प्रेरितां 14 - बिलासपुरी नौआं नियम

इकुनियुस च पौलुस कने बरनबास

¹ इकुनियुम नगरा च येढ़ा हुआ भई सै यहूदियां रे सभा घराँ च सौगी-सौगी गये, कने इयां गल्लां कित्ती यां भई यहूदियां कने यूनानियां चते मतयां विश्वास कित्या।

² पर विश्वास नीं करने औल़यां यहूदियें अन्यजातियां रे मन विश्वासी भाईयां रे बरोधा च भड़काये कने वरोध पैदा करित्या।

³ कने पौलुस कने बरनबास बौहत दिनां तका तित्थी रये, कने प्रभुये रे भरोसे पर हिम्मता ने गल्लां कराँ थे; कने प्रभुये तिन्हांरे हत्थां ते बड़े-बड़े चमत्कारी नशाण दस्सीने कने नोखे काम्म करीने ये साबित कित्या भई अनुग्रह रे बारे च तिन्हांरा सन्देश सच्चा था।

⁴ पर नगरा रे लोकां च फूट पईगी, तिसते कितणे त यहूदियां खौ कने कितणे इ प्रेरितां खौ हुईगे।

⁵ ताहली जे अन्यजाति कने यहूदी लोक तिन्हांरी बेज्जति कने तिन्हां पर पत्थर मारने खातर अपणे सरदाराँ समेत तिन्हांरे पिच्छे दौड़े,

⁶ तां सै ये गल्ल जाणीगे, कने लुकाउनिया प्रदेशा रे लुस्त्रा कने दिरबे नगराँ च, कने नेड़े-तेड़े रियां जगहां जो नट्ठीगे,

⁷ कने तित्थी खुशखबरी सुनाणे लगे।

लुस्रा कने दिरबे च

⁸ लुस्त्रा नगरा च इक माहणु बैठिरा था, तिसरे पैराँ च ताकत नीं थी। सै जन्मा तेई लंगड़ा था कने कदीं मनी चलीरा था।

⁹ सै पौलुसा जो गल्लां करदे सुणया राँ था पौलुसे तिसखा नज़राँ गड्डीने देख्या भई तिस्सो ठीक हुणे रा विश्वास आ,

¹⁰ कने बड़िया अवाज़ा च गलाया, “अपणे पैराँ रे भार सिधा खड़ा हुई जा।”

¹¹ लोकें पौलुसा रा येढ़ा काम्म देखीने लुकाउनिया रिया भाषा च ऊच्चिया अवाज़ा च गलाया, “देबता माहणुआं रे रुपा च हुईने अहांले उतरी गरे।”

¹² तिन्हें बरनबासा जो ज्यूस, कने पौलुसा जो हिरमेस गलाया काँह्भई सै गल्लां करने च माहिर थे।

¹³ ज्यूस रे तिस मन्दरा रा पुजारी सै जे तिन्हांरे नगरा रे सामणे था, बल़द कने फूल्लां रा हार फाटका पर लयाई ने लोकां सौगी बल़ि करना चाँह था।

¹⁴ पर बरनबासे कने पौलुस प्रेरिते ताहली जे ये सुणया, तां तिन्हें बौहत परेशान हुईने अपणे कपड़े फाड़े कने भीड़ा च जाईने, जोरा ने गलाणे लगे,

¹⁵ “हे लोको, तुहें क्या करया रायें? अहें बी तां तुहां साई दुख-सुख भोगणे औल़े माहणु ये कने तुहांजो खुशखबरी सुणाया रायें भई तुहें इन्हां बेकार चिज़ां ते लग्ग हुईने जिऊंदा परमेशरा ले औआ, तिने अकाश कने धरती कने समुद्र कने जो किछ तिसच आ बणाया।

¹⁶ तिने पिछले बगता च सब्बीं जातियां जो अपणे-अपणे रस्तयां पर चलने दित्या।

¹⁷ “तां बी परमेशरे अप्पूँजो बगैर गवाह ते नीं छडया पर सै भलाई करदा रैया, कने अम्बरा ते बरखा कने फल़ां औल़यां मौसमां जो देईने तुहांरे मना जो भोजन कने खुशिया ने भरदा रैया।”

¹⁸ येढ़ा बोलीने भई तिन्हें लोकां जो बड़िया मुश्कलें रोकया भई सै तिन्हांरे खातर बलिदान नीं करो।

¹⁹ पर किछ यहूदियें अन्ताकिया कने इकुनियुम नगरा ते आईने लोकां जो अप्पूँ खा करील्या, कने पौलुसा पर पत्थर मारे, कने तिस्सो मरीरा समझीने नगरा ते बाहर घसीटी ने लईगे।

²⁰ पर तां जे चेले तिसरे चऊँ पासयां आईने खड़े हुये तां सै उट्ठीने नगरा च गया कने दुज्जे दिन बरनबासा ने सौगी दिरबे गाँवां जो चलिग्या।

सीरिया रे अन्ताकिया जो बापस औणा

²¹ कने पौलुस कने बरनबास तिस नगरा रे लोकां जो खुशखबरी सुणाईने, कने बौहत सारे चेले बणाईने, लुस्त्रा कने इकुनियुम कने अन्ताकिया नगरा जो वापस आईगे,

²² कने हरेक नगरा रे चेलयां रे मना जो मजबूत करदे रहे कने ये उपदेश देआं थे भई विश्वासा च बणीरे रौआ; कने ये बोलां थे, “अहांजो मते दुख सहीने परमेशरा रे राज्जा च जाणे मिलणा।”

²³ कने पौलुस कने बरनबासे हरेक कलीसियां चते विश्वासी लोकां जो चुणीने तिन्हां खातर प्राचीन बणाये कने उपवास कने प्राथना करीने तिन्हांजो प्रभु यीशुये जो सौंपीत्या, तिस पर जे तिन्हें विश्वास कित्तिरा था।

²⁴ कने सै पिसिदिया प्रदेशा चियें हुन्दे हुये पंफूलिया प्रदेशा च पुज्जे;

²⁵ फेरी पिरगा नगरा च वचन सुणाईने अत्तलिया नगरा च आये,

²⁶ कने तित्थी ते सै जहाजा पर अन्ताकिया नगरा जो वापस गये, ऊत्थी सै तिस कम्मां खातर सै जे तिने पूरा कित्तिरा था परमेशरा रे अनुग्रह च सौंपी ने गये।

²⁷ तित्थी पुज्जी ने तिन्हें कलीसिया रे लोकां जो कट्ठा कित्या कने दस्या भई परमेशरे तिन्हां सौगी हुईने कितणे बड्डे-बड्डे काम्म कित्ते, कने परमेशरे अन्यजाति लोकां जो कियां यीशु मसीह पर विश्वास करने रे लायक बणाया।

²⁸ कने पौलुस कने बरनबास चेलयां सौगी बौहत दिनां तका रै।