प्रेरितां 26 - बिलासपुरी नौआं नियम

अग्रिप्पा रे सामणे पौलुसा री सफाई देणा

¹ अग्रिप्पे पौलुसा ने गलाया, “तिज्जो अपणे बारे च बोलणे रा हुक्म आ।” तां पौलुस चुप रैहणे खातर हत्था रा ईशारा करीने जवाब देणे लगया,

² “हे राजा अग्रिप्पा तितनियां गल्लां रा जे यहूदी अगुवे माह पर दोष लाया रायें, आज्ज तेरे सामणे तिन्हांरा जवाब देणे ते हऊँ अप्पूँजो धन्या समझां,

³ खास करीने इस खातर भई तू यहूदियां रे सब्बीं रीति रिवाजां कने विवादां जो जाणाँ। इस खातर हऊँ विनती कराँ, धीरजा ने मेरी सुणी लै।

⁴ “तियां जे मेरा चाल-चल़ण बच्छपना तेई अपणे लोकां रे बिच कने यरूशलेम च तेढ़ा जे था, तिस्सो कई साथी यहूदी जाणाँ ये।

⁵ जे सै गवाही देणा चाओ, तां सै मेरे बच्छपना ते मिन्जो पछयाणां ये, भई हऊँ फरीसी हुईने अपणे धर्मा रे सब ते खरे पन्था रे मुतावक चलया।

⁶ कने हुण इस वायदे रिया आशा रिया वजह ते सै जे परमेशरे अहांरे पूर्वजां ने कित्या था, माह पर मुकद्दमा चलया राँ।

⁷ तिसा प्रतिज्ञा रे पूरे हुणे री आशा लाईने, अहांरे बारा गोत्र अपणे सारे मना ते रात दिन परमेशरा री अराधना करदे आया रायें। हे राजा, इसा इ आशा रे बारे च यहूदी अगुवे मांह पर दोष लांये।

⁸ तुहां चते किसी जो बी ये गल्ल विश्वास लायक काँह नीं लगदी भई परमेशर मूईरयां जो जिऊंदा करी देआं।

⁹ “मैं बी समझया था भई नासरत च रैहणे औल़े यीशुये रे नौआं रे बरोधा च मिन्जो बौहत किछ करना चाहिन्दा।

¹⁰ कने मैं यरूशलेम च येढ़ा इ कित्या; कने मुखियायाजकां ते अधिकार लईने मते सारे पवित्र लोकां जो जेलखान्ने च पाया, कने ताहली जे सै मारी दित्ते जां थे, तां हऊँ बी तिन्हांरे बरोधा च अपणी सहमति देआं था।

¹¹ कने हर यहूदी सभा घर च हऊँ तिन्हांजो ताड़ना देई-देईने यीशुये री निंध्या करवां था, येत्थी तक भई गुस्से रे मारे येढ़ा पागल हुईग्या भई दुज्यां नगराँ च बी जाई-जाईने तिन्हांजो सतां था।

अपणे मन बदलने रा बर्णन

¹² “इसा इ टेरा च ताहली जे हऊँ मुखियायाजकां ते अधिकार कने हुक्म पत्र लईने दमिश्क नगरा जो जाया राँ था;

¹³ तां हे राजा, रस्ते च दपैहरा रे बगत मैं अम्बरा ते सूरजा रिया चमका ते बी बधीने इक ज्योति, अपणे कने अपणे सौगी चलने औल़यां रे चऊँ पासयां चमकदी देखी।

¹⁴ तां जे अहें सारे धरतिया पर पैईगे, तां मैं इब्रानी भाषा च, मिन्जो येढ़ा बोलदे इक अवाज़ सुणी, ‘हे शाऊल, हे शाऊल, तू मिन्जो दुख देणे रिया वजह ने खुद अप्पूँ जोई दुख देई कराँ।’

¹⁵ “मैं गलाया, ‘हे प्रभु, तू कुण आ?’ प्रभुये गलाया, ‘हऊँ यीशु आ तिस रेयां लोकां जो जे तू दुख देईराँ।

¹⁶ पर तू उट्ठ, अपणे पैराँ पर खड़ा हो; काँह्भई मैं तिज्जो इस खातर दर्शण दित्या भई तिज्जो तिन्हां गल्लां रा बी सेवक कने गवाह बणाऊं, सै जे तैं देखी रियां, कने तिन्हांरा बी तिन्हां खातर जे मांह तिज्जो दर्शण देणा।

