प्रेरितां 23 - बिलासपुरी नौआं नियम

¹ पौलुसे महासभा खौ नज़राँ गडाई ने देख्या, कने बोल्या “हे भाईयो, मैं अज्जा तका परमेशरा खातर सच्चे मना ने जीवन बिताई रा।”

² तां हनन्याह महायाजके सै जे तिसले खढ़िरे थे, तिन्हांजो पौलुसा रे मुँआं पर थप्पड़ मारने रा हुक्म दित्या।

³ फेरी पौलुसे तिसने गलाया, “हे कपटी, परमेशरा तिज्जो मारना। तू व्यवस्था रे मुजब मेरा न्याय करने जो बैठिरा, कने तू व्यवस्था ते बाहर मिन्जो मारने रा हुक्म देआं?”

⁴ सै जे सौगी खढ़िरे थे तिन्हें गलाया, “क्या तू परमेशरा रे महायाजका जो बुरा-भला बोलां?”

⁵ पौलुसे गलाया, “हे भाईयो, हऊँ नीं जाणदा था, भई ये महायाजक आ; काँह्भई पवित्रशास्त्रा च लिखिरा, ‘अपणे लोकां रे मुखिये जो बुरा नीं बोल।’ ”

⁶ तां पौलुसे ये जाणीने, भई किछ सदूकी लोक कने किछ सदूकी लोकां जो सभा च हाक पाईने गलाया, “हे भाईयो, हऊँ फरीसी कने फरीसियां रे वंशा रा, कने मेरा न्याय मरीरयां री आशा कने भीं ते जिऊंदा हुणे रे बारे च हुया राँ।”

⁷ तां जे तिने ये गल्ल बोल्ली तां फरीसियें कने सदूकियां च झगड़ा हुणे लगया; कने सभा च फूट पईगी।

⁸ काँह्भई सदूकी लोकां रा ये विश्वास आ, भई नां मरने ते बाद भीं ते जिऊंदा हूणा, नां स्वर्गदूत, नां आत्मा इ; पर फरीसी इन्हां सब्बीं च विश्वास कराँ ये।

⁹ तां बड़ा हल्ला मचया कने किछ शास्त्री सै जे फरीसी थे, उट्ठीने ये बोलीने बैहस करने लगे, “अहें इस माहणुये च कोई बुराई नीं देखदे, जे कोई आत्मा या स्वर्गदूत तिसने बोलां तां फेरी क्या?”

¹⁰ ताहली जे बौहत झगड़ा हुआ तां पलटना रे सरदारे इस डरा ते भई सै पौलुसा रे टुकड़े-टुकड़े नीं करी दो, पलटना जो हुक्म दित्या भई पौलसा जो तिन्हां चते जबरदस्ती नकाली लओ, कने कोठड़ियां च लई जाओ।

¹¹ तिसा राति प्रभु यीशु तिसले आया कने खड़े हुईने गलाया, “हे पौलुस, हिम्मत रख; काँह्भई तेढ़ी जे तैं यरूशलेम च मेरी गवाही दित्ति, तेढ़ी तिज्जो रोम शहरा च बी गवाही देणे पौणी।”

पौलुसा रिया हत्या री चाल

¹² ताहली जे दिन हुआ तां यहूदियां रे किछ लोकें चाल खेल्ही कने कसम खाद्दि भई तदुआं तका जे पौलुसा जो मारी नीं देंगे, जे अहें खांगे या पींगे तां अहां पर लाणत इ।

¹³ तिन्हें जे अप्पूँ चियें ये कसम खाद्दि थी, सै चाल़ियां माहणुआं ते जादा थे।

¹⁴ तिन्हें मुखियायाजकां कने बजुर्ग नेतयां ले आईने बोल्या, “अहें ये कसम खाद्दीरी भई तदुआं तका जे अहें पौलुसा जो मारी नीं देंगे, तदुआं तक जे अहें किछ बी खांये तां अहां पर लाणत इ।

¹⁵ इस खातर हुण महासभा समेत पलटना रे सरदारा जो समझावा, भई पौलुसा जो तुहांले ली आओ, येढ़ा मन्नीने भई तुहां तिसरे बारे च होर बी ढंगा ने पड़ताल़ करना चाँये; कने अहां तिसरे पुजणे ते पैहले इ तिस्सो मारने खातर त्यार रैहणा।”

¹⁶ पर पौलुस रे भाणजे सुणया भई सै तिस्सो मारने जो त्यार बैठिरे, तां कोठड़िया च जाईने पौलुसा जो ब्योरा दित्या।

