प्रेरितां 8 - बिलासपुरी नौआं नियम

कलीसिया पर अत्याचार

¹ शाऊल स्तिफनुस रिया हत्या च सहमत था। तिस दिन यरूशलेम नगरा री कलीसिया पर बड़ा सताव शुरु हुआ कने प्रेरितां जो छड्डिने बौहत सारे लोक यहूदिया कने सामरिया प्रदेशां च नट्ठीने बिखरी गे।

² किछ धर्मी लोकें स्तिफनुसा जो कब्रा च रखया कने तिसरे खातर बौहत रोये कने दुख मनाया।

³ शाऊल कलीसिया जो सताया राँ था; कने घरें-घरें बड़ीने विश्वासी जनाना कने मर्दां जो घसीटी-घसीटी ने जेलखान्ने च पां था।

सामरिया च फिलिप्पुसा रा प्रचार

⁴ पर सै विश्वासी जे बिखरी गरे थे, कने तित्थी जे सै गये खुशखबरी सुणांदे रै;

⁵ कने फिलिप्पुस सामरिया रे इक नगरा च जाईने लोकां जो मसीह रा प्रचार करने लगया।

⁶ सै जे गल्लां फिलिप्पुसे बोलियां लोकें तिन्हांजो सुणीने कने सै जे चमत्कार सै दस्सां था तिन्हांजो देखी-देखीने, इक चित हुईने मन लगाया।

⁷ काँह्भई ताहली जे फिलिप्पुस बुरीआत्मा जो हुक्म देआं था, तां बुरीआत्मा बौहतां चते बडिया अवाज़ा च रड़ांदियां निकल़ी गईयां, कने बौहत लकवे रे रोगी कने लंगड़े बी ठीक हुये;

⁸ कने तिस नगरा रे बौहत लोक खुश हुईगे।

जादूगर शमौन

⁹ तिस नगरा च शमौन नौआं रा इक माहणु था, सै जे जादू-टोणा करीने सामरिया रे लोकां जो हैरान कराँ कने अप्पूँजो इक खास माहणु समझां था।

¹⁰ तित्थी सारे लोक, दोयो आम लोकें कने खास लोकें तिसरी गल्ल सुणी। सै बोलीराँ थे, “ये माहणु परमेशरा री महान सामर्थ इ।”

¹¹ तिने बौहतीं दिनां ते तिन्हांजो अपणे जादुये रे कम्मां ते हैरान कित्तिरा था, इस खातर सै तिस्सो बौहत मन्नां थे।

¹² पर ताहली जे लोकें परमेशरा रे राज्जा कने यीशु मसीह रे नौआं री खुशखबरिया च फिलिप्पुस रा सन्देश सुणीने विश्वास कित्या, जनाना कने मर्द दुईं ही बपतिस्मा लेआ।

¹³ तां शमौने अपणे आप बी फिलिप्पुसा रे सन्देशा पर विश्वास कित्या कने बपतिस्मा लईने फिलिप्पुसा ने सौगी रैहणे लगया। सै चमत्कारी नशाण कने बड़े-बड़े सामर्था रे काम्म हुंदे देखीने हैरान हुआं था।

सामरिया च पतरस कने यूहन्ना

¹⁴ ताहली यरूशलेम नगरा च प्रेरितें ये सुणया भई सामरी लोकें परमेशरा रा वचन मन्नी लईरा, तां पतरस कने यूहन्ना जो तिन्हांला जो भेज्या।

¹⁵ तिन्हें तित्थी पुज्जीने तिन्हांरे खातर प्राथना कित्ती भई पवित्र आत्मा पाओ।

¹⁶ काँह्भई पवित्र आत्मा हूणा तका तिन्हां चते किसी पर मनी आया था; तिन्हें त सिर्फ प्रभु यीशुये रे नौआं च बपतिस्मा लईरा था।

¹⁷ फेरी पतरस कने यूहन्ने तिन्हांरे सिरा पर हात्थ रखे कने तिन्हें पवित्र आत्मा पाया।

¹⁸ तां जे शमौने देख्या भई प्रेरितां रे हाथ रखणे ते पवित्र आत्मा मिलां, तां तिन्हांला जो पैसे ल्याईने आया कने गलाया,

¹⁹ “ये सामर्थ मिन्जो बी देआ भई जिस किसी पर हाथ रखूं तिस्सो पवित्र आत्मा मिली जाओ।”

²⁰ पतरसे तिसजो गलाया, “तू कने तेरे पैसे नाश हुईजो, काँह्भई तैं परमेशरा रा दान पैसयां च खरीदणे रा बचार कित्या।

²¹ इसा सेवा च तेरा किछ बी हिस्सा नींआ; काँह्भई तेरा मन परमेशरा रे सामणे सच्चा नींआ।

²² इस खातर अपणिया इसा बुराईया ते मन फिराई ने प्रभुये ले प्राथना कर, हुई सक्कां भई तेरे मना रा बुरा बचार माफ कित्या जाओ।

