प्रेरितां 22 - बिलासपुरी नौआं नियम

भीड़ा रे सामणे पौलुसा रा भाषण

¹ “हे भाईयो कने पित्रो मेरा जवाब सुणा, सै जे माह हुण तुहांरे सामणे देणा।”

² सै ये सुणी ने भई इस अहां ने इब्रानी भाषा च गलाणा, कने बी चुप हुईगे। तां तिने गलाया :

³ “हऊँ त यहूदी माहणु आ, मेरा जन्म किलिकिया प्रदेशा रे तरसुस नगरा च हुईरा; पर इस नगरा च गमलीएल रे पैराँ च बैठीने पढ़या, कने पूर्वजां री व्यवस्था जो खरिया रितिया पर सखाया गया; कने परमेशरा खातर येढ़ि लगाईरी थी, तेढ़ी जे तुहां सब्बीं जो आज्ज लगी री।

⁴ मैं तां क्या माहणु क्या जनानां दुईं जो बन्ही-बन्हीने जेलखान्ने च पाईने, यीशु मसीह पर विश्वास करने औल़यां जो येत्थी तका सताया भई तिन्हांजो मरवाई बी दित्या।

⁵ इस गल्ला खातर महायाजक कने महांसभा रे सब बजुर्ग गवाह ये भई तिन्हांते हऊँ यहूदी भाईयां रे नौआं पर चिट्ठियां लईने दमिश्क नगरा जो जाया राँ था, भई सै जे तित्थी हो तिन्हांजो बी सजा दिलाणे खातर बन्हीने यरूशलेम जो ल्याऊं।

अपणे मन बदलने रा बर्णन

⁶ “ताहली जे हऊँ चलदे-चलदे दमिश्क नगरा रे नेड़े पुज्जया, तां येढ़ा हुआ भई दपैहरा रे बगता इकदम इक बड्डी ज्योति अम्बरा ते मेरे चऊँ पासयां चमकी।

⁷ कने हऊँ धरतिया पर पई गया कने येढ़ि अवाज़ सुणी, ‘हे शाऊल, हे शाऊल, तू मिन्जो काँह सताया राँ?’

⁸ मैं जवाब दित्या, ‘हे प्रभु, तू कुण आ?’ तिने मेरने गलाया, ‘हऊँ नासरत नगरा च रैहणे औल़ा यीशु आ, तिस्सो जे तू सताया राँ?’

⁹ “मेरे साथियें ज्योति चमकदी त देखी, पर सै जे मेरने गलाया राँ था तिसरी अवाज़ सुणी, पर सै ये नीं पैहचाणी पाये भई क्या बोल्या।

¹⁰ तां मैं गलाया, ‘हे प्रभु, हऊँ क्या करूँ?’ प्रभुये मेरने गलाया, ‘उट्ठीने दमिश्क नगरा च जा, कने जो किछ तेरे करने खातर ठहराईरा तित्थी तिज्जो सै सब दस्सीत्या जाणा।’

¹¹ तां जे तिस ज्योतिया रे तेज्जा रिया वजह ने मिन्जो किछ नीं दुस्या, तां मैं अपणे साथियां रे हत्थां पकड़ीने दमिश्क नगरा जो आया।

¹² “तां हनन्याह नौआं रा व्यवस्था रे मुतावक इक परमेशरा रा डर मनणे औल़ा माहणु, सै जे तित्थी रैहणे औल़यां सब यहूदियां च ईज्जतदार था, मेरले आया,

¹³ कने खड़े हुईने मेरने गलाया, ‘हे भाई शाऊल, फेरी देखणे लग।’ तिस इ घड़िया हऊँ तिस्सो देखणे लायक हुईग्या।

¹⁴ “तां तिने गलाया, ‘अहांरे पूर्वजां रे परमेशरे तिज्जो इस खातर ठहराईरा भई तू तिसरिया इच्छा जो जाणो, कने तिस धर्मिये जो देखो कने तिसरे मुँआं ते गल्लां सुणो।