¹⁷ पौलुसे सुबेदाराँ चते इक्की जो अप्पूँ ला सद्दीने गलाया, “इस जवाना जो पलटना रे सरदारा ला लई जावा, ये तिसने किछ बोलणा चाँह।”

¹⁸ इस खातर सुबेदारे पौलुसा रे भाणजे जो पलटना रे सरदारा ले नेईने गलाया, “कैदी पौलुसे मिन्जो सद्दीने विनती कित्ती, भई ये जवान पलटना रे सरदारा ने किछ बोलणा चाँह; इस्सो तिसला लई जवा।”

¹⁹ पलटना रे सरदारे तिसरा हाथ पकड़ीने तिस्सो लग नेईने पुच्छया, “तू मेरने क्या बोलणा चाँह,”

²⁰ तिने गलाया, “यहूदी अगुवेयां साजस कित्तिरी भई तेरने विनती करो भई कल पौलुसा जो महासभा च ल्याओ, मन्नो भई सै होर बी ठीक ढंगा ने तिसरी जाँच करना चाँये।

²¹ पर तिन्हांरी देखां सुणदा काँह्भई तिन्हां चते चाल़ी माहणु पौलुसा जो मारने खातर त्यार बैठिरे, तिन्हें ये कसम खाद्दीरी भई तदुआं तका जे तिन्हां पौलुसा जो मारी नीं देणा तदुआं तका नां किछ खाणा नां पीणा। कने हुण सै त्यार ये कने तेरे बायदे रा इन्तजार करया रायें।”

²² फेरी पलटना रे सरदारे जवानां जो ये हुक्म देईने भेजित्या, “किसी ने देखां बोलदा भई तैं मिन्जो ये गल्लां दस्सी रियां।”

पौलुसा जो फेलिक्सा ले भेज्या जाणा

²³ फेरी पलटना रे सरदारे दो सुबेदाराँ जो सद्दीने गलाया, “दो सौ सैनिक, सत्तहर स्वार, कने दो सौ भाले औल़े, राति रे नौ बजे ते बाद कैसरिया नगरा जो जाणे खातर त्यार करी रखयों।

²⁴ कने पौलुसा रिया स्वारिया खातर घोड़े त्यार रखयों, भई तिस्सो फेलिक्स हाक्मा ला सही सलामत पहुँचाई देओ।”

²⁵ पलटना रे सरदारे येढ़ि इक चिट्ठी बी लिखी:

²⁶ “महामहिम् फेलिक्स हाक्मा जो क्लौदियुस लूसियास रा नमस्कार;

²⁷ इस माहणुये जो यहूदियें पकड़ीने मारना चाया, पर तां जे मैं जाणया भई सै रोमी आ, तां पलटन लईने तिस्सो छडवाईल्या।

²⁸ “हऊँ जाणना चाँह था भई सै किस वजह ते तिस परा दोष लाया रायें, इस खातर तिस्सो तिन्हां रिया महासभा च लईग्या।

²⁹ तां मैं जाणी लया भई सै यहूदी व्यवस्था रिया बैहसा रे बारे च तिस परा दोष लांये, पर मारी देणे खातर तिसच कोई दोष नीं मिलदा।

³⁰ कने ताहली जे मिन्जो पता लगया भई सै इस माहणुये रिया घाता च त्यार हुईने बैठिरे, तां मैं ताहलु इ तिस्सो तेरले भेजित्या; कने दोष लाणे औल़यां जो बी हुक्म देईत्या भई तेरे सामणे तिस परा इल्जाम लाओ।”

³¹ इस खातर तेढ़ा जे सैनिकां जो हुक्म दित्तिरा था, तियां इ सै पौलुसा जो लईने रातों-रात यरूशलेम ते अन्तिपत्रिस नगरा च ल्याये।

³² दुज्जे रोज सै स्वाराँ जो पौलुसा सौगी कैसरिया नगरा जो जाणे खातर छड्डिने सपाई यरूशलेम जो वापस हुये।

³³ तिन्हें कैसरिया नगरा च पुज्जी ने राजपाल जो चिट्ठी दित्ति; कने पौलुसा जो बी तिसरे सामणे खड़ा कित्या।

³⁴ ताहली जे राजपाले चिट्ठी पढ़ी, तां तिने पुच्छया भई पौलुस किस प्रदेशा ते था। ताहली जे तिने सिख्या भई सै किलिकिया ते था।

³⁵ कने ताहली जे पता लगया भई सै किलिकिया प्रदेशा रा, तां तिसने गलाया, “ताहली जे तेरे आरोपियां बी औणा तां हऊँ तेरा मुकद्दमा सुणांगा।” कने तिने पौलुसा जो हेरोदेस रे किले च पैहरे च रखणे रा हुक्म दित्या।