प्रेरितां 1 - बिलासपुरी नौआं नियम

परिचय

¹ आदरणीय थियूफिलुस जी, मैं अपणी पैहली कताब तिन्हां सब्बीं गल्लां रे बारे च लिखी तिन्हांजो जे यीशु शुरु ते करदा कने सखांदा रैया,

² तिस दिना तक तदुआं तका जे यीशुये जो परमेशर स्वर्गा च लेईने नीं गया। पर स्वर्ग जाणे ते पैहले तिने अपणे प्रेरितां जो तिन्हांजो जे तिने चुणया था पवित्र आत्मा रिया अगुवाईया ते हुक्म दित्या था।

³ यीशुये रे दुख सैहणे कने क्रूसा पर लटकाये जाणे ते बाद कई सारे पक्कयां सबूतां ने अप्पूँजो प्रेरितां रे सामणे ज्यूंदा परगट कित्या, कने चाल़ियां दिनां तक सै तिन्हांजो दुसदा रैया, कने परमेशर माहणुआं पर कियां राज कराँ ये गल्लां दस्सियां।

⁴ इक मौके पर, ताहली जे यीशु अपणे चेलयां सौगी रोटी खाया राँ था, तां तिने तिन्हांजो ये हुक्म दित्या, “यरूशलेम नगरा जो मता छडदे, पर पिता रे तिस वायदे रे पूरा हुणे रा इन्तजार करदे रौआ, तिसरे बारे च जे तुहें मेरते सुणी चुक्कीरे।

⁵ काँह्भई यूहन्ने त पाणिये च बपतिस्मा दित्तिरा, पर थोड़यां दिना ते बाद परमेशरा तुहां च वास करने खातर पवित्र आत्मा भेजणा।”

यीशुये रा स्वर्गा जो जाणा

⁶ इस खातर ताहली जे सै फेरी भीं कट्ठे हुये, तिन्हें यीशुये ते ये स्वाल कित्या, “प्रभु, क्या सै वगत आईगरा ताहली जे तुहां इस्राएल रा राजा बणीने सब्बीं लोकां पर राज करना?”

⁷ यीशुये तिन्हांजो जबाब दित्या, “तिस बगता जो जाणना तुहांरा काम्म निआं, तिन्हांजो जे पिता परमेशरे अपणे अधिकारा च रखीरा।

⁸ पर तां जे पवित्र आत्मा तुहांले औणा तां तुहांजो सामर्थ मिलणी; कने यरूशलेम नगर कने सारे यहूदिया कने सामरिया प्रदेशा च कने सारे संसारा च मेरे गवाह हुणे।”

⁹ ये गल्ल बोलणे ते बाद, ताहली जे चेले देख्या राँ थे तां परमेशर यीशुये जो चक्कीने स्वर्गा खौ लेईग्या, कने बद्दल़ें यीशुये जो तिन्हांरियां नज़राँ ते लुकोईत्या।

¹⁰ तिसरे जान्दे बगत तां जे सै स्वर्गा खौ देख्यारा थे, तां अचानक, दो माहणु चिट्टे कपड़े पैहनीरे तिन्हांरे नेड़े आईने खड़ीगे,

¹¹ कने तिन्हांजो गलाया, “गलील प्रदेशा रे लोको, तुहें काँह हल्तियें तक खड़ीने स्वर्गा खौ देख्या रायें? सैई यीशु, तिस्सो जे परमेशर तुहां लाते स्वर्गा जो चक्कीने लेई गरा, जिस तरिके ने तुहें तिस्सो स्वर्गा जो जान्दे देख्या तियां इ तिस फेरी वापस औणा।”

मत्तियाह जो यहूदा रा पद मिलणा

¹² फेरी तिन्हां दुईं माहणुआं रे तित्थी ते जाणे ते बाद चेले जैतून नौआं रे पहाड़ा ते यरूशलेम नगरा जो वापस हुये, सै जे ऊत्थीते तकरीवन इक किलोमीटरा रे फासले पर था।

¹³ तां जे सै तित्थी पुज्जे तां सै तिस बौढ़ी रे कमरे च गये, तित्थी जे पतरस, यूहन्ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई रा पुत्र याकूब, शमौन जेलोतेस कने याकूब रा पुत्र यहूदा रैयां थे।

¹⁴ ये सब कई जनानां कने यीशुये री माता मरियम कने तिसरे भाईयां सौगी इक मन हुईने प्राथना च लगीरे रै।

¹⁵ तिन्हांई दिनां च पतरस भाईयां रे बिच सै जे तकरीवन इक सौ बीह माहणु थे, खड़ा हुईने बोलणे लगया,

¹⁶ “हे भाईयो, जरूरी आ भई पवित्रशास्त्रा रा सै लेख पूरा हो सै जे पवित्र आत्मे दाऊद रे मुँआं ते यहूदा रे बारे च, पैहले ते गलाया था, सै जे यीशुये रे पकड़वाणे औल़यां रा अगुवा था।

¹⁷ काँह्भई सै त अहां च गिणया गया, कने इस सेवा रे कम्मां च साथी बणया।

¹⁸ (तिने अर्धमा रिया कमाईया ते इक खेत मुल लेआ, कने सिरा रे भार पैया कने तिसरा पेट फटी गया कने तिसरियां सब आँतड़ियां बाहर निकल़ी गियां।

¹⁹ इसा गल्ला जो यरूशलेम रे सब रैहणे औल़े जाणीगे, येत्थी तका भई तिस खेता रा नौं तिन्हां रिया भाषा च हक्लदमा मतलब खून्ना रा खेत पईग्या।)

²⁰ भजन संहिता च लिखिरा, ‘तिसरा घर उजड़ी जाओ कने तिसच कोई नीं बसो, कने तिसरा औहदा कोई दुज्जा लईलो।’

²¹ “इस खातर जितने दिना तक जे प्रभु यीशु अहांने सौगी औंदा-जान्दा रैया मतलब,

²² यूहन्ना रे बपतिस्मे ते लईने तिसरे अहां लाते चक्के जाणे तका सै लोक जे हमेशा अहांने सौगी रै, ठीक आ भई तिन्हां चते इक माहणु अहां सौगी तिसरे जिऊंदा हुणे रा गवाह बणी जाओ।”

²³ तां तिन्हें दुईं जो खड़ा कित्या, इक यूसुफ तिस्सो जे बर-सबा बोलां ये, तिसरा उपनौं जे युसतुस आ, दुज्जा मत्तियाह जो,

²⁴ कने ये प्राथना किति, “हे प्रभु, तू जे सब्बीं रे मना जो जाणाँ, ये प्रगट कर भई इन्हां चते तैं किस्सो चुणीरा,

²⁵ भई सै इस सेवकाईया कने प्रेरिताईया रा औहदा लओ, तिस्सो जे यहूदा मरने ते बाद छड्डिने तित्थी जो गया तित्थी जो जे जाणे रे लायक था।”

²⁶ तां तिन्हें तिसजो चुणने खातर तिन्हां दुईं रे नौंवाँ री पर्चियां पाईयाँ, कने पर्ची मत्तियाह रे नौवाँ री निकल़ी। तिसते जे सै ग्याराँ प्रेरितां सौगी बाहरवां गिणया गया।