प्रेरितां 17 - बिलासपुरी नौआं नियम

थिस्सलुनीके नगरा च

¹ फेरी पौलुस कने सीलास अम्फिपुलिस कने अपुल्लोनिया नगराँ चियें हुईने थिस्सलुनीके शहरा च आये, तित्थी जे यहूदियां रा इक सभा घर था।

² पौलुस अपणी रितिया रे मुतावक तिन्हां ला गया, कने तिन्न हफ्ते तका पवित्रशास्त्रा ते तिन्हांने वाद-विवाद करदा रैया;

³ कने तिन्हांरा मतलब खोल्ली-खोल्ली ने समझां था भई मसीह रा दुख सैहणा, कने मूईरेयां चते ज्यूंदा हूणा, जरूरी था; कने, “सै यीशु तिसरी जे हऊँ तुहांजो कथा सुणाई राँ, मसीह आ।”

⁴ तिन्हां चते किछ यहूदियें, कने परमेशरा ते डरने औल़े यूनानियां चते बौहत लोकें कने कई कुलीन जनानें यीशु मसीह पर विश्वास करीने तिसरी अराधना कित्ती, कने सै बी पौलुस कने सीलासा ने मिलणे जो त्यार हुई गियां।

⁵ पर यहूदियें डाह ने भरी ने बजारू लोकां चते किछ बुरयां माहणुआं जो अप्पूँ सौगी लया, कने भीड़ कट्ठी करीने नगरा च दंगा करने लगे, कने यासोन रे घरा पर हमला करीने तिन्हांजो लोकां रे सामणे लौणा चाया।

⁶ तित्थी तिन्हांजो सै नीं मिले तां यासोन कने किछ विश्वासियां जो नगरा रे हाक्मा रे सामणे खिंजी ने ली आये कने रड़ाये, “ये लोक तिन्हें जे संसारा रे हरेक कोणे च हंगामा करी तरा, कने हुण येत्थी बी आईगरे।

⁷ “यासोने तिन्हांजो अपणे घरा रखीरा। ये सब येढ़ा बोलां यें भई यीशु इ राजा, कने बादशाह कैसरा रे हुक्मा रा बरोध कराँ यें।”

⁸ तिन्हें लोकां जो कने नगरा रे हाक्मां जो येढ़ा बोलीने घबराई त्या।

⁹ इस खातर तिन्हें यासोना कने बाकी लोकां ते मुचलका लईने तिन्हांजो छड्डीत्या।

बिरिया नगरा च पौलुस कने सीलास

¹⁰ विश्वासियें रातो-रात पौलुस कने सीलास जो थिस्सलोनिया नगरा ते बिरिया नगरा च भेजित्या; कने सै तित्थी पुज्जी ने यहूदियां रे यहूदी सभा घर च गये।

¹¹ ये लोक त थिस्सलुनीके नगरा रे यहूदियां ते खरे थे, कने तिन्हें दिल लाईने वचन ग्रहण कित्या, कने हर रोज पवित्रशास्त्रा च टोलदे रै भई ये गल्लां येढ़ियां इ हईयां की नीं।

¹² इस खातर यूनानी जनाना चते बौहतीं, कने कुलीन जनानां चते कने माहणुआं चते बौहतीं विश्वास कित्या।

¹³ पर तां जे थिस्सलुनीके नगरा रे यहूदी जाणीगे भई पौलुस बिरिया नगरा च बी परमेशरा रा वचन सुणाये राँ, तां तित्थी आईने बी लोकां जो भड़काणे कने हलचल मचाणे लगे।

¹⁴ फेरी विश्वासियें झट इ पौलुसा जो विदा कित्या भई समुद्रा रे कनारे चली जावा; पर सीलास कने तिमुथियुस बिरिया नगरा च रईगे।

¹⁵ पौलुसा जो ल्यौणे औल़े तिस्सो एथेंस नगरा तक लईगे; कने पौलुसा रे इस हुक्मा सौगी सै बिरिया नगरा च वापस हुईगे भई सीलास कने तिमुथियुसा जो छोड़े इ तिन्हांले भेजी दित्या जाओ।

एथेंस नगरा च पौलुस

¹⁶ ताहली जे पौलुस एथेंस नगरा च सीलास कने तिमुथी रा इन्तजार करयां राँ था, तां नगरा जो मूर्तियां ने भरीरा देखीने तिसरा मन बड़ा उदास हुया।

¹⁷ इस खातर सै यहूदी सभा घर च यहूदी लोकां कने परमेशरा ते डरने औल़े यूनानी, कने बजारा रे चौराहे च सै लोक जे तिस्सो मिले थे तिन्हांने हर रोज वाद-विवाद कराँ था।

¹⁸ फेरी इपिकूरी कने स्तोईकी दार्शनिकां चते किछ तिसने तर्क करने लगे, कने कईयें गलाया, “ये बकवादी क्या बोलणा चाँह?” पर दुज्जेयां गलाया, “ये होरसी रा प्रचारक लगया राँ” काँह्भई सै यीशुये रा कने भीं ते जिऊंदा हुणे री खुशखबरी सुणावां था।

¹⁹ फेरी सै तिस्सो अप्पूँ सौगी अरियुपगुस सभा च लईगे कने पुच्छया, “क्या अहें जाणी सक्कां यें भई ये नई शिक्षा तिस्सो जे तू सणवां, क्या?

