2 तिमुथियुस 3 - बिलासपुरी नौआं नियमआखरी दिनां च अधर्म 1 तिमुथियुस हऊँ चांह भई तू ये जाणी ले, संसारा रे आखरी दिनां च बौहत बुरा बगत हूणा। 2 काँह्भई लोकां सिर्फ अप्पूँजो प्यार करना, पैसे ने प्यार करना, डींग मारना, घमण्डी हुणे, निंध्या करने औल़े हुणे, अपणे माता-पिता रा हुक्म नीं मनणे औल़े, नमकहराम, अपवित्र हुणे, 3 दुज्यां ने प्यार नीं करने औल़े, माफ नीं करने औल़े, दोष लाणे औल़े, अपणिया इच्छां पर काबू नीं करने औल़े, बेरैहम, भलाईया ते नफरत करने औल़े, 4 विश्वासघाती, लापरवाह, घमण्डी कने सै परमेशरा ने प्यार करने री बजाय सुखा जो चाहणे औल़े हुणे। 5 तिन्हां भगत हुणे रा नाटक करना, पर परमेशरा रिया सामर्था रा इन्कार करना; येढ़यां लोकां ते दूर रौआ। 6 इन्हां चते किछ येढ़े लोक ये सै जे घराँ च घुसां ये कने मूर्ख औरतां जो अपणे बशा च करी लैं, ये औरतां अपणे पापां रे बोझे च दबोईने हर तरिके रियां बुरी इच्छां रे बशा चियां। 7 ये औरतां हमेशा नई-नई गल्लां सिक्खां इयां, पर सै कदीं सच्चाईया जो समझी नीं पान्दियां। 8 तियां जे यन्नेस कने यम्ब्रेसे मूसा रा बरोध कित्या था, तियां इ ये झूट्ठे शिक्षक बी सच्चाईया रा बरोध कराँ ये। इन्हां लोकां री बुद्धि भ्रष्ट इ कने सै हकीकत च मसीह पर विश्वास नीं करदे। 9 पर ये लोक बौहत वगता तक लोकां जो धोखा नीं देई सकगे, काँह्भई तियां जे लोकें यन्नेस कने यम्ब्रेस री मूर्खता जो पछयाणील्या था, तियां इ सारयां लोकां तिन्हां रिया मूर्खता जो पछयाणी लेणा। तिमुथियुस जो पौलुस रा आखरी निर्देश 10 किछ बी हो, तू मेरिया शिक्षा जो जाणाँ, मेरा जीणे रा ढंग, जीणे रा मकसद, मेरा विश्वास, मेरी सैहणे री ताकत, मेरा प्यार, मेरा धीरज 11 कने मेरे सताव, मेरे दुखा रे बगता तैं मेरा साथ दित्तिरा। तू त जाणाँ भई अन्ताकिया, इकुनियुम कने लुस्त्रा नगराँ च मिन्जो किस तरिके री यातना दित्ति थी तिन्हौं जे मैं सहील्या, पर प्रभुये मिन्जो तिन्हां सब्बीं ते बचाईल्या। 12 असल च, जो बी मसीह यीशुये च भगतिया रा जीवन जीणा चांये सै सारे सताये जाणे। 13 पर बुरे लोक कने बैहकाणे औल़यां होर जादा बुरा काम्म करना, तिन्हां लोकां जो धोखा देणा कने खुद तिन्हां दुज्यां रे जरिये धोखा खाणा। 14 पर तिमुथियुस तैं तिन्हां गल्लां जो जे सिखीरा कने मजबूतिया ने विश्वास कराँ, तिन्हां पर लगातार विश्वास करदा रैयां, काँह्भई तू तिन्हांजो जाणाँ भई तिज्जो किने इसा सच्चाईया जो सखाईरा। 15 कने तू बचपना तेई पवित्रशास्त्रा जो जाणाँ, सै जे मसीह यीशुये पर विश्वास करने कने छुटकारा पाणे खातर तिज्जो बुद्धि देई सक्कां। 16 सारा पवित्रशास्त्र परमेशरा री प्रेरणा ते रचया गईरा कने सै लोकां जो सच्चाईया री शिक्षा देणे, डांटणे, गल़तियां सुधारने च उपयोगी, कने धार्मिक जीवन जीणे खातर निर्देश देआं। 17 ताकि परमेशरा रा माहणु हर तरिके रा भला काम्म करने रे खातर पूरा त्यार कने लायक बणी जाओ। |
This work is licensed under Creative Commons Attribution-ShareAlike 4.0 License.