प्रेरितां 25 - बिलासपुरी नौआं नियम

पौलुस रा फेस्तुस रे सामणे

¹ फेस्तुस तिस प्रदेशा च पुजणे ते तिन्नां दिनां बाद कैसरिया नगरा ते यरूशलेम जो गया।

² तां मुखियायाजकें कने यहूदी अगुवेयां, तिसरे सामणे पौलुसा पर इल्जाम लगाये भई तैं जो किछ कित्या सै गल़त आ;

³ कने तिसने विनती करीने ये चाहया भई सै पौलुसा जो यरूशलेम च सद्दो, काँह्भई सै तिस्सो मारने खातर घात लाईने रस्ते ची लुक्खीरे थे।

⁴ फेस्तुसे जवाब दित्या, “पौलुस कैसरिया च पैहरेदाराँ रे पैहरे च था, कने मांह खुद जल्दी तित्थी जो जाणा।”

⁵ फेरी गलाया, “तुहां चते सै जे अधिकारी ये सै सौगी चलो, कने जे इने माहणुये किछ गल़त काम्म कित्तिरा, तां तिस परा दोष लगावा।”

⁶ फेस्तुसे यरूशलेम च कोई आठ-दास रोज रईने सै कैसरिया जो गया; कने दुज्जे रोज न्याय आसणा पर बैठीने पौलुसा जो लयाऊणे रा हुक्म दित्या।

⁷ ताहली जे सै आया, तां सै जे यहूदी अगुवे यरूशलेम ते आईरे थे, तिन्हें तिसरे चऊँ पासयां खड़ीने तिस पर गम्भीर इल्जाम लगाये, तिन्हांरा जे सै सबूत नीं देई सकदे थे।

⁸ पर पौलुसे अपणा बचाव करदे हुये जवाब दित्या, “मैं नांत यहूदियां री व्यवस्था रे कने नां मन्दरा रे, कने नांई बादशाह कैसरा रे बरोधा च कोई अपराध कित्तिरा।”

⁹ तां फेस्तुसे यहूदी अगुवेयां जो खुश करने रिया इच्छा ते पौलुसा ते पुच्छया, “क्या तू चाँह भई यरूशलेम जो जाईये; कने तित्थी मेरे सामणे तेरा ये मुकद्दमा लड़या जाओ?”

पौलुस रा कैसरा री दुहाई देणा

¹⁰ पौलुसे बोल्या, “हऊँ बादशाह कैसरा रे न्याय आसणा रे सामणे खढ़िरा; मेरे मुकद्दमे रा येत्थी ही फैसला हूणा चाहिन्दा। तेढ़ा जे तू ठीक ढंगा ने जाणाँ, यहूदी लोकां रा मैं किछ अपराध नीं कित्तिरा।

¹¹ “जे हऊँ अपराधी आ कने मारी दित्या जाणे रे लायक कोई काम्म कित्तिरा, तां हऊँ मरने ते नीं मुकरदा; पर तिन्हां गल्लां रा जे माह पर दोष लांये, जे तिन्हां चते कोई बी गल्ल सच्च नीं ओ, तां किसी जो बी ये अधिकार नींआ भई सै मिन्जो इन्हांरे हवाले करो। हऊँ बादशाह कैसरा री दोहाई देआं।”

¹² फेरी फेस्तुसे मन्त्रियां रियां सभा ने सौगी बचार करीने जवाब दित्या, “तैं बादशाह कैसरा री दुहाई दित्तिरी, तां तू बादशाह कैसरा लाई जाणा।”

राजा अग्रिप्पा रे सामणे पौलुस

¹³ कईयां दिनां ते बाद, अग्रिप्पा राजा अपणी छोट्टी भैण बिरनीके ने कैसरिया नगरा च आये कने फेस्तुस ने आईने भेन्ट किति सै जे प्रदेशा रा नया राजपाल था।

¹⁴ तिन्हांरे बौहत दिन तित्थी रैहणे ते बाद फेस्तुस पौलुसा रे बारे च राजे जो दस्या: “इक माहणु आ, तिस्सो जे फेलिक्स कैदी रखी गरा।