²⁰ काँह्भई तू अहांजो नोखियां गल्लां सुणावां, इस खातर अहें जाणना चाँये भई इन्हांरा क्या मतलब आ।”

²¹ (इस खातर भई कई एथेंस वासी कने सै जे प्रदेशी तित्थी रैयां थे, नौंईयां-नौंईयां गल्लां बोलणे कने सुणने ते इलावा होर किसी कम्मां च बगत नीं बितांदे थे।)

अरियुपगुस रिया सभा च पौलुसा रा भाषण

²² तां पौलुसे अरियुपगुस सभा रे बिच खड़े हुईने गलाया, “हे एथेंस रे लोको, हऊँ देख्यारा भई तुहें हर गल्ला च देबतयां रे बड़े मनणे औल़े।

²³ काँह्भई हऊँ फिरदे-फिरदे तांजे तुहांरियां पुजणे रियां चिज़ां जो देख्यारा था, तां इक येढ़ि वेदी मिली, तिस पर लिखिरा था, ‘अनजाणे ईश्वरा खातर।’ इस खातर तिस्सो जे तुहें बिणा जाणे पुज्जां ये हऊँ तुहांजो तिसरी खबर सुणावां।

²⁴ “तिने परमेशरे जे संसार कने संसारा रियां सब चिज़ां जो बणाया, सै स्वर्ग कने धरतिया रा मालक हुईने, हत्था रे बणाईरे मन्दरा च नीं रैंहदा;

²⁵ तिस्सो किसी चिज़ां री कमी नीं इस खातर तिस्सो माहणुआं रिया सहायता री जरूरत नीं, काँह्भई सैई सब्बीं जो जीवन कने सांस कने सब किछ देणे औल़ा।

²⁶ “इक्की माहणुये ते तिने माहणुआं रियां सारियां जातियां बणाईयां ताकि सै सारिया धरतिया पर बसी जाओ; कने तिने इ लोकां रा बगत तैह करित्या कने तिसा जगह री, तित्थी जे सै रौ, सीमायें बन्ही तियां,

²⁷ परमेशरे ये सब किछ इस खातर कित्या भई लोक परमेशरा री खोज करी सक्को। हुई सक्कां भई सै तिस तक पहुँची ने तिस्सो पाईलो। इतणा हुणे पर बी सै अहां चते किसी ते बी दूर निआं।

²⁸ काँह्भई अहें तिसच इ ज्यूंदे रैयां ये, कने चलां-फिराँ ये, कने टिकिरे रैयां ये; ठीक तियां इ जियां जे तुहांरे कितणेयां कवियें बी बोलीरा, ‘अहें तिसरे इ वंशा रे।’

²⁹ “कने काँह्भई अहें परमेशरा रा वंश ये इस खातर अहांजो ये कदीं नीं सोचणा चाहिन्दा भई सै दिव्य अस्तित्व सोना या चान्दी या पत्थरा री बणीरी माहणुये री कल्पना या कारीगरिया ने बणी किसी मूरता साई आ।

³⁰ इस खातर परमेशरे तिस बगता पर ताहली जे सब अंजाण थे ध्यान नीं दित्या, पर हुण हर जगह सब्बीं माहणुआं जो मन फिराणे रा हुक्म देआं।

³¹ काँह्भई तिने इक दिन रखीरा, तिसच जे तिस माहणुये रे जरिये संसारा रा न्याय करना, तिस्सो जे तिने रखीरा, कने तिस्सो मूईरेयां चते ज्यूंदा करीने इसा गल्लां रा सबूत सारयां लोकां जो देईतरा।”

³² मूईरयां चते जिऊंदा हुणे री गल्ल सुणीने किछ लोक मजाक उड़ाणे लगे, कने कईयें गलाया, “ये गल्ल अहें तेरते फेरी कदीं सुणगे।”

³³ तां पौलुस तिन्हां चते निकल़ी गया।

³⁴ पर किछ माहणु तिसने सौगी मिले, कने प्रभु यीशुये पर विश्वास कित्या; तिन्हां च जे दियुनुसियुस सै जे अरियुपगुस सभा रा सदस्य था, कने दमरीस नौआं री इक जनाना थी, तिन्हां सौगी होर बी किछ लोक थे।