प्रेरितां 15 - बिलासपुरी नौआं नियम

यरूशलेम री सभा

¹ फेरी किछ यहूदी विश्वासी यहूदिया प्रदेशा ते आईने विश्वासियां जो सखाणे लगे : “जे मूसा री रितिया पर तुहांरा खतना नीं हुईरा हो तां तुहें छुटकारा नीं पाई सकदे।”

² पौलुस कने बरनबास तिन्हांने सैहमत नीं थे, तिन्हांरी बौहत बैहस कने झगड़ा हुआ तां ये मन्नया गया भई पौलुस कने बरनबास कने तिन्हां चते किछ विश्वासी लोक इसा गल्ला रा समाधान करने प्रेरितां कने प्राचीनां ले यरूशलेम जो जाओ।

³ कलीसिया रे लोकें रोटी कने पैसा देईने तिन्हांरी यात्रा च जाणे जो मदद कित्ती; कने सै फीनीके कने सामरिया प्रदेशा चियें हुंदे हुये किस तरिके ने अन्यजातियां रे लोक खुशखबरी सुणीने यीशु मसीह पर विश्वास करी राँये ये खबर सुणान्दे रै, कने ये सुणीने सब विश्वासी बौहत खुश हुये।

⁴ ताहली जे सै यरूशलेम नगरा च पुज्जे, तां कलीसिया रे लोक कने प्रेरित कने प्राचीन तिन्हांने खुशिया ने मिले, कने पौलुस कने बरनबासे दस्या भई परमेशरे तिन्हांने सौगी हुईने केढ़े-केढ़े काम्म कित्तिरे थे।

⁵ पर फरीसियां रे दला चते तिन्हें जे विश्वास कित्या था, तिन्हां चते कईयें उट्ठीने गलाया, “होरीं जाति रे लोकां जो खतना कराणे कने मूसा री व्यवस्था जो मनणे रा हुक्म देणा चहिन्दा।”

⁶ तां प्रेरित कने प्राचीन इसा गल्ला रे बारे च बचार करने खातर कट्ठे हुये।

⁷ तां पतरसे बौहत बैहस हुणे ते बाद खड़े हुईने तिन्हांजो गलाया, “भाईयो, तुहें जाणाँ ये भई बौहत दिन पैहले परमेशरे तुहां चते मिन्जो चुणीलरा भई मेरे जरिये अन्यजातियां रे लोक खुशखबरी सुणीने विश्वास करो।

⁸ मना रे जाँचणे औल़े परमेशरे तिन्हांजो बी अहां साई पवित्र आत्मा देईने ये साबित कित्या भई तिने तिन्हांजो अपणयां लोकां साई ग्रहण कित्या;

⁹ कने विश्वासा ते तिन्हांरे मन शुद्ध करीने अहां च कने तिन्हां च किछ भेद नीं रखया।

¹⁰ “फेरी हुण तुहें काँह परमेशरा जो परखां ये भई चेलयां रिया गर्दना पर येढ़ा जुंगड़ा रखो, तिस्सो जे अहांरे पूर्वज बी चक्की नीं सक्के कने नां अहें चक्की सक्कां ये?

¹¹ हाँ, अहांरा ये निश्चा जरूर आ भई तियां-तियां ने प्रभु यीशुये रे अनुग्रह ते छुटकारा मिलणा; तियां-तियां इ अहांजो बी मिलणा।”

¹² तां सै सारी सभा चुपचाप बरनबासा कने पौलुसा री सुणने लगी, भई परमेशरे तिन्हांरे दवारा अन्यजातियां च कितणे बड्डे-बड्डे चमत्कार, कने नोखे काम्म दस्से।

¹³ ताहली जे सै चुप हुये तां याकूब बोलणे लगया, “हे भाईयो, मेरी सुणा।

¹⁴ शमौन पतरसे दस्या भई परमेशरे पैहले अन्यजातियां रे लोकां पर केढ़ी दया कित्ती भई तिन्हां चते अपणे लोक होणे खातर किछ लोकां जो चुणया।

¹⁵ इसते भविष्यवक्तयां रियां गल्लां बी मिलां ईं, तेढ़ा जे पवित्रशास्त्रा च लिखिरा:

¹⁶ ‘इसते बाद मांज फेरी आईने दाऊद रा रूढ़िरा राज खड़ा करना, कने तिसरे खण्डहराँ जो फेरी बनाणा, कने तिस्सो खड़ा करना,

¹⁷ इस खातर भई बाकी माहणु, मतलब सब जातियां रे लोक तिन्हांजो जे अपणे लोक हुणे रे खातर चुणीरा, प्रभुये जो टोल़ो,

¹⁸ येढ़ा सैई प्रभु बोलां सै जे जगता रिया उत्पतिया ते इन्हां गल्लां री खबर देन्दा आया।’

¹⁹ “इस खातर मेरा बचार येआ भई अन्यजातियां चते सै जे किछ लोक परमेशरा खा फिराँ ये अहें तिन्हांजो दुख नीं दईये;

²⁰ पर तिन्हांजो इक चिट्ठी लिखीने भेजिये भई सै मूर्तां पर चढ़ाईरी किसी बी खाणे रिया चीज़ा जो नीं खायां कने व्यभिचारा ते दूर रैयां कने गल़ा घुट्ठीरे जानवरा रा मांस नां खाये कने जानवरा रा खून्न नीं पीये।

