प्रेरितां 13 - बिलासपुरी नौआं नियम

बनरबास कने शाऊला जो भेजणा

¹ अन्ताकिया नगरा री कलीसिया च कई भविष्यवक्ता कने उपदेशक थे; तियां जे : बरनबास कने शमौन तिसरा दुज्जी नौं जे नीगर था; कने लूकियुस कुरेनी, कने चौथाई देशा रे राजे हेरोदेस रा दुध भाई मनाहेम, कने शाऊल।

² तां जे सै उपवासा सौगी अराधना करया राँ थे, तां पवित्र आत्मे गलाया, “मेरे खातर बरनबास कने शाऊला जो तिसा सेवा खातर लग करा तिस खातर जे मैं तिन्हांजो चुणीरा।”

³ तां तिन्हें उपवास कने प्राथना करीने तिन्हां परा हात्थ रखीने परमेशरा रा काम्म करने जो भेज्या।

पौलुसा री पैहली प्रचार यात्रा

⁴ इस खातर पवित्र आत्मा रे भेजीरे शाऊल कने बरनबास अन्ताकिया नगरा ते सिलूकिया बन्दरगाह जो गये; कने तित्थी जे जहाज़ा पर चढ़ीने साइप्रस टापुये जो चले;

⁵ कने सलमीसा च पुज्जी ने, परमेशरा रा वचन यहूदियां रे यहूदी सभा घराँ च सुणाया। यूहन्ना तिसजो जे मरकुस बोलां ये तिन्हांरा सेवक था।

⁶ सै तिस सारे टापुये चियें जान्दे हुये पाफुस नगरा तक पुज्जे। तित्थी तिन्हांजो बार-यीशु नौआं रा इक यहूदी टोणा कने झूट्ठा भविष्यवक्ता मिलया।

⁷ सै हाकिम सिरगियुस पौलुसा ने सौगी था, सै अक्लमन्द माहणु था। तिने बरनबास कने शाऊला जो अप्पूँ ला सद्दीने परमेशरा रा वचन सुणना चाहया।

⁸ पर इलीमास टोणा, काँह्भई तिसरे नौआं रा येई मतलब आ, तिन्हांरा बरोध करीने हाकिमा जो यीशु मसीह पर विश्वास करने ते रोकणा चाया।

⁹ तां शाऊले तिसरा नौं जे पौलुस बी आ, पवित्र आत्मा ते भरी ने इलीमास टोणे खा घूरीने देख्या कने गलाया,

¹⁰ “ओ सारे कपटी कने सारिया चलाकिया ते भरीरे शैतान्ना री ल्वाद, सकल धर्मा रे बैरी, क्या तू प्रभुये रे सिधे रस्तेयां जो टेड्डा करना नीं छडणा?

¹¹ हुण देख, प्रभु परमेशरा तिज्जो सजा देणी; कने तू किछ बगता तका अन्हे रैहणा कने सूरजा जो नीं देखणा।” तां ताहलूं इ तिसरियां आक्खीं धुंधलि़यां कने फेरी नेहरियां हुई गियां, कने सै हत्था ने उरे-परे टोहणे लगीग्या भई कोई तिसरा हाथ पकड़ीने तिस्सो चलाणे च मदद करे।

¹² तां हाकमे, जो किछ हुआ तिस्सो देखीने कने प्रभु यीशुये रे उपदेशा ते हैरान हुईने तिस पर विश्वास कित्या।

पिसिदिया रे अन्ताकिया च

¹³ पौलुस कने तिसरे साथी पाफुसा नगरा ते समुद्री यात्रा शुरु कित्ती कने पंफूलिया प्रदेशा ते पिरगा नगरा च आये; कने यूहन्ना तिसजो जे मरकुस बी बोलां ये तिन्हांजो छड्डिने यरूशलेम जो हटिग्या।

¹⁴ पिरगा नगरा ते अग्गे बधीने सै पिसिदिया जिले रे अन्ताकिया नगरा च पुज्जे; कने विस्रामा रे दिन यहूदी सभा घर च जाईने बैठीगे।

¹⁵ मूसा री व्यवस्था कने भविष्यवक्तयां री कताब पढ़ने ते बाद यहूदी सभा घरा रे सरदारे तिन्हांजो गलाया, “हे भाईयो, जे तुहांरे मना च लोकां जो उपदेश देणे री कोई गल्ल इ तां बोल्ला।”

¹⁶ फेरी पौलुसे खड़े हुईने कने हत्था रा सहारा करीने शाँत हुणे जो गलाया, “इस्राएलियो, कने परमेशरा ते डरने औल़े अन्यजातियां रे लोको सुणा

¹⁷ इन्हां इस्राएली लोकां रे परमेशरे अहांरे पूर्वजां जो चुणील्या, कने तां जे सै लोक मिस्र देशा च परदेशी हुईने रौआं थे, तां तिन्हांरी संभाल लई; कने अपणिया सामर्था रे जोरा ते तिन्हांजो तित्थीते कड्डील्या।

