प्रेरितां 20 - बिलासपुरी नौआं नियम

मकिदुनिया, यूनान कने त्रोआसा च पौलुस

¹ ताहली जे हुल्लड़ रुकी गया तां पौलुसे चेलयां जो सद्दीने हौंसला दित्या, कने तिन्हांते विदा हुईने मकिदुनिया प्रदेशा खा चली पैया।

² तिस सारे नगरा चियें घुम्मी फिरीने सब विश्वासियां जो हौंसला दित्या कने सै यूनान प्रदेशा जो आईग्या।

³ तां जे तिन्न महीने रैईने सै तित्थी ते जहाजा पर सीरिया प्रदेशा खा जाणे जो त्यार था, तां यहूदी अगुवेयां तिसजो मारने री योजना बणाई, इस खातर तिन्हें ये फैसला कित्या भई मकिदुनिया हुईने वापस हुई जाओ।

⁴ इसा यात्रा च बिरिया वासी पुरूर्स रा पुत्र सोपत्रुस कने थिस्सलुनीकी नगरा चते अरिस्तर्खुस कने सिकुन्दुस, कने दिरबे नगरा रा गयुस, कने तिमुथियुस, कने आसिया प्रदेशा रा तुखिकुस कने त्रुफिमुस तिस सौगी आये।

⁵ सै अग्गे जाईने त्रोआस नगरा च अहांरा इन्तजार करने लगे।

⁶ कने अहें बिणा मलेड़े री रोटिया रे दिनां ते बाद फिलिप्पी नगरा ते जहाजा परा चढ़ीने पंज्जां दिना च त्रोआसा च तिन्हांले पुज्जे, कने सत्तां दिनां तका तित्थी रै।

त्रोआसा च यूतुखुस रा जिऊंदा कित्या जाणा

⁷ हफ्ते रे पैहले दिन तां जे अहें प्रभु भोज्जा च शामिल होणे खातर कट्ठे हुये, तां पौलुसे तिस जे दुज्जे दिन चली जाणा था, तिन्हांने गल्लां कित्तियां; कने अधिया राति तका गल्लां करदा रैया।

⁸ तिस बराण्डे जे अहें कट्ठे हुईरे थे तिसच मते दिऊये बल़या राँ थे।

⁹ कने यूतुखुस नौआं रा इक जवान दुआरिया च बैठिरा गैहरिया निंदा ने टुल्लया राँ था। तां जे पौलुस मतिया देरा तका गल्लां करदा रैया तां सै निंदा रिया टेरा च तिज्जिया मंजला ते पैईग्या, कने मरीरा चक्कया।

¹⁰ पर पौलुस उतरी ने थल्ले जाईने तिसने लिपटीग्या, कने गल़े लगाईने बोल्या, “मता घबरान्दे; काँह्भई सै हल्तियें बी जिऊंदा।”

¹¹ कने भीं ते ऊपर जाईने रोटी तोड़ी कने खाईने इतनिया देरा तक गल्लां करदा रैया भई भ्याग हुणे लगीग्या; फेरी सै चलिग्या।

¹² कने सै तिस जवाना जो ज्यूंदे ली आये कने बौहत खुश हुये।

त्रोआस ते मिलेतुस री यात्रा

¹³ अहें पैहले इ जहाजा पर चढ़ीने अस्सुस नगरा जो येढ़ा सोच्चीने अग्गे गै भई तित्थी ते अहां पौलुसा जो चढ़ाई लेणा, काँह्भई तिने ये इस खातर रखीरा था भई तिस अप्पूँ पैदल जाणा था।

¹⁴ तां जे सै अस्सुस च अहां मिलणा तां अहें तिस्सो जहाजा पर चढ़ाईने मितुलेने नगरा च आये।

¹⁵ तित्थी ते जहाज खोली ने अहें दुज्जे दिन खियुस नगरा रे सामणे पुज्जे, कने अगले दिन सामुस नगरा च पुज्जीगे; फेरी दुजे दिन मिलेतुस नगरा च आये।

¹⁶ काँह्भई पौलुसे इफिसुस नगरा रे नेड़े चियें जाणे रा फैसला कित्या था भई किति येढ़ा नीं हो भई तिस्सो आसिया च देर लगो; काँह्भई सै जल़्दी च था भई जे हुई सक्को तां पिन्तेकुस्त त्योहारा रे रोज यरूशलेम च रौ।

इफिसुस रे बजुर्गां जो उपदेश

¹⁷ ताहली जे अहें मिलेतुस नगरा च पुज्जे, पौलुस इफिसुस नगरा रिया कलीसिया रे प्राचीनां जो औणे रा इक सनेहा भेज्या।

¹⁸ ताहली जे सै तिसला आये, तां तिन्हांने गलाया, “तुहें जाणाँ ये भई पैहले इ दिना ते तां जे हऊँ आसिया प्रदेशा च पुज्जया, हऊँ हर बगत तुहां सौगी कियां-कियां रैया,

