प्रेरितां 3 - बिलासपुरी नौआं नियम

लंगड़े भिखारिये रा चंगा हूणा

¹ पतरस कने यूहन्ना दोपैहर तकरीवन तिन्न बजे प्राथना रे वगत मन्दरा च जाया राँ थे।

² कने लोक इक्की जन्मा रे लंगड़े माहणुये जो लयाया राँ थे। सै तिस्सो हर रोज़ मन्दरा रे तिस दरवाजे पर तिस्सो जे सुन्दर बोलां ये, बठाल़ी देयां थे भई सै मन्दरा च जाणे औल़यां ते भिख मंग्गो।

³ तां जे तिने पतरस कने यूहन्ना जो मन्दरा च जान्दे देख्या, तां तिन्हांते भिख मंगी।

⁴ पतरसे यूहन्ने सौगी तिस खौ ध्यान लाईने देखीने गलाया, “अहां खौ देख!”

⁵ इस खातर सै भिख मंगणे औल़ा मंगता तिन्हांते किछ पाणे री आशा रखदे हुये तिन्हां खौ देखणे लगया।

⁶ तां पतरसे गलाया, “चाँदी कने सोना त मेरले निआं, पर जो किछ मेरले आ तिस्सो हऊँ तिज्जो देआं; यीशु मसीह नासरिये रे नौआं ते उट्ठ कने चल फिर।”

⁷ कने पतरसे तिसरा सज्जा हाथ पकड़ीने तिस्सो उठाया; कने झटपट तिसरे पैराँ कने जनुआं च ताकत आईगी।

⁸ सै उटकी ने खड़ा हुईग्या कने चलने-फिरने लगया; कने चलदा, कने छालीं मारदा, कने परमेशरा री स्तुति करदा तिन्हां सौगी उछल़ कूद करदा हुआ मन्दरा रे अंगणा च गया।

⁹ सब्बीं लोकें तिस्सो चलदा-फिरदा कने परमेशरा री स्तुति करदे देख्या,

¹⁰ तिस्सो पछयाणी लया भई ये सैई लंगड़ा भिखारी आ सै जे मन्दरा रे सुन्दर फाटका पर बैठीने भिख मंगां था; कने तिसा गल्ला ते सै जे तिस सौगी हुई थी सै बौहत हैरान हुये।

मन्दरा च पतरसा रा उपदेश

¹¹ तां जे सै पतरस कने यूहन्ना जो पकड़ीरे थे, तां सब लोक बौहत हैरान हुईने तिसा जगह तिस्सो जे सुलैमाना रा बरान्डा बोलां ये, तिसलौ दौड़ीने आये।

¹² येढ़ा देखीने पतरसे लोकां जो गलाया, “इस्राएली लोको, तुहें इस माहणुये पर हैरान काँह हुये रायें? कने अहां खौ इयां काँह देख्या रायें। क्या तुहें येढ़ा सोच्चया राँये भई अहें इ अपणिया शक्तिया या भगतिया ते इस्सो चलने-फिरने लायक बणाया?

¹³ अब्राहम कने इसहाक कने याकूब रे परमेशर, कने अहांरे पूर्वजां रे परमेशरे अपणे सेवक यीशु री महिमा कित्ती, तिस्सो जे तुहें यहूदी अगुवेयां ले मारने जो पकड़वाईत्या। ताहली जे राजपाल पिलातुसे तिस्सो छडणे रा बचार कित्या, तां तुहें तिसरे सामणे तिसरा इन्कार कित्या।

¹⁴ तुहें यीशुये रा इन्कार कित्या सै जे पवित्र कने धर्मी था कने इक हत्यारे जो तुहां खातर छडणे जो विनती कित्ती,

¹⁵ कने तुहें अनन्त जीवन देणे औल़े जो मारीत्या, तिस्सो जे परमेशरे मूईरेयां चते ज्यूंदा कित्या, कने अहें इसा गल्ला रे गवाह थे।

¹⁶ कने तिस विश्वासा ते सै जे यीशु मसीह रिया वजह ने, इस माहणुये जो तिस्सो जे तुहें जाणाँ ये कने तिस्सो जे तुहें इस वगत बी देख्या राँये, सामर्थ दित्ति गैईरी। सै माहणु यीशुये रे नौआं च कने यीशु मसीह च विश्वासा रे जरिये विल्कुल ठीक-ठाक हुईरा तियां जे भई तुहें अप्पूँ खुद देखी सक्कां ये।

¹⁷ “हुण हे भाईयो, हऊँ जाणाँ भई ये तुहें कने तुहांरयां अगुवेयां यीशुये जो अंजाणगिया च मारीत्या, काँह्भई तुहें नीं जाणदे थे भई सैई मसीह था।

¹⁸ पर तिन्हां गल्लां जो जे परमेशरे सब भविष्यवक्तयां रे मुँआं ते पैहले इ दस्सी तरा था, भई परमेशरा रे भेज्जीरे मसीहे दुख सैहणा कने मरना था, तिन्हांजो तिन्हें इसा रितिया ते पूरा कित्या।

¹⁹ इस खातर, मन फिरावा कने वापस आई जावा भई तुहांरे पाप माफ कित्ते जाओ, तिसते जे प्रभुये रे सामणे तसल्लिया ने रमान्ना रे दिन आओ,

²⁰ कने सै यीशुये जो भेज्जो तुहां खातर सै जे पैहले तेई मसीह चुणी रखीरा।

²¹ जरूरी आ भई यीशु स्वर्गा च तिस बगता तक रौ तदुआं तका जे सब्बीं गल्लां रा सुधार नीं करी लो, तिसरे बारे च जे पुराणे वगता ते परमेशरे अपणे पवित्र भविष्यवक्तयां रे मुँआं ते दस्सीरा।

²² तेढ़ा जे मूसे बोलीरा, प्रभु परमेशरा तुहांरे भाईयां चते तुहां खातर मेरे साई इक भविष्यवक्ता भेजणा, जो किछ सै तुहांजो बोल्लो, तिसरी सुणयों।

²³ पर हरेक माहणु, सै जे तिस भविष्यवक्ता री नीं सुणो, सै लोकां बिच नाश कित्या जाणा।

²⁴ “कने शमुएल ते लईने तिसते बाद औणे औल़यां तका तितने जे भविष्यवक्ता बोल्ले तिन्हें सब्बीं तिन्हां दिनां रे बारे च खुशखबरी दित्ति।

²⁵ तुहें सारे तिन्हां भविष्यवक्तयां रियां औल़ादां ये कने तिस वायदे रे सहभागी हुणे, तिस्सो जे परमेशरे तुहांरे पूर्वजां ने कित्तिरा, तां जे तिने अब्राहमा ने गलाया, ‘तेरे वंशा तेई धरतिया रेयां सारेयां घरान्नेयां आशीष पाणी।’

²⁶ परमेशरे अपणे सेवका जो मूईरयां चते जिऊंदा करीने सब्बींते पैहले तुहांले भेज्या, भई तुहां चते हर इक्की माहणु अपणियां बुराईयां जो छड्डिने परमेशरा रिया तरफा जो फिरो ताकि आशीष पाओ।”