प्रेरितां 28 - बिलासपुरी नौआं नियम

माल्टा टापुये च पौलुस

¹ ताहली जे अहें सारे समुद्रा रे कण्डे ठीक-ठाक पुज्जीगे, तां पता लगया भई इस टापुये रा नौं माल्टा था।

² कने तित्थी रे रैहणे औल़यां अहां पर महान दया करीने अहांजो ग्रहण कित्या; काँह्भई बरखा बरसणे ते ठण्ड हुया राँ थी, इस खातर तिन्हें आग्ग बाल़ीने अहां सब्बीं जो सकाया।

³ ताहली जे पौलुसे लकड़ियां रा अंगड़ु कट्ठा करीने अग्गी पर रखया, तां इक सप्प सेक्का ते निकल़या कने तिसरे हत्था च लपेठि गया।

⁴ तां जे तिन्हें निवासियें सप्पा जो तिसरे हत्था ने लटकोई रा देख्या, तां अप्पूँ चियें गलाया, “सचमुच ये माहणु हत्यारा हुँगा भई समुद्रा ते तां बची गया, तां बी अहांरी देबिये पौलुसा जो ज्यूंदा रैहणे नीं दित्या।”

⁵ तां तिने सप्पा जो अग्गी च ठुटकित्या, कने तिस्सो किछ नुक्शान नीं हुया।

⁶ पर सै लोक इन्तजार करदे रै भई तिसजो सोजिश औणी या इकदम पईने मरी जाणा, पर तां जे सै मतिया देरा तका देखदे रै कने देख्या भई तिसरा किछ नुक्शान नीं हुया, तां अपणा बचार बदली ने गलाया, “ये तां कोई देबता।”

⁷ तिसा जगह रे नेड़े तेड़े तिस टापुये रे प्रधान पुबलियुस री जमीन थी। तिने अहौं अपणे घरा नेईने तिन्हां दिनां तका दोस्तां साई आओ-बैठ किति।

⁸ पुबलियुस रा पिता बुखार कने खून बगणे रा रोगी था। इस खातर पौलुसे तिसरे कमरे च जाईने प्राथना कित्ती कने तिस परा हाथ रखीने तिस्सो ठीक करित्या।

⁹ ताहली जे येढ़ा हुआ तां तिस टापुये रे बाकी बमार लोक पौलुस ले आये कने ठीक हुईने गै।

¹⁰ तिन्हें अहांरा बौहत आदर कित्या, कने ताहली जे अहें तिन्नां महीनयां ते बाद चलने लगे तां जो किछ अहां खातर जरूरी था, जहाजा पर रखीत्या।

मालटा दवीपा ते रोमा रिया तरफा

¹¹ तिन्नां महीनयां ते बाद अहें सिकन्दरिया नगरा जो जाणे औल़े इक्की जहाजा पर बैठीने चले सै जे तिस टापुये पर सारियां ठन्ठी रैईरा था, कने तिसरा नशाण दियुसकुरी था।

¹² सुरकुसा शहरा च लंगर सट्टीने अहें तिन्नां दिनां तका रुकीरे रै।

¹³ तित्थी ते अहें अग्गे बधीने रेगियुमा नगरा च पुज्जे; कने इक्की दिना ते बाद दखणा री हवा चली, तां अहें दुज्जे रोज पुतियुली शहरा च आये।

¹⁴ तित्थी अहांजो विश्वासी मिले, कने तिन्हांरे कैहणे ते अहें तिन्हांले सत्तां रोजां तक रै; कने इस तरिके ने अहें रोम नगरा तक यात्रा शुरु कित्ती।

¹⁵ तित्थी ते किछ विश्वासी अहांरे औणे री खबर सुणीने सै अपियुस नगरा रे चौका कने तिन्न सराये तक अहांने भेंट करने जो आये, तिन्हांजो देखीने पौलुसे बौहत हौंसला पाईने परमेशरा रा धन्यवाद कित्या।

¹⁶ ताहली जे अहें रोमा नगरा च पुज्जे तां पौलुसा जो इक्की सपाईये सौगी सै जे तिसरी रखवाली कराँ था, कल्हे रैहणे रा हुक्म मिल़या।

