प्रेरितां 16 - बिलासपुरी नौआं नियम

पौलुसा रा तिमुथियुस जो सौगी लेणा

¹ फेरी सै दिरबे कने लुस्त्रा नगरा च बी गया, तित्थी तिमुथियुस नौआं रा इक चेला था। सै जे यहूदी विश्वासी जनाना रा पुत्र था, पर तिसरा पिता यूनानी था।

² सै लुस्त्रा कने इकुनियुम नगरा रे विश्वासियां च ईज्ज़तदार माहणु था।

³ पौलुस री इच्छा थी भई सै तिसने सौगी चलो; कने सै जे यहूदी लोक तिन्हां जगहां च रौआं थे तिन्हां रिया वजह ते तिने तिसरा खतना कित्या, काँह्भई सै सब जाणाँ थे, भई तिसरा पिता यूनानी था।

⁴ पौलुस कने तिसरे साथी नगर-नगर जान्दे हुये सै तिन्हां विधियां जो सै जे यरूशलेम नगरा रे प्रेरितें कनें प्राचीनें दस्सी रियां थिआं, मनणे खातर चेलयां जो दस्दे जां थे।

⁵ इयां कलीसिया रे लोक विश्वासा च पक्की हुन्दी गई कने तादाता च हर दिन बधदी गई।

त्रोआस च: पौलुस रा दर्शण

⁶ सै फ्रूगिया कने गलातिया प्रदेशा चते हुईने गये, काँह्भई पवित्र आत्मे तिन्हांजो आसिया प्रदेशा च वचन सुनाणे ते मना कित्या।

⁷ तिन्हें मूसिया प्रदेशा रिया सीमा रे नेड़े पुज्जी ने, बितूनिया इलाके च जाणा चाया; पर पवित्र आत्मे तिन्हांजो जाणे नीं दित्या।

⁸ इस खातर सै मूसिया प्रदेशा चियें हुईने त्रोआस बन्दरगाह च आये।

⁹ तित्थी पौलुसे राति जो इक दर्शण देख्या भई इक मकिदुनी प्रदेशा रा इक माहणु खढ़िरा कने तिसने विनती करीने गलाया राँ, “समुद्रा रे पार जाईने मकिदुनिया प्रदेशा च औआ, कने अहांरी मदद करा।”

¹⁰ तिसरे येढ़ा दर्शण देखदे इ अहें झट मकिदुनिया प्रदेशा च जाणा चाया, येढ़ा समझीने भई परमेशरे अहौं तिन्हांजो खुशखबरी सुनाणे खातर सद्दीरा।

फिलिप्पी च: लुदिया रा मन बदलना

¹¹ इस खातर त्रोआस नगरा रिया बन्दरगाह ते जहाज खोल्ली ने अहें सिधे सुमात्रा रे टापुये कने दुज्जे दिन नियापुलिस बन्दरगाह च आये।

¹² ऊत्थीते अहें फिलिप्पी नगरा च पुज्जे, सै जे मकिदुनिया प्रदेशा रा खास नगर आ तित्थी जे कई रोमी नागरिक रैं, कने अहें तिस नगरा च किछ दिन तका रहे।

¹³ विस्रामा रे दिन अहें नगरा रे फाटका ते बाहर नदिया रे कनारे येढ़ा समझीने गये भई तित्थी यहूदियां री प्राथना करने री जगह हुंगी, कने बैठीने सै जनानां जे तित्थी कट्ठियां हुई रियां थिआं, तिन्हांने गल्लां करने लगे।

¹⁴ लुदिया नौआं री थुआतीरा नगरा री बैंगणी कपड़े बेचणे औल़ी परमेशरा री इक भगतणी सुणया राँ थी। परमेशरे तिसारा मन खोल्या भई सै पौलुसा रिया गल्लां पर चित लगाओ।

¹⁵ तां जे तिसे अपणे घराने समेत बपतिस्मा लया, तां तिसे अहांने विनती किति, जे तुहें मिन्जो प्रभुये री विश्वासी समझां यें तां, चलीने मेरे घरा च रौआ, “कने सै अहांजो मनाई ने लई गई।”

पौलुस कने सीलास जेल्ला च

¹⁶ ताहली जे अहें प्राथना करने रिया जगह च जाया राँ थे, तां अहांजो इक दासी मिली तिसच जे भविष्य दसणे औल़ी बुरीआत्मा थी; कने भविष्य दसणे ते अपणे मालकां खातर बौहत कमाई करी लेयां थी।

¹⁷ सै पौलुसा रे कने अहांरे पिच्छे आईने रड़ाणे लगी, “ये माहणु परमप्रधान परमेशरा रे दास ये, सै जे अहांजो छुटकारे री कथा सुणवांये।”

¹⁸ सै बौहत दिनां तका येढ़ा इ करदी रई; पर पौलुस दुखी हुआ, कने मुड़ीने तिसा बुरीआत्मा जो गलाया, “हऊँ यीशु मसीह रे नौआं ते हुक्म देआं भई इसा चते निकल़ी जा।” कने सै तिस इ बगता निकल़ीगी।

