प्रेरितां 7 - बिलासपुरी नौआं नियम

स्तिफनुसा रा भाषण

¹ तां महायाजके पुच्छया, “क्या ये इल्जाम सच्चे?”

² स्तिफनुसे गलाया, “हे भाईयो, कने अगुवेयो सुणा। अहांरा पूर्वज अब्राहम हारान नगरा च बसणे ते पैहले मेसोपोटामिया प्रदेशा च था; तां चमकदे तेज्जा च परमेशरे तिस्सो दर्शण दित्या,

³ कने तिसने गलाया, ‘तू अपणे देश कने अपणे टबरा जो छड्डिने निकल़ कने तिस देशा जो जा सै जे माह तिज्जो दसणा,’

⁴ तां सै कसदियां रे देशा ते निकल़ीने हारान नगरा च बसी गया, तिसरे पिता रिया मौता ते बाद परमेशरे तिस्सो तित्थी ते इस देशा च ल्याईने बसाया तित्थी जे अहें हुण रैयां ये,

⁵ पर तिस बगत परमेशरे अब्राहमा जो येत्थी कोई जमीन नीं दित्ति, येत्थी तक भई धरतिया रा थोड़ा जेआ टुकड़ा बी नीं दित्या सै जे तिसरा हुन्दा; पर परमेशरे ये वायदा कित्या भई माह ये देश तेरते बाद तेरे वंशजां जो देणा; हलांकि तिस बगत तिसरे कोई पुत्र नीं था।

⁶ कने परमेशरे ये बी गलाया, ‘तेरे वंशजां पराये देशा च प्रदेशी हुईने रैहणा, कने तिन्हां इन्हांजो दास बनाणा कने चार सौ साल्लां तका तिन्हांने बौहत बुरा बर्ताव करना।’

⁷ फेरी परमेशरे गलाया, ‘तिसा जातिया रे तिन्हां दास हूणा, तिन्हांजो मांह सजा देणी, कने इसते बाद तिन्हां तिस देशा ते निकल़ीने इसा जगह मेरी अराधना करनी।’

⁸ कने परमेशरे अब्राहमा ने खतने रा वायदा कित्या; ताहली जे अब्राहमा रे पुत्र इसहाका रा जन्म हुया, तां अठवें दिन तिसरा खतना कित्या; कने इसहाका ते याकूब कने याकूब ते बारा कुलपति पैदा हुये, तिन्हांरा बी खत़ना कित्या गया।”

⁹ “कुलपतियें अपणे भाई यूसुफा ते जल़ण करीने तिस्सो मिस्र देश जाणे औल़यां जो बेचीत्या, ताकि सै तित्थी जाईने दास बणीने रौ, पर परमेशर तिसने सौगी था,

¹⁰ कने परमेशरे यूसुफा जो तिसरे सब्बीं दुखां ते छडुआईने मिस्र रे राजा फिरौना रियां नज़राँ च अनुग्रह कने बुद्धि दित्ति, फिरौन राजे यूसुफा जो अप्पूँ सौगी मिस्र देशा पर कने अपणे सारे मैहला पर राजपाल बणाया।

¹¹ “ताहली जे यूसुफ राजपाल था तां मिस्र कने कनान देशा च नकाल़ पैया; तिसते जे बौहत जादा संकट हुया, कने अहांरे पूर्वजां जो खाणे जो रोटी नीं मिलदी थी।

¹² पर याकूबे ये सुणीने भई मिस्र देशा च अनाज हया, अहांरे पूर्वजां जो पहली बार तित्थी ते अनाज खरीदणे जो भेज्या। सै मिस्र देशा च जाईने यूसुफा ने मिले कने अनाज खरीदया,पर सै तिस्सो पछयाणी नीं पाये।

¹³ कने दुज्जी बार भीं ताहली जे सै अनाज खरीदणे गये, तां यूसुफे अप्पूँजो अपणे भाईयां पर प्रगट करित्या कने फिरौना जो यूसुफा रे परिवारा री जानकारी मिली।

