प्रेरितां 24 - बिलासपुरी नौआं नियम

हाकिम फेलिक्सा रे सामणे पौलुस

¹ पंज्जां रोज़ां ते बाद हनन्याह महायाजक कईयां प्राचीनां कने तिरतुलुस नौआं रे किसी वकीला जो सौगी लईने कैसरिया नगरा च आई पुज्या; तिन्हें राजपाला रे सामणे पौलुसा पर दोष लगाये।

² ताहली जे पौलुस जो सदया गया तां तिरतुलुस तिस पर दोष लाईने बोलणे लगया, “हे आदरणीय राजपाल फेलिक्स, तुहें कईयां साल्लां तक अहां पर राज कित्या तिस दौरान अहें शाँतिया ने रैयां थे; कने तुहांरे अच्छे प्रबन्धा रिया वजह ने इसा जातिया रियां कई बुराईयां सुधरया राईयां।

³ इसजो अहें हर जगह कने हर तरिके ने धन्यवादा सौगी मन्ना यें।

⁴ पर इस खातर भई तिज्जो होर दुख नीं देणा चाहन्दे, हऊँ तेरने विनती कराँ, भई मेहरवानी करीने अहां रियां इक दो गल्ला सुणी ले।

⁵ काँह्भई अहें इस माहणुये जो इक उत्पात मचाणे औल़ा पाया। सारी दुनिया रे बौहत सारे यहूदी लोकां इने दंगे भड़काईरे, कने ये नासरियां रे कुपंथा रा मुखिया।

⁶ तिने मन्दरा जो अपवित्र करना चाहया, कने फेरी अहें तिस्सो बन्दी बणाईल्या। (अहें तिस्सो अपणिया व्यवस्था रे मुतावक दण्ड दित्या हुन्दा;

⁷ पर पलटना रे सरदार लूसियासे आईने तिस्सो जबरदस्ती अहांरे हत्था ते खोईल्या,

⁸ कने इस पर दोष लाणे औल़यां जो तेरे सामणे औणे रा हुक्म दित्या।) इन्हां सब्बीं गल्लां जो तिन्हांरे बारे च जे अहें तिस पर इल्जाम लगायें, तू अप्पूँ इ तिस्सो जाँची ने सच्चाईया जो जाणी लेणा।”

⁹ यहूदियें बी तिसरा साथ देईने बोल्या, “ये गल्लां इस इ तरिके रियां हईयां।

पौलुसा रा जबाब

¹⁰ “ताहली जे राजपाले पौलुसा जो बोलणे खातर ईशारा कित्या तां तिने जबाब दित्या : हऊँ ये जाणीने भई तू बौहती साल्लां ते इसा जातिया रे लोकां रा न्याय कराँ, इस खातर मौज्जा ने अपणा जबाब देआं।

¹¹ तू खुद जाणी सक्कां, भई तदुआं ते जे हऊँ यरूशलेम च अराधना करने रे मन्दरा च आया, मिन्जो बाराँ दिनां ते ऊपर नीं हुये।

¹² तिन्हें मिन्जो नां मन्दरा च, नां यहूदी सभा घराँ च, नां नगरा च किसी ने बैहस करदे या भीड़ लांदे देख्या;

¹³ कने नां तां सै तिन्हां गल्लां जो, तिन्हांरे बारे च जे सै हुण मेरे पर दोष लाया रायें, तेरे सामणे तिन्हांजो सच साबित करी सक्कां ये।”

¹⁴ पर ये हऊँ तेरे सामणे मन्नी लेआं, भई यीशु मसीह पर विश्वास करने औल़यां लोकां जो ये कुपन्थ बोलां ये, पर हऊँ अपणे पूर्वजां रे परमेशरा री सेवा करया राँ; कने सै जे गल्लां व्यवस्था कने भविष्यवक्ता री कताबां च लिखी रियां, तिन्हां सब्बीं पर विश्वास कराँ।

¹⁵ कने परमेशरा ते आशा रखां तेढ़ी जे सै खुद बी रखां ये, भई धर्मिये कने अधर्मिये दुईं जो परमेशरा मौती ते जिऊंदा करना।

¹⁶ इसते हऊँ अप्पूँ बी कोशिश कराँ भई परमेशरा खौ, कने माहणुआं खौ हऊँ सदा निर्दोष रौ।

¹⁷ “बौहत साल्लां बाद अपणयां गरीब लोकां जो उपहार देणे, कने परमेशरा जो भेंट चढ़ाणे यरूशलेम नगरा च आया था।

¹⁸ तिस इ वगत तिन्हें मिन्जो मन्दरा च, पवित्र होणे रे रीति रिवाजा जो पूरा करदे हुये देख्या तिसा जगह नांत कोई भीड़ थी नांई कोई शोर था। पर तित्थी आसिया प्रदेशा रे किछ यहूदी थे, तिन्हे जे दंगा कित्या था,

¹⁹ भई जे मेरे बरोधा च तिन्हारी कोई गल्ल हो तां येत्थी तेरे सामणे आईने तिन्हांजो माह पर दोष लगाणा चाहिन्दा।

²⁰ “या ये खुद बोल्लो, भई तां जे हऊँ महासभा रे सामणे खढ़िरा था, तां इनें मेरे च कुण जेआ अपराध पाया?

²¹ इसा इक्की गल्ला जो छड्डिने सै जे मैं इन्हांरे बिच खड़े हुईने बोल्ली थी, ‘मूईरेयां चते जिऊंदा हुणे रे बारे पर हऊँ विश्वास कराँ इस खातर आज मेरा तुहांरे सामणे मुक्दमा हुया राँ।’”

²² फेलिक्स सै जे यीशु मसीह पर विश्वास करने औल़यां लोकां रियां गल्लां ठीक-ढंगा ने जाणाँ था, तिन्हांजो येढ़ा बोलीने टाल़ीत्या, “ताहली जे पलटना रे सरदार लूसियासा औणा, तां तुहांरियां गल्लां रा न्याय करगा।”

²³ कने सुबेदारा जो हुक्म दित्या भई पौलुसा जो पैहरे च रख्या जाओ, कने तिसरे मित्राँ चते किसी जो बी तिसरी सेवा करने ते देहां रोकदे।

फेलिक्स कने द्रुस्सिल्ला रे सामणे पौलुस

²⁴ किछ दिनां ते बाद राजपाल फेलिक्स अपणी पत्नी द्रुस्सिला जो, सै जे यहूदिनी थी, सौगी लईने कैसरिया नगरा च आया कने पौलुसा जो सद्दीने तिस विश्वासा रे बारे च सै जे मसीह यीशुये पर आ, तिसते सुणया।

²⁵ ताहली जे सै धर्मिकता, कने संयम, कने औणे औल़े न्याय रे बारे च चर्चा करया राँ था, तां फेलिक्स डरा रे मारे जवाब दित्या, “हुण तू जा; मौका देखीने हऊँ तिज्जो फेरी सदगा।”

²⁶ फेलिक्स जो पौलुसा ते किछ पैसे मिलणे री बी आशा थी, इस खातर सै होर बी तिस्सो सद्दी-सद्दीने तिसने गल्लां कराँ था।

²⁷ पर ताहली जे दो साल बितिगे तां, फेलिक्स रिया जगह पर पुसकियुस फेस्तुस राजपाल बणया; कने फेलिक्स यहूदियां जो खुश करने खातर पौलुसा जो कैदी रणी त्या।