²¹ काँह्भई बौहत बगता ते कई नगराँ च मूसा री व्यवस्था रा प्रचार करदे आये, कने सै हर विस्रामा रे दिन यहूदी सभा घर च पढ़ियां जांईयां।”

अन्यजाति बिश्वासियां जो चिट्ठी

²² फेरी यरूशलेम री सारी कलीसियां रे लोकां समेत प्रेरितां कने प्राचीनां जो ये खरा लगया भई अप्पूँ चते किछ माहणुआं जो चुणीने, मतलब यहूदा तिस्सो जे बरसब्बा बोलां ये, कने सीलासा जो सै जे विश्वासियां च अगुवे; कने तिन्हांजो पौलुस कने बरनबासा सौगी अन्ताकिया नगरा रिया कलीसिया च भेज्या।

²³ कने तिन्हें चिट्ठी तिन्हांरे साथ भेज्जी : “अन्ताकिया नगर कने सीरिया कने किलिकिया प्रदेशा रे रैहणे औल़े विश्वासियां जो सै जे अन्यजातियां रे लोकां चते हुये, प्रेरितां कने प्राचीन विश्वासियां रा नमस्कार।

²⁴ “अहें सुणीरा भई अहां चते कंईंयें तित्थी आईने तुहांजो अपणियां गल्लां ते घबराई तरा; कने तुहांरे मन पुट्ठे करी तरे, पर अहें तिन्हांजो हुक्म नीं दित्तिरा था।

²⁵ इस खातर अहें इक मन हुईने ठीक समझया भई किछ माहणुआं जो चुणीने अपणे प्यारे बरनबासा कने पौलुसा सौगी तुहांले भेजिये।

²⁶ ये येढ़े माहणु ये तिन्हें जे अपणे प्राण अहांरे प्रभु यीशु मसीह रे खातर मुश्कला च पाईरे।”

²⁷ “अहें यहूदा कने सीलासा जो भेज्या राँये, तिन्हां तुहांजो अपणे मुँआं ते इन्हां सारियां गल्लां जो दसणा।

²⁸ पवित्र आत्मा जो कने अहां जोये ठीक लगया भई इन्हां जरूरी गल्लां जो छड्डिने, तुहां परा कने बजन नीं पाईये;

²⁹ भई तुहें मूरतां पर बल़ि कित्तिरे कने खून्ना ते, कने गल़ा घुट्ठीरे मासा ते, कने व्यभिचारा ते दूर रहो। इन्हांते दूर रहो तां तुहांरा भला हूणा। अग्गे शुभकामना।”

³⁰ फेरी सै विदा हुईने अन्ताकिया नगरा च पुज्जे, कने सभा जो कट्ठी करीने सै पत्री तिन्हांजो दईती।

³¹ सै तिसा पत्रिया पढ़ीने तिन्हां उपदेशां रियां गल्लां ते बौहत खुश हुये।

³² यहूदा कने सीलासे सै जे अप्पूँ बी भविष्यवक्ता ये, बौहत गल्लां ते विश्वासियां जो उपदेश देईने मजबूत कित्या।

³³ सै किछ दिन रईने, विश्वासियां ते शान्तिया री आशीष पाईने अपणे भेजणे औल़यां ले विदा कित्ते।

³⁴ (कने सीलासा जो तित्थी रैहणा खरा लगया, पर यहूदा वापस यरूशलेम चलिग्या।)

³⁵ कने पौलुस कने बरनबास अन्ताकिया नगरा च रईगे : कने होरी मतयां लोकां ने सौगी प्रभु यीशुये रे वचना रा उपदेश देन्दे कने खुशखबरी सुणांदे रये।

पौलुस री दुज्जी प्रचार यात्रा, पौलुस कने बरनबासा च मतभेद

³⁶ किछ दिना बाद पौलुसे बरनबासा ने गलाया, “तिन्हां-तिन्हां नगराँ च जे अहें प्रभुये रा वचन सुणाई रा, आओ, फेरी भीं तिन्हां च चलिये कने अपणे विश्वासियां जो देखिये भई सै केढ़े।”

³⁷ तां बरनबासे यूहन्ना जो तिस्सो जे मरकुस बोलां ये, सौगी नेणे रा बचार कित्या।

³⁸ पर पौलुसे तिस्सो सौगी नेणा अच्छा नीं समझया काँह्भई पंफूलिया प्रदेशा च सै तिन्हांते लग हुईगरा था, कने कम्मा पर तिन्हां सौगी नीं गया था।

³⁹ मतलब येढ़ि बैहस हुई भई पौलुस कने बरनबास इक्की दूये ते लग हुईगे; कने बरनबास, मरकुसा जो लईने जहाजा पर साइप्रस टापुये जो चलिग्या।

⁴⁰ पर पौलुसे सीलासा जो चुणी लया, कने विश्वासियां ते परमेशरा रे अनुग्रह च सौंपया जाईने अन्ताकिया नगरा ते चली गया;

⁴¹ कने सै सीरिया कने किलिकिया प्रदेशा ते हुन्दे हुये कलीसिया रे लोकां जो मजबूत करदा गया।