¹⁹ यनिके बड्डिया दीनता ने, कने आँसू बहाई-बहाई ने, कने तिन्हां परीक्षां च सै जे यहूदियां रिया साजिशा रिया वजह ते मेरे परा पईयां, फेरी बी हऊँ प्रभुये री सेवा करदा इ रैया;

²⁰ कने सै-सै गल्लां जे तुहांरे फायदे रियां थिआं, तिन्हांजो दसणे कने लोकां रे सामणे कने घरें-घरें सखाणे च कदीं मनी झिझक्या,

²¹ पर यहूदी कने यूनानी लोकां रे सामणे गवाही देन्दा रैया भई परमेशरा खौ मन फिरावा कने अहांरे प्रभु यीशु मसीह पर विश्वास करना चाहिन्दा।

²² कने हुण हऊँ पवित्र आत्मा रा हुक्म मन्नीने यरूशलेम जो जां कने हऊँ नीं जाणदा भई तित्थी मेरे सौगी क्या-क्या हुंणा;

²³ सिर्फ ये जाणाँ भई पवित्र आत्मा हर नगरा-नगरा च गवाही देईने मेरने गलाया राँ भई बन्धन कने क्लेश तेरे खातर त्यार ये।

²⁴ पर हऊँ अपणे प्राणां जो बी किछ नीं समझदा भई तिस्सो प्यारा जाणुं, पर येढ़ा भई हऊँ अपणी दौड़ा जो कने तिसा सेवा जो पूरी करूँ, सै जे परमेशरा रे अनुग्रह ते खुशखबरिया री गवाही देणे खातर प्रभु यीशुये ते पाईरी।

²⁵ हुण हऊँ जाणाँ भई तुहें सब तिन्हां च जे हऊँ परमेशरा रे राज्जा रा प्रचार कित्या, मिन्जो फेरी नीं देखणा।

²⁶ इस खातर हऊँ अजके दिन तुहांजो बोलां, भई जे तुहां चते कोई यीशुये पर बिणा विश्वास करीने मराँ ये, तां ये मेरा दोष नींआ।

²⁷ काँह्भई हऊँ परमेशरा रियां सारियां गल्लां जो तुहां पूरिया रितिया ते दसणे जो कदीं मनी झिझक्या।

²⁸ इस खातर अपणी कने पूरे झुण्डा री रखवाली कराँ तिसच जे पवित्र आत्मा ते अगुवे बणाईरा, भई तुहें परमेशरा री कलीसिया री रखवाली करो, तिस्सो जे तिने अपणे खून्ना ते मुल्ले लईरा।

²⁹ हऊँ जाणाँ भई मेरे जाणे ते बाद लोक सै जे फाड़णे औल़े भेड़ियां साई तुहांरे बिच्च औणा कने परमेशरा रे लोकां जो नष्ट करने री कोशिश करनी।

³⁰ तुहां बिच्चा ते बी येढ़े-येढ़े माहणु औणे, तिन्हांजे चेलयां जो अप्पूँ खौ खिंजणे खातर गल़त फल़त गल्लां करनियां।

³¹ “इस खातर जागदे रौआ, कने याद करा भई मैं तिन्नां साल्लां तका रात-दिन रोई-रोई ने हर इक्की जो चेतावनी देणा नीं छडया।

³² कने हुण हऊँ परमेशरा जो, कने तिसरे अनुग्रह रे वचना जो तुहांजो दई देन्दा; सै जे प्रभु यीशु मसीह च तुहांरा विश्वास मजबूत करी सक्को कने परमेशरा रे जरिये सब पवित्र कित्तिरे लोकां च सहभागी हुईने तुहांरा उत्तराधिकार दिलाई सक्कां।

³³ “मैं किसी जो चाँदी, सोने या कपड़े रा लालच नीं कित्या।

³⁴ तुहें अप्पूँ जाणाँ ये भई इन्हें इ हत्थें मेरी कने मेरे साथियां री जरूरतां पूरियां कित्तियां।

³⁵ मैं तुहांजो सब किछ करीने दस्या भई इयां-इयां मेहणत करीने कमजोराँ जो संभाल़णा कने प्रभु यीशुये रे वचन याद रखणे जरूरी ये, सै जे तिने अप्पूँ इ बोलीरा : ‘परमेशर अहांजो बौहत आशीष देआं ताहली जे अहें अपणे खातर लेणे रे बजाय दुज्जेयां जो दें।’ ”

³⁶ येढ़ा बोलीने तिने गोडे टेक्कीने तिन्हां सब्बीं सौगी प्राथना किति।

³⁷ तां सै सब बौहत रोये कने पौलुसा रे गल़े लगीने तिस्सो प्यार करने लगे।

³⁸ सै जादा जे इसा गल्ला ते दुखी थे भई सै जे तिने बोल्ली री थी भई तुहां मिन्जो फेरी नीं देखणा। तां तिन्हें तिस्सो जहाजा तक पहुँचाया।