¹⁵ तां जे हऊँ यरूशलेम च था, तां मुखियायाजकें कने यहूदियां रे बजुर्ग नेतयां तिस पर इल्जाम लगाये कने चाहया, भई तिस्सो सजा रा हुक्म दित्या जाओ।

¹⁶ पर मैं तिन्हांजो जवाब दित्या भई रोमियां री ये रीति नीं भई किसी माहणुये जो सजा देणे खातर सौंपी देओ, तदुआं तका जे आरोपिये जो अपणे इल्जाम लाणे औल़यां रे सामणे खड़े हुईने दोषा रा जवाब देणे रा मौका नीं मिलो।

¹⁷ “इस खातर ताहली जे यहूदी अगुवे कैसरिया च आये, तां मैं किछ देर नीं किति, पर दुज्जे इ दिन न्याय आसणा पर बैठीने पौलुसा जो ल्यौणे रा हुक्म दित्या।

¹⁸ तां जे तिसरे मुद्दई खड़े हुये, तां तिने येढ़ि गल़त गल्लां रा दोष नीं लगाया, तेढ़ा जे, हऊँ समझां था।

¹⁹ पर सै अपणे धर्मा रे सम्बन्धा रियां किछ गल्लां च पौलुसा ने मतभेद था कने यीशु नौआं रे किसी माहणुये रे बारे च, सै जे मरी चुक्कीरा, पर पौलुस तिसरे ज्यूंदा हुणे रा दावा कराँ।

²⁰ कने हऊँ उलझना च था भई इन्हां गल्लां रा पता कियां लाऊं? इस खातर मैं पौलुसा ते पुच्छया, ‘क्या तू यरूशलेम जाणा, भई तित्थी इन्हां गल्लां रा मुकद्दमा हो?’

²¹ पर ताहली जे पौलुसे दुहाई दित्ति, भई तिसरे मुकद्दमे रा न्याय रोम रे बादशाह ले हो; तां मैं हुक्म दित्या, भई तदुआं तका जे तिस्सो बादशाह कैसरा ला नीं भेजूँ, इसजो हिरासता च रख्या जाओ।”

²² तां अग्रिप्पे फेस्तुसा ने गलाया, “हऊँ बी तिस माहणुये री सुणना चाँह।” तिने गलाया, “तू कल सुणी लेयां।”

²³ इस खातर दुज्जे रोज, ताहली जे अग्रिप्पा कने बिरनीके बड़िया धूमा-धाम्मा ने आये कने पलटना रे सरदाराँ कने नगरा रे खास लोकां सौगी दरबारा च पुज्जे। फेरी फेस्तुसे हुक्म दित्या भई सै पौलुसा जो ली आओ।

²⁴ फेस्तुसे गलाया, “राजा अग्रिप्पा, कने मौजूद सब सज्जन लोको, तुहें इस माहणुये जो देख्या रायें, तिसरे बारे च जे कई यहूदी अगुवेयां यरूशलेम च कने येत्थी बी रड़ाई-रड़ाईने मेरने विनती किति, भई इसरा ज्यूंदा रैहणा ठीक निआं।

²⁵ पर मैं जाणी लया भई इने येढ़ा किछ नीं कित्तिरा भई मारीत्या जाओ; कने तां जे भई तिने खुद बादशाह री दोहाई दित्ति, तां मैं पौलुसा जो रोम नगरा जो भेजणे रा फैसला कित्या।

²⁶ पर मैं इसरे बारे च कोई पक्की गल्ल नीं पाई भई बादशाह जो लिखुं, इस खातर मैं इस्सो तुहांरे सामणे कने खास करीने हे राजा अग्रिप्पा, तेरे सामणे लन्दीरा, भई जाँचणे ते बाद मिन्जो किछ लिखणे जो मिलो।

²⁷ काँह्भई किछ बी ओ कैदिये जो रोम सम्राटा ले भेजणा कने सै दोष जे तिस परा लगीरे, तिन्हांजो नीं दसणा, मिन्जो अन्याय पूर्ण लगां।”