रोमा च पौलुस

¹⁷ तिन्नां दिनां ते बाद तिने यहूदियां रे प्रमुख लोकां जो सदया, कने तां जे सै कट्ठे हुये तां तिन्हांने गलाया, “हे भाईयो मैं अपणे लोकां रे या पूर्वजां रियां प्रथां रे बरोधा च किछ बी नीं कित्या, फेरी बी कैदी बणीने यरूशलेम ते रोमी सरकारा रे हत्था सौंपया गया।

¹⁸ तिन्हें मिन्जो परखीने छड्डी देणा चाया काँह्भई मेरे च मौती रिया सजा रे लायक कोई इल्जाम नीं था।

¹⁹ पर तां जे यहूदी अगुवे इसरे बरोधा च बोलणे लगे, तां मिन्जो बादशाह कैसरा री दुहाई देणी पैई; इस खातर नीं भई मांह अपणे लोकां पर कोई दोष लाणा था।

²⁰ इस खातर मैं तुहांजो सदया भई तुहांजो मिलूँ कने गल-बात करूँ; काँह्भई इस्राएल री आशा यनि मसीह रे खातर हऊँ इस जंजीरा च जकड़ी रा।”

²¹ तिन्हें तिसने गलाया, “नां अहें तेरे बारे च यहूदा प्रदेशा रे लोकां ते चिट्ठियां पाईयां। कने नां विश्वासियां चते किन्हिये आईने तेरे बारे च किछ दस्या या बुरा गलाया।

²² पर तेरा विचार क्या? तिस्सो इ अहें तेरते सुणना चांये, काँह्भई अहें जाणाँ यें भई हर जगह इस मता रे बरोधा च लोक गल्लां कराँ ये।”

²³ तां यहूदियें तिस खातर इक दिन तैह कित्या, कने मते लोक तिसले कट्ठे हुये, कने सै परमेशरा रे राज्जा री गवाही देन्दा हुआ। कने मूसा री व्यवस्था कने भविष्यवक्तयां री कताबां चते यीशुये रे बारे च समझाई-समझाई ने सवेरे ते संझा तका दसदा रैया।

²⁴ तां किछ लोकें तिन्हां गल्लां पर विश्वास कित्या, कने कईयें लोकें विश्वास नीं कित्या।

²⁵ तां जे सै अप्पूँ चियें इक मत नीं हुये, तां पौलुसा रिया इसा गल्ला रे बोलणे पर चलीगे : “पवित्र आत्मे यशायाह भविष्यवक्ता ते तुहांरे पूर्वजां ने ठीक इ गलाया,

²⁶ ‘जाईने इन्हां लोकां ने बोल, भई तुहां सुणदयां त रैहणा, पर नीं समझणा, कने तुहां देखदे त रैंहणा, पर बुझणा नींआ;

²⁷ काँह्भई इन्हां लोकां रा मन कठोर ये कने इन्हांरे कान्न सुणी नीं सकदे, कने इन्हें अपणियां आक्खीं बन्द कित्ती रियां, इस खातर इन्हां रियां आक्खीं देखी नीं सकदियां, कने कान्न सुणी नीं सकदे, कने ये मना ते समझी नीं सकदे, जे ये नीं हुन्दा तां सै फिरी जान्दे, कने हऊँ तिन्हांजो चंगा करी देन्दा।’

²⁸ इस खातर तुहें जाणो भई परमेशरा रे इस छुटकारे री कथा अन्यजातियां ले भेज्जी गईरी, कने तिन्हां ग्रहण करनी।”

²⁹ तां जे तिने येढ़ा गलाया तां यहूदी अप्पूँ चियें बौहत बैहस करने लगे कने तित्थी ते चलीगे।

³⁰ सै पूरे दुईं साल्लां तका किराये रे घरा च रैया,

³¹ कने सै जे तिसला औवां थे, तिन्हां सब्बीं ने मिलदा रैया कने बिणा रोक टोक बौहत निडर हुईने परमेशरा रे राज्जा रा प्रचार करदा कने प्रभु यीशु मसीह री गल्लां सखांदा रैया।