¹⁹ तां जे तिसारे मालकें देख्या भई अहां रिया कमाईया री आशा चलीगी, तां पौलुस कने सीलासा जो पकड़ीने चौका च प्रधाना ला खिंजी ने लईगे;

²⁰ कने तिन्हांजो जज्जा ला लईगे कने गलाया, “ये लोक सै जे यहूदी ये, अहांरे नगरा च बड़ा हल्ला मचाई रायें;

²¹ कने येढ़ियां रितियां दस्या रायें, तिन्हांजो ग्रहण करना कने मनणा अहां रोम नगरा च रैहणे औल़यां रे खातर ठीक निआं।”

पौलुस कने सीलास रा जेल्ला च पाया जाणा

²² तां लोकां री भीड़ पौलुस कने सीलासा रे बरोधा च कट्ठे हुईने आये, कने जज्जे तिन्हांरे कपड़े उतारी ने, तिन्हांजो बैंत मारने रा हुक्म दित्या।

²³ बौहत बैंत मरवाई ने तिन्हें तिन्हांजो जेल खाणे च पाईत्या कने दरोगे जो हुक्म दित्या भई तिन्हांजो चौकसिया ने रखो।

²⁴ तिन्हें येढ़ा हुक्म लईने तिन्हांजो अन्दरलिया कोठड़िया च रखया कने तिन्हांरे पैर लकड़िया री बेड़ियां ने जकड़ीते।

पौलुस कने सीलासा रा जेल्ला ते छुटणा

²⁵ अधिया राति रे बगत पौलुस कने सीलास प्राथना करदे परमेशरा रे भजन गाये राँ थे कने कैदी तिन्हांरी सुणया राँ थे।

²⁶ इतणे च अचानक बड्डा हिलण हुआ, येत्थी तका भई जेलखान्ने री निऊँआ तका हिली गी, कने ताहलूं इ सब दरवाजे खुलीगे; कने सब्बीं रे बन्धन खुलीगे।

²⁷ दरोगा जागीग्या, कने जेलखान्ने रे दरवाजे खुले देखीने समझया भई कैदी नट्ठीगे, इस खातर तिने तलवार कड्डीने अप्पूँजो खत्म करना चाहया।

²⁸ पर पौलुसे उचिया अवाज़ा च गलाया, “अप्पूँजो मत मारदा, काँह्भई अहें सब येत्थी ये।”

²⁹ तां सै लम्फ बाल़ीने अन्दरा गया, कने पौलुस कम्बदा-कम्बदा सीलासा रे अग्गे पैराँ पई गया;

³⁰ कने तिन्हांजो बाहर ल्याईने गलाया, “हे सज्जनो, छुटकारा पाणे खातर हऊँ क्या करूँ?”

³¹ तिन्हें गलाया, “प्रभु यीशु मसीह पर विश्वास कर तां तू कने तेरे घराने जो छुटकारा मिलणा।”

³² कने तिन्हें तिस्सो कने तिसरे सारे घरा रे लोकां जो प्रभुये रा वचन सुणाया।

³³ राति जो तिन्हें तिस इ वगत तिन्हांजो नेईने तिन्हांरे जख्म धोये, कने तिने अपणे लोकां समेत ताहलूं इ बपतिस्मा लई लया।

³⁴ तां तिन्हें तिन्हांजो अपणे घरा च नेईने तिन्हांजो रोटी खाणे दित्ति, कने अपणे सारे घराने समेत परमेशरा पर विश्वास करीने खुशी मनाई।

³⁵ ताहली जे अगला दिन हुआ तां हाक्में सपाईयां जो येढ़ा बोलीने भेज्या भई तिन्हां माहणुआं जो छड्डी दे।

³⁶ दरोगे ये गल्लां पौलुसा ने बोलियां, “हाक्में तिज्जो छड्डी देणे रा हुक्म दित्तिरा। इस खातर शान्तिया ने निकल़ीने चली जा।”

³⁷ पर पौलुसे तिन्हांने गलाया, “तिन्हें अहां रोमी माहणुआं जो बिणा दोषा ते लोकां रे सामणे मारया कने जेल्ला बी पाया। हुण अहां चुप-चाप काँह निकल़ी जाणा? येढ़ा नीं करना; पर सै अप्पूँ आईने अहांजो बाहर निकल़ो।”

³⁸ सपाईये ये गल्लां हाकमा ने कित्तियां, कने सै येढ़ा सुणीने भई ये रोमा रे नागरिक ये, डरीगे,

³⁹ कने आईने तिन्हांते माफी मंगी, कने बाहर नेईने विनती किति भई नगरा ते चली जाओ।

⁴⁰ सै जेलखान्ने ते निकल़ीने लुदिया रे घरौ गै, कने विश्वासियां ने मिलीने तिन्हांरा हौंसला बधाया, फेरी ऊत्थीते चलीगे।