालन करी राँये? तियां जे भई

²¹ “इसने हात्थ नीं लावा, इसजो मता चखदे, या इसजो मता छुन्दे?”

²² ये सारे नियम त कम्मां च औन्दे-औन्दे खत्म हुई जाणे, काँह्भई ये माहणुआं रे हुक्मां कने शिक्षां रे मुतावक आ।

²³ ये नियम हकीकत च ज्ञाना साई लगां ये, काँह्भई ये लोकां जो परमेशरा ने बौहत प्यार करने रे खातर कने अप्पूँजो नम्र करने, कने अपणे शरीरा जो दुख देणे रे खातर सखां, पर ताहली जे भई लोक इन्हां सारयां नियमां रा पालन कराँ ये फेरी बी अपणियां बुरियां इच्छां जो रोकी नीं सकदे।