प्रेरितां 27 - बिलासपुरी नौआं नियम

पौलुसा रा रोम भेज्या जाणा

¹ ताहली जे फिस्तुस राजपाला रे जरिये ये तैह कित्या गया भई अहां जहाजा च इतालिया प्रदेशा रे रोम नगरा च जाईये, तां तिन्हें पौलुस कने किछ होरीं कैदियां जो बी यूलियुस नौआं रे बादशाह औगस्तुस रिया पलटना रे इक्की सुबेदारा रिया निगरानिया च सौंपीत्या।

² आसिया रे अद्रमुत्तियुम नगरा रे इक्की जहाजा पर सै जे आसिया रे कनारे रियां जगहां च जाणे औल़ा था, चढ़ीने अहें अपणी यात्रा शुरु करी ती, कने अरिस्तर्खुस नौआं रा मकिदुनी प्रदेशा रे थिस्सलुनीके नगरा रा इक निवासी अहांने सौगी था।

³ दुज्जे रोज अहें सैदा नगरा च पुज्जीगे, कने यूलियुस पौलुसा पर दया करीने तिस्सो दोस्तां ला जाणे दित्या भई सै तिसरा सत्कार कित्या जाणा।

⁴ तित्थी ते अहें यात्रा दोवारा शुरु कित्ती कने हवा बरोधा च हुणे रिया वजह ते अहें साइप्रस टापुये रे आड़े-आड़े हुईने चले;

⁵ कने किलिकिया कने पंफूलिया नगरा रे समुद्रा रे किनारे ते हुईने लुसिया प्रदेशा रे मूरा नगरा च उतरे।

⁶ तित्थी सुबेदारा जो सिकन्दरिया नगरा रा इक जहाज इतालिया जान्दा हुआ मिलया, कने तिने अहांजो तिस जहाजा पर चढ़ाईत्या।

⁷ तां जे अहें बौहतीं दिनां तका मठयां-मठयां चलीने मुश्कला ते कनिदुस नगरा रे सामणे पुज्जे, तां इस खातर भई हवा अहांजो अग्गे नीं बधणे देन्दी थी, अहें सलमोना रे सामणे चियें हुईने क्रेते टापुये री आड़ लईने चले;

⁸ कने तिसरे कनारे-कनारे मुश्कला ते चलीने शुभलंगरबारी नौआं रिया जगह पुज्जे, तित्थी ते लसया नगर नेड़े था।

⁹ ताहली जे बौहत दिन बितिगे, कने जल यात्रा च जोखम इस खातर हुआं था भई उपवासा रे दिहाड़े हुण बौहत बित्ती चुकीरे थे। इस खातर पौलुसे तिन्हौं सब्बीं जो ये बोलीने चेतावनी दित्ति,

¹⁰ “हे सज्जनो, मिन्जो येढ़ा लगया राँ भई इसा यात्रा च विपत्ति कने बड़ा नुक्शान, नां सिर्फ समाना रा कने जहाजा रा, पर अहांरे प्राणा रा बी हुणे औल़ा।”

¹¹ पर सुबेदारे पौलुसा रिया गल्लां ते कप्तान कने जहाजा रे मालका रियां गल्लां जो बधीने मन्नया।

¹² शुभलंगरबारी नामक बन्दरगाह ठण्ड बिताणे खातर ठीक नीं था, इस खातर मतयां रा बचार हुआ भई येत्थीते जहाजा जो अग्गे ले जाईने किसी रितिया ने हुई सक्को तां फीनिक्स बन्दरगाह च पुज्जी ने ठण्ड कट्टिये। येत क्रेते टापुये रे कनारे रा इक बन्दरगाह हया तिसरा दवार जे दखण-पश्चम कने उत्तर-पश्चमा खौ खुलां।

समुद्रा च तूफान

¹³ ताहली जे थोड़ी-थोड़ी दखणा री हवा बगणे लगी, तां तिन्हें ये समझीने भई अहांरी योजना जो पूरा करने खातर ये सही वगत था, इस खातर यात्रा शुरु कित्ती कने कनारा दब्बी ने क्रेते टापुये रे बखा ते जाणे लगे।

¹⁴ पर थोड़िया देरा च धरतिया खा ते इक बड्डी नेहरी आई, तिस्सो जे युरकुलीन बोलां ये।

¹⁵ ताहली जे नेहरी जहाजा परा लगी तां जहाज तिसरे सामणे टिक्की नीं सकया, इस खातर अहें जहाजा जो हवा रे बगणे पर छड्डीत्या कने इयां इ बगदे-बगदे चलीगे।

¹⁶ तां कौदा नौआं रे इक्की छोट्टे जे टापुये रिया आड़ा च बगदे-बगदे अहें मुश्कला ने जीवन बचाणे औल़ी किश्तिया जो वशा च करी सक्के।

¹⁷ फेरी जहाजा रे कर्मचारी दल रे माहणुएं तिसाजो चक्कीने कई कोशिशां ते जहाजा जो थल्ले ते लेईने उपरा तक रस्से ने कस्सीने बन्हीत्या, कने सुरतिस खाड़िया रे चोर रेता पर फसी जाणे रे डरा ते तिन्हें लंगर जो थोड़ा जेआ थल्ले उतारी ने जहाजा जो हवा रे बहावा सौगी-सौगी बैहणे रे खातर छड्डीत्या।

¹⁸ ताहली जे अहें नेहरिया ते मते हिचकोल़े कने धक्के खादे, तां दुज्जे दिन सै जहाजा रा समान सटणे लगे;

