प्रेरितां 5 - बिलासपुरी नौआं नियम

हनन्या कने सफीरा

¹ हनन्याह कने तिसरी जनाना सफीरे, धरतिया रा इक टुकड़ा बेच्चया।

² कने तिसरे पैसयां चते थोड़े जे अप्पूँ ले रखी ले; कने ये गल्ल तिसरी जनाना बी जाणाँ थी, कने तिसरा इक हिस्सा लईने प्रेरितां जो देईत्या।

³ पतरसे गलाया, “हे हनन्याह! सै जे शैताने तेरे मना च पवित्र आत्मा ने झूट्ठ बोलणे रा विचार पाया, कने तुहें अपणी बेच्ची रिया धरतिया रे पैसयां चते थोड़े जे रखी लो?

⁴ तदुआं तका जे सै तेरले थी, क्या तेरी नीं थी? कने तां जे बिकीगी तां क्या तेरे वशा च नीं थी? तेरे मना च इस बुरे कम्मा रा वचार कियां आया? तू माहणुआं ते नीं, पर परमेशरा ते झूट्ठ बोलां।”

⁵ ये गल्लां सुणदे इ हनन्याह थल्ले पईग्या, कने मरीग्या; कने सब सुणने औल़यां पर बड़ा डर हुई गया।

⁶ फेरी जवानें आईने तिसरी अर्थी बणाई कने बाहर नेईने दबाईत्या।

⁷ कोई तिन्नां घण्टयां ते बाद तिसरी जनाना, हुई रियां गल्लां ते बेखबर हुईने, अन्दरा जो आई।

⁸ तां पतरसे तिसाने बोल्या, “मिन्जो दस क्या तुहें सै जमीन इतणे इ पैसयां री बेचीरी थी?” तिसे गलाया, “हाँ, इतणे इ पैसयां री बेचीरी थी।”

⁹ पतरसे तिसाने गलाया, “ये क्या गल्ल इ भई तुहें दुईं प्रभुये रिया आत्मा जो परखणे खातर येक्का कित्या? देख, तेरे लाड़े रे दफन करने औल़े दरवाजे पर इ पुज्जीरे, कने तिन्हां तिज्जो बी बाहरा जो लई जाणा।”

¹⁰ तां सै इकदम पतरसा रे सामणे पईगी, कने मरीगी; कने जवानें अन्दर आईने तिसाजो मरीरी देख्या, कने बाहर नेईने तिसारे लाड़े सौगी दफन करी ती।

¹¹ कने यरूशलेम री सारी कलीसिया पर कने इन्हां गल्लां रे सुणने औल़यां पर बड़ा डर छाईग्या।

चिन्ह कने चमत्कार

¹² प्रेरितां रे जरिये बड़े हैरान करने औल़े काम्म कने चमत्कारी नशाण लोकां च दस्या जां थे, कने सारे मसीह विश्वासी इक मन हुईने सुलैमाना रे बराण्डे च कट्ठे हुआं थे।

¹³ पर मसीह पर विश्वास नीं करने औल़यां चते किसी जो बी ये हिम्मत नीं हुंदी थी भई तिन्हां सौगी मिली जाओ; तां बी लोक तिन्हांरी बडयाई कराँ थे।

¹⁴ प्रभुये पर विश्वास करने औल़यां री संख्या बधदी गई। मर्द कने जनानां रा इक बड्डा समूह बणीग्या।

¹⁵ इसरा ये परिणाम हुया भई लोक बमाराँ जो मंजयां कने मंजोलुआं पर सुआई ने ल्याणे लगे कने गल़ियां च रखणे लगे, भई तां जे पतरस आओ, तां तिसरा परछौंवा इ तिन्हां चते किसी पर पई जाओ।

¹⁶ यरूशलेम रे आसे-पासे रे नगराँ ते बौहत लोक बमाराँ कने बुरीआत्मा रे सताई रयां जो ल्याई-ल्याईने, कट्ठे हुआं थे, कने सब ठीक करी दित्ते जां थे।

प्रेरितां री गिरफ्तारी

¹⁷ तां महायाजक कने तिसरे सब साथी सै जे सदूकियां रे मण्डल़िया रे थे चेलयां रा हिरख करीने तिन्हांरे खिलाफ कार्यवाई करने रे बारे च तैह कित्या।

¹⁸ कने प्रेरितां जो पकड़ीने जेलखान्ने च बन्द करित्या।

¹⁹ पर राति जो प्रभुये रे इक्की स्वर्गदूते जेल्ला रे दरवाजे खोली ने तिन्हांजो बाहर लयाई ने गलाया,

²⁰ “जावा, मन्दरा च खड़े हुईने इस अनन्त जीवना रियां सारियां गल्लां लोकां जो सुणावा।”

²¹ सै येढ़ा सुणीने सवेर हुन्दे इ मन्दरा च जाईने उपदेश देणे लगे। तां महायाजक कने तिसरे साथियें आईने महासभा जो कने इस्राएलियां रे सब पुरनियां जो कट्ठा कित्या, कने जेलखान्ने च पैहरेदाराँ जो बोलीने भेज्या भई तिन्हांजो लयावा।

²² पर पैहरेदारें तित्थी पुज्जी ने तिन्हांजो जेलखान्ने च नीं पाया, कने हटिने तिन्हांजो सनेहा दित्या,

²³ “अहें जेलखान्ने जो पूरे चौकन्ने हुईने बन्द कित्तिरा था, कने पैहरा देणे औल़यां जो बाहर दरवाजे च खढ़िरा देख्या; पर तां जे दरवाजे खोल्हे, तां अन्दर कोई नीं मिलया।”

²⁴ ताहली जे मन्दरा रे पैहरेदाराँ रे सरदारे कने मुखियायाजकें ये खबर सुणी, तां तिन्हांरे बारे च बौहत चिन्तित हुईगे भई इसरा क्या परिणाम हुंगा!