¹⁴ तां यूसुफे अपणे पिता याकूब कने अपणे सारे घराने जो, सै जे पच्हतर माहणु थे, तिन्हां सब्बीं जो मिस्र देशा च औणे रा सनेहा दित्या।

¹⁵ तां याकूब मिस्र च गया; कने किछ वगता ते बाद तित्थी सै कने अहांरे पूर्वज मरीगे।

¹⁶ तिन्हांरियां लाशां शकेम नगरा च ल्याईने तिसा कब्रा च रखी तियां, तिसाजो जे अब्राहमे चाँदिये रे सिक्के देईने शकेम नगरा च हमोर रियां सन्तानां ते मुल देईने खरीदया था।

¹⁷ “पर तां जे तिस वायदे रे पूरा हुणे रा बगत नेड़े आया सै जे परमेशरे अब्राहमा ने कित्या था, तां मिस्र देशा च सै लोक बधीने बौहत हुईगे।

¹⁸ तां मिस्र देशा च दुज्जा राजा हुया सै जे यूसुफा जो नीं जाणदा था।

¹⁹ “तिने अहांरी जातिया ने चलाकी करीने अहांरे पूर्वजां सौगी येत्थी तका बुरा वर्ताव कित्या, भई माता-पिता जो अपणे बालकां जो सट्टणा पैया, भई सै ज्यूंदे नीं रौ।

²⁰ तिस बगत मूसा जम्मया; सै परमेशरा री नज़राँ च मता सुन्दर था; सै तिन्नां महीनयां तका अपणे पिता रे घरें गुप्त च पल़या।

²¹ पर ताहली जे सै तिस्सो छिपाई नीं सक्के, तां मूसे जो घरा ते बाहर रखीत्या, पर फिरौना रिये कुड़िये तिस्सो चकील्या, कने अपणा पुत्र बणाईने पाल़या।

²² मिस्र देशा रे गुरुयें मूसे जो लग-लग ज्ञाना रियां गल्लां तिन्हौं जे मिस्री लोक जाणाँ थे सखाई, कने ताहली जे सै बड्डा हुया तां मूसे अपणी सारियां गल्लां कने काम्म प्रभावशाली तरिके ने कित्ते,

²³ “ताहली जे मूसा चालियां साल्लां रा हुआ, तां तिसरे मना च बचार आया भई हऊँ अपणे इस्राएलियां भाईयां ने मिलूँ।

²⁴ तिने इक्की इस्राएली माहणुये पर गल़त हुंदा देखीने तिस्सो वचाया, कने मिस्री लोकां जो मारीने तिसरा बदला लेया।

²⁵ मूसे सोच्या भई तिसरे भाईयां ये समझणा भई परमेशरा मूसे रे जरिये दासत्व ते तिन्हांजो अजाद करना, पर तिन्हें नीं समझया।

²⁶ दुजे दिन तां जे सै अप्पूँ बाटियें लड़या राँ थे, तां सै तिन्नु चियें जाये रां था; कने येढ़ा बोल्ली तिन्हांजो मेल करने खातर तिन्हांजो समझाया, ‘हे माहणुओ, तुहें तां भाई-भाई ये, इक्की दुजे पर काँह अन्याय कराँ ये।’

²⁷ पर सै जे अपणे पड़ोसिये पर अन्याय करया राँ था, तिने तिस्सो येढ़ा बोलीने रोकी त्या, ‘तिज्जो अहां पर हाकम कने न्यायी किने बणाया?’

²⁸ क्या तियां जे तैं कल मिस्री लोकां जो मारया मिन्जो बी मारना चां?

²⁹ ये गल्ल सुणीने मूसा डरा रे मारे मिस्र देशा ते नट्ठया कने मिद्यान देशा च परदेशी हुईने रेहणे लगया, कने तित्थी तिसरे दो बालक जम्मे।

³⁰ “ताहली जे पूरे चाल़ी साल मिद्यान देशा च बीत्तीगे, तां परमेशरे स्वर्गदूता रे रुपा च सिनै पहाड़ा रे सुनसान जगह च तिस्सो बल़दे हुये बुटड़े रिया लोई च दर्शण दित्या।