¹⁸ कोई चाल़ी साल्लां तका सै सुनसान जगह च तिन्हांजो सैंहदा रैया, हलाँकि इस्राएली लोकें परमेशरा रे हुक्मा रा पालन नीं कित्या।

¹⁹ कने कनान देशा च सत्तां जातियां रा नाश करीने तिन्हांरा देश कोई साढे चार सौ साल्लां च इन्हांजो दईत्या।

²⁰ इसते बाद परमेशरे शमुएल भविष्यवक्ते तकौ इस्राएल रे लोकां पर राज करने खातर न्यायी बणाये।

²¹ ताहली जे शमूएल हलतियें तक तिन्हांरा अगुवा ही था, तां इस्राएली लोकें अपणे खातर इक राजा मंगया; फेरी परमेशरे चाल़ी साल्लां खातर बिन्यामीना रे गोत्रा चते इक माहणु; मतलब कीशा रे पुत्र शाऊल जो तिन्हां परा राजा बणाया।

²² फेरी परमेशरे शाऊला जो राज गद्दिया ते हटाईने तिसरिया जगह पर दाऊद जो तिन्हांरा राजा बणाया; तिसरे बारे च तिने गवाही दित्ति, ‘मिन्जो इक माहणु, यिशै रा पुत्र दाऊद, मेरिया मर्जिया रे मुतावक मिलीगरा; तिस इ मेरी सारी इच्छा पूरी करनी।’

²³ “इसरे वंशा चते परमेशरे अपणिया वाचा रे मुतावक इस्राएल ले इक छुटकारा करने औल़े जो, यनि यीशुये जो भेज्या।

²⁴ तिसरे औणे ते पैहले यूहन्ने सबनीं इस्राएलियां जो प्रचार कित्या भई अपणे पापां ते मन फिरावा कने बपतिस्मा लौआ, तां परमेशरा तुहांरे पाप माफ करने।

²⁵ परमेशरे यूहन्ने जो सै जे काम्म दित्तिरा था सै तकरीवन पूरा होणे इ औल़ा था, तां तिन्हें गलाया, ‘तुहें मिन्जो क्या समझां यें? देखो हऊँ मसीह निआं! पर मेरे बाद इक औणे औल़ा, सै जे मेरते बी सामर्थी आ, हऊँ तिसरे मुकावले किछ बी नींआ, हऊँ इक्की सेवका रा सब्बीं ते छोट्टा काम्म तिस खातर करना चाओ, तां बी लायक नींआ।’

²⁶ “हे भाईयो, तुहें अब्राहमा रे खानदान्ना ते; कने तुहें परमेशरा ते डरने औल़े अन्यजातियां रे लोको, तुहांले परमेशरे छुटकारे रा वचन भेजीरा।

²⁷ काँह्भई यरूशलेम च रैहणे औल़े कने तिन्हांरे सरदारें, नां यीशु मसीह जो पछयाणया कने नां भविष्यवक्ता रियां गल्लां समझियां, सै जे हर विस्रामा रे दिन पढ़ियां जाईयां, इस खातर तिस्सो दोषी ठहराईने तिन्हां गल्लां जो पूरा कित्या।

²⁸ “तिन्हें मारी देणे लायक कोई दोष तिसच नीं पाया, तां बी पिलातुस राजपाल ते विनती कित्ती भई तिस्सो मारया जाओ।

²⁹ कने ताहली जे तिन्हें यीशु मसीह रे बारे पवित्रशास्त्रा च लिखी रियां सब गल्लां पूरियां कित्तियां, तां तिस्सो क्रूसा पर मेखां गड्डीने मारया कने क्रूसा ते उतारी ने कब्रा च रखया।

³⁰ “पर परमेशरे तिस्सो मूईरेयां चते ज्यूंदा कित्या,

³¹ कने सै तिन्हांजो सै जे तिसने सौगी गलील प्रदेशा ते यरूशलेम नगरा जो आईरे थे, बौहतीं दिनां तक तिसरे चेलयां जो दुसदा रैया; लोकां रे सामणे हुण सैई तिसरे गवाह ये।

³² अहें तुहांजो तिस वायदे रे बारे च सै जे परमेशरे अहांरे बापदादयां ने कीतिरा, ये खुशखबरी सुणावां ये,

³³ भई परमेशरे यीशुये जो मूईरयां चते ज्यूंदा करीने, सै वायदा अहां रियां औल़ादां खातर पूरा कित्या; येढ़ा जे भजन संहिता च परमेशरे मसीह रे बारे च बोल्या, ‘तू मेरा पुत्र आ; मैं तिज्जो राजा हुणे खातर नियुक्त कित्या।’