¹⁹ कने तिज्जे दिन तिन्हें अपणे हत्था ते जहाजा रा साज समान बी सट्टीत्या।

²⁰ ताहली जे बौहती दिनां तका नां सूरज, नां तारे दुस्से कने बौहत नेहरी चलदी रई, तां आखरी च अहांरे बचणे री आशा जान्दी रैई।

²¹ तां जे सै बौहती दिनां तका भूखे रई चुके तां पौलुसे तिन्हांरे बिच खड़े हुईने गलाया, “हे लोको, चाहिन्दा था भई तुहें मेरी गल्ल मन्नीने क्रेते टापुये चते नां अग्गे बधदे कने नां संकट औंदा कने नां ये नुक्शान हुन्दा।

²² पर हुण तुहांजो समझावां भई हिम्मत रखा, काँह्भई तुहां चते बी किसी रे प्राणा रा नुक्शान नीं हूणा, पर सिर्फ जहाजा रा हूणा।

²³ काँह्भई परमेशर तिस राजे हऊँ आ, कने तिसरी सेवा कराँ, तिसरे स्वर्गदूते पिछलिया राति मेरले आईने गलाया,

²⁴ “हे पौलुस, ‘मत डर! तेरा बादशाह कैसरा रे सामणे खड़ा हूणा जरूरी आ, देख, परमेशरे सब्बीं जो सै जे तेरे सौगी यात्रा कराँ ये, तिन्हांजो बचाईरा।’

²⁵ इस खातर, हे सज्जनो, हिम्मत रखा; काँह्भई हऊँ परमेशरा रा विश्वास कराँ, भई तेढ़ा जे तिने मेरने बोलीरा तेढ़ा इ हूणा।

²⁶ पर अहांजो किसी टापुये पर जाईने रुकणे पौणा।”

जहाजा रा टुटणा

²⁷ तां जे चौहदवीं रात आई, कने अहें अद्रिया समुद्रा च भटकदे फिरया राँ थे, अधिया राति रे नेड़े तां नाविक लोकें अनुमान लगाईने जाणया भई अहें किसी देशा रे नेड़े पुज्या रायें।

²⁸ पाणिये री गहराई नापणे पर तिने बीह पुरसा यनि 37 मीटर गैहरा पाया, कने थोड़ा अग्गे बधीने फेरी गैहराई नाप्पी तां पन्द्रह पुरसा यनि 28 मीटर पाया।

²⁹ तां जे पत्थराँ औल़ियां जगहां ते बचणे रे डरा ते तिन्हें जहाजा री पछाड़िया खौ चार लंगर सट्टे, कने सबेर हुणे री कामना करदे रै।

³⁰ पर ताहली जे नाविक जहाजा परा ते नठणा चां थे, तां तिन्हें जहाजा रे सामणे ते लंगर सटणे रे बहान्ने जीवन बचाणे औल़ी किश्ती समुद्रा च उतारी ती;

³¹ तां पौलुसे सुबेदार कने सैनिकां ने गलाया, “जे ये लोक बचणा चाँये तां इन्हांजो जहाजा पर रैहणे री जरूरत इ।”

³² तां सैनिकें बचणे खातर छोट्टी किश्तिया री रस्सी कट्टीने जहाजा ते लग करित्या।

³³ ताहली जे सवेर हुई तां, पौलुसे ये बोलीने, सब्बीं जो रोटी खाणे खातर विनती कित्ती, “आज्ज चौदा रोज हुये भई तुहें चिन्ता करदे-करदे भूखे रै कने किछ रोटी नीं खाद्दि।

³⁴ इस खातर तुहांजो समझां भई रोटी खाई लवा, तिसते जे तुहांरा बचाव हुई सक्को; काँह्भई तुहां सुरक्षित रैहणा।”

³⁵ येढ़ा बोलीने तिने रोटी लईने सब्बी रे सामणे परमेशरा रा धन्यवाद कित्या कने तोड़ीने खाणे लगया।

³⁶ तां सै सब जणे हौंसला पाईने रोटी खाणे लगे।

³⁷ अहें सब मिलीने जहाजा पर दो सौ छयात्तर माहणु थे।

³⁸ तां जे सै रोटी खाईने रज्जीगे, तां कणकां जो समुद्रा च सट्टीने जहाजा जो हल्का करने लगे।

³⁹ तां जे दिन निकल़या तां तिन्हें तिस देशा जो नीं पछयाणया, पर इक खाड़ी देखी तिसरा कनारा चौरस था, कने बचार कित्या भई जे हुई सक्को तां इस पर जहाजा जो टकाईये।

⁴⁰ फेरी तिन्हें लंगरा जो खोली ने समुद्रा च छड्डीत्या कने तिस बगत पतवाराँ रे बन्धन ढीले करी ते, कने हवा रे सामणे रा अगला पाल चढ़ाईने कनारे खा चले।

⁴¹ पर दुईं समुद्राँ रे संगमा रिया जगह जो पढ़ीने तिने जहाजा जो रोकया, कने तिसरा अगला हिस्सा त रुकिग्या कने टल़ी नीं सक्की; पर पछाड़ी लैहराँ रे जोरा ते टुटणे लगी।

⁴² तां सैनिकां रा ये बचार हुआ भई कैदियां जो मारी दो, येढ़ा नीं हो भई कोई तैरी ने नट्ठी जाओ।

⁴³ पर सुबेदारे पौलुसा जो बचाणे रिया इच्छा ते तिन्हौं इस बचारा ते रोकया कने ये गलाया, भई सै जे तैरी सक्कां ये, पैहले छाल मारीने कनारे पर निकल़ी जाओ;

⁴⁴ कने बाकी कोई पटड़ेयां पर कने कोई जहाजा री होरीं चिज़ां रे सहारे निकाल़ी जाओ। इसा रितिया ते सब धरतिया परा ठीक ठाक पुज्जीगे।