³¹ मूसा जो ये दर्शण देखीने हैरानी हुई, कने ताहली जे देखणे खातर सै नेड़े गया तां प्रभु परमेशरा री ये अवाज़ आई,

³² ‘हऊँ तेरे पूर्वज, अब्राहम, इसहाक कने याकूब रा परमेशर आ,’ तां मूसा डरा रे मारे कम्बीग्या, येत्थी तका भई तिस्सो देखणे री हिम्मत नीं रई।

³³ तां जे प्रभु तिसने गलाया, ‘मेरा आदर करने खातर अपणे पैराँ ते जुते खोली दे, काँह्भई तिसा जगह जे तू खढ़िरा, सै पवित्र जगह इ।

³⁴ मैं सच-मुच अपणे लोकां री सै जे मिस्र देशा चे बुरी दशा देखीरा; कने तिन्हांरा रोणा सुणीरा; इस खातर तिन्हांजो छडवाणे खातर आईरा। हुण आओ, मांह तिज्जो मिस्र देशा च भेजणा।’

³⁵ “तिस मूसा जो जे तिने येढ़ा बोलीने नां करी ती थी, ‘तिज्जो किने अहां पर हाकम कने न्यायी बणाईरा?’ तिस्सो इ परमेशरे राजपाल कने छुड़ाणे औल़ा बणाईने, तिस स्वर्गदूता रे जरिये तिने जे झाड़िया च दर्शण दित्या था, भेज्या।

³⁶ येई माहणु मिस्र देशा च कने लाल समुद्र कने जंगला च चाल़ी साल्लां तका नोखे काम्म कने चमत्कारी नशाण दस्सी-दस्सीने तिन्हांजो तित्थी ते ली आया।

³⁷ ये सैई मूसा, तिने जे इस्राएली लोकां ने गलाया, ‘परमेशरा तुहांरे भाईयां चते तुहां खातर मेरे साई इक भविष्यवक्ता बनाणा।’

³⁸ “ये सैई आ, तिने जे सुनसान जगह च सभा रे बिच अहांरे पूर्वजां ने सौगी कने तिस स्वर्गदूता ने मौजूद था तिने जे सिनै पहाड़ा पर तिसने गल्लां कित्तियां। इने इ अहांजो देणे रे खातर परमेशरा ते जीवन देणे औल़े वचन पाये थे।

³⁹ पर अहांरे पूर्वजें तिसरी मनणी नीं चाई, पर तिस्सो हटाईने अपणा मन मिस्र देशा खा फेरील्या,

⁴⁰ कने तिन्हें मूसा रे भाई हारून ने गलाया, ‘अहां खातर येढ़ा देबता बना, सै जे अहांरे अग्गे-अग्गे चलो, काँह्भई ये मूसा सै जे अहांजो मिस्र देशा ते नकाली ने ली आया, अहें नीं जाणदे तिस्सो क्या हुआ?’

⁴¹ तिन्नां दिनां च तिन्हें इक बछड़े री मूर्त बणाईने तिसरे अग्गे बल़ि चढ़ाई, कने अपणे हत्थां रे कम्मा च मगन हुणे लगे।

⁴² इस खातर परमेशरे अपणा मुँह तिन्हांते फेरीने तिन्हांजो छड़ीत्या, भई अम्बरा रे गणां री पूजा करा, तेढ़ा जे भविष्यवक्तयां रिया कताबा च लिखिरा, ‘हे इस्राएल रे लोको, क्या तुहें पशु बल़ि कने अन्न बल़ि सुनसान जगह च, चाल़ी साल्लां तका मिन्जो इ नीं चढ़ांदे रै?