³⁴ “कने तिसरे इयां मूईरेयां चते ज्यूंदे हुणे रे बारे च भई सै कदीं मनी सड़ो, परमेशरे येढ़ा बोलीरा, ‘मांह तिज्जो पवित्र कने अटल आशीषां देणियां तिन्हांजो देणे रा वायदा जे मैं दाऊद ने कित्या था।

³⁵ इस खातर दाऊदे इक होरी भजना च बी गलाया, तू अपणे पवित्र माहणुये जो सड़ने नीं देणा।’

³⁶ “काँह्भई दाऊद त परमेशरा री इच्छा रे मुतावक अपणे बगता च सेवा करीने मरीग्या, कने अपणे पूर्वजां च मिलीग्या, कने सड़ी बी गया।

³⁷ पर तिस्सो जे परमेशरे मूईरयां चते ज्यूंदा कित्या, सै सड़या निआं।

³⁸ इस खातर, हे भाईयो, तुहें जाणी लवा भई इसरे इ जरिये पापां रिया माफिया री खबर तुहांजो दित्ति जाया राईं;

³⁹ कने तिन्हां गल्लां च जे तुहें मूसा री व्यवस्था रे जरिये निर्दोष नीं ठैहरी सकदे थे, तिन्हांई सब्बीं च हर इक विश्वास करने औल़ा यीशु मसीह जरिये निर्दोष ठैहरया।”

⁴⁰ इस खातर चकन्ने रौआ, येढ़ा नीं हो भई जो किछ भविष्यवक्तयां रियां कताबा च आईरा, तुहां परा बी पई जाओ :

⁴¹ “‘हे निंध्या करने औल़यो, देक्खा कने हैरान होआ, कने मिटी जावा; काँह्भई हऊँ तुहांरे दिनां च इक काम्म करया राँ, येढ़ा काम्म सै जे कोई तुहांजो चर्चा करो, तां तुहां कदीं बी विश्वास नीं करना।’”

⁴² पौलुस कने बरनबास रे बाहर निकल़दे बगत लोक तिसने विनती करने लगे भई अगले विस्रामा रे दिन अहां जो ये गल्लां फेरी बी सुणायो।

⁴³ तां जे सभा खत्म हुईगी तां यहूदियें कने यहूदी मता च आईरे भगतां चते बौहत सारे पौलुस कने बरनबासा रे पिच्छे-पिच्छे आईगे; कने तिन्हें तिन्हांने गल्लां करीने समझाया भई परमेशरा रे अनुग्रह च बणीरे रौआ।

पौलुसे अन्यजातियां च प्रचारा री शुरुआत किति

⁴⁴ अगले विस्रामा रे दिन लगभग सारे इ लोक परमेशरा रा वचन सुणने जो कट्ठे हुये।

⁴⁵ पर यहूदी अगुवे भीड़ा जो देखीने डाह ने भरीगे, कने निंध्या करदे पौलुसा रियां गल्लां रे बरोधा च बोलणे लगे।

⁴⁶ तां पौलुसे कने बरनबासे निडर हुईने गलाया, “जरूरी था भई परमेशरा रा वचन पैहले तुहांजो सुणाया जान्दा; पर ताहली जे तुहें तिसरा इन्कार कराँ ये, कने अप्पूँजो अनन्त जीवना रे लायक नीं ठहराँदे, तां हुण अहें अन्यजाति लोकां ले जाणा।

⁴⁷ काँह्भई प्रभुये अहां जो ये हुक्म दितिरा, ‘मैं तुहांजो अन्यजातियां खातर ज्योति ठहराईरा, ताकि तुहें धरतिया रे कोणे-कोणे तका जाईने छुटकारे री वजह बणो।’ ”

⁴⁸ ये सुणी ने अन्यजातियां खुशी हुये, कने परमेशरा रे वचना री बडयाई करने लगे कने जितने अनन्त जीवना खातर ठहराईरे थे, तिन्हें विश्वास कित्या।

⁴⁹ तां प्रभुये रा वचन तिस सारे देशा च फैलणे लगया।

⁵⁰ पर यहूदी अगुवेयां भगत कने कुलीन जनानां जो कने नगरा रे ताकतवर लोकां जो भड़काया, कने पौलुसा कने बरनबासा रे बरोधा च उपद्रव कराई ने तिन्हांजो अपणिया सीमा ते कड्डित्या।

⁵¹ तां पौलुस कने बरनबास लोकां रे सामणे अपणयां पैराँ री धूड़ ये दसणे खातर झाड़ी भई परमेशरे तिन्हांजो त्यागी तरा कने तिस तिन्हांजो सजा देणी। फेरी सै अन्ताकिया रे नगरा जो छड्डिने इकुनियुम रे नगरा जो चलीगे।

⁵² कने अन्ताकिया नगरा रे चेले खुशिया ने कने पवित्र आत्मा ते भरदे गये।