¹⁵ काँह्भई तू तिसरिया दुखा ते सब्बीं माहणुआं रे सामणे तिन्हां गल्लां रा गवाह हूणा सै जे तैं देख्या कने सुणेया।

¹⁶ हुण देर काँह करया राँ? उट्ठ बपतिस्मा लै, कने यीशु मसीह पर विश्वास कर ताकि परमेशर तेरे पाप माफ करो’।”

अन्यजातियां च प्रचार

¹⁷ “ताहली जे हऊँ फेरी यरूशलेम च आईने मन्दरा च प्राथना करया राँ था, तां मैं इक दर्शणा च,

¹⁸ तिस्सो देख्या भई सै मेरने गलाया राँ, ‘छोड़े करीने यरूशलेम ते झट निकल़ी जा; काँह्भई तिन्हां मेरे बारे च तेरी गवाही नीं मन्नणी।’

¹⁹ “मैं गलाया, ‘हे प्रभु, सै त अप्पूँ जाणाँ ये भई हऊँ तेरे पर विश्वास करने औल़यां जो जेलखान्ने च पान्दा कने जगें-जगें यहूदी सभा घर च कुटावां था।

²⁰ तां जे तेरे गवाह स्तिफनुसा रा खून बगया राँ था तां हऊँ बी तित्थी खढ़िरा था कने इसा गल्ला च सहमत था, कने तिस्सो मारने औल़यां रे कपड़यां री रखवाली करया राँ था।’

²¹ कने प्रभु यीशुये मेरने गलाया, ‘चली जा : काँह्भई माह तिज्जो अन्यजातियां ला दूरा-दूरा जो भेजणा।’ ”

²² लोक इसा गल्ला तका तिसरी सुणदे रये तां बड्डिया अवाज़ा च रड़ाये, “येढ़े माहणुये जो खत्म करो इसरा ज्यूंदा रैहणा ठीक निआं।”

²³ ताहली जे सै रड़ांदे कने कोट सट्टदे कने गुस्सा जाहिर करने रे खातर अम्बरा च धूड़ डुवांदे रै;

²⁴ तां पलटना रे सरदारे गलाया, “इस्सो गढ़ा च लई जाओ, कने कोड़े मारीने पता लाओ, भई हऊँ जांणूं भई लोक किस वजह ते इसरे विद्रोहा च येढ़े रड़ाया रायें।”

²⁵ ताहली जे तिने तिस्सो चमड़े रिया पेट्टिया ने बन्हया, तां पौलुसे तिस सुबेदारा जो सै जे सौगी खढ़िरा था, गलाया, “क्या ये ठीक आ भई तुहें इक्की रोमी माहणुये जो, कने सै बी बिणा दोष साबित हुये, कोड़े मारो?”

²⁶ सुबेदारे ये सुणी ने पलटना रे सरदारा ला जाईने गलाया, “तू ये क्या करया राँ? ये तां रोमी माहणु आ।”

²⁷ तां पलटना रे सरदारे तिसला आई ने गलाया, “मिन्जो दस्स क्या तू रोमी आ?” तिने गलाया, “हाँ।”

²⁸ येढ़ा सुणी ने पलटना रे सरदारे गलाया, “मैं तां रोमी हुणे रा पद मते पैसे देईने लईरा।” पौलुसे गलाया, “हऊँ तां जन्मा तेई रोमी आ।”

²⁹ तां सै जे लोक परखणे लगे थे, सै ताहलूं इ तिसला ते हटीगे; कने पलटना रा सरदार बी येढ़ा जाणीने भई ये रोमी आ कने मैं तिस्सो बन्हीरा डरी गया।

बड्डिया पंचैती रे सामणे पौलुस

³⁰ दुज्जे दिन तिने असली गल्ल जाणने रिया इच्छा ते भई यहूदी तिस पर काँह दोष लाया रायें, तिसरे बन्धन खोल्लीते; कने मुखियायाजकां कने सारी महासभा जो कट्ठा हुणे रा हुक्म दित्या, कने पौलुसा जो थल्ले नेईने तिन्हांरे सामणे खड़ा करित्या।