²³ अपणयां बुरयां कम्मां ते दूर हुई जवा काँह्भई हऊँ समझां भई तू अहांने बौहत नफरत कराँ, कने पापां रे चुँगल़ा च फसीरा।”

²⁴ शमौने जवाब दित्या, “तुहें मेरे खातर प्रभुये ले प्राथना करा भई सै जे गल्लां तुहें बोलियां, तिन्हां चते कोई बी मेरे परा नीं पौ।”

²⁵ इस खातर सै गवाही देईने कने प्रभुये रा वचन सुणाईने यरूशलेम नगरा जो वापस हुन्दे वगत, तिन्हें सामरिया प्रदेशा रे कई गाँवां च खुशखबरी सुणाई।

फिलिप्पुस कने कूश देशा रा अधिकारी

²⁶ फेरी प्रभुये रे इक्की स्वर्गदूते फिलिप्पुसा ने गलाया, “उट्ठ कने दखणा खा रे तिस रस्ते परा जो जा, सै जे यरूशलेम ते गाजा नगरा जो जाँ।”

²⁷ सै उट्ठीने चलीप्या, कने फेरी, कूश देशा रा इक माहणु आयाराँ था सै जे खोज्जा (खुसरा) था कने कूशियां री राणी कन्दाके रा मन्त्री कने खजानची था। सै अराधना करने जो यरूशलेम च आया था।

²⁸ कने सै अपणे रथा पर बैठिरा था, कने यशायाह भविष्यवक्ता री कताब पढ़दा हुआ वापस अपणे देश जाया राँ था।

²⁹ तां पवित्र आत्मे फिलिप्पुसा ने गलाया, “नेड़े जाईने इस रथा ने सौगी-सौगी चल्ल।”

³⁰ फिलिप्पुस तिसखा दौड़ीने रथा ले पुज्या कने तिस्सो यशायाह भविष्यवक्ता री कताब पढ़दे सुणया, कने पुच्छया, “तू जो किछ पढ़या राँ क्या इस्सो समझां बी आ?”

³¹ तिने गलाया, “तदुआं तका जे मिन्जो कोई नीं समझाओ तां माह कियां समझणा?” कने तिने फिलिप्पुसा ने विनती कित्ती भई सै रथा पर चढ़ीने तिसने सौगी बैट्ठो।

³² पवित्रशास्त्रा रा सै पाठ जे सै पढ़या रां था, सै ये था : “सै भेड्डां साई कटोणे जो पुजाया गया, कने तियां जे भेड्डा रा बच्चा अपणी ऊन कड्डणे औल़यां रे सामणे चुप-चाप रैयां, तियां इ तिने बी अपणा मुँह नीं खोल्या, ताहली जे लोक तिस्सो पीड़ा दें थे।

³³ तिसरे गरीब हुणे पर बी सै अपमानित हुया कने तिस्सो कोई न्याय नीं मिलया। तिसरिया पीढ़िया रा कुण बखान करगा? काँह्भई धरतिया ते तिसरा जीवन त लेईल्या था।”

³⁴ इस पर खोज्जे फिलिप्पुसा ते पुच्छया, “हऊँ तेरले विनती करां ए दस भई भविष्यवक्ता येढ़ा किसरे बारे च गलाया रां, अपणे या किसी होरसी रे बारे च?”

³⁵ तां फिलिप्पुस बोलणे लगया कने इस शास्त्रा ते शुरु करीने तिस्सो यीशु मसीह री खुशखबरी सुणाई, फेरी तिन्हें यीशु मसीह पर विश्वास कित्या।

³⁶ रस्ते च चलदे-चलदे सै इक्की पाणिये रिया जगह पुज्जीगे। तां खोज्जे गलाया, “देख येत्थी पाणी आ, हुण मिन्जो बपतिस्मा लेणे च क्या रोक इ।”

³⁷ फिलिप्पुसे गलाया, “जे तू सारे मना ते विश्वास करो तां बपतिस्मा लई सक्कां।” तिने जवाब दित्या “हऊँ विश्वास करां भई यीशु मसीह ही परमेशरा रा पुत्र आ।”

³⁸ तां तिने रथ खड़ा करने रा हुक्म दित्या, कने फिलिप्पुस कने खोज्जा दोन्नो पाणिये च उतरीगे, कने फिलिप्पुसे खोजे जो बपतिस्मा दित्या।

³⁹ तां जे सै पाणिये चते निकल़ीने ऊपर आये, तां प्रभुये रा आत्मा फिलिप्पुसा जो चक्कीने लईग्या, कने खोजे तिस्सो फेरी नीं देख्या कने खुशी मनांदा अपणे रस्ते च चली गया।

⁴⁰ फिलिप्पुस अशदोदा नगरा च आई निकल़या, कने तदुआं तका जे कैसरिया नगरा च नीं पुज्जया, तदुआं तका नगर-नगर खुशखबरी सुणांदा गया।