²⁵ ताहलूं इ किन्हिये आईने तिन्हांजो दस्या, “देक्खा, तिन्हांजो जे तुहें जेलखान्ने च बन्द करीने रखीरा था, सै माहणु मन्दरा च खड़ीने लोकां जो उपदेश देई रायें।”

²⁶ तां सरदारे, पैहरेदाराँ ने सौगी मन्दरा रे अंगणा च जाईने, प्रेरितां जो ली अन्दया, पर जोर जबरदस्ती नीं, काँह्भई सै लोकां ते डराँ थे भई अहां पर पत्थर नीं बाओ।

²⁷ तिन्हें चेलयां जो ल्याईने महासभा रे सामणे खड़ा करित्या तां महायाजके तिन्हांते पुच्छया,

²⁸ “क्या अहें तुहांजो समझाई ने हुक्म नीं दित्या था भई तुहें इस नौआं ते उपदेश देहां देन्दे? तां बी देक्खा, तुहें सारे यरूशलेम जो अपणे उपदेशा ते भरीत्या कने तिस माहणुये रिया हत्या रा दोष अहां पर मढ़ना चाँह थे।”

²⁹ तां पतरस कने होरीं प्रेरितें जवाब दित्या, “माहणुआं रे हुक्मा ते बधीने परमेशरा रे हुक्मा जो मनणा अहांरा काम्म आ।

³⁰ अहांरे पूर्वजां रे परमेशरे यीशुये जो मूईरयां चते ज्यूंदा कित्या, तिस्सो जे तुहें क्रूसा पर लटकाईने मारीत्या था।

³¹ परमेशरे यीशुये जो स्वर्गा च सद्दीने सब्बींते ऊच्चे औहदे पर बठाल़या, तिने तिस्सो अधिकार दित्या ताकि सै अहांरा छुटकारा करीने अहां पर राज करो। परमेशरे येढ़ा इस खातर कित्या भई अहें इस्राएली अपणे पापां ते मन फिराई लो ताकि सै अहांजो कने अहांरे पापां जो माफ करी दो।

³² अहें इन्हां गल्लां रे गवाह ये कने तियां जे पवित्र आत्मा बी, तिस्सो जे परमेशरे तिसरा हुक्म मनणे औल़यां जो दित्तिरा।”

³³ पर महांसभा रे सदस्या ये सुणीने फुखीगे, कने प्रेरितां जो मारी देणा चाँह थे।

³⁴ पर गमलीएल नौआं रा इक फरीसी सै जे व्यवस्थापक कने सब्बीं लोकां च खरा था, कचैहरिया च खड़े हुईने प्रेरितां जो थोड़िया देरा खातर बाहरा जो भेजणे रा हुक्म दित्या।

³⁵ फेरी गमलीएले महांसभा रे सदस्या जो गलाया, “हे इस्राएलियो, तुहें जो किछ इन्हां माहणुआं ने करना चाँये सोच्ची-समझीने करयों।

³⁶ काँह्भई इन्हां दिनां ते पैहले थियूदास ये बोलदा उट्ठया, सै बी दावा कराँ था भई हऊँ बी किछ हया; कने तकरीवन कोई चार सौ माहणु तिसरे चेले बणिगे, पर सै मारीत्या गया कने जितने लोक तिस्सो मन्नां थे, सब उरे-परे हुईने खत्म हुईगे।

³⁷ तिसते बाद नौं लिखे जाणे रे दिनां च गलील निवासी यहूदा आया, कने किछ लोक अपणे खा जो करी ले; सै बी खत्म हुई गया कने जितने लोक तिस्सो मन्नां थे, सब उरे-परे हुईगे।

³⁸ इस खातर हुण हऊँ तुहांजो बोलां, इन्हां माहणुआं ते दूर इ रौआ कने इन्हांने किछ काम्म नीं रखा; काँह्भई जे ये धर्म या काम्म माणुआं खा ते हुंगे तां खत्म हुई जाणे;

³⁹ पर जे परमेशरा खा ते हये, तां तुहें इन्हांजो कदीं मनी खत्म करी सकदे। किति येढ़ा नीं हो भई तुहें परमेशरा ने बी लड़ने औल़े बणो।”

⁴⁰ तां तिन्हें तिसरी गल्ल मन्नी ली; कने प्रेरितां जो सद्दीने कुटवाया; कने ये हुक्म देईने छड्डीत्या भई यीशुये रे नौआं ते फेरी कोई गल्ल देखां करदे।

⁴¹ सै इस गल्ला ते खुश हुईने महासभा रे सामणे ते चलीगे, भई अहें यीशुये रे खातर बदनाम हुणे लायक त बणे।

⁴² प्रेरित रोज मन्दरा रे अंगणा च कने घरें-घरें लगातार ये सखान्दे कने ये खुशखबरी प्रचार कराँ थे, भई यीशु इ मसीह आ।