¹⁷ कने माह तिज्जो तेरे लोकां ते कने अन्यजातियां ते बचांदे रैहणा, तिन्हांले जे हुण हऊँ तिज्जो इस खातर भेज्या दा,

¹⁸ भई तू तिन्हांजो इसा गल्ला रा एहसास करवाई दो भई सच्च क्या? कने झूट्ठा पर विश्वास करने रे बजाय परमेशरा रिया सच्चाईया पर विश्वास करा; ये सब इस खातर ताकि सै पापां री माफी कने मांह पर विश्वास करने ते पवित्र कित्तिरे लोकां सौगी बिरासत पाई सक्को।’

अपणयां कम्मां रा बर्णन

¹⁹ “इस खातर हे राजा अग्रिप्पा, मैं तिस स्वर्गीय दर्शणा रा पालन कित्या,

²⁰ पर पैहले दमिश्क नगरा रे, फेरी यरूशलेम रे रैहणे औल़यां जो, फेरी यहूदिया रे सारे देशा च कने अन्यजातियां जो प्रचार कित्या, भई मन फिराणे कने परमेशरा खौ मुड़ीने मन फिराणे रे लायक काम्म करा।

²¹ ताहली जे हऊँ इन्हां गल्लां रा प्रचार मन्दरा च कराँ था, इस रिया वजह ते यहूदी मिन्जो पकड़ीने मारने री कोशिश कराँ थे।

²² “पर परमेशरा री सहायता ते हऊँ अज्जा तका बचीरा कने छोट्टे बड्डे सब्बीं रे सामणे गवाही देआं, तिन्हां गल्लां जो छड्डिने किछ नीं बोलदा सै जे भविष्यवक्तयां कने मूसे बी गलाईयां भई हुणे औल़ियां इ,

²³ भई मसीह जो दुख सैहणे पौणा, कने तिस इ सब्बीं ते पैहले मूईरेयां चते जिऊंदा हुईने, अहां रयां लोकां च कने अन्यजातियां च परमेशरा रा सन्देश सै जे ज्योतिया साई आ तिसरा प्रचार करना।”

²⁴ ताहली जे पौलुस इसा रितिया ने जवाब देई कराँ था, तां फेस्तुसे ऊच्चिया अवाज़ा च गलाया, “हे पौलुस, तू पागल आ। बौहती विध्यां ते तू पागल हुईगरा।”

²⁵ पर पौलुसे गलाया, “हे महामहीम फेस्तुस हऊँ पागल निआं, पर सच्चाई कने बुद्धिया रियां गल्लां बोलां।

²⁶ राजा बी ये गल्लां जाणाँ, तिसरे सामणे जे हऊँ निडर हुईने गलाया राँ; कने मिन्जो विश्वास आ, भई इन्हां गल्लां चते कोई बी तिसते छिपीरी नीं, काँह्भई ये घटना सारयां लोके सुणिरी भई यीशु मसीह सौगी क्या हुईरा।

²⁷ हे राजा अग्रिप्पा क्या तू भविष्यवक्तयां रा विश्वास कराँ? हाँ, हऊँ जाणाँ भई तू विश्वास कराँ।”

²⁸ हुण अग्रिप्पे पौलुसा ने गलाया, “क्या तू थोड़े इ समझाणे ते मिन्जो मसीही बनाणा चाँह?”

²⁹ पौलुसे जबाब दित्या, थोड़े वगता च, चाये मते वगता च, “परमेशरा ने मेरी प्राथना येई भई नां सिर्फ तू, पर सै सारे लोक बी, सै जे आज्ज मिन्जो सुणया राँये, तेढ़े इ हुई जाओ, तेढ़ा जे हऊँ विश्वासी आ, सिवाय इन्हां जंजीराँ ते।”

³⁰ तां राजा कने राजपाल कने बिरनीके कने तिसने सौगी बैठणे औल़े उट्ठीने चलीगे;

³¹ कने तियां जे सै जाया राँ थे अप्पूँ चियें बोलणे लगे, “इने माहणुये येढ़ा त किछ नीं कित्या, सै जे मौती रिया सजा या जेल्ला च पाणे लायक हो।”

³² अग्रिप्पे फेस्तुसा ने गलाया, “जे ये माहणु बादशाह कैसरा री दुहाई नीं देन्दा, तां छुट्टी सक्कां था।”