⁴³ तुहें मोलेक देबता रे तम्बू कने रिफान देबता रे तारे जो लईने फिराँ थे, मतलब तिन्हां मूर्तियां जो तिन्हांजो जे तुहें मत्था टेकणे खातर बणाईरा था। इस खातर माह तुहांजो बेबीलोन देशा ते पार नेईने बसाणा।’

⁴⁴ “गवाईया रा तम्बू बी तिस सुनसान जगह च अहांरे पूर्वजां रे बिच था; ये तम्बू तिस इ नमूने पर बणाया गया था तेढ़ा जे परमेशर ठहराईरा था, तिने जे मूसा ने गलाया, ‘सै आकार जे तैं देखीरा, तिसरे मुतावक इस्सो बणा।’

⁴⁵ कई साल्लां बाद तिस तम्बुये जो अहांरे पूर्वज पुराणे बगता ते पाईने यहोशू ने सौगी येत्थी ली आये; तिस बगत जे भई तिन्हें तिन्हां अन्यजातियां पर अधिकार पाया, तिन्हांजो जे परमेशरे अहांरे पूर्वजां रे सामणे ते कड्डित्या, कने सै तम्बू राजा दाऊद रे बगता तका रैया।

⁴⁶ दाऊद पर परमेशरे अनुग्रह कित्या; इस खातर दाऊदे याकूब रे परमेशरा रे वास करने खातर जगह बनाणे जो विनती कित्ती।

⁴⁷ पर तिसरे पुत्र सुलैमाने परमेशरा खातर मन्दर बणाया।

⁴⁸ पर परमप्रधान हत्था रे बणाईरे मन्दरा च नीं रहदा, तेढ़ा जे यशायाह भविष्यवक्ते रिया कताबा च लिखिरा :

⁴⁹ “ ‘प्रभु परमेशर बोलां, स्वर्ग मेरा संघासण कने धरती मेरे पैर रखणे री चौकी। मेरे खातर तुहां केढ़ा जेआ मन्दर बनाणा? कने मेरे आराम करने री कुण जेई जगह हुंगी?

⁵⁰ क्या ये सब चिज़ां मेरे हत्था री बणाई रियां निआं?’

⁵¹ “तुहें जिद्दी लोक ये सै जे परमेशरा रे हुक्म नीं मनदे कने तिसरियां गल्लां बी नीं सुणदे, तुहें सदा पवित्र आत्मा रा बरोध कराँ ये। तेढ़ा जे तुहांरे पूर्वज कराँ थे, तेढ़ा इ तुहें बी कराँ ये।

⁵² भविष्यवक्तयां चते किस्सो तुहांरे पूर्वजें नीं सताया? तिन्हें तिस मसीहे रे औणे रा पुराणे बगता ते सन्देश देणे औल़यां जो मारीत्या; कने हुण तुहें बी तिसरे पकड़वाणे औल़े कने मारने औल़े बणे।

⁵³ तुहें स्वर्गदूतां ते बणाईरी व्यवस्था त पाई, पर तिसारा पालन नीं कित्या।”

स्तिफनुसा पर पथराव

⁵⁴ ये गल्लां सुणीने यहूदी अगुवे बड़ा गुस्सा हुईगे कने स्तिफनुसा परा दन्द किरड़ने लगे।

⁵⁵ पर तिने पवित्र आत्मा ते भरी ने स्वर्गा खौ देख्या कने परमेशरा रे चमकदे तेज्जा जो कने यीशुये जो खबिया खौ खढ़िरे देख्या,

⁵⁶ कने गलाया, “देक्खा, हऊँ स्वर्गा जो खुलीरा, कने माहणुये रे पुत्रा जो परमेशरा रे सज्जे पासे खौ खढ़िरा देख्यारा।”

⁵⁷ तां तिन्हें जोरा रिया अवाज़ा च रड़ाईने कान्न बन्द करी ले, कने सारे लोक तिसजो मारने पैईगे;

⁵⁸ कने तिसजो यरूशलेम नगरा ते बाहर निकाल़ी ने पत्थर मारने लगे कने तिन्हांरी हत्या करी ती। गवाहें अपणे कोट शाऊल नौआं रे इक जवाना ले उतारी ने रखीते।

⁵⁹ सै स्तिफनुसा पर पत्थर मारदे रै, कने सै येढ़ा बोलीने प्राथना करदा रैया, “हे प्रभु यीशु, मेरी आत्मा जो लईले।”

⁶⁰ फेरी गोडे टेक्कीने उचिया अवाज़ा च हाक पाई, “प्रभु, इस पापा खातर इन्हांजो माफ कर।” इसते बाद येढ़ा बोलीने सै मरीग्या।